هروب ليلة الزفاف💍مكتملة💍

💍الجزء 52💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 52🌹

هذيك الليلة هبة مانعساتش باتت ليل كامل تتقلب في فراشها متشوقة ومتخوفة في نفس الوقت انها ماتنجحش في هاذ المهمة.  ماعرفاتش علاش هي متحمسة لهاذ الموضوع بزاف ... ومتشوقة امتى تتعرف على هاذ البنت اللي محمقة العائلة ... اذن الفجر ناضت توضات وصلات ودعات ربي اعونها كمربية واجعل فيها الخير لهاذ البنية.
سلات الصلاة وهزات القرآن تتقراه حتى وصلات السبعة ديال الصباح خرجات من لفراش ومشات توجد لفطور. وكالعادة شمات هذيك الريحة اللي ديما تتوثرها. بلاما دور قال ليها : ،صباح الخير

دارت غير بشوية لقاتو لابس بدلة رسمية كلاص ومونطو كلاس واصل فوق الركبة تيبان في قمة الاناقة.
ماعرفات واش تضحك ولا تبكي واش تبتاسم ولا تعبس واش تبقا تتحنزز فيه ولا تغض البصر. المهم اللي عتقها هو البراد تشحر وفاض وراها .

دارت بالزربة باش تطفي عليه.
دارت راسها مشغولة معاه. وبلاما ترجع تشوف فيه قالت: معاياش غادي نمشويو لدارك.

بلال مشا جر كرسي وجلس خوا ليه كاس القهوة وبدا يشرب فيه بلا سكر.
بلال : بصراحة عندي موعد مهم. لهذا منقدروش نمشيو الصباح. غادي نخليوها حتى ورا لغذا عاد نمشيو .... تقريبا هذيك الوحدة ...

هبة قالت في خاطرها اكيد عندو موعد مع هذيك الصفريطة ديال ليلى . هي اللي مزوق ليها باش اخرج معاها . حيث البارح ما خرجش.
هبة : صافي ان شاء الله.

حطات الصينية وكل ما جدات لفطور من الفرماج حتى لخبز.

رجع بلال قال ليها: شوفي خليت ليك واحد الامانة حدا النموسية . هبطي عند فاطمة وهي تمشي معاك تتقداي ليك لحوايج. حيث فين احنا ساكنين ماكينينش لمحلات.

هبة : راه عندي فلوسي واقدوني

بلال : عارف عندك فلوسك . ولكن انتي ذابا على دمتي ومن مسؤوليتي  يعني غادي نبقا نصرف عليك  كل ما احنا متزوجين.

هبة جاوباتو بكل هذوء وكأنها تتحاول تفهم شي طفل صغير : اسي بلال غير فهمني ياك تفقنا انك غادي تساعدني باش نوقف على رجلي. ونعتمد على نفسي ونكون قد المسؤولية وقلتي باللي انت غادي توجهني وتساعدني معنويا ماشي مديا حتى نحقق اهذافي. لهذا انا قررت نقبل الخذمة عندك كمربية يعني الحاجة الوحيدة اللي غادي تكون واجبك وحق بالنسبة لية هو مرتبي الشهري .

بلال : مرتبك الشهري جمعيه تحتجيه من بعد ماهاذ الاتفاق اللي بينتنا اسالي. ومصروفك خلال هاذ الفترة هو من واجبي كزوج . والا بغيتي نقبل  بتوضيفك عندي هذا هو شرطي.

هبة طلع ليها الدم مابقاتش مزال باغياه اعطف عليها بغات تعتمد على راسها وتحس بأنها مستقلة بذاتها: ولكن اسي بلال غادي نحس..

قاطعها وكأنه تيحزم في الموضوع  : ماغدي تحسي بوالو هذا حقك . ونعتقد اننا تكلمنا في الموضوع كثر من اللازم.
شاف في الساعة ديال يدو وكمل.

بلال : تنعتقد تعطلت خاصني نوض نمشي. الوحدة ندوز عليك نلقاك واجدة باش نمشيو للفيلا.

هبة وخا كانت تقلقات منين خسرات في التفاوض مع بلال لكن فكرة انها اليوم غادي تبدا خدمتها وحياتها الجديدة خلاتها تتحمس.

هبة : اسي بلال بغيت نسولك.

بلال : تفضلي.
هبة : ملاك بنتك شحال في عمرها.
بلال بقا ساكت وكانه فعلا ماتيعرفش سنها حدو قال بصوت ناشف مافيهش حتى احساس:  تقريبا  8 سنين.

هبة بغات تزيد تعرف عليها كثر: ممكن تقول لية كثر عليها. زعما شنو تتبغي شنو هواياتها انا مستوى دراسي عندها..... يعني حوايج اخليوني ناخد فكرة مسبقة عليها.
بلال ابتسم بسخرية: لغاية اليوم مازال معرفنا ملك شنو تتبغي وشنو تيدور في راسها. اللي تنعرفو انها  طفلة عصبية متمردة علاش هي هكذا وكيفاش او امتى ولات هكذا . مانقدرش نجاوبك.  انا كنت كثير السفر ومشغول بزاااف ماكنتش تنعرف انها تبدلات ولات وحدة ثانية ... ( بقا ساكت وظهر الحزن على وجهو هز سوارت السيارة والتيليفون وقال ) ذابا تعاشريها وتعرفي انا علاش تنهضر.

هبة جاوباتو بكل ثقة : انا اللي تعلمتو من الحياة ان ورا كل شخصية طفل كاينة حكاية وقصة شخصيتها  واحداثها هما اللي تيأثرو وتينعكسو على شخصية الطفل سواء   تأثير ايجابي اوسلبي .

بلال: بصراحة انا ماتنبغيش نهضر في موضوع ملاك .وخا نبغي نشرح ليك صعيب نوصلك او نوصف ليك شكون ملاك لأن جميع وسائل الراحة توفرات ليها وكلشي كان تيبغيها لهذا تصرفتها ماعندهاش حتى مبرر. .
قصد الباب وبلاما يدور قال: ماتحمسيش بزاف مع ملاك راه بزربة غادي تخسري وتفقدي الامل في راسك وفيها.