Chapter (125-1) - ခွေးစာကျွေးခံရသည့် မင်းကြီး
လီယွီသည် ကျင်းဝမ်ကို နောက်ကွယ်က အဆိပ်ခတ်သည့် တရားခံကို မှန်းဆနိုင်ခြင်းမရှိပေ။ သူက ကျင်းဝမ်ဖေးသာဖြစ်သည်။ လွန်ခဲ့သည့်နှစ်ဆယ်ကျော်က ဧကရာဇ် မင်းကြီး၏အနောက်နန်းဆောင်က ဖြစ်ပွားခဲ့သည့် တစ်စုံတစ်ရာကို စုံစမ်းချင်ပေမယ့် ကန့်သတ်ချက်များစွာရှိနေသည်။ အသင့်တော်ဆုံး ကတော့ မင်းကြီးဖာသာ စုံစမ်းဖို့ လျှောက်တင်လိုက်ခြင်းပါပဲ။ ယခုအချိန်တွင် ဧကရာဇ်ကို ယုံကြည်ဖို့ကလွဲပြီး လီယွီနှင့် ကျင်းဝမ်တို့တွင် ရွေးချယ်စရာမရှိတော့ပေ။
နောက်ထပ် ကြောက်စရာကောင်းသော အတွေးတစ်ခု ရှိလာသည်။ ဤကမ္ဘာတွင် ကျင်းဝမ်သည် လုံးဝ ပြန်လည်ကောင်းမွန်လာခဲ့သည်။ မူရင်းဝတ္ထုထဲတွင် ကျင်းဝမ်သည် တစ်သက်လုံး ဆွံ့အသွားခဲ့ပေမယ့် ကျင်းဝမ်၏သားစဉ်မြေးဆက်အားလုံး ပုံမှန်ဖြစ်နေခဲ့ကြောင်း ဇာတ်လမ်းထဲမှာ ပြောပြခဲ့သည်။ ဒါက ကျင်းဝမ် ကံကောင်းလို့မဟုတ်ပဲ ကျင်းဝမ်၏ ဆွံ့အခြင်းသည် သဘာဝအတိုင်းကြောင့် မဟုတ်သည့်အတွက်ပင်။ ဤကမ္ဘာတွင်၊ ကျင်းဝမ်ရဲ့ ဆွံ့ခြင်း အရင်းမြစ်ကို သူ ရှာတွေ့ခဲ့တာ ကံကောင်းသည်။ မူရင်းဝတ္ထုထဲတွင်၊ ကျင်းဝမ်ရဲ့ အမှန်တရားကိုရှာဖွေတွေ့ရှိဖို့ ငါးကြင်း နတ်ဆိုးတစ်ကောင်မျှ မရှိခဲ့ပေ။
လီယွီက သူ ကံကောင်းသည်ဟုခံစားရပြီး တစ်ချိန်တည်းတွင်ပင် နောက်ဆက်တွဲအနေဖြင့် အနည်းငယ်ကြောက်လန့်သွားခဲ့သည်။ ကျင်းဝမ် ဆွံ့အခြင်း နဲ့ ပတ်သက်တဲ့ လျှို့ဝှက်ချက်က သူ့မျက်နှာရှေ့မှာ တချိန်လုံး ရှိနေပေမယ့် လွဲချော်လုနီးပါးဖြစ်ခဲ့သည်။
"သနားစာနာခြင်း" မစ်ရှင်ခွဲကို ဆောင်ရွက်ရန် လီယွီ၏ ရွေးချယ်မှုကြောင့် လုပ်ကြံသူပေါ်လာပြီး လီယွီ ဓါးထိုးခံရလုဆဲဆဲဖြစ်ခဲ့ရသည်။ ထိုရလဒ်ကြောင့် ကျင်းဝမ်က စိတ်ထဲ ပူပန်ဖိစီးမှုများလွန်းလို့ အဆိပ်သင့်နေသောသွေး အန်ထုတ်ခဲ့မိသည်။ ဒီမစ်ရှင်ခွဲအောင်မြင်သည့်အတွက် သူ ရလိုက်သည့် ဆေးအညွန်းတစ်ခုသည်လည်း ကျင်းဝမ် ဆွံ့အခြင်း နှင့် ဆက်စပ်နေသည့် ဆေးညွှန်း တစ်ခုဖြစ်သည်။
