هروب ليلة الزفاف💍مكتملة💍

💍الجزء 51💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 51 🌹

سمحات فيهم ومشات للكوزينة  كانت كلها تترعد ماعرفاتش كيفاش تحكمات في راسها قدامهم ..عمرات كاس ديال الماء وجلسات تشرب حسات ان حلقها نشف وان قلبها غادي اوقف. بلال صدق كان مزوج وعندو بنت  وخاطب من لفوق.... اذا عندوعائلتو وناس محتاجين ليه كثر منها هي ... ماعرفاتش شنو ممكن اكون مخبي عليها. وهي ماعرفاهش.
بقات غارقة في تفكيرها حتى سمعات صوت الباب ديال الدار تسد.
هذو مايكونو غير خرجو اتعشاو برة.
حاولات تتقبل الامر وكأنه حاجة عادية ... هي اصلا كما قالت ليه غير مرخلة صغيرة في حياتو غادي تسالي اول ماتوقف على رجليها وتعتمد على راسها ...  لكن واحد الصوت فيقها من تفكيرها وهو صوت بلال.

بلال  باين على وجهو انه معصب وقف قدام باب الكوزينة وربع يديه قدامو وسولها : ممكن نفهم قصة مهنة المربية والخذامة اللي اخترعتي وتيقتي راسك فيهم .

هبة قفزها من بلاصتها بسم الله الرحمن الرحيم هذا من خرج ياك مشاو اتعشاو.
هبة مصدومة من وجودو في الكوزينة  : ماخرجتوش تتعشاو

بلال مزال معصب  : ماشي هذا هو موضوعنا جاوبيني على قد سؤالي.

هبة تتوشوش ليه غير بشوية  : وفين هي خطيبتك خليتيها وجاي عندي راه غادي تسمعنا.

بلال بصوت مرتفع : هبة بلاما تبقاي دوخي علية . ليلى مشات . وانتي جاوبيني على سؤالي  لاياش ناوية توصلي بهاد التمثيلية ديالك اللي درتي اليوم.

هبة  تتحاول تبين ليه ان اللي عملات هو الصح : اي تمثيلية انا كل اللي قصدتو انني نغطي وجودي هنا . تخيل واحد تجي خطيبتو ولا مرتو لعندو لدار وتلقى مرا وحدا اخرى . اذا واحد من زوج ياتيخونها يا مزوج عليها. وفي كلا الحالتين راه خراب بيوت .  مشاكل تقد توصل لفراق . الا في حالة وحدة الا كانت هذيك لمرا الخذامة. وهذاك الشي اللي درت وعوض باش تشكرني  حيث حافضت على علاقتك بخطيبتك  جاي تتقول لية تمثيلية.

بلال  قرب منها ووقف مباشرة قبالتها : حياتي الشخصية انا عارف كيفاش انسيرها. لكن  انتي دخلتي راسك في شي حوايج متقدريش عليهم . واكيد غادي اخلو ليك ولية المشاكل. بحال انك توافقي تكوني مربية بنتي. هاذ الشي مانقبلوش.

هبة حتى هي وقفات ووجهاتو  : ياك قلتي لية غادي تساعدني نوقف على رجلي ونخدم لكن بشرط نكون تحت عينيك. هاهي الفرصة  جات  لينا بزوج حتى لقدام يدينا. ... غادي نخدم وفي دارك.

بلال معصب وفي نفس الوقت باغي افهمها واقنعها بأن الوظيفة اللي اختارت ماشي سهلة : هبة  غير فهميني مزيان...  هذيك بنتي وانا عارفها مزيان. طفلة غير طبيعية. راه دوزات كثر من عشرين مربية . راه والله تتحمقك وتخليك تبغي ترجعي عند اباك ماشي غير تخوي الفيلا.

هبة جاب ليها الضحكة .

بلال زاد تعصب : واش انا تنهضر معاك بالمعقول وانتي تتضحكي.

هبة تتحكم في ضحكتها بزز  : شوقتيني نشوفها . تعرف واحد الحاجة كلكم تتحكيو عليها وكأنها شيطان صغير . ولكن انا حاسة ان ورا هذاك الشيطان اللي تتوصفوه كاين ملاك حقيقي  صغير غير انتوما تتشوفوه بعينكم ماشي بقلبكم.

بلال : ماتخليش عواطفك تتحكم في قراراتك باش ماتندميش من بعد

هبة ابتسمت : والله العظيم انا متشوقة لهاذ الوظيف غير انت وافق وماتعكسش وان شاء الله ربي غادي اعيني.

بلال صافي باع حمارو معاها فمو اللي جاب ليه المشاكيل وهو اللي وعدها انه اخليها تخذم وهاهو تيدفع ثمن كلامو. كانت عندو فيلا في الدار اللي هي بنتو زادوه فيلا وحدا اخرى اللي هي هبة.  لكن الا بغات تجرب وتقتنع خليها هي اللي قلبات هلى المشاكل.

بلال : بما أنك مصرة فتحملي مسؤليتك. غذا صباح وجدي راسك نوصلك للفيلا.

خرج وخلاها وهي كانت غادي تموت بالفرحة. واخيرا غادي تكون عندها خذمة . وخذمة زوينة مربية اطفال اعز حاجة عندها.... وماشي اي طفلة ... بنت اسي بلال ... البنت اللي بسبابها عايش المشاكل وتربيتها ليها تقدر تنقص هاذ المشاكل وترد ليه ولو القليل من جمايلو عليها.