هروب ليلة الزفاف💍مكتملة💍

💍الجزء 135💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 135🌹

الشيخ بحزن : لو جلست نشكر فيك اخوية موحى عمري كامل مانوفيك حقك ... من اليوم انت ماشي خذام عندي انت خوية اللي ماولداتوش لية امي ... انت جميلك مغرقني  وماعنديش كيفاش نرضو ليك لا انت لا اختك .... (شاف في امي رحمة وقال ) وانتي اختي رحمة ...ربيتي ولدي بحال امو ... كفلتيه وهو مزال نقطة حليب ماشربها .... كنت ليه ام من اول يوم تفرق فيه على الام ديالو ....ليومنا هذا ربيتيه احسن تربية و كان قبلتي علية ... تبقاي أم ولدي أدم و تكوني لية زوجة و مولات داري حتى تفرقنا الموت ... غادي نكون أسعد واحد ... باش حتى لا مت نكون عارف باللي خليت ولادي ورزقي في آيادي امينة .... انا عارف مانستحقش وحدة بحالك .... ولكن الا عطف قلبك وقبلتي تكوني اجرك اللي عملتيه كملتيه لنهاية العمر.

كان طلب الشيخ ليد رحمة مفاجأة للجميع واولهم رحمة ... وهبة اللي تمنات توافق.
امي رحمة حشمات وماعرفات ماتقول شافت في خوها موحى اللي الرأي رأيو .

ابا موحى : شرف لينا اسي الشيخ ... ختي تتزوج بيك ... ونكون انا نسيبك...و لكن تيبقى القرار ليها  ... فالرفض والموافقة تيرجعو ليها ....

كلشي شاف في امي رحمة تيتسناو موافقتها .... هي نزلات راسها لتحت وابتسمت ابتسامة خجل ارتسمت على شفيفها .

بلال ادخل : اوا اش غادي نقول ليكم السكوت علامة الرضا الله اكمل بالخير ومبروك عليكم ..

ناضت دادا ميمونا تتزغرت ووقفت هبة وادم فرحانيين مشاو عنقو امي رحمة ... حيث غادي تولي مرت اباهم في مقام امهم ... واكثرية ادم حيث ماغاديش اتفرق على الام الي حل عليها عينيه وكبر معاها... ومابخلاتش عليه بالحب وحنان الام.

كلشي فرح من قلبو وامي رحمة اللي سمحات في زواجها على قبل خوها كفأها الله بالشيخ ... 
رجعو جلسو بلاصتهم  وهنا تكلم ابا موحى.

موحى :احم ..  الله اكمل عليكم بالخير ... ولكن اسي الشيخ حتى انا عندي طلب.

الشيخ  :تفضل

موحى تشجع وقال : الا قبلتي علية وقبلات علية لالة ميمونا فأنا طالب يدها منك على سنة الله ورسوله...

كلشي فعلا تفاجأ ... لكن منين فكرو مزيان لقاو فعلا ان ابا موحى ودادا ميمونا تيعزو بعض من زمان وهاذ المعزة عاد توضحات ليهم بأنها كانت عبارة عن قصة حب صامتة مستورة تحت التراب تتسنا الوقت باش طلع لنور وتنما وتكبر .

الشيخ ابتسم : اش غادي نقول ليك حتى انا لية الشرف نتناسب معاك وبلاما ناخد موافقة اختي ... هي باينة الموافقة في عينها قبل ماتطلبها ...هههه

بقا كلشي تيضحك وناضو حتى هي هانؤوها ....

بلال : اوا بهاذ المناسبتين ماغادي تمشيو لفيرما حتى تكتبو كتابكم هنا عدنا باش نشاركوكم افراحكم .... وتمشيو مباشرة تبداو حياة جديدة تكون ان شاء الله كلها افراح ....

الحاجة : وانا ماعلية غير نعمل ليكم شي نهار زوين ابقا ذكرى ليكم كاملين ...

الشيخ  : بارك الله فيك انسيبتي لعزيزة.... غادي نديرو غير غذا بسيط ونكتبو كتابنا ونتوكلو على الله نرجعو لفيرما راه بقات بوحدها ....

وفعلا بعد يومين دوزو احسن يوم في حياتهم كانت حفلة غير بسيطة لكن كانو مجموعين فيها اغلى ناس على قلبها .... سلات الحفلة و كان هذاك هو نفس  النهار اللي قررو ارجعو فيه للفيرما مجموعين ... الشيخ خرج مريض محمول غير على خشبة واليوم راجع مع ولدو ومراتو اللي ربات ليه ولدو .... كم انت كريم يارب .... فعلا رحمتك وسعت كل شئ.

ودعاتهم هبة والحاجة وبلال ....

كانت هبة فرحانة بزاف لأن المياه رجعات لمجاريها والعائلة اللي كانت تتحلم بيها ولات عندها ... واهم شي رجعات لحضن اباها ورجع ليها خوها.... شافت في بلال ... اللي مزال تدعي ربي حتى هو احن قلبو ليها وابغيها وإحبها كما حتى هي تتحبو.