ရွယ်ယားသည် ကျင်းဝမ်ကိုထိခိုက်စေသောအဆိပ်ဖြစ်လာသည်။ အခြားပါဝင်ပစ္စည်းများ အနည်းငယ်ထပ် ဖြည့်ထားသော်လည်း၊ ယခုအခါ ကျင်းဝမ်၏ ခွန်အားပြန်လည်ရရှိရန် အကူအညီဖြစ်နေလေပြီ။
ဘာမဟုတ်တဲ့ System က မင်းကို ဘယ်လို မမျှော်လင့်တဲ့ အရာပေးမယ်ဆိုတာ မသိနိုင်ဘူးလေ။ ဒါ့အပြင် တစ်ခါတရံ ကုသိုလ်ကောင်းမှုပြုခြင်းက မင်းကို ကောင်းကျိုးရစေတယ်....
မစ်ရှင်ခွဲတာဝန်ပြီးဆုံးသွားသောအခါ လီယွီသည် လျန်ရှီးကိုကူညီနိုင်ခဲ့သည်။ တစ်ချိန်တည်းမှာပင်၊ သူနဲ့ ကျင်းဝမ်တို့က အပြင်းထန်ဆုံးစမ်းသပ်မှုကို ခံနိုင်ရည်ရှိစေခဲ့ပြီးနောက် ကျန်တာအားလုံးက အဆင်ပြေချောမွေ့သွားတော့သည်။
ထိုနေ့တွင်၊ ဆဌမမင်းသားသည် လျန်ရှီးကိုခြိမ်းခြောက်ခဲ့ပြီး မင်းကြီးကို လုပ်ကြံသည့် ပြစ်မှုကို ကျူးလွန်ခဲ့သဖြင့် သက်ဆိုင်သူအားလုံးကို တော်ဝင်နန်းတော်ကို ခေါ်ဆောင်လာပြီးနောက် မြေအောက်အကျဉ်းထောင်တွင် သော့ခတ်ထားရန် အစောင့်များအား အမိန့်ပေးခဲ့သည်။ ဆဌမ မင်းသားအကြောင်းကို နန်းတော်ထဲ ဘယ်သူမှ မပြောရဲကြတော့ပေ။
ဆဌမ မင်းသားသည် ဧကရာဇ်မင်းအား လုပ်ကြံသတ်ဖြတ်ရန် သတ္တိရှိရှိစီစဉ်ခဲ့ပေမယ့် မင်းကြီးက သားဖြစ်သူကို သေဒဏ်ပေးသည်အထိ နှလုံးသားမမာခဲ့ပေ။ ထို့ကြောင့် ဆဌမမင်းသား၏အသက်ကို ချမ်းသာခွင့်ပေးခဲ့သည်။
ကိုယ်လုပ်တော်ကျန်းသည် ဤအကြိမ်တွင် သူမ၏သားတော် ဆဌမမင်းသားက ခွင့်မလွှတ်နိုင်သော ရာဇဝတ်မှုတစ်ခုကို အမှန်တကယ်ကျူးလွန်ခဲ့ကြောင်း သိခဲ့ရပြီး အတတ်နိုင်ဆုံး သူမနေထိုင်သည့် ယုံဖူနန်းဆောင်ထဲမှာ ပုန်းအောင်းနေခဲ့သည်။
ကိုယ်လုပ်တော် ကျန်း သည် ဆဌမ မင်းသား၏အစီအစဉ်တွင် တိုက်ရိုက်မပါဝင်သောကြောင့် ဧကရာဇ်က သူမအား ပြင်းထန်စွာ ပြစ်တင်ရှုတ်ချပြီးနောက် ကိုယ်လုပ်တော် ရာထူးကို ဆက်လက်ပေးအပ်ထားခဲ့သည်။
