💍❤️هروب ليلة الزفاف❤️💍
بقلم✍️ أسماء الزروالي⭐🌙
فقرة 161🌹
وخلاها تدور هضرتو في راسها ... بان ليها بلال فعلا ناوي اقصر هاذ الليلة وادوز بيها الليل ...
مشات خرجات البليزة من البلكار فتحاتها لقات اول حاجة عباية كحلة مطرزة بشكل جميل باين جابها ليها من السعودية ... ولقات عباية ثانية ديال الصلاة في الوردي ووحدة ثانية في البيض خرجاتهم وفرحات بيهم ... لقات كسيوات صيفيين شوية قصار وصلين لركبة ولويناتهم باردين وتوبهم بارد حمقوها ... من بعد حلات عينيها اش هاد الشي ملابس داخلية مشبكة اشكال وانواع زائد قمصان نوم مثيرين ماتغطيو والو ... بدات تتقلب وسط هذاك الشي ووجها ولا حمر وفي الاخير قدرات تلقا واحد الروب في البلونكاسي بالبيناور ديالو فايت الركبة مستور مقارنة مع القمصان الثانية ختارتو هو اللي تلبسو لهاذ الليلة . وختارت معاه ملابس داخلية في نفس لون الروب
دخلات دوشات و توضات لبسات بينوار الحمام نشفات راسها لبسات حوايجها من بعد لبسات فوق منهم عباية الصلاة ....
خرجات طلقات الصلاية وبدات تتصلي المغرب ولعشا اللي فاتوها ...
دخل بلال لقاها تتصلي خلاها تتصلي و مشا لبلاكار هز ملابس بيتية شورط قصير وتيشورط في البيض ودخل ادوش ....
هي كيف كملات الصلاة دعات الله ومشات هزات المصحف اللي لقاتو فوق الطبلة وجلسات تتقرا ....
نفس الشي منين خرج بلال بلاما اقاطع قرايتها للقرآن الكريم مشا حل البلاكار جبد منو فوقية بيضة لبساها فوق الشورط وتيشورط ديالو وبدا تيصلي الفروض اللي فاتوه ....
كملات هي قراءة القرآن وهزات عينها اللي جات على بلال تيصلي بخشوع
بقات سارحة تتشوف فيه يمكن بهاذ المظهر ديالو تيصلي زاد فتنها بقات حالة فمها فيه وتتشوف فيه بكل حب شحال تمنات هاذ اللحظة تشوف فيها بلال ... وفعلا هاهي تحققت بفضل الله اللي هداه لطريق المستقيم.
كمل هو الصلاة وبعد ماكمل الدعاء دار عندها لقاها حالة فيه فمها ابتسم ليها وقال : اجي صلي وريا ... اليوم اول ليلة لينا بزوج غادي نكونو فيها زوج وزجة ... اجي نصليو باش ربي ابارك لينا في زوجنا .
وقفات بسرعة وهي فرحانة من طلبو شحال تمنات تصلي وراه هزات صلاية ثانية وفرشاتها وراه .
وبدا هو الصلاة وهي متبعاه ... حتى سالا... دعا دعاء ليلة الدخلة وقرب منها باس ليها راسها .
هي هاذ الصلاة اللي صلات وراه هي اللي فكات لسانها ولقات انها من الواجب عليها تفرحو كما فرحها بتوبتو ..... شافت فيه بعيون كلها حب ووقفات على ركبيها وهي مزال تتشوف فيه قربات منو وباستو في جبهتو .
ورجعات حضناتو بيديها بزوج وحدا وذنيه قالت : بلال انا ماشي تنبغينك او تنعشقك ... انت حياتي وروحي ... انا خاصني نظل العمر كامل تندعي ربي ونشكرو انه جعلك لية قدري ومكتوبي ... ورسلك لية في اصعب اوقات حياتي.... بلال انا تنبغيك وغادي نبقا نبغيك العمر كامل ونسأل ربي إجعلني ليك زوجة حتى في الجنة .
بلال اعترافها بحبها ليه فرحو بزاف هو كان عارف انها تتبغيه لكن كان حاب اسمعو منها ... هز يدو وزاد زير عليها في حضنو وقال: انا فعلا انسان محظوظ وانتي حظي الكبير ... عارف انه ماشي ساهل عليك تقولي هاذ لكلام ... لكن هذا ماتيعني غير حاجة وحدة انه فعلا تتحملي لية حب كبير ... شكرا هبة حبيبة على هاذ الاعتراف اللي فعلا فرحني بزاااف .
بعدها عليه غير بشوية وقال : ياله نتعشاو قبل مانتعشا بيك . ... راه فية الجوع .
وقفات هبة بالزربة وتمات سابقاه للباب متوثر: اه اه حتى انا فية الجوع انا نسبق لكوزينا.
خرجات بزربة وخلاتو وراها تيبتسم .
أنت تقرأ
هروب ليلة الزفاف💍مكتملة💍
Romance💎مكتملة💎 ❌حصرية على الواتباد❌ 💥💥🌙🌙⭐⭐ قصة رمضانية ⭐⭐🌙🌙💥💥 🌹📕هروب ليلة الزفاف📕🌹 💞ما أجمل القدر حين يهديك شخصا يغنيك عن الاخرين💞 ⏳⏳لهروب نحو المجهول دائما جميل لأننا ماتنعرفوش شنو جايب لينا ومنين وإمتى وشنو مخبي لين...
