هروب ليلة الزفاف💍مكتملة💍

💍الجزء 57💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 57🌹

نزلو الدروج بزوج وملاك ورات الطريق لهبة كان لغذا ورا الفيلا كاينا جردة ثانية تم فيها  لبيسين كبير.  داير بيه بحال سقيفة مبنية بحال لبيوتا مفتوحين على لابيسين ومفرشين بالفوتايات . و في راس لبيسين كاينا واحد طابلة بستة ديال لكراسا جالس فيها بلال وليلى تيتحدتو وزهرة تتقاد الطباصل.

حتى واحد مانتبه لهبة وملاك اللي صوت اقدامهم ماتيتسمعش وسط العشب ولانهم عاطيينهم بالظهر من غير زهرة اللي كانت واقفة هاد المرة تتستف الفراشط والمعالق. هزات راسها وقالت مبتسمة والفرحة واضحة على وجها.

زهرة : سبحان الله . واش هاد الشي بصح ولا غير تنتخيل.

شاف فيها بلال وشاف فين تتشوف. دور وجهو هو وليلى . وتتبان ليه هبة قصداهم وملاك ماسكاها في يدها.

ملاك واضح التوثر على وجها بينما هبة تتحاول تزرع ابتسامة ثقة وشجاعة على وجها رغم انها من الداخل متوثرة كثر من ملاك.

ليلى ماحملاتش تشوفهم بزوج وبالاخص تشوف ملاك ماسكة في يد هبة . وحيث هي عندها طريقتها الخاصة باش تتستفز ملاك وتخليها تتعصب وتبان خايبة قدام اباها.

بدات الحوار هي الاولى.

ليلى : اجي انتي فين تخبيتي هاد الصباح وخليتينا تنقلبو عليك اش هاد قلة الادب عاوتاني رجعتي لعاويدك لقدام.
هبة حسات ان يد ملاك زيرات على يدها.
وهنا دخلات هبة : اولا السلام عليكم .
شافت في ملاك وقالت : قولي السلام عليكم وسيري سلمي على باباك.

شافت فيها ملاك بعنين بريئتين وقالت : علاش مابقاش مقلق مني.
هبة ابتسمت : وعلاش غادي اتقلق منك اصلا هو متوحشك كما حتى انتي متوحشاه.
رجعات هبة شافت في بلال وكأنها تترجاه مايغوتش عليها.

وقالت : ملاك ماكانتش مخبية كانت في بيتي تتسناني غير باش تعرف علية . وها احنا تعرفنا على بعض وجينا نتغذاو.
رجعات شافت في ملاك وابتسمت ليها باش تشجعها تمشي تسلم على باباه .

طلقات ملاك من يد هبة ومشات جهة بلال غير بشوية وورسها تيشوف في الارض.
وصلات حداه .
هبة في قلبها تدعي وتقول ياربي اهزها عندو ويحضنها وزودها بالثقة في نفسها. لكن بلال حدو حنا ليها راسو وخلاها تطبع قبلة على خدو.

وهي تقول : السلام عليكم.
زهرة عينها تغرغرو جاوباتها بكل فرح: وعليكم السلام ابنتي المصوابة اجي جلسي هنا نحط ليك تغذاي
كان هذاك الكرسي اللي جنب ليلى  . فامشات مسكات هبة من يدها وجرتها جيهت الطبلة ومشاو لجهة الثانية المعاكسة لي ليلى.

جلسات ملاك في الطرف الثاني اللي ماشي مباشرة قدام ليلى اللي كانت جالسة جنب بلال اللي كان مترأس الطبلة . بينما بقا كرسي خاوي مابين ملاك وبلال اللي اضطرت تحلس فيه هبة.

بلال غير حاضي بنتو وتصرفاتها الهادئة اللي ماتوقعش اشوفها مع اول وصول لهبة . تيشوف ملاك وحدة ثانية غير ملاك اللي تيحكيو ليه عليها.

حطات ليهم زهرة لغذا وبدات ليلى تتهز وتحط لبلال وعاد حطات ليها شافت فيها هبة . وشافت في بلال اللي فهم الغلط اللي دارت ليلى لكن مابغاش اعلق فقط تيراقب وساكت.

هبة دارت عند ملاك وقالت ليها : شنو نحط ليك املاك تكلي.
ملاك جاوباتها:  غير بطاطا وخيار ومطيشة . بربا و خيزو ماتيعجبنيش مداقهم.

ليلى : خاصك تكلي الخضرة كلها باش تكبري.

هبة عملات هذاك الشي اللي قالت ملاك.  اما هي حطات ليها غير لبطاطا ولخيار والخيزو وقالت : حتى انا ماتتعجبنش الباربا . ولكن تنعوضها بخضر وحدا خرى. المهم الاكل اكون صحي ياك املاك.
ابتسمت ليها ملاك كتأكد لكلامها.

ليلى خنزرات في هبة اللي دايرا راسها مامسوقاش ليها هزات الفرشيط .

وهي تقول ليها ليلى : تتعرفي تكلي بيها حيث ماتنضنش تتكالو بيها في العروبية.

هبة جاوباتها في البلاصة: لا تتشبه لمدرا هذيك اللي تنهزو بها الثبن مانضنش تتعرفيها لكن تتشبه ليها وبما انني تنعرف للمدرة نأكد ليك ان الفرشيط حالها ساهل قدامها.

بلال ترسمات ابتسامة خفيفة على جنب فمو شافتها غير زهرة اللي حتى هي زيرات الضحكة غير بزز.

قبل ماتبدا هبة الماكلة قالت : بسم الله.
شافت فيها ملاك وهي تقلدها وقالت : بسم الله.
بداو تياكلو في صمت.

داز لغذا كلو وهما ساكتين ومرة مرة كانت ليلى هي اللي تتكسر الصمت مع بلال مرة نزيدك الخبز مرة نخوي ليك الماء كان كل اهتماهمها وتركيزها داير على بلال وكأن هبة وملاك كاع ماكينين. سلاو لغذا بلا ملاك ماتعمل اي حاجة او تقول شي حاجة خايبة. منين سلاو وقفات هبة هي لولا وشافت في ملاك بابتسامة وكأنها تتهنيها على ادبها ورزانتها خلال لغذا.
ورجعات شافت في ليلى وبلال .

هبة ووجهات كلامها لبلال : اسي بلال .الا سمحتي لينا بغينا نمشيو ندخلو لدار وشكرا على لغذا.

شافت في زهرة اللي كانت تتجمع الطبلة وقالت : زهرة الله اعطيك الصحة لغذا كان بنين.

زهرة : بصحة والراحة ابنتي .

ليلى باستهزاء  : بالسيف اجيك لغذا زويين تنعتقد اول مرة تاكلي شي وليمة بحال هاذي

هبة ابتسمت وردات: بحال الا علمك الله  اول مرة نكل لحم و الخضرة

ملاك مستغربة : واش بصح ؟ شنو كنتي تتكلي.

هبة ابتمست : غير تنضحك مع خالتك ليلى . في لعروبية عدنا اللحم والخضرة الطرية والفواكه تبارك الله كلشي موجود .

ليلى : منين الخير عندكم موجود علاش مابقيتيش تما.

هبة شافت في بلال اللي ياله بغا اجاوبها نطقات هبة : ظروف خاصة وتتبقا لمدينة حتى هي زوينة فيها شي حوايج ماكينينش في لعروبية.

ورجعات سولاتها ملاك : بحالاش.

هبة : بغيتي تعرفي بحالاش تندخلو لدار ونقول ليك بحالاش.