هروب ليلة الزفاف💍مكتملة💍

💍الجزء 78💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 78🌹

دخلات زهرة دافعة كروسة فيها  الصوبا  وطبسيل فيه سطيكات لحم  وواحد اخر فيه كراتان وصلات حداهم وبدات تتحط في الطبلة وهبة تتساعدها وزعو هذاك الشي على الطباسل... من بعد زهرة طلبات من بلال ايجي اتعشا.

جا بلال جلس في راس الطبلة وجلست جنبو هبة وحداها ملاك...

ملاك: بسم الله.
بدات تتاكل.
كذلك هبة و بلال.
بقا تيتسمع غير صوت المعالق منين تيقيصو الطباسل.

زهرة قررت تكسر صمتهم : اسي بلال راه كلمت عمي دريس وغذا غادي ايجي .. فرح مسكين بزاف ... وفرح اكثرية منين عرفك رجعتي.

بلال : مزيان ... أحسن حاجة.

شاف بلال في هبة وقال: عنداك اكون هنا وتمشي تقربي لجردة راه ماتيسمح لحتى واحد اقيص ليه شي نبتة .
هبة : كون هاني...

ملاك : انا بعدا تيخليني نعاونو ... والا توسخت بحال ليوم ... غادي نطلب من هبة تكسالني.

هبة كانت الماكلة غادي تخرج ليها من نيفها .. يالطيف هاد البنت شحال تتفرش... ماتقدرش تسكت

بلال باستغراب : شنو قلتي غادي تعمل ليك هبة.

ملاك: غادي تكسلني .... واش حتى انت ابابا ماتتعرفش شناهو التكسال ...  زعما غادي دوش لية بالصابون البلدي والخرقة.... راه طلعات مني الشعرية ديال بصح.

بلال شاف في هبة باش تشرح ليه لقاها مزنكة اش عند بوها ماتشرح كلشي شرحاتو ليه ملاك.

رجع بلال سول بنتو : مافهمتش اش جاب شعرية للحمام.

ملاك: الشعرية هي الوسخ منين تتكون هبة تتحك لية تيخرج الوسخ وتيتكور بحال الشعرية... وعرفتي شحال ديال الشعرية خرجات مني بزاااف. حيث عمري تكسلت.

بلال ابتسم وشاف في هبة وقال: واش هاد الشي اللي جبتك تعلميه لملاك. عطياها دورة تعليمية في التكسال.

هبة منزلة راسها لتحت ماقدراش تشوف فيه.ولا تتكلم.

رجعات ملاك كملات هضرتها:  راه التكسال مهم ابابا ... راه تيحيد التعب والقلق... شي نهار حتى انت خاص هبة تكسلك حيث تتبان لية ديما مقلق.... ولكن حيث عمرك تكسلتي غادي تخرج منك السباكيتي ماشي شعرية حيث انت كبير.

هنا زهرة وهبة ماقدروش اتحكمو في ريوسهم وبلاما اشعرو بداو تيضحكو    ...  وحتى بلال جابت ليه بنتو الضحكة من براءتها .... هذي كثر من عام اول ليلة بلال  اضحك في دارو.

ولكن كما هبة خلاتو اتحط في هاذ الموقف قرر حتى هو انتقم منها خلاهم حتى سكتو وقال.
بلال : فكرتك مزيانة .
شاف في هبة .. ابتسم وقال: إمتى اهبة حتى انا تكسليني ملاك قالت باللي تيحيد التعب والقلق..

ملاك : اه ابابا وخصوصا هبة متخصصة في التكسال في الاول غادي تحس باللي الجلدة غادي طير من بلاصتها لكن غير تتخوي عليك الماء دافي تتحس بواحد الراحة واعرة بزاااف.

بلال : صافي المرة الجايا تجي هبة تكسلني.

هبة تزنك ليها وجها وبدات تتسرط ريقها وبعفوية قالت : راه تنكسل غير لعيالات ماشي رجال حشومة.

بلال شاف في زهرة وابتسم : كنت باغي نجرب هاذ التكسال لكن خسارة ممنوع على رجال.

زهرة ابتسمت عارفاتو بغا اشد في هبة: اصلا اسي بلال انت خاص راجل اللي كسلك .... راه ماشي ساهل التكسال والله تتسخف البنت.

بلال:  خسارة .... اما محتاج شي تكسيلة..
غمز هبة ووقف وشكر زهرة على لعشا الرائع.

ومشا خرج من الغرفة

هبة ولا وجها حمر اش هاد الاحراج حطاتو فيها ملاك.
شافت في ملاك وقالت : من نيتك راه البنات ماتيكسلوش الرجال .... راه حشومة.

ملاك : مافراسيش ... ولكن الا كنتي مرتو ممكن ...حيث ماما كانت تدوش مع بابا.

هبة وجها ولا مزنك وزهرة تتموت بالضحك .

هبة : ملاك عيب هاذ الهضرة ماتبقايش تقوليها وخصوصا قدام باباك... الحمد لله خرج ذابا كوراه حشمتيني انا وياه..... نوضي ياله تنعسي راه مشا الحال..... زهرة شكرا بزاف على لعشا كان رائع  الله اعطيك الصحة.

خرجو من الغرفة وخلاو زهرة وراهم تتفكر شنو وقع وتتموت بالضحك.