ကျုပ်က ပါရမီရှင် (Chapter 1-200)

Chapter 16

ကျုပ်က ပါရမီရှင်
I am a prodigy
Author Rugao Under The Bridge
ဘာသာပြန် Han Shin

Chapter 16 အရည်အချင်းနှင့် လုပ်နိုင်စွမ်းကို မကြွားဝါပါ

ကစားပွဲထဲသို့ ဝင်ရောက်ပါပြီ။
[ကိုးလ် … မင်း ကျွမ်းကျင်အဆင့်ကို တကယ် မြန်မြန် ရောက်လာသားပဲ၊ မင်း မသမာတဲ့နည်းနဲ့ ဆော့နေတာပဲ ဖြစ်မယ်၊ ဟုတ်တယ်မလား]
ကစားပွဲစသည်နှင့် ရည်းစားစာဟူသော မာစတာဂရေ့က ဆွေးနွေးခန်းထဲ၌ အလွန် ရန်စသော ဟန်ပန်ဖြင့် စာတိုများ ပို့လာသည်။
[ရည်းစားစာ စောင့်ကြည့်နေလိုက်၊ ဒီတစ်ပွဲမှာ ငါ နင့်ကို အနိုင်ယူပြမယ်]
ကိုးလ်က ပြန်ဖြေလိုက်သည်။
“မင်း အရင်တုန်းကလည်း အဲ့လို ပြောခဲ့တာပဲ”
ရည်းစားစာက ပြန်ရေးလေသည်။ ကိုးလ်က ပြန်မပြောတော့ဘဲ ရဲ့လင်းချန်ကိုသာ ပြောလိုက်သည်။
[ဝိုင်နတ်ဘုရား ဒီကောင်က မလေးမစား လုပ်ရတာကို သိပ်သဘောကျနေတာ၊ ငါ့ကို ကူညီပြီး သူ့ကို ပညာပြပေးပါ၊ ငါ နင် တောင်းဆိုတာတစ်ခုကို ဖြည့်ဆည်းပေးမယ်လို့ ကတိပေးမယ်]
[ဟီဟိ … တောင်းဆိုတာကို ဖြည့်ဆည်းပေးမယ်ပြောတော့ ငါ ဘာတွေတွေးမိသွားတာပါလိမ့်]
[ဘာပဲဖြစ်ဖြစ်လား ဟီးဟီး]
[ရေခဲနတ်သမီး သူ ပြစ်မှုကျူးလွန်မိအောင် မင်း သွေးဆောင်ဖြားယောင်မိနေတယ်ဆိုတာကိုရော သိရဲ့လား]
[ဟီးဟီးဟီး]
…
ကိုးလ်၏ စကားများ ထွက်လာသည်နှင့် သူမ၏ တိုက်ရိုက် ထုတ်လွှင့်ခြင်း ချန်နယ်နှင့်အတူ ရဲ့လင်းချန်နှင့် ရည်းစားစာတို့၏ ချန်နယ်များ၌ စနောက်လှောင်ပြောင်သံများ ထွက်ပေါ်လာ၏။
[ဝိုင်နတ်ဘုရား မင်း ဒီဖြားယောင်းမှုကို တောင့်ခံမှ ဖြစ်မယ်]
[ဝိုင်နတ်ဘုရား မင်းကိုယ်မင်း ထိန်းချုပ်ရမယ်]
[လုပ်စမ်းပါ အစ်ကိုကြီး ရည်းစားစာရာ၊ ခင်ဗျား ရေခဲနတ်သမီး အဲ့ဝက်ဆီမှာ ဖျက်ဆီးခံရတာကို မကြည့်ချင်ဘူး မဟုတ်လား]
[အစ်ကိုကြီး ရည်းစားစာ နတ်သမီးလေးရဲ့ လုံခြုံမှုက ခင်ဗျားဆုံးဖြတ်ချက်အပေါ် မူတည်နေပြီ]
…
သူ၏ တိုက်ရိုက် ထုတ်လွှင့်ခြင်း ချန်နယ်ကိုကြည့်ပြီး ရည်းစားစာ ပိုကြီးထွားလာပြီး ပိုအရပ်ရှည်လာသည်ဟု ခံစားမိ လာသည်။ နတ်သမီးလေး၏ ဖြူစင်မှုကို ကာကွယ်သည့် မြင့်မြတ်သော တာဝန်ကို သူ ထမ်းဆောင်နေရသည် မဟုတ်ပါတကား။
“အားလုံးပဲ စိတ်မပူပါနဲ့၊ ဝိုင်နတ်ဘုရားက ငါ့ကို ဘယ်တော့မှ နိုင်မှာ မဟုတ်ဘူး”
