هروب ليلة الزفاف💍مكتملة💍

💍الجزء 21💍

💍❤️هروب ليلة الزفاف❤️💍

بقلم✍️ أسماء الزروالي⭐🌙

الفقرة 21🌹

كيف خرجات امي رحمة وادم و قبل ماينطق بلال  بشي كلمة مشات هبة جيهت الساك ديالها وخذات الظرف اللي فيه لفلوس اللي صيفطاتهم ليها دادا ميمونا.

مشات جيهتو وقالت : اسي بلال انا عارف ان اللي غادي نقولو ذابا محال اعجبك . لكن خيرك اللي درتي فية مغرقني . وانا وليت تنحس اني متقلى عليك وعلى امي رحمة .

جبدات لفلوس اللي في الظرف ومداتهم ليهم وقالت : عافك تقبل مني هاد المبلغ وعاون بيه راسك انا تنشوف من نهار جيت أن مدخولك شبه منعدم. وهاذي مساعدة مني ولو غير على المصروف اللي حتى انا عايشة منو.

شاف فيها  كان غا اتعصب عليها ولكن بما انه ولا عارفها  مزيان فعرف  أن تصرفها عن حسن نية

بلال  : اولا انا متنخدش فلوس من امرأة ثانيا الا اعتبرتي تعاملي معاك كرم . فالكرم ماتيحتاجش المقابل. انتي ضيفةو والضياف تيبقاو ضياف حتى تيغادرو الدار واجب علينا غير نكرمهم وهما استمتعو بالضيافة .

شاف جيهت صاكها وقال : خودي دهبك وفلوسك معاك عند امي رحمة خبيهم عندها. راه ثم اكثر امان وخصوصا انا وانتي ماغاديش نقيلو   في الدار.

مشات تتجمع هاد المرة دهبها  وفلوسا وخذات واحد اللبسة سخونة باش حتى هي تبدل حوايجها عند امي رحمة.

ومن بعد وصلها  بلال عند امي رحمة.
قدام الكوخ  ديال امي رحمة وقفات ودارت شافت فيه : اسي بلال تتبان مهموم .... مانقدرش نسولك مالك .... لكن اللي نقدر انقول ليك الله اسهل امرك وافتح بيبان الخير في وجهك ....

بلال حس فعلا انه محتاج لهاذ الدعوة قال : أمين يارب.

هبة : وشكرا بزاف على اللي عملتيه معايا رغم همومك ... زدتك بهمي .... لكن أجرك عند الله .... إن شاء الله في ميزان حساناتك وربي ادخرو ليه أجر في الدنيا والاخرة .

بلال : ماتبقايش تشكريني .... ما عملت غير اللي مفروض اتعمل .... وذابا دخلي ماتبقايش برة .... وماتخرجيش نهائيا ... حتى نرجع ....
دار عطاها بالظهر باش امشي ... هي حسات بقلبها تقبض عليها وكأنه غادي إمشي ومايرجعش .... بلاما تفكر قالت : اسي بلال .

دار شاف فيها  بلال لقاها حاطا يدها على قلبها وعلامة الخوف مرسومة على وجها  وقال : نعم

هبة بصوت حزين : غادي ترجع ياك .... ماغاديش تخليني بوحدي هنا .... عافاك ماتديرهاش مني قلت الصواب ولكن راه ماعندي حد من غيرك انت طوق النجاة ديالي في هاذ المحنة وهاذ الدنيا.

بلال رجع عندها حط يدو على راسها وقال : تنواعدك غادي نرجع . مستحيل نخليك  غادي نبقا جنبك حتى توصلي لغايتك.

تغرغرو عينيها وزيرات على دموعها باش ماينزلوش هزات يدها حطاتها فوق يدو وقالت : وعد ياك .... وعد .

بلال قلب يدو ومسك يدها نزلها قدامها  من فوق راسها وخشا يدها بين يديه لكبار بزوج وقال وهو تيشوف في  عينها : هذا وعد ... وعمر بلال ما خلف بوعدو ...

ابتسمت براحة وقالت : شكرا بزااااف .....
ودعها بلال وتوجه اقضي غرضو اللي شاغلو من الصباح .... رغم كلامو ورغم وعدو ليها  هبة مزال  قلبها مقبوض عليها ماعرفتش السبب ..  تنهدات و قالت  : استغفر الله العظيم....  استغفر الله العظيم من كل ذنب عظيم واتوب اليه.