ကိုယ်လုပ်တော် ကျန်း သည် ဧကရာဇ်မင်းရှေ့တွင် ငုံးတစ်ကောင်လို ပြုမူလေ့ရှိသည်။ နောက်ဆုံးတော့ ဒီငုံးကဲ့သို့ ရိုးရိုးကုပ်ကုပ် နေထိုင်တတ်သည့် ပုံစံက သူမကို ကယ်တင်ခဲ့သည်။
လျန်ရှီးသည် ဆဌမ မင်းသားကို လုံးဝ ဆုံးရှုံးသွားခဲ့သည်။ ဓားစာခံအဖြစ် ချုပ်နှောင်ခံရပြီးနောက် လျန်ရှီးသည် အလွန်တုန်လှုပ်သွားပြီး ထိုညတွင် သူမ၏ဗိုက်ထဲတွင် ကလေးက ပျက်ကျသွားခဲ့သည်။ နောက်တနေ့တွင် လျန်ရှီးက ဘာမှ မပြောဘဲ သူ့မိခင် မိသားစုနဲ့ အတူ နေဖို့ ပြန်သွားခဲ့တော့သည်။
ဧကရာဇ်၏ ပြတ်ပြတ်သားသား စုံစမ်းစစ်ဆေးမှုအပြီးတွင် ချောက်ချခံလိုက်ရသည့် ကိုယ်လုပ်တော် လု သည် ပြန်လည် လွတ်မြောက်ခဲ့ပြီး အဌမမင်းသားနှင့် ပြန်လည်တွေ့ဆုံခဲ့သည်။
နဝမမင်းသားနဲ့ သူ့မိခင် ကိုယ်လုပ်တော်လီတို့ဟာ ဆဌမမင်းသား ရဲ့ အစီအစဉ်နဲ့ မပတ်သက်ကြောင်း၊ ဆဌမမင်းသား အကွက်ချကာ လုပ်ကြံခံရခြင်းသာဖြစ်ကြောင်း ဧကရာဇ်မင်းက ကျင်းဝမ် ထံမှ သိရှိခဲ့သည်။ နဝမမင်းသားသည် "တစ်စုံတစ်ဦးကိုသိခြင်းသည် သူတို့၏နှလုံးကိုသိခြင်းဟု မဆိုလိုပေ" ဆိုသည့် ဆိုရိုးစကားကို အခု အမဲလိုက်ပြိုင်ပွဲ ခရီးကို ထွက်လာပြီးနောက် ကောင်းမွန်စွာ ကိုယ်တွေ့ကြုံလိုက်ရသည်။ ဒါကြောင့် ကလေးကဲ့သို့သာနေခဲ့သည့် မင်းသားလေးနှစ်ဦးသည် မထင်မှတ်ဘဲ ရင့်ကျက်လာခဲ့လေသည်။
ဧကရာဇ်သည် ကျင်းဝမ်၏ သားလေးယောက်ကို တော်ဝင်စာသင်ဆောင်သို့စေလွှတ်ခဲ့သည်။ နဝမ နှင့် အဌမ မင်းသားသည် အခုတော့ စာသင်ဆောင်တွင် အငယ်ဆုံး မုန်လာဥလေးတွေ မဟုတ်တော့ပေ။ ကလေး လေးယောက်ရှေ့မှာ သူတို့ ဦးလေးတွေဖြစ်လာခဲ့သည်။ မင်းသားလေးနှစ်ယောက်စလုံး က ဦးလေးတွေအဖြစ် မတ်တပ်ရပ်ပြီး ဂုဏ်ယူစွာဖြင့် ရင်ဘတ်ကို ကော့ထားကြတော့သည်။