ရည်းစားစာက သူ့ကစားဖော်များကို ကြေငြာလိုက်သည်။ ထို့နောက် သူ့ကြေငြာချက်က မလုံလောက်သေးကြောင်း သတိထားလိုက်မိသဖြင့် ဂိမ်း၏ စကားပြောခန်း၌ စာရိုက်လိုက်သည်။
[ဝိုင်နတ်ဘုရား ငါ့ကို အကြိမ်သုံးရာအတွင်း နိုင်အောင် ချကြည့်စမ်း]
[မိုက်တယ်ကွာ၊ မင်းက မြင့်မြတ်တဲ့ ရည်းစားစာတို့ ကျော်ကြားထိုက်ပါတယ်၊ ငါ မင်းရဲ့ စီးပိုးတဲ့ အပြုအမူအတွက် ငါ ရှိနေမယ်]
[အစ်ကိုကြီး ရည်းစားစာတော့ ဒါကို အလေးအနက် ထားလာပြီ၊ ဒီပွဲ နိုင်မှာ သေချာတယ်]
ရဲ့လင်းချန် အသာပြုံးလိုက်မိသည်။ သူ တစ်ခဏမျှ စဉ်းစားနေပြီးနောက် တန်ပြန်စာရိုက်လိုက်သည်။
[ဒုက္ခခံစရာ မလိုပါဘူး၊ မင်းတို့အဖွဲ့က ငါးယောက်လုံး ငါ့ဆီ ပြိုင်တူ လာတိုက်လို့ရတယ်]
[ဝိုး]
[သောက်ချီး သူက မောက်မာတယ်ဟ]
[သူက ဝင့်ကြွားနေတာ၊ ရည်းစားစာရှေ့ သူ့ကိုယ်သူ ဘယ်လိုတောင် ကြွားလုံးထုတ်ရဲတာလဲ]
[ခဏလောက်တော့ ကြွားထားဦးပေါ့ကွာ၊ နောက်ကျရင် မိုးကြိုးပစ်ချခံမှာပဲ]
ရဲ့လင်းချန်၏ မောက်မာမှုက တိုက်ရိုက်ထုတ်လွှင့်မှု ချန်နယ်အတွင်းမှ အခြေအနေအား အမြင့်ဆုံးအထိ ရောက်အောင် လုပ်လိုက်နိုင်သည်။ ကစားပွဲ မစရသေးသော်လည်း ငြင်းခုန်မှုများ ဖြစ်လာလေသည်။
ရဲ့လင်းချန်က အခြားအရာများကို မသိကျိုးကျွန် ပြုလိုက်ပြီး ရှဲဒိုးဖီးန်အား ရွေးချယ်၍ အလယ်လမ်းသို့ လျှောက်သွားလိုက်သည်။
ကိုးလ်က သူတော်စင် စစ်သည်တော်ကို ရွေးပြီး ရည်းစားစာက ဆုလာဘ်မုဆိုးကို ရွေးလေသည်။ ကျန်လူများ ကလည်း သူတို့ဟီးရိုးများကို အသီးသီး ရွေးလိုက်ကြသည်။ ကျွမ်းကျင်သူများက ဤပွဲကို ပုံမှန်ထက် အလေးအနက် ထားနေ၏။
အင်ဗိုကာသည် အလိုအလျောက် တိုက်ခိုက်မှုကို အဓိက အားထားရသည်။ ဟီးရိုးကို ထိန်းချုပ်ခြင်း၌ အထူး အားကောင်းသော စွမ်းရည်များ ရှိစရာ မလိုသော်လည်း ကစားသမား၏ အချိန်ကိုက် လှုပ်ရှား၍ စွမ်းရည်များ ထုတ်သုံးခြင်းက ဆရာကျလှသည်။
ဘောင်တီဟန်တာက မတူပေ။ ၎င်း၌ အလစ်ငိုက် တိုက်နိုင်သော ကိုယ်ပျောက်စွမ်းရည် ရှိပြီး ကစားသမား၏ တိကျသော ထိန်းချုပ်မှု လိုအပ်ပေသည်။ ကစားသမားသာ ကျွမ်းကျင်ပါက ကစားပွဲ တစ်ခုလုံး၏ အခြေအနေကို ထိရောက်စွာ ထိန်းချုပ်နိုင်၏။ ရည်းစားစာ၏ ဤပွဲကို အနိုင်ယူနိုင်မည့် ယုံကြည်ချက်က သိသာလွန်းလှသည်။
