💍❤️روب ليلة الزفاف❤️💍
بقلم✍️ أسماء الزروالي⭐🌙
فقرة4🌹
مشا جيتها تيجري ماعرفها واش انس ولا جن في هاد الليل . لكن اول ماوصل حداها شاف في وجها الملائكي ... فتحات عينها غير بشوية شافت فيه وعاود غمضاتهم.... نزل من فوقها وحملها بين دراعو بحال شي ريشة وتوجه بيها جيهت الكوخ.
دخلها لدفا كانت النار شاعلة في واحد القنت حطها فوق السرير الفردي الوحيد اللي تم كان مصنوع غير من الخشب وعليه بطانية .... حطها وسط لفراش وغطاها كانت تترعد بالبرد. واول مابدات تدفا بدات تتفتح عينها.... ماعرفات راسها واش هي في حلم ولا غير هلوسة تتقول غادي نفيق ونلقا راسي وسط الغابة او ربما انا مت و هذا دفا لقبر.
بصوت رزين وعميق تيعكس هدوء صاحبو تكلم الراجل الغريب
الغريب : حاولي تفتحي عينيك.
فتحتهم وغير شافت في وجهو ...كان قلبها غادي اوقف تتقول ياربي مايكونش شي سفاح ولا مجرم ولا شي حمق....
حلات عينها اللي كلهم براءة و ووجها تيعكس مقدار خوفها منو خصوصا منين بان ليها ان الشخص اللي قدامها طويل وعريض و عينيه حادين لحيتو وشعرو مغطيين وجهو.... لكن تتبان فيهم العدوانية وكأن حضورها قطع خلوتو.... وكأنها عدو دخل لأملاكو الخاصة.... تتشوف فيه بعينين كلهم خوف تتقول اللي قدامها فعلا سفاح او شي مجدوب .
الرعب اللي تزرع فيها والبرد اللي تتعاني منو خلاو جسمها ارتعش وسنانها صوتهم اتسمع.... نزل قرب منها منين شافها في هذيك الحالة .... غمضات عينها بخوف وكانه غادي افترسها.
حط يدو على راسها لقاه شاعل بالحرارة ..... وقف ومشا جيهت واحد الكوزينة صغيرة بدا تيقلب في بلاكارتها. وهي تتقول في خاطرها يمكن تيقلب على شي جنوي ولا سيف ادبحني بيه واتعشا بية حاضياه غير بنص عين ... بقامتو الطويلة وجسمو لعريض تيتسار بكل رشاقة في هداك الكوخ. رجع هاز ابريق فيه شي عشوب خوا ليها كاس وقرب منها.
الغريب : خودي شربي هادا .
بيدين تيرتاعشو مسكات الكاس ورشفات اول رشفة جاتها مرة لكن دافية كانو عشوب اول مرة تشربهم . مشا جيهت واحد لبلاكار فتحو وجبد منو تريكو صوف و تيشورت وواحد السروال ديال التوني قرب منها وعطاهم ليها .
الغريب : بدلي حاويجك راهم فازكين انا خارج شوية ونرجع.
كانت تيتكلم بكل هدوء ... هدوك لحوايج صحيح نقيين لكن باين شبعو لبوس .
بسرعة حيدات تكشيطتها وهي تطلب ان هاذ الراجل المجهول مايأديهاش واكون طوق نجاة ليها.
حيدات السروال المطروز اللي كانو مالين العرس تيتسناو تصبح فيه ...وبكل قرف شافت فيه وحمدات الله انها هربات كوراه في هاذ الوقت تيلعب بيها هذاك المجرم وتيتمتع بجسدها.
جات تلبس السروال الثاني حسات بألم فضيع في رجلها اللي بانت ليها منفوخة... لكن بقات تتحاول حتى لبساتو... وكملات لبيس باقي لحوايج ورجعات لفراشها بدات تتدفا لكن السخانة وحريق الراس ورجليها تيوجعوها طيرو النعاس من عينيها.
دخل مرة ثانية هذاك الراجل.... جاب كاس ديال الماء وخلط فيهم عشوب مطحونين. وعطاهم ليها
قال ليها : شربي هاذو باش تفوتك السخانة.
خدات من عندو الكاس هذا هو املها الوحيد وماعند المسجون اش اقول قدام سجانو غير الطاعة.
شاف فيها حتى كملات كاسها وعطاتو ليه .
شاف جيهت رجلها لقاها مامغطياش مشا باش اغطيها غوتات بالم.
شاف فيها وسولها : مال رجليك واش طحتي عليها.
حركات ليه راسها تتأكد ليه كلامو نسات راسها انها راه رجع ليها صوتها وممكن تجاوبو . لكن هو خلاها على خاطرها.
قرب من رجليها كانت فعلا متورمة ومنفوخة بدا تيشتم غير بشوية شاف فيها لقاها مغمضة عينها من لحريق .
شاف الشال اللي كانت ديراه على راسها حيث هي دايرا الحجاب
قال ليها : اعطيني هداك الزيف اللي على راسك نربط ليك بيه رجلك.
شافت فيه وحطات يدها على راسها دليل على عدم موافقتها. فهم باللي متقدرش تعري راسها قدامو. مشا جيهت لبلاكار فتحو وجبد واحد ليزار قطع منو طرف طويل ورجع جمع ليها رجليها وهي تتقاوم الالم غير بزز تتنين بصمت وزوج دمعات ديال لحريق تينزلو على خدودها.
غطا ليها رجلها ووقف عطاها بظهرو وقال: انت اليوم ضيفة عندي وحالتك محتاجة الراحة نعسي دابا وفي الصباح غادي تقولي لية شنو مشكلتك وشنو وصلك عندي لهنا.في هاذ الليل وفي هاذ الجو .
وشاف لحوايج ديالها اللي في الارض وزاد قال : وفي هاد لحوايج.
مشا جيهت واحد الكرسي اللي حدا الدفاية جلس عليه ورخا جسمو تيحاول انعس اما هي حمدات الله انه ربي سمع دعاها وسخر ليها هاذ الراجل لغريب اللي تيفهم في لعشوب وكلامو رزين ماشي ديال الهبال..ى وتصرف معها بكرم وهي طبعا ماشي تصرفات مجرم.... غمضات عينها وهي حاسة بالامان لأول مرة من بعد ما جبروها على هذاك الزواج
أنت تقرأ
هروب ليلة الزفاف💍مكتملة💍
Romance💎مكتملة💎 ❌حصرية على الواتباد❌ 💥💥🌙🌙⭐⭐ قصة رمضانية ⭐⭐🌙🌙💥💥 🌹📕هروب ليلة الزفاف📕🌹 💞ما أجمل القدر حين يهديك شخصا يغنيك عن الاخرين💞 ⏳⏳لهروب نحو المجهول دائما جميل لأننا ماتنعرفوش شنو جايب لينا ومنين وإمتى وشنو مخبي لين...