ဧကရာဇ်သည် ကျင်းဝမ်အတွက် ထီးနန်းဆက်ခံနိုင်စေရန် လမ်းခင်းပေးနေပြီဖြစ်သည်။ ကျင်းဝမ်သည် သူတို့ထံတွင် အပြစ်မရှိကြောင်း သက်သေပြရန် ကူညီခဲ့သူ ဖြစ်ကြောင်း မင်းကြီးက မင်းသားနှစ်ဦးအား ရှင်းရှင်းလင်းလင်း ပြောပြခဲ့သည်။ ထို့ကြောင့် မင်းသားလေးနှစ်ယောက်သည် သူတို့၏တူများကို အထူးစိတ်ရင်းဖြင့် ဂရုစိုက်လာကြသည်။ တော်ဝင်စာသင်ဆောင်တွင် မင်းသား အားလုံး သဟဇာတဖြစ်ပြီး ငြိမ်းချမ်းချစ်ခင်လာကြသည်။ ဧကရာဇ်မင်းသည် ထိုသို့ချစ်ခင်ရင်းနှီးလာကြသည်ကို အလွန်နှစ်သက်ခဲ့သည်။ နဝမ နှင့် အဌမမင်းသားသည် ကလေး လေးယောက်နှင့် ကောင်းမွန်သော ဆက်ဆံရေး တည်ဆောက်နိုင်ခြင်းက ကျင်းဝမ်နှင့် ကောင်းမွန်သော ဆက်ဆံရေးကို တည်ဆောက်နိုင်ခြင်းကို ဆိုလိုသည်။ ဒါဆိုရင်မင်းကြီးက သူတို့ရဲ့ အနာဂတ်အတွက် စိတ်ပူစရာ မလိုတော့ပေ။
အခြားတစ်ဖက်တွင် လော့ကုန်းကုန်း က သူ၏ စုံစမ်းစစ်ဆေးမှုကို ဆက်လက်လုပ်ဆောင်ခဲ့သည်။ ထို့အတွက်ကြောင့် ပူလျှိုသေဆုံးရခြင်းအကြောင်းရင်းကို ဖော်ထုတ်နိုင်ခဲ့သည်။ ပူလျှိုသည် အဆိပ်ကြောင့် သေဆုံးသွားခဲ့သည်။ ဧကရာဇ်မင်းသည် တော်ဝင်သမားတော်အိုကြီးကို စစ်ဆေးရန် အမိန့်ပေးခဲ့သည်။ ပူလျှို၏ ခန္ဓာကိုယ်တွင် ရွယ်ယားရောစပ်ထားသည့် အားဆေးကြောင့် ဖြစ်လာသည့် အဆိပ်အကြွင်း အကျန်များ ရှိနေကြောင်း သူတို့ သိရှိနိုင်ခဲ့သည်။
ဒါက ပူးပေါင်းလုပ်ကြံမှုဖြစ်ကြောင်း ရှင်းရှင်းလင်းလင်း ဖြစ်စေခဲ့သည်။ ပူလျှိုသည် အဆိပ်ပါဝင်သော ပစ္စည်းများကို ရောနှောပြီး စားသုံးပြီးမှသာ အဆိပ်ခတ်ခြင်းကို အောင်မြင်အောင် လုပ်ဆောင် နိုင်မည်ဖြစ်သည်။ရင်သွေးငယ်လေး ကျင်းဝမ်သည် သူမ၏ မိခင်နို့မှတဆင့် အဆိပ်သင့်ခဲ့သည်။ ထို့နောက် သူမသည် နန်းတော်မှ ထွက်ခွာသွားပြီးနောက် သူမ သောက်ခဲ့သည့် အဆိပ်ရဲ့ အာနိသင်က အစွမ်းပြကာ သေဆုံးခဲ့သည်။
သူမသည် ကျင်းဝမ်ကိုတိုက်ရိုက်မကျွေးခဲ့လို့သာ ကျင်းဝမ်က သေေဘေးက လွတ်ခဲ့သည်ဟု ဆိုနိုင်သည်။ တကယ်လို့ ထိုအဆိပ်ကို တိုက်ရိုက်ကျွေးခဲ့လျှင် လသားအရွယ် ကျင်းဝမ်လေးက ဘယ်လိုမှ အသက်မရှင်နိုင်ပေ။ ရွယ်ယား၏ အဆိပ်သည် မိခင်နို့မှတဆင့် လွှဲပြောင်းပေးသောကြောင့် သူ့ဆီရောက်ချိန် အဆိပ်အာနိသင်က အားနည်းသွားသည်။ ထို့ကြောင့် ကျင်းဝမ်သည် သေမည့်အစား ဆေးကြောင့်သာ ဆွံ့အသွားခဲ့သည်။ အဆိပ်သည် ကျင်းဝမ်၏ ခန္ဓာကိုယ်ထဲတွင် ကျန်ရှိနေသော်လည်း နောက်ထပ် ထိခိုက်မှု မရှိခဲ့ပေ။
