💍❤️هروب ليلة الزفاف❤️💍
بقلم✍️ أسماء الزروالي⭐🌙
فقرة 132🌹
الشيخ نسا رجليه اللي مزال ضعافين وقف وهو ماماصدقش لا وذنيه لا عينيه .... مايمكنش ولدو اكون مزال حي ... ولدو اللي حلم اكون دراعو اليمين .... ولدو اللي حلم اعلمو الخيل و التبوريدا وافتاخر بيه وسط ناس لقبيلة ...
ماوقف حتى وقف حداهم حط يدو على كتف ولدو ... هبة نتابهت لباها الشيخ اللي واقف ورا خوها مامصدقش علامات الدهول مرسومة على وجهو والدموع نازلين شلال... شافت فيه هبة بعيون دامعة لكن فرحانة وقالت : خويا ادم دور شوف شكون وراك
دار ادم وشاف الرجل المصدوم اللي باين التعب والمرض على وجهو الراجل اللي مد يدو تيتفحصو ... مد الشيخ يدو ولمس للادم في وجهو شعرو كتافو ... تيقلب واش اللي قدامو فعلا انسان حقيقي ماشي غير حلم....
الشيخ وسط دموعو : اه انا ماتنحلمش انت ولدي اه ولدي ... من لحمي ودمي ... ياك انا ماتنحلمش.
ادم حتى هو خرجات الكلمة من فمو اللي سنين تمنى اقولها: أبا ...
وكانت هاذ الكلمة كافية باش الشيخ اتأكد باللي هو ماتيحلمش ... جرو عندو حضنو بقوة وبقا تيبكي ....
الشيخ تينين بصوت عالي : ولدي مامتش اعباد الله ... ولدي حي ... ولدي ما متش ولدي حي ... اللهم لك الحمد والشكر يارب ... اللهم لك الحمد والشكر يارب ... كيف عطفتي علية وجبرتي خاطري ... وحميتي لية ولادي ... اللهم لك الحمد والشكر ...
بقا الشيخ تيقولها وتينزل للارض ... حتى وصل للأرض ونزل ساجد سجدة حمد وشكر لله ... الشيخ لما مرض وشد لفراش جعل لياليه ونهارو كلها تسبيح واستغفار وطلب الرحمة والمغفرة لله ... تاب لله سبحانه بعدما فكر المرض باللي الانسان ضعيف قدام الله ... وان الحياة غير مدرسة كلها امتحانات واختبارات وحنا المتمدرسين ... وكل اعمالنا سواء كانت مزيانة او سيئة تنتحاسبو عليها .... وأن الاخرة هي اللي دايما ... واللي بغا انول الجنة والدرجة الرفيعة لازم اعمل في مدرسة الدنيا بجد واتقرب من الخالق وابعد على الاعمال السيئة لأن اخرتنا موت ... فختار تكون صالح مع الله وخلي نصيبك من الحياة اختارو ليك الله لأن هذاك النصيب هو في الاخير غير اختبار من عند الله
جلس الشيخ فوق الفوتاي وسط هبة وادم وحضنهم لصدرو مابغيش افرقهم عليه ... خايف لا افيق من الحلمة ...
شاف في ابا موحى : موحى علاش ماقلتيش لية ولدي حي.
موحى اللي نطق اول مرة قدام هبة : سمح لية اسي الشيخ حيث خبيت عليك هاذ السر لكن كنت مجبر .
هبة مصدومة اول مرة تتسمع ابا موحى تيتكلم .: ابا موحا انت تتهضر ماشي زيزون.
ابا موحا ابتسم ليها وقال : اه ابنتي عمري كنت زيزون واليوم تعرفي علاش كنت عامل راسي زيزون
شاف في الشيخ وكمل : اسي الشيخ ... انت كنتي مسافر ... ومنين رجعتي كانو عينيك مغمضين على الحقيقة ... دورتي بيك لحناش ... و سمعتهم شحال من مرة باغيين اتخلصو من هبة .... هذاك الشي علاش قلت كلما كانو بعاد على هذوك المجرمين كلما أأمن ليهم... انا بصراحة اسي الشيخ شتك تغيرتي بزاف ... ماعرفاتو واش سحر ولا مالك حتى انا مابقيتيش تتحملني ووليت بعيد عليك والعربي ولا هو يدك اليمنى وماعرفتش كيفاش عرف بقصتي وكان ديما تيهددني بيها ... خفت نقول ليك باللي هما اللي قتلو لالة جميلة ماتيقنيش ... وعاد هو امشي اعلم ولاد عمامي فين انا موجود ...فخليت الوقت والزمان هما اللي افتحو ليك عينيك واعرفوك الحقيقة.
.
الشيخ : اش غادي نقول ليك ... ماعرفتش واش نفرح ولا نغضب منك ... ولكن انت اللي عملتيه كبير عتقتي لية ولدي من الموت ... وهاذا كافي باش اخليني نطلب منك السماحة و نشكرك على كل ماعملتيه مع مع ولادي.
شافت فيه هبة وقالت: راه هو اللي هربني نهار العرس ... ابا موحى كان بحال الملاك الحامي لينا ... الله اجازيه بخير
أنت تقرأ
هروب ليلة الزفاف💍مكتملة💍
Romance💎مكتملة💎 ❌حصرية على الواتباد❌ 💥💥🌙🌙⭐⭐ قصة رمضانية ⭐⭐🌙🌙💥💥 🌹📕هروب ليلة الزفاف📕🌹 💞ما أجمل القدر حين يهديك شخصا يغنيك عن الاخرين💞 ⏳⏳لهروب نحو المجهول دائما جميل لأننا ماتنعرفوش شنو جايب لينا ومنين وإمتى وشنو مخبي لين...
