❤️هروب ليلة الزفاف❤️💍
بقلم✍️ أسماء الزروالي⭐🌙
فقرة 19🌹
ناس لقبيلة بداو تيوشوشو وهما تيتفرقو راجعين لديورهم ومتفاجئين من المجدوب اللي طلع ماساهلش خصوصا عينيه اللي كانو شاعلين بالغضب زرع بيهم الرعب في قلوبهم وعرفو انهم خاصهم ادخلو سوق راسهم فعلا كما قال الشيخ ...
اما رابحة وفتيحة مشاو تيجريو جيهت العربي اللي جاو اسعدوه باش اوقف خنزر فيهم .... ودفع فتيحة اللي مدات ليه يدها تعاونو .... مساعدتهم عاد ماحسساتو باللاهانة وانه تيبان ضعيف قدامهم.
جا واقف بوحدو وحوايجو ولاو مسخين بالغيص. ختو الي مدات يدها تمسح ليه وجهو من التراب دفعها حتى هي بقوة حتى كانت غاذا طيح.
العربي بغضب : بعدي مني ماتقصينيش .
رابحة : ماتعصبش اخوية راه ولد لحرام غفلك ما انا عارفاك كنتي تمرمدو في هاذ التراب
فتيحة : اش عندو مايمرمد فيه امي وخالي العربي تيبان قدامو بحال لخروف. واش ماشفتيش بيد وحدة لوليه ليه يدو وجابو على وجهو في الغيص انشوف يدك اخالي ...لالا هادي بينا تدفعت ليك .... راه غير ثاقة فيك وجه الله اما كوراه هرسها ليك ....
رابحة تتغمز وتقرص في بنتها الفراشة لسانها سليط ماتيعرفش اسكت
رابحة : سكتي ابنت لحرام لا فمك اتهرس هاذ نهار .... وغدايدو اردهم فيك.
فتيحة : وراه قلت غير الصراحة انا شفتو قلبي طاح حدا رجلي تيصحابني غير سحت الليل خرج بالنهار.
العربي خنزى فيها وقال : سدي هذاك الفم ولا نهرسو ليك ... والا كان هو سحت الليل انا وحش الغابة والله لابقات فيهم بزوج. مزال ماتيعرفوش العربي شكون وإلا حط شي حد في راسو إنحيه من على وجه الارض.
رابحة تتحدرو: شوف انا تنعرفك مزيان ... عصابيتك ديما سابقاك .... عنداك دير شي حاجة بلا خباري وبلاما تشاورني.
العربي : مشاورتك هي خلاتني نطيح في هاد الموقف اليوم. ياك قلت ليك خلينا نخطفوها ونردوها قلتي لا خلينا نشوهوها باش اباها تنقص قيمتو وكلمتو قدام الناس . حتى الساعة احنا اللي تنقصات قيمتنا وشوية ماكانت العفريتة غادي تفضحنا.
رابحة : اجي سمعتي شنو قالت منين خرجات .... عنداك المسخوط تكون شافت شي حاجة منين كانت صغيرة.
العربي تيخمم بصوت عالي :هاد الشي اللي فهمت من هضرتها ...و الا كانت شافت شي حاجة مشينا فيها وخصنا نسكتوها قبل ماتفضحنا ودينا للحبس. وكاع هذاك الشي اللي خططنا ليه هذي سنين اتضرب في الزيرو. لالا هاد الشي خطير خاصنا ضروري نلقاو ليه شي حل.
فتيحة: نديرو ليها مادرنا لمها.
رابحة : سكتي ابنت لحرام غادي تفضحينا . سكتي لا اسمعك شي حد واش انتي ماتتعرفيش تهضري بشوي.
فتيحة تتحاول تهبط صوتها: عرفتي امي والله حتى فرحت منين شفتها تزوجات بهاذ المجدوب شفتي شعرو ولحيتو وهو داير بحال شي غول وجهو ماتيبانش . شوفي هربات من العز و شوفي دابت فين ساكنة في خربة وسط الغابة . راه هاذ الشي برد لية غدايدي فيها. اما اباها منين إسيق لخبار غادي احيدها من الحالة المدنية هذي هي لخرى ليها.
العربي معصب : الغبية راكي مافهما والو راه الا مات اباها هذاك المجدوب غادي اولي سيدك في الفيرما.
رابحة : زيدو ياله نمشيو راه خوات الدنيا وبقينا غير حنا ياله نمشيو قبل مايخرج لينا هذاك بوعو ديال رجلها. و منين نوصلو لدار نديرو شي خطة نحيدوهم بها بزوج من طريقنا.
مشاو تيجرو خيبتهم وراهم وبلال حاضيهم من شق الشرجم بقا حاضيهم حتى مشاو .
أنت تقرأ
هروب ليلة الزفاف💍مكتملة💍
العاطفية💎مكتملة💎 ❌حصرية على الواتباد❌ 💥💥🌙🌙⭐⭐ قصة رمضانية ⭐⭐🌙🌙💥💥 🌹📕هروب ليلة الزفاف📕🌹 💞ما أجمل القدر حين يهديك شخصا يغنيك عن الاخرين💞 ⏳⏳لهروب نحو المجهول دائما جميل لأننا ماتنعرفوش شنو جايب لينا ومنين وإمتى وشنو مخبي لين...