အင်ဗိုကာ ကားလ်က ရဲ့လင်းချန် ရှိသော လမ်း၌ ရှိနေသည်။ ရဲ့လင်းချန်၏ အထင်ကြီးစရာကောင်းသော ဂိမ်းစွမ်းရည်ကို သူ သိနေသောကြောင့် ခိုးကြောင်ခိုးဝှက် လှုပ်ရှားနေ၏။ သူသည် ရဲ့လင်းချန်အား သူ့ကို လာသတ်ခွင့် မပေးနိုင်သလို အလဲထိုးတိုက်ကွက်၌လည်း သူ အလွန် ကျွမ်းကျင်၏။ သူသည် အလွန် ခိုင်လုံသော အခြေခံရှိသည့် ပြိုင်ဘက်ပင်။
ပြိုင်ဘက်ကို သတ်နိုင်သည့် အခွင့်အရေး တစ်ခုပင် မရှိသည်ကို သတိပြုမိသည်နှင့် ရဲ့လင်းချန် ချက်ချင်း ဗျူဟာ ပြောင်းလိုက်သည်။ သူသည် လမ်းမှ ခရိများကိုရှင်းလင်းရန် အရိပ်ဖြိုကို စသုံးလေသည်။ သို့မှသာ တစ်ဖက်အသင်း၏ ခရိများကို သူ သတ်နိုင်ပေမည်။
ခရိများကို ထိန်းချုပ်သည့် အရည်အချင်းက အလဲထိုး တိုက်ကွက်၌ အဓိက အရေးပါလှသည်။ ရဲ့လင်းချန်၏ လုပ်ရပ်က အဖွဲ့သားများအား သံသယဝင်ကာ စိုးရိမ်သွားစေသည်။
“ငါ လူတိုင်းကို ရှဲဒိုးဖီးန်ကို ထိန်းချုပ်ရတဲ့ စွမ်းရည်တစ်ခု သင်ပေးမယ်”
ရဲ့လင်းချန်က သံသယကင်းစွာဖြင့် တည်တည်ငြိမ်ငြိမ် ပြောလိုက်သည်။ ထို့နောက် သူသည် အလယ်လမ်းမှထွက်၍ တောထဲ ဝင်လိုက်သည်။
ကြားနေခရိများကို တိုက်ခိုက်ပြီးနောက် သူ အလယ်လမ်းပေါ် ပြန်တက်လာသည်။ တစ်ဖက်အသင်း၏ ခရိများကလည်း အချိန်ကိုက် ရောက်လာသည်။ ရဲ့လင်းချန်က ရှဲဒိုးဖီးန်ကို လက်ဦးအောင် ထိန်းချုပ်၍ ယခင်အတိုင်း အရိပ်ဖြိုဖြင့် ခရိများကို ရှင်းလေသည်။
[ထုတ်လွှင့်သူက အဲ့မှာ ဘာလုပ်ချင်နေတာလဲ၊ သူ ဘာလို့ ကြားနေခရိတွေကို တစ်ကြိမ်ပဲ သွားတိုက်ရတာလဲ]
[သူက ခရိတွေကို တစ်ဖက်ဆီ ရောက်အောင် တွန်းပို့နေတာ၊ ဒါပေမဲ့ သူ့ကိုယ်သူ အတွေ့အကြံ အမှတ်ရအောင် လုပ်ဖို့ တားသလို ဖြစ်နေတယ်၊ သူက စောက်ရူးပဲ]
[တစ်ဖက်အသင်းက အလဲထိုးနိုင်အောင် မျှော်စင်အောက်မှ ပုန်းနေတယ်၊ ဒါကို သိပ်ပျော်မနေနဲ့]
[စွမ်းရည်သစ် ဟုတ်လား၊ မင်း လေလုံးထွားနေတာပဲ၊ ထုတ်လွှင့်သူက အခု အရမ်း မောက်မာနေတာ]
သူ့တိုက်ရိုက်ထုတ်လွှင့်ခြင်း ချန်နယ်မှ ပရိသတ်များသည် ယခင်အတိုင်း စိတ်ရှုပ်ထွေးနေ၏။ သို့သော် ရဲ့လင်းချန်က ရှင်းပြမနေဘဲ သူ့အကြံအစည်အတိုင်း ဆက်လုပ်နေသည်။
လူတစ်ဘောက်ချင်းစီက ကစားပွဲကို အလေးအနက်ထား၍ ဆော့နေကြသည်။ ငါးမိနစ်ပြည့်သွားသည့်တိုင် တစ်ယောက်မှ မသေသေးပေ။ မုန်တိုင်းမလာခင် လေငြိမ်သကဲ့သို့ အားလုံး တိတ်ဆိတ်နေ၏။
