هروب ليلة الزفاف💍مكتملة💍

💍الجزء 13💍

❤️هروب ليلة الزفاف❤️💍

بقلم✍️ أسماء الزروالي⭐🌙

الفقرة 13🌹

هديك الليلة حتى واحد فيهم ماجاه نعاس كل واحد تيتقلب في فراشو يمين يسار تقول ناعسين على الشوك.

ومع الفجر سمعو الكلب تينبح وسمعو صوت ادم تيسكتو .بلال خرج من فراشو ولبس هذاك السلهام وقبل مايوصل لباب سمع دقان .

هبة جات واقفة وقلبها تيضرب تقول فشي سباق تتسنا تعرف علاش ادم جايهم مع لفجر.

حل بلال الباب لقا ادم

بلال :  ادم شنو واقع ؟

ادم : سمح لية اسي بلال لكن واحد السيد جا بغا اشوفك .

شاف في هبة وقال: بقاي في فراشك وماتخرجيش نهائيا من هنا. وخا اوقع اللي اوقع.

كلامو وثرها كثر وحسات بالوجع شدها في كرشها من الخلعة.

مشات جلسات على الكرسي وهي ماعالم بيها غير الله الخوف والتوثر ماسكها من راسها لساسها وقلبها غادي اسكت.

تتسنى بلال امتى يرجع وتعرف شنو واقع وشكون اللي هاد الراجل اللي بغاه.

بعد واحد نص ساعة جا بلال ... هي غير شافتو واقفات ....كان هاز في يدو ساك متوسط مدو ليها ومد ليها رسالة

بلال بهدوء تيحاول  مازيدش اوثرها  قال : هاد الشي من دادا ميمونة واللي جا هو ابا موحى جاب ليك حتى هاد الرسالة.

مدات يدها اللي تيرعشو ومسكات من عندو رسالة : فتحاتها لقات فيها فلوس والبطاقة الوطنية ديالها و ورقة .

رجليها مابقاوش قادرين اهزوها وكلها تترعد . شدها بلال من كتافها ورجعها تجلس على الكرسي

بلال:  جلسي وعاد قراي شنو مكتوب انا راه قريتو قدام ابا موحى.
فتحات هبة الورقة وبدات تتقرا غير بعيونها لأن صوتها ماقادرش اخرج.....

الرسالة مكتوب فيها: بنتي هبة نتمنى هاد الرسالة تلقاك على خير ...... بالصدفة هاذ الليلة  سمعتهم تيتكلمو عليك في الدار  والله فرحت منين سمعتهم تيقولو باللي راكي في الغابة مع واحد الراجل الله اجازيه بخير حيث خلاك عندو .... . لكن في نفس الوقت خفت لا اوصلو ليك قبل مايوصل ليك ابا موحى...... حيث ابنتي خليتهم صباح مع الفحر غادي اخرجو من الدار .... العربي رسل شي رجال لفيلاج شي حاضي المحطة وشي حدا السوق وشي حدا القنطرة وجناب الواد .... و ونشرهم حتى في المخارج ديال الغابة والله اعلم تقدرو تلقاو شي حد حاضيكم  هاد الشي كامل باش ماتحاوليش تهربي مرة ثانية ...     بنتي هذاك الصاك فيه شوية من حوايجك وشي ذهب ديال امك كان عندي امانة وشوية لفلوس كيف اجي الصباح شوفي كيفاش تهربي الا لقيتي منين  تهربي. ماتبقايش تم قبل ما اوصلو ليك.... والا كان الراجل اللي انتي عندو تيقرا معاك الرسالة ....  بغيت نقول ليه اولدي هاذ البنت ظلماتها الدنيا بما فيه الكفاية ومابقا ليها في هاذ اللحظة غير الله وانت ربي سخرك ليها ورماها في طريقك .... فالله اجازيك بخير انا خليتها عندك أمانة ساعدها ووصلها البر الامان  ..... راه ماعندها  حد غيرك .....وخيرك عمري ننساه ليك اولدي ....  رعاكم الله وحفظكم .....  ابنتي نتلقاو في الدار البيضاء اللي وصل الاول اتسنا الثاني  . نلقاك في نفس العنوان اللي رسلت ليك .

الله احفظك من كل ادى واسخر ليك ولاد الناس  الطيبين في طريقك
                       دادا ميمونة

هزات عينها وشافت فيه بعيون دابلين ووجه حزين وگأنها فقدات الامل خلاص أباها عرف طريقها وشوف واش تقدر تنجح في الهروب. اللي ولا شبه مستحيل بسباب العربي اللي نشر الرجال ديالو في جميع الاماكن اللي تقدر تهرب منهم  .

قالت بصوت متوتر :  باين لية رحلة هروبي قربات تسالي ونهايتي قربات