هروب ليلة الزفاف💍مكتملة💍

💍الجزء 55💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 55🌹

شافت فيها هبة وابتسمت : شكرا اختي زهرة.
زهرة : العفو ابنتي . وكما قلت ليك صحيح ملاك صعيبة وعنيدة وماتتسمعش الهضرة وبعد المرات تتخرج لية لعقل . لكن هي محتاجة شي حد اللي افهمها.

هبة : اختي زهرة انا قلت ليك انا ماجاياش كمربية لملاك انا جايا نكون قريبة منها نصادقها ونتعرف عليها . نتصاحبو نقراو مع بعض نلعبو مع بعض نخرجو مع بعض. انا لكلام كلو اللي قالت ليلى . عليها مامدخلاهش لراسي وماغديش ندخلو لراسي . ملاك طفلة اذا خاص اللي اتعامل معاها اولي طفل بحالها واتقرب منها ماشي افرض عليها تنضج قبل الوقت وتنضبط حسب قوانينهم وشروطهم.

زهرة ابتسمت : كلامك ريحني ابنتي واكيد لو كانت جدتها هنا غادي تفرح بزاف. والله اقدرك ابنتي عليها. تخليك ذابا تبدلي حوايجك ونمشي نقلب على ملاك.

هبة : نبدل ونجي نقلب معاكم هههه حتى انا منين كنت صغيرة كان تيعجبني نلعب هاذ اللعبة نتخبا ونخلي كاع اللي في الدار اقلب علية. ههه

غمزات زهرة وشيرات ليها براسها تحت السرير تتبان واحد رجيلة صغيرة . حطات هبة صبعها على فمها تتقول لزهرة سكتي وكملات هضرتها: صافي اختي زهرة نكمل ونتبعك. غير تهناي.

ابتسمت زهرة وخرجات.
هبة جلسات فوق السرير وقالت : ايها الجني الساحر اضهر وبان عليك الامان.

غيرات هبة صوتها ورجعاتو بحال ديال الراجل وقالت: شبيك لبيك الجني الساحر بين يديك.

هبة رجعات صوتها : تنأمرك أيها الجني تقول لية ملاك فين مخبية.

رجعات دارت صوت الجني : هههههه امرك طاعة امولاتي الاميرة ملاك اللي لابسة كسوة حمرا وصباط بيض وزوينة وشعرها زوين وتتشبه للأميرة سندريلا موجودة في قصرها الصغير.

هبة رجعات لصوتها العادي : واين يوجد قصرها الصغير؟

رجعات بصوت الجني : القصر الصغير موجود تحت السرير.

ضحكات هبة : شكرا ايها الجني على المساعدة . تقدر تنصرف في امان.

بقات جالسة والضحكة غالباها : ايتها الاميرة ملاك خرجي من تحت السرير ولا نعيط لجني الساحر اخرجك.

قبل ماتكمل هضرتها خرجات بسرعة .... فعلا اسم على مسمى ملاك صغير ظهر قدام هبة . كيفاش تيوصفوها بالشر وهي بقمة الجمال والبراءة عيونها لكبار بشفارهم الكثيفين وشعرها المايل لشقورية ومبوكليو وبشرتها البيضة فعلا بحال شي اميرة في قصص الخيال.

شافت في هبة وخنزرات
ملاك : انا كاع ماتنخاف من الجني الساحر .

هبة جاوباتها: حتى انا ماتنخافش منو عرفتي علاش حيث كاين غير في الخيال وحتى انتي اقدر اكون عندك جني في الخيال.

ملاك : انا الا كان عندي اول طلب غادي نقول ليه اديك من هنا انا مابغياش مربية.

هبة ابتسمت : وشكون قال ليك باللي انا مربية . راه غير قدام ليلى تنقول مربية. انا راه جابني باباك باش نكون انا وياك اصدقاء نلعبو مع بعض ونقراو مع بعض ونخرجو. لجردة ولبحر المهم نستمتعو مع بعض.

ملاك  مستغربة : يعني الهضرة اللي قلتي لزهرة صحيحة. اللي سمعت وانا تحت السرير.

فعلا هبة اول مادخلات للبيت بانت ليها رجل ملاك تحت السرير وحاولات تخليها تسمع علاش هي جاية باش المقابلة ماتكونش صعيبة وترفضها من الاول لا بالعكس حولات تطمأنها.

هبة ابتسمت : صحيحة الهضرة اللي سمعتي. وخير دليل انني جبت ليك بزاف ديال الهذايا معايا .

ملاك ابتسمت ابتسامه جميلة والفرحة  ارتسمت على عيونها: بصح اعطيهم لية انشوفهم.

هبة : غادي نعطيك لكن بشرط.

ملاك : شناهو.

هبة : اولا غادي نعملو اتفاق صداقة ثانيا غادي تنزلي تغداي معايا حيث انا تنحشم ومابغيتش نتغذا بوحدي مع باباك وليلى بغيت شي صديقة تكون معايا باش نحس انني ماشي غريبة. ثالثا غادي تعاونيني نستف حوايجي لأن الكادوات لتحت البليزة وصعيب نوصل ليهم.

ملاك كثرات عليها الشروط قبلات الشرط الاول والثالث لكن الثاني ديال لغذا ماقبلاتوش.

ملاك: راه ماتنبغيش ناكل مع طاطا  ليلى تتبقا تغوت علية في الطبلة. ومن بعد تتشكي لبابا علية تتقول ليه باللي انا مامربياش وتنلعب في الماكلة و باللي  انا بلعاني تنتعمد نعمل هكذاك غير باش نعصبها.

هبة : وانتي فعلا تتعملي هكذاك.

جوباتها بسرعة وكأنها تتبرأ نفسها: لا انا تنعرف ناكل وماتنوسخش حوايجي.  حيث انا كبرت ومابقيتش بنيتة صغيرة .

هبة : مزيان اوا باش تبيني انتي لباباك انك زوينة ونقية وتتكلي بالعقل والاداب  وأنك كبرتي خاصك تنزلي معايا نتغداو وتعملي قدامو هاذ الشي وهنا غادي اعرف ان ليلى غير تتكذب عليه.
ملاك مترددة : بلاش بلاش نخاف لا تقول لبابا على شي حاجة ثانية واغوت علية بابا