“ပထမဆုံးအကြိမ် သတ်ဖြတ်ခြင်း”
“မာစတာဂရေ့က ကိုးလ်ဗွီကို သတ်လိုက်ပါပြီ”
ခြောက်မိနစ်မြောက်တွင် ပထမဆုံးအကြိမ် သတ်ဖြတ်ခြင်း ဖြစ်လာသည်။ ရည်းစားစာက ကိုးလ်ကို တကယ် သတ်သွားသဖြင့် လူတိုင်း အံ့အားသင့်သွားကြသည်။
“နှစ်ကြိမ် သတ်ဖြတ်ခြင်း”
“မာစတာဂရေ့က အရှုံးမပေးသော ဘုရင်ကို သတ်လိုက်ပါပြီ”
အံဩဖွယ်ကောင်းလောက်အောင် နှစ်ကြိမ်ဆက်တိုက် သတ်ဖြတ်ခြင်းပင်။ ထို့နောက် ရည်းစားစာက တစ်ဖက်အသင်းကို လှောင်ရန် ? သင်္ကေတကို ကစားပွဲ ဆွေးနွေးခန်းသို့ ပို့လိုက်သည်။
အခြေအနေက ချက်ချင်း ကြည့်မကောင်းတော့ချေ။ ကိုးလ်၏ လမ်းက ပျက်စီးလုနီးပါး ဖြစ်နေသည်။
“ဝိုင်နတ်ဘုရား ဒီကိုလာပြီး ရည်းစားစာကို သတ်ပေးဦး၊ သူက တအား အင်အားကြီးနေတယ်”
ကိုးလ် မနေနိုင်တော့ဘဲ ရဲ့လင်းချန်၏ အကူအညီကို တောင်းမိသည်။
“သူက ကိုယ်ပျောက်နိုင်တယ်၊ ငါ အခု သွားလိုက်ရင် နာလိမ့်မယ်၊ အချိန်ဖြုန်းရုံပဲ ရှိမယ်”
ရဲ့လင်းချန်က ပွင့်ပွင့်လင်းလင်း ပြောလိုက်သည်။
“ဒါဆို ငါ ဘာလုပ်သင့်လဲ”
ကိုးလ်က မကျေနပ်စွာ ပြောလာသည်။
“ငါ့ဘက် လာခဲ့”
ရဲ့လင်းချန် ပြန်ပြောလိုက်သည်။ ကိုးလ် မသိမသာ အံ့ဩသွားသည်။ သူမသည် တစ်ခါသေပြီးသွားသဖြင့် ရှဲဒိုးဖီးန် အနာသို့ မယုံသင်္ကာဖြင့် သွားလိုက်မိသည်။
“မင်းအဆင့်က နိမ့်လွန်းတယ်၊ အမှတ်ရအောင် ငါ့နောက်လိုက်ခဲ့”
ရဲ့လင်းချန်က တောထဲ ဝင်သွားသည်။
ဒီလိုလုပ်ရင် ငါ နင့်အမှတ်ကို လုသလို ဖြစ်နေပြီမလား”
ကိုးလ်က ပဟေဠိဖြစ်စွာ ပြန်မေးလိုက်သည်။ သို့သော် မကြာခင်မှာပင် သူမ ဆွံ့အသွားရသည်။ သူမ အံ့ဩလွန်းသဖြင့် ပါးစပ် အဟောင်းသား ဖြစ်သွားရသည်။
[သောက်ကျိုးနည် ဒါ ဘာကြီးလဲ]
[ဒါ တကယ်လား၊ ဘာလို့ သူ့တောထဲမှာ ကြားနေခရိတွေ ဒီလောက် များနေရတာလဲ]
[မြေယိုး ကြားနေခရိတွေ များလွန်းလို့ ကြည့်ရုံနဲ့တင် ငါ ကြက်သီးထတယ်]
[ငါ ပြောတော့မလို့ ဒီလိုအခြေအနေနဲ့ဆို ဒီလောက်များတဲ့ ကြားနေခရိတွေက ဘယ်ဟီးရိုးကိုမဆို သတ်နိုင် လောက်တယ်]
[မင်းတို့ ကိုးလ် အမူအရာကို တွေ့လိုက်လား၊ သူ အံ့ဩလွန်းလို့ ပါးစပ်တောင် မပိတ်နိုင်ဘူး ဟားဟားဟား …]
[အပေါ်ကလူ ရယ်တာ ရပ်တော့၊ ငါလည်း ပါးစပ်ပိတ်လို့ မရဘူး …]
[နင် နင် ဘယ်လိုလုပ်လိုက်တာလဲ]
