💍❤️هروب ليلة الزفاف❤️💍
بقلم✍️ أسماء الزروالي⭐🌙
فقرة5🌹
هذيك الليلة الشتا ماوقفاتش الليل كامل. .... هي ماعقلاتش على راسها من التعب طاحت دودة حتى لصباح ....
وجا الصباح فاقت على صوت نباح الكلب وصوت زوج تيتحدتو برا. ..حلات عينها وبدات تدور عينها في المكان اللي هي فيه وبدات أحداث الليلة الفايتة تترجع ليها بشوية بشوية وأخر حاجة تفكراتها هي وجه هذاك المجرم القتال اللي بسبابو خسرات اغلى حاجة في حياتها أمها لحبيبة. نزلو دموعها وهي تسترجع لحظة موت أمها وحلفات حتى ترجع ليها حقها وتنتقم من هذاك المجرم.
وهي غارقة في ذكرياتها الحزينة تفتح باب الكوخ و دخل منو المجدوب كما سماتو . مباشرة طلع في وجها الباكي... اول ما دخل كان ملامح القلق ظاهرة على وجهو لكن غير شافها تتبكي رطابو ملامحو و حاول إهدأ نفسو. .جر الكرسي وقرب من السرير وبدون أي مقدمات
قال: شكون انتي وشنو مشكلتك؟ نبداو بالسمية شنو سميتك.؟ تتهضري بعدا ياك؟ حيث منين ليقيتك برى صوتك ماسمعتوش
نزل عليها بسؤال ورا الثاني معارفاتش باش تبدا تجاوب... لكن كيفاش تجاوبو وهي بكمة .
.
تذكرت أنها البارح منين شافت وجه المجرم قدرات اول مرة تخرج كلمة " أمي " من فمها يعني تقدر تهضر.... قررت تحاول وتشوف.
بداو شفيفها تيترعدو وتتحاول تتحكم في حبالها الصوتية باش تخرج أول كلمة من حلقها من بعد 16 سنة وهي ماتتهضرش. ....غمضات عينها وسرطات ريقها وجمعات نفس قوية داخل ريتها وخرجات أول كلمة : هِ. ه...هبة
مع نطقات اسمها مع نزلو دموعها اخيرا سمعات صوتها... اخيرا قدرات تنطق ....اخيرا تقدر تعبر على أحزانها وعلى آلامها .... اخيرا تقدر تحي على اللي شافت وهي صغيرة ...
بلا ماتشعر نهارت وبدات تتبكي وتتقول : أميي.... أميييي ....
وكأن هاذ الكلمة هي اللي كان خاطرها تسمع نفسها تتقولها من زمان.
السيد بقا مصدوم فيها مافهمش شنو واقع قدامو.... لكن الحرقة باش تتبكي حس أنه كاين وراها جرح كبير. قدر حالتها وحزنها و خلاها على خطرها حتى شبعات بكا و وسكتات.
بقا تيشوف فيها بدات تتمسح دموعها وهزات عينها الدابلين بالبكا وقالت وهي تتلعثم وتتحاول تتحكم في صوتها
قالت : إسمي هبة الله.....
خرجات هاذ ثلاثة الكلمات غير بزز
شافتو ما جوبهاش قالت تترجاه: وعفاك خليني عندك غير شوية غير توقف الشتا وتولي رجلي شوية ونمشي بحالي .
بقا ساكت تيسمع لصوتها اللي تيتقطع خلاها حتى سكتات ورجع شاف فيها.
قال: ممكن تبقاي لكن تتجاوبيني على أسئلتي.
هبة حركات راسها موافقة .
الرجل : واش انتي بنت البشير شيخ قبيلة العيايدة ؟
بالصدمة خرجات عينها فيه تفكرات الاصوات اللي فاقت عليهم . وأول حاجة جات في بالها أنهم لقاوها .
رجعات تتبكي وصوتها تيعبر على الخوف والرعب الي تزرع في قلبها.
هبة : عفاك ما تخليهمش اياخدوني غادي اقتلوني عفاك .
