هروب ليلة الزفاف💍مكتملة💍

💍الجزء 61💍

💍❤️هروب ليلة الزفاف❤️💍

بقلم✍️ أسماء الزروالي⭐🌙

فقرة 61🌹

بلال تعصب حتى هو مارضاش بهبة تقول ليه هاد لكلام اللي جرحو بزاااف ومابقاش حاملها تزيد كلمة وحدة لهذا وقفها بصوتو اللي تيدل على انه فقد حتى هو الصبر معاها: هييببببة .... صافي سكتي .... ماعندكش الحق تدخلي في حياتي وتحكمي علية وانتي ماعرفا والو..... هذيك بنتي واللي ماتو مرتي وولدي وانتي ماعندكش الحق تدخلي نهائيا في هاذ الموضوع ... ولأخر مرة تنحضرك تعاودي تجبديه معايا او تتماداي في هضرتك معايا...... ماتيقيش باللي فعلا راكي مراتي ...... لزمي حدودك معايا.... ونفكرك انتي هنا غير مربية ديال ملاك فحاولي ماتجاوزيش هاذ الحد.... باش مانطرش نتعامل معاك بتعامل مايعجبكش.

هبة لو ماكانش تعلقات بملاك اللي فعلا هي محتاجة ليها بزاف .... ملاك اللي تتشوف فيها صورتها وهي صغيرة ....ملاك اللي حلفات انها توقف معاها وتعوضها على كل حنان وحب فقداتو وخسراتو ..... وحلفات انها اكيد غادي تصالحها مع باباها.  لان بلال وخا تيداعي ان قلبو قاصح الا ان وراه قلب بيض وطيب لمساتو منين كانت وحيدة في الغابة

هبة بهدوء جاوباتو: واخا اسي بلال سمح لية بزاف على التدخل في حياتك.... وانا عارفة راسي باللي زواجنا غير على لوراق وباللي انا غير خذامة هنا.... وتنواعدك انه اخر مرة ندخل في حياتك الشخصية.... ورسالتك راها وصلات .

بلال عرف راسو فقد اعصابو وهانها لكن حتى هي هانتو وكان لازم اوقفها لأنه اصلا مجروح ومامحتاجش حد ثاني ازيد اجرحو.

بلال بعد عليها ومشا جيهت المكتب جلس على الكرسي وبصوت تيدل على الصرامة: اولا انتي هنا كمربية يعني اهم حاجة مسؤولة على سلوكها واخلاقها... خاصك تنظمي وقتها ماشي كلو ادوز لعب راه خاصها تتعلم تقرا وتكتب وهاذي هي مسؤوليتك الثانية... قدرتي على هاذ الشي راه من هنا شهر وشفت كاين شي تحسن راه غادي تبقاي مربيتها وهي غادي تلتحق بمدرستها هنا في المغرب.... ماقدرتيش تنجحي في هاد المهمة  وبقا سلوكها كما هو وماضهر عليها حتى تحسن راه غادي نرسلها لمدرسة داخلية خارج المغرب... وبلاما تنقشيني في حتى قرار....  و دابا يمكن ليك تنصارفي .

هبة فعلا ولاول مرة في حياتها كرهات بلال في هاذ اللحظة . اليوم اكتشفت بلال ثاني تمنات انها ماتتعرفش عليه. بلال الاناني اللي قلبو كحل وقاصح بلال اللي فكرها في أباها وفي طفولتها الحزينة.

خرجات بهدوء من المكتب .... وهي حالفة انها غادي تندمو على هاد الشي وغادي تبين ليه انه كان غالط فيها وفي بينتو وان ليلى هي الشيطان اللي مخرب ليه علاقتو مع بنتو...  هي حاسة أن القصة وراها أحداث سبابهم ليلى..... لأنها حتى هي كانت ضحية مرت رابحة والعربي.

طلعات مهمومة لكن بتحدي وعزيمة غادب تتغلب على أي حاجة غادي توقف في طريقها وطريق ملاك . الماضي يوعيد نفسه وهذاك الشي اللي ماقدراتش تديرو وهي صغيرة غادي ديرو مع ملاك وغادي توقف في وجه أي واحد حاول اغتصب طفولتها واهضم حقوقها وابعدها على أباها.

طلعات وتوجهات مباشرة لبيت ملاك بعدما دقات الباب فتحات ليها ملاك وباين الخوف والشك على وجها باغا تعرف اش وقع مع باباها واش غادي اخليها ولا اجري عليها

ابتسمت ليها هبة ودخلات تبعتها ملاك.
ملاك : واش بابا مقلق منك واش قالك غادي تمشي .... انا عارفاه متيبغينيش نهضر على ماما ... كوراه غوث عليك ومقلق مني ..
  هبة : جلسي وانا نقول ليك شنو وقع ....سمعي مزيان..... باباك وخا فعلا مقلق لكن غادي اخليني نبقا معاك ...لكن عندو شروط .

ملاك فرحانة طرت عليها وعنقاتها: بصح غادي اخليك انا اسعد وحدة اليوم.

هبة جلست وجراتها جلساتها حداها فوق السرير وقالت : حتى انا فرحانة بحالك