هروب ليلة الزفاف💍مكتملة💍

💍الجزء 101💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 101🌹

سالا موسم الشتاء وكما تزاحو الغممات الكوحل من السماء تزاح معاهم الهم والغم على عائلة بلال .... وشرقت شمس الربيع وتفتحات زهورو على حياتهم ... ملاك دومات على المدرسة ...وهبة ولفات الدور الجديد ديالها دور الأم و بلال ولا ماسك الامور الادارية ديال المستشفى ... واكثرية وقتو في الدار البيضاء ... وقليل فاش تيجي لدار ... ليلى من نهار الخطوبة مارجعات ...لكن اليوم تاصلات بزهرة وطلبت منها تجمع ليها حوايجها ... اللي خلاتهم عندهم في الفيلا....

وفعلا هذاك الشي اللي عملت زهرة ...
كان اليوم هو عيد ميلاد ملاك  لكن كلشي ناسيه حتى ملاك ... ماعادا هبة اللي كانت تتمنى غير امتى اوصل باش تفرح ملاك ...  وصلات هبة  ملاك صباح للمدرسة وفي طريقها لدار طلبات من الشيفور  ادوزها وسط لمدينة شرات حلوة كبيرة ومجموعة من الهداية ... ورجعات لدار  وطلعات كلشي خباتو في بيتها وقال مع راسها توصل الربعة ديال لعشيا  تجيب ملاك وتجيبها لبيتها تعمل ليها مفاجأة

وفعلا وصلات لعشية ورجعو لدار ...  اول مادخلو لقاو ليلى جات وطلعات لبيتها باش تاخد حوايجها... هبة مسكات ملاك من يدها وقالت.

هبة : اجي معايا عندي ليك مفاجأة.

ملاك : مفاجأة لية أنا .
هبة : أه ...غير تعالي ..
لقات زهرة خارجة من الكوزينة وهي تقول .
هبة : زهرة تعالي حتى انتي تشوفي المفاجأة اللي وجدت لملاك.

طلعو كاملين للبيت لفوق اول ما وصلو قدام بيت ملاك .
هبة : بلاتي غمضي عينك عاد نحلو الباب.

ملاك متشوقة غير امتى تعرف المفاجأة شناهيا.

غمضات ليها هبة عينها وحلات الباب ... اول ملاك ما حلات عينها ..حلات معاها فمها

كان البيت كلو مزين بنفافخ وفوق الطاولة اللي كانو تيقراو عليها كانت محطوطة كيكة كبيرة  وحداها مجموعة من الهذايا المغلفين

شافت في هبة وهي مامصدقاش
ملاك : ماما واش هاذ الشي ديالي

هبة : اه احبيبة ...كل عام وانتي بخير .اليوم قلت نحتافل معاك بعيد ميلادك.

طارت عليها ملاك وعنقاتها وبقات تتقول: شكرا ماما  على هاد المفاجأة انتي احسن أم في العالم ...انا تنبغيك بزاف.

هبة: حتى انا تنبغيك بزاف بنتي لحبيبة .

من وراهم كانت ليلى واقفة تتفرج فيهم بحقد هزات يدها وبدات تتصفق .
دارو لقاوها بحال ملاك الموت واقفة عليهم.
ليلى : واو على مشهد درامي ماكاينش حتى في الافلام ... ادوي اسليعفانة ... بزربة نسيتي ماماك وولات الخذامة هي ماماك.
هبة بسرعة تعصبات  : ليلى عرفي شنو تتخرجي من فمك

ليلى : انتي منين نكون تنهضر سكتي حيث في نظري غادي تبقاي غير خذامة .... عنداك اصحابك قطعتي الواد ونشفو رجليك.... اما انتي اشنيولة ... نفكرك انكارة الخير ... هاذ التاريخ ديال العيد الميلاد اللي تتحتافلي بيه  هو نفسو تاريخ موت ماماك ولا نسيتي ... انها بسبابك وبسباب عصبيتك  ماتت ... عرفتي لو اعرف باباك انك احتفلتي بهاد اليوم اكرهك كثر ماهو تيكرهك.