هروب ليلة الزفاف💍مكتملة💍

💍الجزء 15💍

❤️هروب ليلة الزفاف❤️💍

بقلم✍️ أسماء الزروالي⭐🌙

الفقرة 15🌹

خرج بلال ومشات هيبة جلسات فوق واحد الكرسي تتستوعب شنو غادي اوقع من هنا شوية. كانت ضيفة طالبة اللجوء والامان  عند بلال غادي تولي مراتو على سنة الله ورسولو. باش تهرب من الزواج من ولد عائلتها خاصها تزوج بواحد غريب مجهول الهوية .... لا تتعرف أصلو من فصلو ... كل اللي تتعرف عليه أنه حماها ومزال باغي احميها .... لأن قرار الزواج في مصلحتها كثر من مصلاحتو شنو غادي استفد هو غير انه غادي ارتبط بوحدة حياتها كلها مشاكل ... وهاذ الارتباط اقدر اخلق ليه مشاكل حتى هو ...بقات تتفكر عقلها غادي اطلع من بلاصتو ...

قربات منها امي رحمة وطبطبات على كتافها: بنتي القضاء والقدر وفي ظلمات الليل والمطر والرعد وصلك لعند هاد السيد و أكيد كاينة حكمة الله ورا هاد الشي وانا متفائلة خير وبإذن الله نهايتو غادي تكون فرح وهناء وراحة البال.

هبة مستسلمة لأمر الله : ونعمة بالله امي رحمة . فوضت أمري لله وهو حسبي.

ناضت هبة توضات وصلات الفجر وصلاة الاستخارة وماجات فين تكمل حتى كان بلال رجع ومعاه لفقيه وزوج ديال الشهود.

تكتب كتابها على بلال بأسرع مايكن وماجات فين تستوعب  الموقف حتى لقات راسها ماسكا القلم وتتوقع على وثيقة الزواج..... وفعلا ولات مرت بلال . ... الراجل اللي دخلات حياتو هاذي يومين  فقط ولا راجلها مابين الفجر والصبح.

هنأهم الفقيه ودعا معاهم وخرج هو والشهود وخرج معاهم بلال وادم.... بقات أمي رحمة معاها اللي قربات منها وعنقاتها وباستها من راسها

امي رحمة : مبروك عليكم ابنتي الله اكمل بالخير.

هبة شافت فيها مستغربة وقالت : امي رحمة شفتك تيقتي . راه غير حبر على ورق. راه ماشي زواج ديال بصح. اللي خذامة تنهني فية .

امي رحمة  بغات تشد فيها ابتسمات وغمزاتها

امي رحمة : انا بعدا تنعرف زواج هو الزواج . وماعرفنا شنو مخبيا ليام ليكم وبما انكم تزوجتو على سنة الله ورسوله ماعلية غير نبارك ليكم.

هبة عبسات وشافت فيها شوفت هاذ الشي راه مافيهش الضحك واللعب

هبة : امي رحمة .... ماتخلعينيش وتندميني علاش وافقت على هاد الزواج .... اسي بلال غادي اكون عند كلمتو وزوجنا غادي اكون غير بالسمية واكيد غير اوصلني لدار البيضاء غادي اطلقني وكل واحد امشي في طريقو.

امي رحمة تتزير ضحكتها وتتحاول تحكم في ملامح وجها  لأن هبة منظرها وهي مرعوبة تيضحك انطبق عليها مثال طلع تاكل الكرموس نزل شكون قالها ليك ...

امي رحمة  : ايه ابنتي اكيد اكيد . اوا اش غادي نقول الله اعمل ليكم شي تاويل الخير . أ نوض انا نمشي نوجد ليكم لفطور . ونخليكم مع بعض بوحدكم راكم عرسان جداد.

قالتها وخرجات من الكوخ تتضحك وخلات هبة حالة فمها مصدومة من الضحك الباسل ديال امي رحمة.

هبة تتكلم راسها : والله هاد امي رحمة ما سهلاش بزربة تيقات. نوضوها تشطح دارتها بصح.  قالت ليك عرسان جداد. ناقصها غير دير لينا العرس وتجيب النكافة ....

دازت واحد الساعة تقريبا وجات امي رحمة هازة لفطور اما بلال منين خرج مع لفقيه ماعاود رجع.

امي رحمة : اسي بلال مزال مارجعش.
هيبة : لا مزال منين خرج مع لفقيه هو وادم مزال مارجعوش.

امي رحمة : الا ادم مشا يسرح لغنيمات .  سولتو على اسي بلال لكن حتى هو منين خرجو من هنا ماعودش شافو.

هبة : وهذا هو اسي بلال من نهار جيت وهو قليل فاش تيجي لدار مرات نهار كامل تيبقا غابر.

امي رحمة هزات البراد وخوات اناي : راه كان تيقيل هنا لكن على قبلك باش تبقاي على راحتك ولا تيغيب نهار كامل ...قربي ابنتي اجي بعدا نفطرو انا وياك ونخليو ليه حقو.

فطرو وجمعو الطبلة وشحال تحدثو في امور كثيرة.

وكانو ناشطين ونساو موضوع عائلة هبة  اللي كان  وموثرهم...  حتى دخل عليهم ادم تينهج ووجهو صفر.

ادم  : امي امي عتقي لقبيلة كلها جاية لهنا ... وبان لية  معاهم هذاك الراجل اللي سولني البارح ومعاه شي وحدين تيبانو من عائلة هبة زوج عيالات وراجل ...

هبة كانت هازة الصينية بكيسانها ماحساتش براسها حتى طلقتها وبدات كلها تترعد .

قالت ليها امي رحمة تتهدأها : ماتخفيش ابنتي والله اللي قرب ليك نكلو بسناني.

شافت في ادم وقالت : ادم سير عند لفقيه وشوف واش اسي بلال تما .... والا ماكانش ماتجيش حتى تلقاه قلب جيهت جبوحة النحل ولا فين زارع الخضرة .المهم قلب عليه وقول لفقيه اجي بزربة راه هو اللي عارف باللي اسي بلال وهبة مزوجين.

خرج ادم تيجري ومشات امي رحمة بزربة سدات الباب مزيان وسدات شراجم. ورجعت جيهت هبة اللي باقا مصدومة بلاصتها فين خلاتها ....