ကိုးလ် ချမ်းစိမ့်သွားသည်။ ဤနေရာသည် ကြားနေ ခရိ အနည်းငယ်မျှသာ ရှိသင့်သော်လည်း ယခု အကောင်နှစ်ဆယ်ကျော် ရှိနေသဖြင့် အတော်လေး ကြောက်စရာကောင်းနေ၏။ ရဲ့လင်းချန် ပြုံးလိုက်သည်။
“ကြားနေခရိတွေက မိနစ်တိုင်း အသစ်ပြန်ပေါ်လာတယ်ဆိုတာ လူတိုင်း သိတယ်၊ အဲ့တော့ ငါ ကြားနေခရိတွေကို သူတို့ နယ်မြေထဲကနေ မျှားခေါ်ပြီး ကျန်ခဲ့တဲ့ နေရာမှာ ကြားနေခရိတစ်အုပ် ပြန်ပေါ်လာအောင် လုပ်တာလေ”
“ငါ ခုနက အချိန်ကိုက် လုပ်ခဲ့လို့ ကြားနေခရိတွေကို သူတို့နယ်မြေထဲက ထွက်လာအောင် လုပ်ပြီးမှ သူတို့ကို သတ်လိုက်တာ”
[အချစ်ကလေးရေ အထင်ကြီးစရာပဲ၊ ငါ ဘာလို့ အရင်က ဒါကို မတွေးမိတာလဲ]
[ဒီလို ကျွမ်းကျင်အောင် သူ ဂိမ်းထဲ အတွေ့အကြုံနဲ့ ပိုက်ဆံတွေ ဘယ်လောက် ရင်းခဲ့ရသလဲ မသိဘူး၊ သူ ခေါင်ကို ထိတာပဲ]
“ရှဲဒိုးဖီးန်မှာ အဝေးပစ် ထိခိုက်မှုဖြစ်အောင် လုပ်နိုင်တဲ့ အရိပ်ဖြို စွမ်းရည် ရှိတယ်၊ အဲ့တော့ ကြားနေခရိတွေကို မြန်မြန် ရှင်းနိုင်တာပေါ့၊ တောထဲကနေ ဘယ်လို မျှားခေါ်ရမလဲဆိုတာက ရွှေနဲ့ အမှတ်ပိုရအောင် လုပ်နိုင်တယ်”
ရဲ့လင်းချန်က သင့်တော်သော ထောင့်မှနေ၍ အရိပ်ဖြိုကို ထုတ်သုံးပြီး ပရိသတ်များကို ရှင်းပြလိုက်သည်။
ကြားနေခရိ ငါးအုပ်ကို လျင်မြန်စွာ ရှင်းလိုက်နိုင်သည်။ ရဲ့လင်းချန်နှင့် ကိုးလ်တို့၏ အဆင့်က ဆက်တိုက် တက်လာ၏။ ထို့အပြင် ရဲ့လင်းချန်၏ ရွှေကလည်း နှစ်ထောင်နားသို့ ကပ်လာလေသည်။
[မိုက်တယ်ဟေ့]
[ထုတ်လွှင့်သူက နာမည်ကြီးဖို့ ထိုက်တန်ပါပေတယ်၊ ငါ ဒီနေ့ အသစ်တစ်ခုကို သင်လိုက်ရတယ်]
[ငါလည်း စမ်းကြည့်ချင်နေပြီ၊ ငါလည်း ဟီးရိုး ရှဲဒိုးဖီးန်ကို ရွေးပြီး တစ်ပွဲလောက် ဆော့ကြည့်ချင်တယ်]
[ထုတ်လွှင့်သူက ရှဲဒိုးဖီးန်ကို ကိုင်ရတာ လွယ်တယ်လို့ ပြနေသလိုပဲ]
…
“ဆက်တိုက် သတ်ဖြတ်ခြင်း”
“မာစတာဂရေ့က အရှုံးမပေးသောဘုရင်ကို သတ်လိုက်ပါပြီ၊ မာစတားဂရေ့က သတ်ပြီးရင်း သတ်နေပါပြီ”
တစ်ချိန်တည်းမှာပင် ရည်းစားစာက ဘေးလမ်း၌ ထပ်မံ၍ သတ်ဖြတ်နေပြန်သည်။ အခြေအနေက ယခင်အတိုင်း တင်းမာဆဲပင်။
“ရပြီ ရောက်တော့မယ်”
ရဲ့လင်းချန်က ဂရုမစိုက်စွာ ပြောလာသည်။ သူသည် မည်သည့် သံချပ်ကာ သို့မဟုတ် စွမ်းရည် တိုးတက်စေသော ပစ္စည်းကိုမှ မဝယ်ဘဲ လျှပ်တပြက် ဓားမြှောင်ကိုသာ ရွေးချယ်လေသည်။ ၎င်းသည် သူ့အား အကွာအဝေး တစ်ခုအထိ သွားလာနိုင်အောင် လုပ်ပေးသော ပစ္စည်းဖြစ်သည်။