ဒီလုပ်ရပ်က လက်သည်တရားခံ၏ ပြောင်မြောက်သည့် အကြံဖြစ်နိုင်သည်။ တကယ်လို့ ကျင်းဝမ်သာ သေဆုံးသွားခဲ့မည်ဆိုရင် မင်းကြီးက တကယ့်အဖြစ်မှန်ကို အသေးစိတ်ရှာဖွေစုံစမ်းလိမ့်မည်။ အခုလို ဆွံ့အသွားသည်ဆိုလျှင် သမားတော်တွေကို စစ်ဆေးခိုင်းလိမ့်မည်။ ဒါက မွေးရာပါဖြစ်သည်ဟု သမားတော်များ၏ ဆုံးဖြတ်ပေးလိုက်ပါက စုံစမ်းမှုမလုပ်ပဲ ဘုရားကျောင်းမှာ ဆုတောင်းမှု ပြုလုပ်ရုံနှင့် ထိုအဖြစ်က ပြီးသွားလိမ့်မည်။ ပြုလုပ်သူလည်း အပြစ်ပေးခံရမည် မဟုတ်တော့ပေ။
ဒါဆိုလျှင်မင်းကြီးနှင့် ဧကရီရှောင်ဟွေ့တို့၏ တစ်ဦးတည်းသော သားလေးက အသက်ရှင်နေလည်း သေသည်နှင့် ဘာမှ မထူးခြားတော့ပေ။
နို့ထိန်းက မိဖုရားခေါင်နှင့် ရန်ငြိုးမရှိသောကြောင့် ပူလျှိုဟာ တခြားသူရဲ့ အမိန့်အောက်မှာ လုပ်ဆောင်ခဲ့တာ ဖြစ်ရမည်။ လော့လွေ့စိန်း သည် လမ်းကြောင်းအတိုင်း ဆက်လိုက်ကာ ပူလျှို၏ မိသားစုကို စုံစမ်းခဲ့သည်။ သူမရဲ့ မိသားစုဝင်တွေဟာ ပလိပ်ရောဂါကူးစက်ခံရပြီး သူမသေဆုံးပြီး မကြာခင်မှာပဲ သေဆုံးသွားခဲ့တာကို တွေ့ရှိခဲ့ရသည်။
ထိုအချိန်တွင် ဧကရီ ရှောင်ဟွေ့ကို ကလေးမွေးရာတွင် ကူညီပေးခဲ့သည့် သားဖွားလက်သည် နှစ်ဦးတွင် တစ်ဦးမှာ ချောက်ကမ်းပါးပေါ်မှ ခြေချော် ပြုတ်ကျကာ ခန္ဓာကိုယ်တစ်ခုလုံးတစ်စစီဖြစ်သွားသလို ကျန်တစ်ဦးမှာ အရက်သောက်ပြီးနောက် ရထားလုံးရှေ့ လဲကျကာ သေဆုံးသွားခဲ့သည်။ ထိုအတောအတွင်း၊ "မွေးရာပါ ဆွံ့အခြင်းဟု ရောဂါအမည်တပ်ပေးခဲ့သော" တော်ဝင်သမားတော်က မကြာခင် အသက်ကြီးနေပြီဖြစ်လို့ အငြိမ်းစားယူပြီး သိပ်မကြာခင်မှာပဲ သူ့မွေးရပ်မြေကို ပြန်သွားကာ သေဆုံးသွားခဲ့သည်။
......
