Magkasalungat
I
Sa pagbubukang-liwayway,hanggang sa muling pagdilim,
Sa pagganda ng panahon, hanggang sa pangungulimlim,
Sa iyong pagpapaalam, hanggang sa muling pagdating,
Para bang palaisipan na may tinatagong lihim.
II
Bumibilis, bumabagal, lumalakas, humuhupa,
Ang bago'y nagiging luma, ang maikli'y humahaba,
Ang maliit lumalaki, ang mabango'y bumabaho,
Ang lahat magkasalungat ngunit parang konektado.
III
Umaalis, bumabalik, ngumingiti't tumatawa,
Umaayaw, tumutuloy, umuuwi, sumasama.
Lumalambot, tumitigas, lumalakas, naghihina,
Ano nga bang kahulugan, ng mga pagkakaiba?
IV
Bumubuo't gumigiba, lumilitaw, nawawala,
Tumataas, bumababa,umuula't tumitila!
Umuukol, bumubukol, namamali't tumatama,
Ikaw ba ay pagpapala, o isang malaking sumpa?
V
Sa rurok ba ng ligaya, o sa kahihiya't dusa?
Ewan ko kung saan, ikaw, nakapili ka na ba?
Magkasalungat na daan, sa kanan ba o sa kaliwa?
Basta!... hindi ko pa alam...na sa 'yo ang pagpapasya.
VI
Kung minsan, ang buhay nati'y magkasalungat.
Nalilito sa pagpili kung anong karapatdapat.
Sa tama ba o sa mali, sa itaas ba o ibaba?
Mag-ingat katoto na sa 'yo pa rin ang huling pasya.
BINABASA MO ANG
Mga Tula ng Isang Manhid
PoetryHighest Rank: #1 June 2013 Top 1-10 (June to August 2013) Para sa mga manhid. tanga. seloso. martir. suplado. paano nga ba ang magmahal? paano ang magmove on? paano mo ipapamukha sa ex mo na kaya mo nang wala siya? sana makatulong ang mga tula ko sa...