သူ ဘေးလမ်းသို့ တစ်ချက်ကြည့်လိုက်သောအခါ ဘောင်တီဟန်တာ၏ သွေးတန်းက အခြားသူများကို သတ်ပြီးသွားပြီးနောက် သုံးပုံနှစ်ပုံခန့် ရှိနေဆဲ ဖြစ်သည်ကို တွေ့လိုက်ရသည်။
ရဲ့လင်းချန် အချိန်ဆွဲမနေဘဲ ဘေးလမ်းသို့ ချက်ချင်း တည်နေရာ ရွှေ့ပြောင်းလိုက်သည်။ ရည်းစားစာက အန္တရာယ်ကို ခံစားမိပုံရသည်။ သူသည် အနားမှ တောထဲသို့ ခုန်ဝင်သွားပြီး အားလုံး၏ မြင်ကွင်းထဲမှ ပျောက်ကွယ် သွားလေသည်။ ရဲ့လင်းချန် တုံ့ဆိုင်းမနေဘဲ ရည်းစားစာနောက်လိုက်၍ တောထဲသို့ ဝင်သွားလိုက်သည်။
“ဝိုင်နတ်ဘုရား သတိထားပါ၊ ဘောင်တီဟန်တာမှာ ကိုယ်ဖျောက်နိုင်တဲ့ အစွမ်းရှိတဲ့၊ သူ့နောက်လိုက်သွားတာက နင့်အတွက် အသုံးမဝင်ဘူး၊ သူကပဲ နင့်ကို ရှာတွေ့သွားလိမ့်မယ်”
ကိုးလ် သတိပေးလိုက်သည်။ သို့သော် ရဲ့လင်းချန်က သူမကို မသိချင်ယောင်ဆောင်ထားသည်။ သူသည် တောထဲ၌ အရူးတစ်ယောက်သဖွယ် အေးအေးလူလူ လျှောက်သွားနေသည်။
“ဝိုင်နတ်ဘုရား ဘာလုပ်နေတာလဲ၊ စိတ်လိုက်မာန်ပါ မလုပ်နဲ့”
ကိုးလ် သွေးပျက်သွားသည်။ ရဲ့လင်းချန်က ကံဆိုးမှုကို လိုက်ရှာနေသည် မဟုတ်ပါတကား။ ထိုအချိန်တွင် မာနကြီးပုံပေါက်သည့် လူငယ်တစ်ယောက်က ကွန်ပျူတာရှေ့၌ ခြေချိတ်ထိုင်နေသည်ကို ရည်းစားစာ၏ တိုက်ရိုက် ထုတ်လွှင့်ခြင်း ချန်နယ်၌ မြင်နေရသည်။ သူသည် ကွန်ပျူတာ ဖန်သားပြင်ထက်မှ ရှဲဒိုးဖီးန်ကို ကြည့်နေ၏။
“ဟားဟားဟား … အစ်ကိုအစ်မတို့ ဝိုင်နတ်ဘုရားက အဲ့လောက်လည်း အထင်ကြီးစရာ မကောင်းပါလား၊ သူ့ရှေ့မှာ ငါ ပတ်သွားနေတာတောင် မသိဘူး၊ လာ … လာ … လာ …”
သူသည် ကိုယ်ဖျောက်စွမ်းရည်ကို သုံးထားပြီး ရှဲဒိုးဖီးန်ဘေး၌ ပတ်သွားနေကာ သူ့အသင်းဖော်များ ရောက်လာသည်ကို စောင့်နေသည်။ သို့မှသာ သူတို့ ရှဲဒိုးဖီးန်ကို သတ်နိုင်ပေမည်။
သူ့မျက်လုံးထဲတွင် ရှဲဒိုးဖီးန်အား သေလူဖြစ်နေပြီးသားပင်။ သူ့အကြံကို စဉ်းစားရင်း သူ ပျော်ရွှင်စွာဖြင့် သီချင်း မညည်းဘဲ မနေနိုင်တော့ချေ။
သို့သော် ဘယ်ညာလျှောက်သွားနေသော ရှဲဒိုးဖီးန်က ရုတ်တရက် ခေါင်းမော့လာပြီး အရိပ်ဖြိုကို ထုတ်သုံးလာသည်။