အားလုံးသေပြီ။ သူတို့ထဲမှာ ပါဝင်သည့် တစ်ယောက်စီက တစ်ယောက်မှ အသက်ရှင်မကျန်ခဲ့ပေ။
တရားရုံးတော်မှ ညစ်ပတ်သည့် တိုက်ပွဲများတွင် အသုံးပြုသည့်နည်းလမ်းများကို ရင်းနှီးကျွမ်းဝင်သော ဧ ကရာဇ်သည် သူတို့အားလုံး နှုတ်ပိတ်ခံရတာဖြစ်နိုင်ကြောင်း ချက်ချင်းသဘောပေါက်ခဲ့သည်။
အဲဒီနှစ်တွေကို ပြန်တွေးရရင် တကယ်ကို မေးခွန်းထုတ်စရာ အပိုင်းတွေ အများကြီးရှိနေခဲ့သည်။
ဒီအတွက်ကြောင့် စုံစမ်းစစ်ဆေးမှုတွေ ပြတ်တောက်ခဲ့ရသည်။ ဧကရာဇ်သည် အနည်းငယ် ခေါင်းကိုက်လာခဲ့သည်။ သို့သော် ထိုအချက်သည် ကျင်းဝမ်နှင့် သက်ဆိုင်သောကြောင့် ဧကရာဇ်မင်းသည် ကျင်းဝမ်တို့ လင်မယားကို နန်းတော်ထဲသို့ ခေါ်သွင်းခဲ့သည်။
ဧကရာဇ်သည် ကျင်းဝမ်ဖေး သည် ထက်မြက်ပြီး ဉာဏ်ရည်ထက်မြက်ကြောင်း နောက်ဆုံးတွင် သေချာ နားလည်ခဲ့သည်။ လီယွီသည် အမြဲတစေ ထူးခြားသောအမြင်ရှိသည်။ လီယွီသည် နန်းတော်အတွင်း အလုံပိတ်အခန်းတွင် ပုလျိူအသုံးပြုခဲ့သော အဆိပ်ပါဝင်သည့် အမှုန့်ကို တွေ့ရှိပြီး ကျင်းဝမ်ကို ကယ်တင်ခဲ့သည်။ ဧကရာဇ်မင်းသည် လီယွီအား မေးမြန်းပြီး အခြားအကြံဉာဏ်များ ရှိနိုင်သေးလားလို တွေးနေသည်။
ဧကရာဇ်က အမိန့်ပေးပြီးနောက် ကျင်းဝမ်သည် လီယွီတို့ လျင်မြန်စွာ ရောက်လာသည်။
ကျင်းဝမ်ရဲ့ စကားပြောသံက အခုတလော ပိုကောင်းလာသည်။ သူ့အသံက ခပ်ကြမ်းကြမ်းဖြစ်နေသေးပြီး သူ့အဖြေက နည်းနည်းနှေးနေတာကလွဲလို့ တခြားပြဿနာတော့ မရှိပေ။ နောင်တွင် ဤကဲ့သို့ ဆက်ရှိနေမည်ဆိုလျှင်ပင်လျှင် ဧကရာဇ်က ကျင်းဝမ်ကို မပြစ်မတင်ပေ။
"ထျန်းချီ မင်းဘယ်လိုခံစားရလဲ" ဧကရာဇ်က မေးလိုက်သည်။
ကျင်းဝမ်က ဖြည်းညှင်းစွာပြောသည်။ "အရမ်းကောင်းပါတယ်"
