هروب ليلة الزفاف💍مكتملة💍

💍الجزء 46💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 46 🌹

هبة : انا تاخدت قرري غادي نمشي نقلب على راسي. بارك مانرون حياتك معايا. اللي في جهدك راه درتيه معايا وبارك الله فيك . حتى انت عندك حياتك الشخصية وماملزمش بية  (سكتات وزيرات دموعها اللي بغاو اخونوها انزلو وهي باغا تبان قوية قدام بلال كملت كلامها ) اعرفتي شكون اللي مفروض اكون ملزم بية و احميني و ارعاني هو ابا ماشي انت ابا اللي انا من لحمو ودمو من صلبو ابا اللي انا الذرية الوحيدة اللي عطاها ليه ربي . هو المسؤول ومن غيرو والو اما غيرو راه غير  ناس ربي سخرهم لية وانت واحد منهم . ودادا ميمونة وامي رحمة وابا موحا وادم كلكم ناس ماتتقربو لية بحتى صلة لكن عونتوني ولكن  لإمتى . جا الوقت اللي انا خاصني نعاون فيه راسي ومانعول على حد من غير الله سبحانه.
تعرف والله وليت نحشم من راسي.

بلال كلامها اثر فيه عارف ان ظروفها صعيبة ويمكن الاحداث اللي وقعو ليها البارح هما اللي خلاوها تتاخد هاذ القرار وتفكر بهاد الطريقة ... لهذا خاصو اقنعها انه كان غلط منو وانه غادي ابقا جنبها حتى تحس بالامان .
بلال:  انا قلت ليك باللي غادي نبقا مسؤول عليك حتى تلقاي هذفك وتوصلي ليه وهذيك الساعة انا نخرج من حياتك.

هبة ضحكات بسخرية والم  : كما خرجتي البارح. ياك.. بسرعة ...صحيح البارح وصلتيني لهذفي ولكن ماتسنتيش تتأكد واش هو فعلا ولا ماشي هو واش وصلت لبر الامان كما كنتي تتقول ولا لا.

سحبات يديها هاد المرة غير بشوية وهي تتقاوم دموعها وتتكبتهم الداخل لكن عينها لتغرغرو والحزن الليي بان في صوتها ذكر بلال بالغلط اللي دار.

بلال هاذ المرة صوتو تيبان فيه الاعتذار والتأسف: اللي وقع البارح فعلا الغلط ديالي لهذا ...
قطعاتو هبة : لا متعتذرش ماشي غلطك لانه فعلا ماشي واجبك انت ماغلطيتش انت درتي اللي عليك انا اللي غلطت انا اللي اعتمدت عليك وعلى  دادا ميمونا انا اللي سلمت امري لناس تانيين . تعرف باللي البارح عطاني درس عمري ننساه في حياتي. ..البارح اول مرة نكون بوحدي ونعتق راسي بلاما اكون معايا شي حد . فراسك تعرض علية البارح نشتغل في وكر الدعارة . وفراسك منين فلت منها وقلت للعساس اشوف لية شي فندق نسكن فيه  حيث ماتنعرفش نتصرف في المدينة عرض علية دارو نبات عندو  لكن بشرط انني  نشاركو لفراش. ههههه وقنعتو غير بزز انني مزوجة وماشي ديال لحرام حتى بقيت تنبكي وكنت غادي اتشوه قدام الناس . ومنين شافني تنبكي عاد خلاني نمشي خوف ولا شفقة ماعرفتش  . وحتى لو مرجعتيش كنت اكيد غادي نلقا حل لراسي.  وحتى دابا ها ذالشي اللي غادي ندير غادي نمشي نقلب على راسي .

بلال حتى هو تعصب تعصب من كلامها ومن نفسو لأنه بسبابو هي تخدات هاذ القرار لكن غادي احاول اقنعها تتراجع عليه

بلال: واش تضحكي على راسك واش تيصحاب راسك انتي في الجنة راه اللي شفتي البارح  هذوك وحوشة صغار في غابة كبيرة عامرة وحوشة وكاين ماكبر منهم. فين باغا تمشي ياك   دادا ميمونة ومالقيتيهاش  عندمن غادا تمشي هذي راها الدار البيضاء ماشي لقبيلة . شتي في قبيلتك العربي واباك ماتيبانو والو قدامهم . هنا ممكن ضيعي وتخسري راسك وحتى راسك ماتبقايش عارفاه.

هبة تتحداه  : علاش غادي نضيع . غادي نكري بحالي بحال الناس ونخدم في الحلال بحالي بحال الناس. مابقيتش مزال باغا نبقا معولا على الناس نشري راحتي على راحتهم وفي الاخير لا انا لا هما تيكونو مرتاحين.

بلال بدا  تيحاول اهذأها لأنها تتبان فعلا معصبة  وبقا ليه الحل الوحيد هو ورقة الزواج : هبة انتي مزال على دمتي .

هبة بسرعة جاوباتو : طلقني طلقني وها انت غادي ترتاح مني. طلقني وخليني نحس انني مابقيتش متقلى على حد ( هاد المرة نزلو زوج دمعات خانوها وبصوت باكي الهضرة تتخرج منو غير بزز قالت ) . عافاك طلقني. تقلت على ابا من نهار ماتت امي وهو ماحملنيش ومابقاش باغي اشوفني . عطاني لدادا ميمونا ربتني  لا تزوجت لا عاشت حياتها بقات مقابلاني تخدم وتضرب تمارة غير باش تكبرني . من بعد رجعني باش ازوجني للعربي  هربت ليه وخليت المسؤولية تحملها دادا ميمونا اللي جرا عليها وماعرفتش دابا فين ممكن تكون مشات. ومن بعد انت اللي باش تحميني تزوجتي بية وكنتي بسبابي غادي تموت . ونهار رجعتي لحياتك  الخاصة حسيت فعلا انني متقلا عليك. وانا والله عييت ما نكون عبئ على الناس . طلقني وخليني نتحمل مسؤوليتي . بارك الله فيك اللي عليك درتيه.

بلال: هبة طلاق ماغاديش نطلقك حتى تلقاي دادا ميمونا مستحيل نطلقك في وسط الطريق. ماشي بلال اللي اسمح في الواجب ديالو في وسط الطريق.

هبة هنا فقدات السيطرة على نفسها وطلقات دموعها : ولكن انا ماشي واجبك . انا ماشي واجبك فهمني انت تزوجتي بية غير باش تحميني وبارك الله فيك اللي عليك درتيه. بقات عندي شوية ديال الكرامة خليني محافظة عليها وطلقني.
بلال قرب منها وشدها من كتافها بزوج وقال: انا وعدت ومستحيل نخلف وعدي وخا انتي اللي تطلبيني . باغا تعتمدي على راسك باش تكوني راسك باغا تتغيري تولي هبة لقوية وهبة اللي تتحدا مشاكل الحياة غير بوحدها. غادي تولي اللي بغيتي ...  ولكن ماشي بوحدك انا غادي نعونك توقفي على رجليك وتبداي حياة جديدة ونهار نشوفك انك قد المسؤولية غادي نطلقك. اما ذابا بلاما تفكري في الطلاق