ရှဲဒိုးဖီးန်၏ နက်မှောင်နေသော အစွမ်းက ၎င်း၏ တစ်ကိုယ်လုံးကို ဖုံးအုပ်သွားသည်။ ရှဲဒိုးဖီးန်၏ သွေးတန်းကလည်း တစ်ဝက်မျှ လျော့သွားသည်။ လျှပ်တပြက် ဓားမြောင်က လက်ခနဲ ဖြစ်သွားပြီးနောက် ရည်းစားစာ အခြေအနေကို သတိမထားမိခင်မှာပင် ရှဲဒိုးဖီးန်က အခြားနေရာသို့ တည်နေရာ ရွှေ့ပြောင်းပြီးသွားလေသည်။ ရှဲဒိုးဖီးန်သည် နောက်ပြန်လှည့်လာပြီး သူ ရှိခဲ့သော နေရာအား ဒုတိယအကြိမ် အရိပ်ဖြို မန္တန်ဖြင့် ပစ်လွှတ်လိုက်သည်။
“ဝိုင်နတ်ဘုရားက မာစတာ ဂရေ့ရဲ့ ဆက်တိုက် သတ်ဖြတ်ခြင်းကို အဆုံးသတ်လိုက်ပါပြီ”
ဖန်သားပြင်ပေါ်၌ စာသားတစ်ခု ပေါ်လာ၏။ ယင်းက ရည်းစားစာက မှိုင်တွေသွားစေသည်။ သူ သေသွားသည်ကို မယုံနိုင်သေးပေ။
[အာ … ဒါ ဆိုးတယ်ကွ …]
[လခွမ်း ဘာဖြစ်သွားတာလဲ၊ ရှဲဒိုးဖီးန်က ဘောင်တီဟန်တာ အဲ့နားမှာ ရှိနေတာကို ဘယ်လိုသိတာလဲ]
[သူက ငတုံး၊ သေချာပေါက် ငတုံးကို၊ သူ လိမ်နေတာပဲ ဖြစ်မယ်]
[ဖာခေါင်းက အရှက်မရှိ လိမ်ရဲတယ်]
ရည်းစားစာ၏ တိုက်ရိုက် ထုတ်လွှင့်မှု ချန်နယ်၌ ဆဲဆိုသံနှင့် ကြိမ်းမောင်းသံများဖြင့် ပြည့်နှက်နေသည်။ အခြေအနေက ကိုးလ်နှင့် ရဲ့လင်းချန်တို့၏ တိုက်ရိုက် ထုတ်လွှင့်မှု ချန်နယ်နှင့် တစ်ခြားစီပင်။ သူတို့၏ ချန်နယ်၌ အုတ်အော်သောင်းတင်း ဖြစ်နေလေသည်။ သူတို့၏ ဖန်သားပြင်၌ ချီးကျူးသော စကားများဖြင့် ပြည့်နှက်နေသည်။ အဘယ်ကြောင့်ဆိုသော် ရဲ့လင်းချန် လိမ်ညာလှည့်စားပြီး မကစားမှန်း သူတို့ သတိထားမိသောကြောင့်ပင်။
[ဝိုင်နတ်ဘုရားက အံ့ဩစရာပဲဟေ့ သူ ဒါကို ဘယ်လိုလုပ်လိုက်တာလဲ]
[ဒါ ယောကျ်ားအသိ ဆိုတာများလား]
[သူက ပေါ်လာတာနဲ့ ရည်းစားစာရဲ့ မောက်မာမှုကို ရိုက်ချိုးလိုက်တာပဲ၊ သောက်ရမ်း လန်းတယ်]
“ရည်းစားစာရဲ့ မာနအတိုင်းဆို သူ့နေရာကို ချက်ချင်း ပြန်မှာမဟုတ်တာ သေချာတယ်၊ အဲ့တော့ ငါ တောလဲ လိုက်ဝင်လာတာကို သတိထားမိပြီးတော့ ငါ့နားမှာပဲ ပတ်သွားနေနိုင်တယ်”
ရဲ့လင်းချန်က ကိုးလ် မမေးခင် ရှင်းပြလိုက်သည်။
“စောနတုန်းက ငါ ရည်းစားစာကို မျှားခေါ်ချင်လို့ တောထဲမှာ ပတ်သွားနေတာ၊ ရှဲဒိုးဖီးန်က လမ်းလျှောက်နေတုန်း မသိမသာ စောင်းစောင်းသွားတာကို ငါ သတိထားမိလို့ ကွက်တိ လှုပ်ရှားလိုက်တာ”
“ဘောင်တီဟန်တာက ကိုယ်ဖျောက်နိုင်ပင်မယ့် ငါ သူ့ကို ထိလို့ရသေးတယ်လေ၊ ရှဲဒိုးဖီးန်ရဲ့ စောင်းသွားတဲ့ ကိုယ်က ငါ ဘောင်တီဟန်တာကို ဝင်တိုက်မိတယ်လို့ ပြနေတာပဲ”
[သောက်ရမ်း အထင်ကြီးစရာ ကောင်းတယ်ဟေ့]
