هروب ليلة الزفاف💍مكتملة💍

💍الجزء 36💍

💍❤️هروب ليلة الزفاف❤️💍

بقلم✍️ أسماء الزروالي⭐🌙

الفقرة 36 🌹

اصبحنا واصبح الملك لله.  جا الصباح وخيوط الشمس تسلات من بين زاج البيت اللي ناعسة فيه هبة .فايقاتها ريحة القهوة. حلات عينها غير بشوية.

وجاها المكان غريب.  فجأة وقف بها الزمان والمكان تتحاول تستوعب هي فين.  وبداو ذكريات الامس تيرجعو لذاكرتها بشوية بشوية.  وهي ساهية في الماضي القريب ديالها. حتى دخل عليها بلال بطلتهو الباهية . لابس سروال تجين زرق وتريكو كول مونطي في  القهوي . اول مرة تتنتبه لواسمتو  . سرطات ريقها واستغفرات مولاها . اكيد السخانة ديال البارح مزال مأثرة عليها.

كان بلال هاز في يدو بلاطو ديال لفطور . حليب وعصير بيض مقلي وشوية مطيشة ولخيار وزيتون وجبن وخبز مقطع. المهم فطور متول.

قرب من حدا سريرها. جر واحد طويبلة صغيرة كان حاط عليها جرائد وكتب كحزهم وحط البلاطو فوقها.

بلال بدون صباح الخير بدون مقدمات قال :فاتك السخانة شوية

هبة بخجل : اه بارك الله فيك.

بلال: المهم فطري . وشربي دوا راه حطيتو ليك حدا راسك. وهديك البومادا دهنيها لبلايص اللي عندك زرقين. باش ابراو. وهاذاك لكريم اللي حداها غطي بيه الاثار اللي علو جهك ... راه حتى هو غادي اساعدك باش وجهك ابرا بسرعة

هبة : واخا ان شاء الله.

بلال: انا غادي نغيب واحد الثلاث ايام . وانتي محتاجة الراحة . كلشي غادي تلقايه في الكوزينة. والا احتاجيتي شي حاجا صوني على هاذ الرقم ديال العساس محمود .  ايجيبو ليك.

هبة متفاجأة من قرر سفرو  فين غادي الله اعلم : واخا . ان شاء الله ماغادي نحتاج والو.

لكن في نفسها محتاجة رفقة شخص سواء بلال او امي رحمة مابغاتش تبقا بوحدها وترجع تفكر في الماضي.

بلال : مرة مرة غادي تجي مرت محمود تجمع الدار وتشوف شنو ناقص في الكوزينة.  انتي حاولي غير ترتاحي.

هبة فرحات انه غادي ايجي شي حد اطل عليها وخا تكون حتى لخذامة.

هبة بصوت هادئ : اسي بلال امي رحمة وادم فين بقاو راه نخاف عليهم من العربي ولا ابا اخر مرة هددها الا دخلات مرة ثانية في حياتي

بلال : كوني هانية هما في امان وماكينش اللي اقرب ليهم.

هبة تيقات اكيد بلال مستحيل اخليهم في الخطر

هبة : الحمد لله اهم حاجة اكونو على خير.
بلال: ياله فطري ورتاحي انا غادي دابا .
قبل مايخرج بغات تسألو السؤال اللي شغلها بزاف .

هبة : اسي بلال سمح لية نسولك الا كان ممكن

بلال وخا عارف السؤال اللي غادي تسأل عطاها الاذن باش تسول.

هبة : بغيت نعرف كيفاش نجيتي من الموت ... زعما ماتحرقتيش هذيك الليلة الحمد لله

بلال : القضاء والقدر نجاوني .... عندي ضروف خاصة خلاتني هذيك الليلة نعاد نغادر الكوخ بالليل ....  ونفس الظروف خلااني نغيب عليك هذيك اليومين ... ونفسها هي اللي مخلياني نغيب هاد الايام ... المهم اصلا هذي المناسبة والوقت المناسب اللي غادي نعتذر لك فيهم على الوقت اللي كنت فيه بعيد حتى وقع ليك اللي وقع.

هبة ابتسمت : اهم حاجة جيتي في الوقت المناسب ... واهم حاجة ان ربي كتب ليك عمر جديد ... وانا اللي بالعكس خاصني نعتذر على هاذ المشاكل اللي دخلتك فيهم ... شكرا بزاااف اسي بلال.
بلال : هذا غير واجب . وكما وعدتك غادي نحاول نوفي بوعدي في اقرب وقت ممكن .

خرج وخلاها غير تتحنزز فعلا حسات بفراغ كبير . ماعرفاتش علاش واش حيث تتحس بالامان بوجودو ولا غير هو الوحيد اللي بقا ليها ومهتم بمصلحتها. ولا لانها في مكان غريب عليها اول مرة تكون فيه.
رجعاتها معدتها للواقع اللي بداو مصارينها تيرقصو وزقزقو  تيطالبو بالفطور.  جرات الطبلة كثر وبدات تتاكل لانها كانت تتموت بالجوع.