هروب ليلة الزفاف💍مكتملة💍

💍الجزء 162💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 162🌹

كملو لعشا وبقاو تيتحدتو ... وهما تيغسلو الماعن ... حكا ليها على مكة ووعدها بأنه المرة الجاية غادي اياخدها معاه تعمل حتى هي عمرة وفرحات بزاف بهاذ الخبر.

ومن بعد مانشفو يديهم بدات هي تتآوب جاها النعاس ...

بلال شاف فيها وقال : نساي هاذ الليلة تنعسي بكري النعاسة ... سهرتنا عاد غادي تبدا....
هي ولات حمرا وبدات تدور غير في عينها وتتمتم : لالا ماشي نعاس .... غير تفوهت وصافي

بلال: واش ماجاكش الصهد هذيك العباية راه ديال الصلاة ماشي ديال الدار وانا جبت ليك بزاف ديال كسيوات و شوميزات لبسي منهم ... سيري بدلي حوايجك وانا غادي نتبعك .

مشات للبيت قلبها تيزدح عرفات ان وقت دفع الحساب قرب حيدات عبايتها ديال الصلاة وقربات من لمرايا تتقاد شعرها  وتتشوف في وجها المنور ماشي راها عروسة ... شوية نزلات عينها لتحت ورفعات الروب غير بشوية على ركبتها تتشوف في الندبة لكبيرة اللي على فخدها بادية من الركبة وسالات حدا الخسر ديالها نزلات دمعة فوق ركبتها ...  غير سمعات صوت وراها غطاتها بزربة ومع هزات راسها تتلقا بلال وراها ماحساتش بيه منين دخل ...

دورها عندو وشاف في وجها الحزين  وعيونها المغرغرين بالدموع وسولها: هبة حبيبة مالكي. .. واش خايفة مني او خايفة من حاجة ثانية ... علاش وقتما تنتكلم على هاذ اللحظة ملامح وجهك تتغير وتيغلب عليها الحزن والخوف .

هبة مسحات دمعتها وابتسمت : والو غير شوية توثر وصافي ... ( سكتات لكن دمعة خانتها ونزلات على خدها بلاما تشاورها )

بلال قرب كثر منها وقال بصوت حنين : حبيبة الا كنتي مامستعداش هاذ الليلة وحاسة براسك تاعبة ماشي مشكل ... نعسو ورتاحي راه مزال العمر كامل تيتسننا ...

هبة مابغاتش تزيد تعيق عليه هو راجلها وزواجهم ولا كامل فيه جميع الشروط وواجب عليها تعطيه حقو وخصوصا انه راغب فيها ..

قربات منو ونزلات وجها الارض وقالت : لا انا مستعدة ... غير اوكان بغيت نطلب منك طلب عفاك ماتردوش في وجهي.

بلال : تفظلي حبيبة قولي .

هبة بصوت تيتلعتم وتتلعب بصوبعها دليل على توثرها قالت بصوت شبه مسموع : ممكن عفاك منين نكونو مع بعض تطفي الضوء ديال البيت .

بلال استغرب من طلبها : علاش واش لهاذ الدرجة تتحشمي مني .

هبة نزلو دموعها هاد المرة بلا توقف جرها بلال عندو لحظنو  وفهم هي علاش تتهرب وتتجنبو  حيث اول ما دخل للبيت لقاها تتفحص الندبة اللي في فخدها عرف انها خجلانة من جسمها اشوفو.

خلاها حتى سكتات مسح ليها دموعها وشاف فيها بحب وقال : هبة حبيبة ...انا راجلك تنبغيك لشخصك  لروحك النقية و لقلبك الطيب ... وحبي ليك غادي ابقا وغادي ازيد اكثر واكثر .... وحتى حاجة ماغادي تأثر فيه ... جسمك ماتخبيهش علية كما بغات تكون عيوبو حيث انا حافظ كل نذبة فيه .... هبة اللي ماعرفاهش هو  باللي انا اللي عملت ليك العملية نهار الحادث بفظل حبي ليك لكبير قدرت ندخل لغرفة العمليات وبفظل الله قدرت نعتقك من الموت ... كنت تنتمنى تبقاي غير حية ماتيهمنيش اثار الجرح اللي غادي ابقا في جسمك ... كنت تنطلب من الله غير روحك ماتفرقش جسدك كما بغا اكون شكلو .... انا اهبة طبيب يوميا تنشوف اجساد مختلفة قدامي .... وعمر شي جسد حرك فية اي شعرة .... لأن الحب هو اللي تيتحكم في رغبتي ليك ماشي جمال الجسد ... الجمال راه تيفنى مع الوقت والزمان لكن الاهم هو الروح الطيبة اللي تتبقا جميلة العمر كامل.

هبة اعترافو هذا ريحها بزاف وفرحها اكثر خصوصا منين عرفات ان بلال رجع لمهنة الطب على قبلها معناها انه تيبغيها بزاف ...
قربات منو عنقاتو وقالت: دايما تتفاجأني بمواقفك الثمينة معايا وماتنعرفش كيفاش نشكر .

بلال بعد هاد التعنيقة وهاد الكلمات اللي خرجو من فمها مابقاش صابر مزال عليها ...  ماحساتش براسها كيفاش نزل وهزاها بين دراعو ومشا بيها لسرير حطاها وقال : هذي هي احسن طريقة تشكريني بيها .