هروب ليلة الزفاف💍مكتملة💍

💍الجزء 54💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 54🌹

تحل الباب بسرعة وبان ليها واحد الرجل لابس كسوة الحراسة . رفع يدو تيحي بلال رد عليه بلال التحية وعلى بعد واحد مائة متر تتبان ليها الفيلا بصراحة كبيرة بزاف فيها زوج طبقات  ومصبغة بالبيض والزرق السماوي.
بابها كبير وقدامها كلو جردة معشبة وعامرا شجر وورد لكن ناقصو العناية . وقبل مايوصلو خرجات وحد السيدة تتبان في الخمسينات من عمرها لابسة صاية كحلة طويلة وكميجة حتى هي في الكحل وشعرها اللي نصو شيب بيض جمعاه اللور على شكل سفنجة وتتبان رزينة. وشوية خرجات حتى ليلى عرفاتها هبة واول ماشفتها قلبها تزير. ماتترتاحش ليها سبحان الله .

كانت ليلى لابسا سروال تجين زرق مزير فوقو بوت واصل حتى الركبة وتريكو كول واسع نازل شوية على كتفها اللي تيبان عريان من الفوق.
واول ماوقفات السيارة . شاف بلال جهت هبة وقال: مرحبا بيك اعتابريها بحال داركم.
هبة ابتسمات : شكرا بارك الله فيك.

نزل هو الاول غير سد الباب جات جيهتو ليلى تطير والفرحة ماسيعاهاش وصلات عندو رمات وجها عطياه زوج بوسات على خدو.
ليلى : حبيبة الحمد لله على سلامتك. توحشناك بصراحة.

بلال شاف فيها شوفات ناشفين وبلاما اجاوبها سولها:  فين ملاك؟
هنا كانت هبة نزلات وسدات الباب واقفة تتسنا الاوامر ماعرفا فين تعطي الراس

ليلى جاوبات بلال وتتبان مقلقة: ماعرفنا فين غابرا هاذ الصباح غير سمعات راه جايا مربية جديدة تعصبات وبدات ترمي في العابها وتتغوت ومن بعد خرجات تتجري من بيتها خلينيها على خاطرها لكن  منين  مشيت انا وزهرة ( زهرة هي مدبرة المنزل المرا اللي وقفا في الباب) نشوفوها واش تهدنات باش تبدل حوايجها لقيناها ماكيناش . فعرفناها رجعات للعادة لقديمة تتخبى تحت شي سرير ولا في شي بلاكار.

بلال شاف في زهرة : زهرة قلبي عليها وخليها تجي عندي حدا لبيسين وحطي لينا لغذا تم.

شاف في هبة وقال: هبة طلعي بدلي عليك حوايجك  ونزلي تتغداي معانا وانتي ازهرة وريها بيتها.

ليلى شافت فيه: احم بلال المربيات راه تيتغداو مع الخذامة. وملاك راه ماتتبغيش تتغذا مع حتى حد موالفة تتاكل في بيتها.

بلال شاف فيها: من اليوم المربية غادي تاكل معانا في الطبلة و ملاك بزز منها غادي تبقا تاكل مع العائلة باش تتعلم شوية الادب والانضباط

ليلى معجبهاش كلام بلال. شافت في هبة بحقد . وقالت: مرحبا بيك وخا على ماتيبان لية بوجهك البرئ هذا وشخصيتك الهاذءة اللي تتبان لية ضعيفة .ماغاديش طولي معانا وغادي دوزي اقصر مدة مع ملاك بالنسبة ليها انتي فريسة ساهلة.

ضحكات وضحكات هاذ المرة حتى هبة لدرجة ان بلال كان مركز مع ليلى اللي معجبوش كلامها وكان ناوي اجاوبها حتى سمع ضحكة هبة اللي هي قررت تجاوبها: عرفتي زدتي شوقتيني نتعرف على ملاك اللي مشيباكم. باينة ذكية وقافزة ماشاء الله عليها وشخصيتها قوية وهذو صفات زوينين في الاطفال خاص غير اللي اصقلهم ووجهم.

جاوباتها ليلى : ماتفائليش بزاف شوية وتخرجي طلبي من بلال ارجعك فين كنتي

خلاتها ورجعات شافت في بلال: ماتقلقش من كلامي انا وصلت ليها غير امر الواقع. .   ملاك ماخصهاش المربيات ملاك خاصها مدرسة داخلية تتعلم الانضباط والادب وتعرف قيمة انها تكون عايشا وسط عائلة اللي هي ماتتقدرهاش وماتتحترمهاش

بلال : مليون مرة قلت ليك هاذ الموضوع ماشي وقتو وماتعاوديش تجبديه حتى انا نفكر فيه ونقرر بنفسي.

رجع شاف في هبة : هبة سيري لبيتك راه غادي افوت علينا وقت لغذا.
عيط على زهرة وقال ليها: شوفي شي حد اطلع البليزة ديالها. وانتي سيري معاها وريها بيتها.

سمح فيهم وتبعاتو ليلى تتحاول تلحق على خطواتو السريعة.

شافت هبة في زهرة وابتسمت : السلام عليكم سميتي هبة.

زهرة ردت الابتسامة لكن بوقار:  مرحبا ابنتي انا زهرة . انا هي المسؤولة على دار اسي بلال اللي احتاجيتيها سولني انا نساعدك. ان شاء الله غير تولفك ملاك. عامليها ابنتي زوين وخليها تولفك انتي راه بنتي لية من وجهك مختالفة على كاع المربيات اللي جابو معبسين من اول نهار تيجيو فيه.

هبة ابتسمت: كوني هانية اختي زهرة غادي نحاول نتصاحب معاها ونكون ليها صديقة ماشي مربية.

زهرة ابتسمت: الله اقدرك ابنتي.
دخلو ورسلات واحد الخذامة لابسة لبسة كحلة حتى هي وطبيلة بييضة  باش تجيب شانطة هبة.

وماجاو فين اوصلو وادخلو للبيت حتى كانت وصلاتها ليهم وخرجات.

زهرة هذا هو بيتك ابنتي عندو زوج بيبان هاد الباب اللي دخلنا منو والباب الثاني تيوصل مباشرة لبيت ملاك.

دورات هبة عينها في البيت واسع ماشاء الله ومضوي عندو سرجم كبير وحتى سريرها كان كبير كان البيت مجهز من مجاميعو فوطاي في تجلس وحمام داخلي و ماريو كبير في تحط حوايجها وطبلة الزينة بمريتها .