هروب ليلة الزفاف💍مكتملة💍

💍الجزء 89💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 89🌹

شاف فيها بلال ووجهو  تلون بالحمورية وعينيه ولاو حمرين بالاعصاب. عروقة جبهتو وعنقو ولاو بارزين عض على شفايفو و  شاف فيها شوفا وحدة عرفات راسها قفراتها وحسات برجليها فشلو وقلبها غادي اوقف.

هبةبدات تترجع اللور والخوف ترسم ليها على وجها وبدات تتلعثم  : مممما نسمحش ليك تهيني.

بلال ماجوبهاش حدو تحرك جيهتها خطوة وهي رجعات لور خطوة حتى لسقات مع لمرايا ديال لبلاكار . شد ليها اليد اللي ضرباتو بيها لاصقها ليها مع لبلاكار بقوة حتى تألمت وبقا ماسكها بيدو ومزيرها مع لبلاكار ...  واليد الثانية شدها بيدو الثانية ونزلها جنبو و قرب وجهو من وجها ونفسو اللي سخونة خارجة من نيفو بحال شي نار ديال شي ثنين ... هبة صقلات والنفس ديالها غادي تقطع بالخلعة...
هبة  مابقات عارفة شنو تقول او شنو تعمل تتبان قدامو بحال كمشة : ااااا اسي  سي .. بلال رجوع الله ... تهدن راه انت اللي استفزيتيني

بلال تيصغط على فكو : انتي تمدي  يدك علية.

هبة عرفات راسها قفراتها وتفكرات نهار هرس لعربي يدو قالت ليوم اهرس ليها حتى انا شي  يد.

بلال تيضغط على كل حرف تينطقو :  عرفتي شنو غير جيتيني مرى اما والله تنهرسهم ليك

هبة نزلات راسها لتحت حسات براسها غادي تنهار قدامو بالخوف لهذا بقات غير ساكتة .

كمل بلال كلامو : .... ونزيدك حاجة ثانية انتي راك مرتي على سنة الله ورسوله ... ياعني مزال على دمتي ....ياعني ماكاين لا راجل ثاني لا خطبة لازواج... وهاذ الشي ديما تفكريه وحطيه حلقة في ودانك . يعني حياتك الشخصية ماتخطي فيها خطوة وحدة حتى تراجعي نفسك وتفكري راسك أن راك مزوجة .. ومزوجة براجل ماشي ديوتي ...

هبة ماعجبهاش بلال  اتأمر عليها واتحكم في حياتها ... صحيح هي مراتو ولكن غير على لوراق ... وتفكرات نهار جات الفيلا وأمرها في المكتب ماتدخلش في حياتو الشخصية وهاهي جات الفرصة باش تنتقم منو.

طرطاق فيه عينها وبكل ماتبقا ليها من شجاعة قالت بتحدي : اسي بلال ... نهار جيت لهاد الفيلا كنتي قلتي لية باللي زواجنا غير على لوراق ... وباللي ماعنديش الحق ندخل في حياتك الخاصة وباللي انا غير خذامة هنا وبلاما نصدق باللي انا مرتك ديال بصح ... حتا انا تنقول ليك  اليوم باللي زواجنا غير على لوراق وباللي حياتي الشخصية ماعندكش الحق تدخل فيها وانا حرة في قراراتي ... نهضر معامن بغيت ونتصرف كما بغيت.

بلال بابتسامة جانبية وبعصبية : ذابا انتي تتحديني اه ... اوا الالة من اليوم غادي اتغيرو القوانين ... وبما انك قانونيا مراتي غادي ندخل في حياتك الخاصة كما بغيت ... وهذاك كريم غذا الا جا ونزلتي عندو  ... غادي نهرس ليكم رجليكم بزوج ... والله تندمك اهيبة  ... غادي تشوفي بلال واحد ثاني .

هبة  وبتحدي : غادي ايجي وغادي نزل عندو وغادي نسا باللي راني مزوجة أصلا.

بلال زاد زيرها مع لبلاكار حتى ولا جسمو ملاصق مع جسمها  وقرب فمو من حدا  وذنها وقال  بصوت  هامس وكأنه باغيها غير هي بوحدها تسمع  : هبة ماتحدينيش .... باش ماندمكش.... قلت ليك راكي مرتي يعني مرتي انا بوحدي .... ماعندكش الحق لاتخطبي لا تتعرفي على أي راجل ثاني من غيري ولا حتى تتكلمي معاه ... انتي مراتي انا ... انا بلال السليماني فقط اللي راجلك.