رجع تيسولها : شكون هدو اللي غادي اقتولوك.؟
بكل خوف جوباتو هبة : أبا أو ولد خالتي العربي.
بقا ساكت تيفكر : اذا الهضرة اللي سمعت هاذ الصباح صحيحة.
هبة تتسأل شنو ممكن إكون سمع
هبة : شنو سمعتي وكيفاش عرفتي شكون أنا.
جاوبها : كيفاش عرفت ماشي مهم وشنو عرفت هو الأهم
الناس تيقولو بلي هربتي البارح من العرس ديالك و لانك خايفة من أباك والراجل اللي كان غادي اتزوج بيك اللي هو ولد خالتك ياك... حيث خايفة من الشوهة وإعرفو انك ماشي بنت وإطبقو عليك الحد.... لهاذ السبب هربتي .... شي تيقول انك غرقتي في الواد لأنهم لقاو لفلوكة مهرسة ومقلوبة في الواد. وشي تيقول أنك هاربة في الغابة...
هي من شدة الصدمة بقات حالا فمها بزربة اخترعوا كذبة ولصقوها ليها . رجعوها بلا شرف
شاف فيها وكمل : مالكي سكتي ؟
هبة : شنو غادي نقول من غير حسبي الله ونعم الوكيل. ربي الله عارف شكون أنا وشنو تنسوا . وعارف علاش هربت ومناش خايفة . وهو اللي غادي انصرني عليهم.
جاوبها : معناها انتي هربتي لسبب اخر ماعندوش علاقة بالشرف لكن هذا ماتيعنيش انك وخا اكون كلامك صح هروبك تيأكد فكرتهم عليك ..
شافت فيه وهي تترجاه اتيقها: وانت تيقتيهم غادي تعطيني ليهم الا لقاوني عندك ؟
رجع تيفكر : بصراحة هذيك حياتك ومشاكلك انتي وعائلتك أنا ماعنديش دخل فيهم. لكن المشاكل انا مابغيهاش. مشاكلك خاصك تواجهيها وتحليها.
طارت على يدو بغات تبوسها ليه وهي تتبكي : عافاك ماتعطينيش ليهم . عافاك خاليني غير تنقوا ونواجهم دابا انا ضعيفة وماعنديش اي دليل ندافع بيه على راسي. عفاك خليني مخبية عندك هنا ...
جبد يدو باش ماتمسكهاش ورجع وجهو لور وقال : اباك داير مكافأة كبيرة على اللي لقاك حية ولا ميتة وأكيد لقبايل كلهم دابا تيقلبو عليك . الزهر اللي عندك ان هاذ الكوخ بعيد بزاف على كاع لقبايل والواد البارح عمر وفاض على القنطرة اللي تتقطع للغابة لكن هذا ماتيعنيش ان اللي تيقلب عليك ذابا في الغابة اقدر اوصل لهنا كما وصلتي انتي.
وفي هاد المنطقة كلها كاينين زوج كواخ ديالي وديال واحد السيدة وولدها هو اللي تيتسخر لقبيلة وهو لللي جاب لي خبارك.
قلبها غادي يوقف بالخوف تتقول في خاطرها عندك حتى هو اطمع في المكافأة وابلغ عليها.
وهو بحال الا تيقرا افكارها: الولد تيقة وامين مستحيل اعطيهم خبارك. وانا عند كلمتي انتي ضيفة عندي وفي حمايتي حتى نشوف كيفاش نلقاو ليك شي حل.
YOU ARE READING
هروب ليلة الزفاف💍مكتملة💍
Romance💎مكتملة💎 ❌حصرية على الواتباد❌ 💥💥🌙🌙⭐⭐ قصة رمضانية ⭐⭐🌙🌙💥💥 🌹📕هروب ليلة الزفاف📕🌹 💞ما أجمل القدر حين يهديك شخصا يغنيك عن الاخرين💞 ⏳⏳لهروب نحو المجهول دائما جميل لأننا ماتنعرفوش شنو جايب لينا ومنين وإمتى وشنو مخبي لين...