အရင်တုန်းကတော့ ကျင်းဝမ်က စကားမပြောတတ်ဘူး။ ယခု သူပြန်လည်ကောင်းမွန်လာပြီးနောက်တွင်ပင် ဧကရာဇ်မင်းအား အဆက်မပြတ် စကားပြောဆိုကာ အနှောက်အယှက် မပေးချင်ခဲ့ပေ။ အများအားဖြင့်တော့ သူ့အဖြေတွေက အရမ်းတိုတောင်းနေဆဲဖြစ်သည်။
ဆန့်ကျင်ဘက်အနေနှင့်၊ ဧကရာဇ်ကိုယ်တိုင်က ကျင်းဝမ်ကို ပို၍ဂရုစိုက်ကြောင်း ပြသလိုသော မေးခွန်းများဖြင့် သူ့ဝမ်းထဲ ပြည့်နေခဲ့သည်။ သို့သော် မမျှော်လင့်ဘဲ၊ သူ့ ပါးစပ်မှ မေးခွန်းတစ်ခုပင် မထွက်ရက်တော့ပေ။
ကျင်းဝမ်က စကားပြောလေ့ကျင့်သည့်အနေဖြင့် နေ့စဉ် မနက်စောစောထကာ ဂန္တဝင်သုံးပါး ကျမ်းစာ မှ ဝတ္ထုမျိုးစုံအထိ စာအုပ်များကို ကျယ်လောင်စွာရွတ်ဆိုရသည်ကို ဝမ့်ရှီးထံမှ ဧကရာဇ်မင်းကြီး ကြားဖူးသည်။
ကျင်းဝမ်သည် အေးစက်ပြီး အထီးကျန်သော ပုံစံရှိသည်။ တိုက်ခိုက်သတ်ဖြတ်တာ ကောင်းပေမယ့် ဧကရာဇ်က သူ့ရဲ့အေးစက်စက်သားက ထိုဝတ္ထုတွေကို အသံကျယ်ကျယ်ဖတ်နေမည်ကို စိတ်ကူးပင် ယဉ်မကြည့်ဖူးပေ။
ကျင်းဝမ်သည် သူ့င်္အကျီလက်ထဲ ထည့်ထားသော စာအုပ်ငယ်တစ်အုပ်ရှိသည်။ ဧကရာဇ်မင်းထံမှ ခွင့်ပြုချက်ရပြီးနောက်၊ ရံဖန်ရံခါ သူက ထိုစာအုပ်ကို ထုတ်ကာ တစ်ချက်ကြည့်လိုက်သည်။
ကျင်းဝမ်သည် မှတ်စုစာရွက်အချို့ကို မေးခွန်းတွေ ပြန်ဖြေဖို့ သိမ်းထားတတ်သည်ကို မင်းကြီးသိသည်။ အခု ကျင်းဝမ်က စကားပြောတတ်လာသဖြင့် မှတ်စုစာရွက်လေးတွေ မလိုအပ်တော့လို့ စာအုပ်ငယ်က ဘာအတွက် ကြည့်နေရတာလဲ....
ကျင်းဝမ် သတိမထားမိသည့်အခါ ဧကရာဇ်က လျှို့ဝှက်စွာ ခိုးကြည့်လိုက်တော့ ထိုစာအုပ်လေးက ထူးဆန်းသော အမှတ်အသားများဖြင့် ပြည့်နှက်နေသည်ကိုတွေ့လိုက်ရသည်။
"ဝမ်ဖေး က ရေးထားပေးတယ်။" ကျင်းဝမ်က ပြုံးပြီး ရှင်းပြလိုက်သည်။
******-******
YOU ARE READING
(Completed) အာဏာရှင်ဆိုးကြီးရဲ့ အချစ်တော်ငါး (MM translation)
Historical FictionGenre _ Historical, Romance, Comedy, Yaoi