[သူ နတ်ဘုရားလို့ နာမည်ကျော်ထိုက်ပါပေတယ်၊ သူ့ရဲ့ လေ့လာစမ်းစစ်တဲ့ အရည်အချင်းက ထိပ်တန်းပဲ]
[အစ်ကိုကြီး ကျွန်တော် သစ္စာခံတာကို လက်ခံပေးပါ]
“တော်တယ် ဝိုင်နတ်ဘုရား”
ကိုးလ်က အသံကျယ်ကျယ်ဖြင့် ချီးကျူးလိုက်သည်။ မကြာခင်မှာပင် သူမက အစောပိုင်းက ရည်းစားစာ ထေ့ငေါ့သည့်အတိုင်း ဂိမ်းဆွေးနွေးခန်းအတွင်း၌ ? သင်္ကေတ ပြန်ပို့လိုက်သည်။
“ချီးပဲ ဂိမ်းက မပြီးသေးဘူးကွ”
ရည်းစားစာက စီးကရက်ကို ရှိုက်သောက်၍ ဝိုင်နတ်ဘုရား၏ အိုင်ဒီကို မှတ်ထားလိုက်လေသည်။ မကြာခင်မှာပင် တစ်ဖက်အသင်းက ရှဲဒိုးဖီးန်ကို ကြောက်လာမှန်း သိသာလာ၏။ သူတို့သည် ရှဲဒိုးဖီးန်နှင့် ရင်ဆိုင်ရချိန်တိုင်း အတတ်နိုင်ဆုံး ရှောင်တိမ်းကြသည်။ သို့သော်ငြားလည်း ရှဲဒိုးဖီးန်က ပြိုင်ဘက် သုံးယောက်ကို သတ်လိုက်နိုင်ပြီး ရည်းစားစာကမူ သူ၏ ကိုယ်ပျောက်စွမ်းရည်ကို အားကိုး၍ ယံဖန်ရံခါ ထွက်လာ၍ တိုက်လေသည်။ သူသည် ပြိုင်ဘက် ကိုးယောက်ကို သတ်ပြီးသွားသည်။
သို့သော် ရည်းစားစာသည် ဂိမ်းအတွင်း၌ ရွှေရရန် ရဲ့လင်းချန်၏ အရည်အချင်းကို မသိချင်ယောင်ဆောင်ထားသည်။ လက်ရှိတွင် ရှဲဒိုးဖီးန်သည် ပစ္စည်းများ ပိုင်ဆိုင်ထားပြီးသား ဖြစ်လေသည်။ သူသည် ပင်မဆိုင်မှ စစ်မှန်သော အမြင်အာရုံ ရတနာကို ဝယ်ယူခြင်းဖြင့် သူ၏ ကြွယ်ဝမှုကို ပြသလိုက်သည်။ သူသည် အဖွဲ့သားများကို စစုစည်း၍ တစ်ဖက်အသင်းကို စဖိအားပေးလေသည်။
စစ်မှန်သော အမြင်အာရုံ ရတနာ : ကိုယ်ယောင်ပျောက်နေသော အရာများကို မြင်နိုင်စွမ်းရှိ။
ဤနည်းအားဖြင့် ဘောင်တီဟန်တာ၏ ကိုယ်ပျောက်စွမ်းရည်က အသုံးမဝင် ဖြစ်လာသည်။ သူသည် ရှဲဒိုးဖီးန်၏ ပြင်းထန်သော အဖျက်စွမ်းရည်အပြင် ပြိုင်ဘက်အသင်းသား ငါးယောက်လုံး၏ ခြိမ်းခြောက်ခြင်းနှင့် ရင်ဆိုင် လာရသည်။ ရည်းစားစာသည် မတတ်သာဘဲ “GG” ဟု စာရိုက်ပို့လာပြီး ဂိမ်းထဲမှ ထွက်သွားလေသည်။
“အိုး ဟိုး ဟိုး ဝိုင်နတ်ဘုရား၊ နင်က အံ့ဩစရာကောင်းလိုက်တာ”
ကိုးလ်၏ မျက်နှာလေးက စိတ်လှုပ်ရှားမှုကြောင့် နီမြန်းနေသည်။
“အခု ငါ့ အင်မော်တယ်အဆင့်က ရည်းစားစာရဲ့ အဆင့်ထက် မြင့်သွားပြီ”
“ဟီးဟီး”
ရဲ့လင်းချန်က ရှက်ကိုးရှက်ကန်း ပြုံးလိုက်သည်။ သူ၏ အရည်အချင်းနှင့် လုပ်နိုင်စွမ်းကို သူ ဘယ်သောအခါမှ ကြွားဝါမည် မဟုတ်ပါ။