هروب ليلة الزفاف💍مكتملة💍

💍الجزء 53💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
الفقرة 53 🌹

خرج بلال وكان الحزن والاستسلام باين في صوتو . لكن هبة تتقول في خاطرها  : اكيد ورا تصرفتها كاين ضغط كبير كل طفل تيعكس الحالة النفسية والضغوطات التي تيحس بيها وكل طفل هو انعكاس لتعامل الاشخاص الحايطين بيه. واكيد ملاك تصرفاتها لهم اسباب لأنها مزال طفلة صغيرة ماتتميزش الصح من الغلط. والا عرفت سبب المشكل غادي نلقى الحل خاص غير الصبر معاك الالة ملاك. 
ابتسمت وعجبها هاذ التشويق وهاذ التفاءل والحماس اللي تزرع في نفسها.
ملاك حاليا بالنسبة لهبة ماشي غير وظيفة او فرصة عمل. ملاك هي تحدي هي مغامرة هي لغز خاصها تفكو وجميل خاصها تردو لبلال اللي فقد الامل في بنتو وعلاش الا اجر تكتسبو في هاذ الطفلة يتيمة الام ونقدرو نقولو حتى يتيمة الاب اللي سنة كاملة ماشافهاش.

بعدما خرجات هبة هي و فاطمة للقسارية وتقدات اللي خاصها من حوايج وسبابط وملابس داخيلة وشي كسيوات وخا ماشي ديال لخروج غير اوكان قالت نلبسهم بالليل منين تكون بوحدها ومنين اسخن الحال لانهم دابا في شهر ثلاثة شوية ادخل الربيع وابدا اسخن الحال. وشرات شانطة كبيرة باش تجمع فيها حوايجها  وشرات لحتى لمريم وفاطمة حويجات حيث بلال فعلا خلا ليها قيمة كبيرة ديال لفلوس .

رجعات لدار وقدات حوايجها في الشانطة . لبسات مونطو في القهوي كلاص تحت منو تريكو في الابيض وسروال التوب غليض شوية في الكحل. وبوت قصير و قدات حيجابها. فعلا جات انيقة ومحترمة. 

كانت الوحدة فعلا منين وصل بلال اللي دخل و ماعلقش على حوايجها . اكيد غادي تجيه عادية مقارنة مع ليلى اللي طويلة وانيقة وتتبان بحال شي عارضة ازياء .

وصلو لباب العمارة  كان موقف سيارتو تم...  حط الباليزة اللور في الكوفر ووركب جنب هبة . وتوكلو على الله .

دازت واحد ربع ساعة وهما ساكتين . كانت هبة شاغلها موضوع ملاك لكن شغلها حتى بلال اللي تيبان مقلق. وتفكرات الام ديالو اللي في سبيطار قالت نسولو عليها واخا ماتيبغيش اتحدث في امورو الشخصية .
ومنها تتكسر الهدوء والصمت اللي سيطر على أجواء السيارة
هبة :  احم اسي بلال .سمح لية بغيت نسولك.

بلال مركز على الطريق بلاما اشوف فيها : تفضلي تنسمعك.

هبة : بغيت نسولك على الام ديالك كيف بقات؟.

بلال تنهد وجاوبها: مزال حالتها صعيبة ومزال في غيبوبة . تصابت بجلطة في دماغها .ونهار اللي تزوجنا فيه دخلات المستشفى وعملات عملية العملية كانت ناجحة لكن مزال مافقت من الغيبوبة .  حنا حطينها تحت المراقبة. واملنا انها تفيق في اسرع وقت ممكن .

هبة تتحاول تطمأنو : إن شاء الله غادي تفيق من الغيبوبة خاصنا غير ندعيو معاها. وربي قريب يجيب دعوة الداعي اذا دعاه.

بلال شاف فيها هاذ المرة وقال : دعي معاها انتي اللي قريبة من الله وقلبك نقي ممكن انتي يستجيب ليك اكثر مني

هبة عارفة ان بلال ماتيصليش وعمرها شافتو هاز القرآن رغم ان اخلاقو حميدة وصفاتو وتعاملو مع الناس كلها صفات تيوصي عليها الدين لكن هذا ماتيمنعش انه خاصو في يوم من الايام اتوب للخالق واصلي.

هبة: انا ضروري غادي ندعي معاها. لكن حتى انت ممكن تدعي معاها. ربي ماحددش شخص معين او حدد صفات الاشخاص الي ممكن ادعيو ليه ولكن قال  الحق سبحانه وتعالى في سورة البقرة: وإذا سألك عبادي عني فإني قريب أجيب دعوة الداعي إذا دعاني فليستجيبوا لي وليؤمنوا بي لعلهم يرشدون (186). في هذه الآية الكريمة يوضح الحق سبحانه وتعالى أن العباد إذا حافظوا على فرائضه، واستجابوا لأوامره، وابتعدوا عن نواهيه، فإنه عز وجل لا يرد لهم طلبا ولا يخيب لهم رجاء.

بلال بقا ساكت ومركز مع كلامها جاوبها بعدما رجع تيشوف فيها: هاذ الشي علاش قلت ليك دعي معاها انتي.

هبة فهمات شنو قصد بلاما تزيد تحرجو ابتاسمت وقالت: اليوم بالليل نصلي وندعي ليها بالشفاء وتنوض من الغيبوبة .  وان شاء الله ربي اقدرني نصبح صايمة بنية شفاءها وربي يتقبل مني.

هاد المرة بلال طول الشوفة فيها  حتا حشمات هي ولاو حناكها حمر ودورات عينها تتشوف الطريق.

بغات بزربة تبدل الموضوع: ماقلتيش لية فين عندكم الدار.
بلال: في المحمدية.

هبة: واش بعيدا بزاف على الدار البيضاء.

بلال : لا قريبة بزاف بقا لينا غير عشرة دقايق وندخلو ليها.

وفعلا دازت عشرة الدقايق بسرعة.  ودخلو وسط شوارع لكبار ديال المحمدية كان وسط النهار الناس كثار وطريق عامرة وهي فعلا مامولفاش هاذ الصداع والزحام وحتى الدار البيضاء جاتها كبيرة وعامرة وفيها الصداع والزحام وطريق اللي تدوز منها ماتتعرفش كيفاش ترجع منها. خصوصا انها كبرات غير في الجبل والمدينة شافتها غير في لكتوبة والتلفازة اللي في لفيرما ديال اباها.
.وهي ساهية حتى لقات ان السيارة بدات تتخرج من الصداع وزحام والمباني اللي متراصة وحدة حدا وحدة  وبداو تيدخلو وسط طريق ديقة حايط بيها شجر خفيف شوية بدا تيبان قدامها المحيط الاطلنتي اول مرة تشوفو مباشرة حلات فمها وعينها توسعو بحال شي طفلة صغيرة شافت شي حاجة غريبة.

هبة: ماشاء الله سبحان الخالق على منظر شحال زوين . فراسك اول مرة نشوف البحر مباشرة.

بلال: غادي تشوفيه كل نهار حيث الفيلا تطل على البحر وقريبة منو بزاف.

هبة فرحات بزاف بهاذ الخبر هي كانت تتحماق على الواد وتجلس حداه وذابا كاين لبحر.
على الطريق مباشرة على اليد اليسرى كاين باب كبير ديال لحديد. وقف بلال قدامو وكلاكسونا.