هروب ليلة الزفاف💍مكتملة💍

💍الجزء 49💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 49 🌹

ليلى خاشيا وجها في صدرو وبصوت كلو انوثة : بلال ماشي حرام عليك تغيب علينا هاذ المدة . وتخلينا نحماقو .  عرفتي اخر مرة شفتك فيها ذابا اربع شهور دازت عليها .. من اخر لقاء بيني وبينك . لكن الحمد لله رجعتي لينا و دابا انا متأكدة ماتغاديش تعاود تخلينا .شوف امك شنو وقع ليها غير من حزنها عليك. مسكينة كانت ديما حزينة عليك.

هبة بقات غير حالة فمها بحال البكمة بصراحة زربات ليلى عليهم بزوج لأن حتى بلال ماعرف باش تبلى.

حاول ابعدها عليه غير بشوية.
وشاف في هبة اللي باقا شدا في مقبض الباب اللي باقي محلول.
بلال : هبة سدي الباب معاك.

هبة  عاد رجعات للواقع: اه اسي بلال واخا.
تمات داخلة ماعرفاش فين تعطي الراس.

حتى شافت فيها ليلى وقالت: الشريفة   فين غادا هزي معاك هذوك السيكان ودخليهم للبيت.

هبة وقفات بلاصتها شافت في بلال وشاف فيها  شوفة انتي اللي خطيتي راسك في هاذ الموقف تحملي . وفعلا رجعات هزات السيكان وتمات غاذا للبيت تحطهم وهو  اوقفها بلال.

بلال :  هبة وقفي ... حطيهم بلاصتهم بلاما دخليهم للبيت.
ليلى شافت فيه مصدومة : علاش؟

بلال : حيث غادي ترجعي منين جيتي.
ليلى : مافهمتش.
بلال خنزر فيها : شكون بقا مع ملاك.
ليلى بدات تتمتم : اه اه بقات مع زهور.
بلال :  وفين مشات المربية ديالها.

ليلى : راه حتى هي استقلات. ملاك المربية اللي تتجي تطفشها. حتى حد مابقا قادر عليها والمدرسة هاذي الثالثة اللي بدلنا ليها  هاذ العام لدرجة راه ذابا ولات جالسة غير في الدار واقدر هاذ العام اضيع ليها.

بلال معصب  : وعاد زايدا انتي مسافرة خارج لبلاد ومخلياها مع الحاجة بوحدها حتى الحاجة جاتها جلطة في الدماغ وكلشي هاذ الشي وقع وانتي مسافرة واش هاذي هي وصيتي اللي وصيتك عليهم واش كان هذا هو اتفقنا ... فنظرك انا علاش دخلتك لداري وحسبتك خطيبتي ماشي باش تهتمي بيهم في غيابي.

ليلى بصوت تتحاول تخليه حزين وضعيف : انا كنت عند وعدي من نهار اتفقنا على هاذ الشي  . لكن ملاك زادت فيه راه ماشي غير امك اللتي تعبت معاها راه حتى انا مرضت. ملاك ولات صعب من الاول ومنين سولت لقيت الحل الوحيد هو ندخلوها لمدرسة الداخلية لأنها تما غادي تتعلم الانضباط وماغادي نكون لا انا لا جدتها تفشش علينا.

بلال: مانضنش ان المدرسة الداخلية حل مناسب.

ليلى : راه هذا هو اللي خلاني نسافر . عندي صحبتي خذامة في الهيئة الدبلوماسية وديما تتسافر و الحل الوحيد اللي لقات لولدها باش اقرا مزيان وانضبط هو تسجلو  في مدرسة داخلية في ابريطانية وهاد الشي انا علاش سافرت . مشيت انشوف المدرسة بعيني وبصراحة مستواها راقي وعرضت عليهم مشكل ملاك قالو لية باللي عندهم ناس مختصين ممكن اعالجوها واسايروها حتى تنضبط. والا وفقتي العام الجاي تلتحق بيهم.
بلال كان واقف مشا جلس ودار يديه بزوج تحت دقنو وبدا تيفكر. جات هي جلسات حداه وحطات يدها هلى كتفو تطبطب عليه وبصوت حزين تتحاول تأثر فيه .
ليلى : صدقني ابلال هذا هو الحل الوحيد باش كلشي ارتاح واولهم الحاجة ماماك و وانت.

بلال باين عليه هاذ الموضوع شاغلو بزاف ومعصبو  : ماعرفتش مزال خاصني نفكر في هاذ القرار.

ليلى تتحلون بصوتها: انا متأكدة انه قرار صائب لملاك بيه نقدرو نعتقوها ماحدها مزال صغيرة.

بلال شاف فيها  : في حالة كاع وافقت وهاد العام اللي تيضيع ليها .ضروري مانلقاو ليها شي حل . شوفي شي مربية تصلي بالمكتب اصيفط لينا شي وحدة.

ليلى : بصراحة ابلال المكتب مابقاش باغي اتعامل معانا قال ليك المربية ماتتكملش شهر تتخرج  واي وحدة تيعرض عليها تربي  ملاك ولات تترفض لان الهضرة تدور بينات المربيات.

بلال : وشنو الحل ذابا. واش انا ماحيلتي للحاجة اللي  في سبيطار حالتها الصحية متدهورة ولا لملاك اللي باغا تحمقني.

ليلى : من نهار ماتت اختي وانا تنحاول نتقرب منها كأم لكن هي رافضاني . ماعرفتش كيفاش نخليها تتقبلني كوراه كاع مانحتاجو مربية.