هروب ليلة الزفاف💍مكتملة💍

💍الجزء 18💍

❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 18🌹

جر بلال هبة لعندو وقربها من جسمو وحاط كتافها بيدو  اليمنى وكأنه تيعلن انها تتخصو وديالو واللي تعدا عليها بحال الا تعدا عليه....

بلال بصوت تيترجم شدة الغضب ديالو وموجه كلامو للعربي والناس اللي جاو معاه.

بلال:  اقسم بالله ونعرف ان شي حد من غير هاد عديم الروجولة اللي تيحكر على النسا نعرف انه  قاص او ضرب او هضر بشي كلمة ناقصة في امي رحمة وهبة تنكون مهرس ليه عنقو وفاصل ليه راسو على جسمو .

لولاد اللي كانو شيرو بالحجر على الكوخ  بداو تيتسللو بشوية اللور تيتخباو وسط الناس ...

شاف في هبة اللي تخشات فيه بحال شي بنيتة صغيرة وماسكا في حوايجو  ومنزلة راسها للأرض من الشوهة والموقف اللي حطاتو فيه و هو كان عايش في سلام وهناء  ... وتخشات فيه  لانها فعلا لاول مرة تتحس بالامان وأن شي حد رد ليها الاعتبار ورجع ليها حقها ودافع عليها وبرد ليها غدايدها في الظالم.

شاف فيها بلال وقال ليها بصوت هامس  : هزي راسك وشوفي فيهم  بفخر ... ماتبنيش ضعيفة قدام اعداءك ... انتي شريفة وعفيفة ومادرتيش شي حاجة تخجلي عليها او تخليك تنزلي راسك للارض.

وقبل مايرجع اكمل هضرتو نطقات رابحة: انت اللي غادي اليوم نفصلو ليك راسك على كسدتك . مسكن معاك مرا في دارك بلا شرع بلا قانون . اللهم ان هذا منكر . ولكن دينا تيقول من رأى منكر فل يغيره. وحنا جينا اليوم نغيروه وماشي بلسانا بيدينا .

جاوبها بلال: انا ماشي بحال خوك عديم الرجولة تنتهجم على لعيالات والصغار ونضربهم لانهم ضعف مني.  وهذا اللي نجاك مني اما لو كنتي راجل كوراه هرست ليك فمك. اللي تتفهم في الدين راك تتقدفي محصنة . أشرف منك ومن اللي عقليتهم ونفسيتهم بحالك.  

هاذ المرة وجه كلامو لناس كاملين

بلال  : سمعو نقول ليكم هبة بنت الشيخ البشير اشرف بنات الارض و انا تزوجت بيها على سنة الله ورسوله.... القضاء والقدر وظروفها  جبوها لية حتى  قدام باب داري وانا ماشفت منها غير حسن الادب والاخلاق العاليه لهذا انا تزوجت بها. ولهذا مانبغيش نشوف شي حد تيدور حدا داري او تيطوف بمرتي واللي نسمعو قال كلمة وحدة عليها تتمس شرفها او تتنقص من قيمتهااقسم بالله ماغاديش نرحمو. واللي ماتيق هاذ الزواج  راه فقيه الجامع اكدو ليكم.

فقيه الجامع كان جا مع بلال : يا ناس لقبيلة .... هاد الشي اللي عملتوه اليوم مايرضا بيه لا الله لا رسوله ... معظمكم من حملة القرآن الكريم كيفاش عطاتكم نفسكم تبعو وتصدقو الشائعات وتجيو تهجمو على الناس في ديورهم بدون حق ... قال تعالى:  { {يَا أَيُّهَا الَّذِينَ آمَنُوا إِنْ جَاءَكُمْ فَاسِقٌ بِنَبَإٍ فَتَبَيَّنُوا أَنْ تُصِيبُوا قَوْمًا بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ} } [الحجرات 6]
صدق الله العظيم .... اجتنبو الفتنة انها اشد من القتل ... ياله كل واحد امشي لدارو ... راه عيب وحرام هاد الشي اللي درتوه  اليوم.
شاف لفقيه في بلال وقال : سمح لينا اسي بلال على اللي وقع اليوم من ناس قبيلتي ... وتنواعدك انه عمرو مزال اتكرر ... ( وشاف في العربي وقال) وانت مابغيتش نطبق فيك الشرع لأنك متهجم على بيوت الناس وزارع الفتنة وضربتي الناس في بيوتها ... فاعلى وجه الشيخ البشير ... غادي نخليك تمشي ...جر معاك اللي جبتي وخوي قبيلتنا ...

مسك  بلال هبة من يدها ودار  غادي جيهت الكوخ وهبة رافعا راسها الفوق شااف في ادم وامي رحمة وشار ليهم براسو اتبعوه....  خلا كلشي حال فمو و مصدوم ... لكن اشدهم صدمة هي فتيحة ورابحة وزيد عليهم العربي اللي خسر كرمتو وهيبتو وحبيبتو  في دقة وحدة.