هروب ليلة الزفاف💍مكتملة💍

💍الجزء 14💍

❤️هروب ليلة الزفاف❤️💍

بقلم✍️ أسماء الزروالي⭐🌙

الفقرة 14🌹

بلال كلامها زاد قلقو وعصبو  خصوصا أنه  حلف  غادي احميها وبأنها آمانة عندو حتى اوصلها لبر الامان ... عطاها وعد وهاهي السيدة اللي رباتها تتزيد تأكد مسؤوليتو عليها بعدما خلاتها أمانة عندو وترجاتو اساعدها .... هي قدامو فاقدة الأمل وفعلا ماعندو مايدير في هاد الوقت لقصير .... وهما محاصرين من كل جهة و سدو عليهم جميع البيبان اللي تقدر توصلها خارج لقبيلة .

كيفاش غادي اعتقها منهم وامنعهم اياخدوها. وإلا جا اباها وبغا إياخدها بأي موجب شرع غادي إمنعو وهي بنتو ....   أما هو فا ماتيقرب ليها بحتى صلة بلعكس جلوسها معاه في بلاصة وحدة ممكن تزيد الهضرة والاشاعات على شرفها  بنت شابة ورجل في نفس المكان ليل ونهار مدة ثلاث ايام اي واحد قال شي حاجة تتمس شرفها ممكن اتيقوها..... و مشكل الشرف في هاذ لقبايل اقدر اوصل حتى القتل ...اذا ماشي غير هي اللي في خطر وبل حتى هو في خطر ....

بقا تيفكر حتى لقا الحل ... لكن الحل الوحيد اللي بقا ليه اقدر مايكونش  مستحيل  الا  هي وفقات .

شاف فيها وقال : انا وعدتك نوصلك بآمان لدار بيضاء لكن عدنا حل واحد . اللي مايخلي حتى حد اقرب منك وفام الناس تسد نهائيا .

قالت بلاما تفكر  ودموعها نازلين لأنها فعلا خايفا وبلال هو الامل الوحيد اللي عندها
هبة : وانا موافقة على اي حل تقولو .... انا ثايقة فيك كثر من نفسي . ثلاث أيام وانا معاك في نفس المكان وتحت سقف واحد وما شفت منك غير الاحسان و الاحترام والكرم والاخلاق الطيبة . فأي حل تشوفو مناسب  أنا موافقة عليه.

بلال بقا ساكت وقال : ولد خالتك كتب عليك نهار العرس.

قالت ليه مستغربة : لا هربت قبل لكتاب. مستحيل نتزوج بيه وخا نعرف نموت استغفر الله العظيم .

جاوبها وقال : مزيان بزاف يعني ماعندوش عليك سلطة .

بقا ساكت تيفكر وسكوتو تيزيد اوثرها

هز عينو وقال بحزم  :  الا فعلا تثيقي فية .... الحل الوحيد  هو الكذبة اللي كذب آدم غادي نردوها حقيقة . غادي نتزوج بيك باش نقدر نحميك وتولي على حسابي ومسؤولة مني. وأباك هو الاخر مايكون عندو حق عليك.

اقتراحو نزل عليها بحال الصاعقة . كاع الحلول كانت تتوقعهم الا هاد الحل انها تتزوج بيه. وهي ماعرفاش شكون هو وولد من وشنو قصتو وشنو سرو . بقات ساكتة وماعرفات باش تجاوب.

رجع سولها : شنو قلتي راه الحل الوحيد . نصيفطو على فقيه الجامع ونكتو كتابنا قبل مايوصلو عدنا.

كانت امي رحمة حدا الباب اللي جات تساعدهم القاو شي حل  وسمعات اقتراح بلال وهنا قررات تتدخل
امي رحمة : وافقي ابنتي هذا هو الحل ... اسي بلال  من نهار جا لهنا ماشفت منو غير الخير .... راه غادي تكوني في يد أمينة ابنتي.
رجع  بلال تكلم باش اعطيها ثيقة اكثر فيه وفي القرار اللي وصل ليه
بلال : غير نوصلك لهذفك ونطلقك وهذيك الساعة غادي تكوني حرة وبعيدة على اباك. زواجنا غادي اكون غير على لوراق باش إكون عندي الحق نمنع أي حد اتحكم في حياتك ولو حتى أباك.

ابتسمت وكأنها تستهزأ من نفسها ومن حياتها والهم اللي مابغاش اسالي فعلا قالوها كثرة الهم تضحك

هبة  : واخا غادي انوافق  ماعنديش شي حل . ههه ...(ابتسمت بحزن  وكملات ) شكون قال باللي باش ننجا من زواج خاصني نعاود نتزوج.

عنقاتها امي رحمة لصدرها :  ما تقوليش هكذا ابنتي عسى ان تكرهو شيئا وهو خير لكم وعسى ان تحبو شيئا وهو شر لكم. الله اعمل ليك اللي فيه الخير ابنتي.

ورجعات شافت في بلال وقالت : وانت اولدي الله اجازيك بخير وقفتك مع هاد الولية ربي غادي اجازيك عليها .

مسحات امي رحمة دموعها لأن هاذ الموقف بكاها. ورجعات ابتسمت ليهم بزوج : ياله اولدي سير جيب لفقيه وزوج ديال الشهود . راه غادي اكون صلى الفجر ومزال في الجامع راه كلما زربنا. غادي نربحو الوقت