هروب ليلة الزفاف💍مكتملة💍

💍الجزء 100💍

💍❤️هروب ليلة الزفاف❤️💍

بقلم✍️ أسماء الزروالي⭐🌙
فقرة 100🌹

كانت هبة في بيتها بدلات حوايجها بحوايج الدار  ودخلات في السرير تنعس شوية وتدفا . هاذا اليوم الثاني اللي جاتها الدورة الشهرية بالوجع وهذا هو السباب اللي خلاها تقول للحاجة أنها تيضرها راسها عوض كرشها. من كثرة لحريق نعسات على كرشها .... جات زهرة طلات عليها ... لقاتها تتوجع .... وقررات تنزل تعمل ليها كاس لحليب بالعسل وفليو اسخن ليها كرشها..... وزهرة هي طالعة تلاقت ببلال .

زهرة : اسي بلال لاباس عليك ...غبرتي علينا.

بلال : الحمد لله غير مع الجرى.
زهرة : وامبروك علينا ملاك مشات لمدرسة .

بلال ابتسم : اه  ... حتى انا عجبني الحال...
شافها هازة كاس لحليب وطالعة بيه.

بلال : لمن هذاك الكاس.

زهرة : لبنتي هبة مسكينة عيانة فيها لوجع.

بلال بلا حشمة طبيب : وجع الدورة الشهرية ولا شي وجع ثاني.

زهرة عارفاه طبيب وعندو كلشي عادي : وجع الدورة الشهرية .

بلال: اري هذا الكاس نديه ليها وبالمرة ...نشكرها على مادارت مع ملاك.

زهرة ابتسمت : واخا اسي بلال .

عطاتو الكاس ومشا هو مباشرة لبيت هبة .... دق الباب ودخل

هبة خاشية راسها في السرير.

هبة : زهرة اختي ... عافاك سدي معاك هذاك الريدو مابغيتش الضو يدخل ..بغيت نعس شوية مانعستش البارح ... وعافاك الا خرجتي جيبي لية معاك الفوط الصحية راه سالاو لية.

فعلا هذاك الشي اللي عمل بلال سد الريدو وجا حداها جلس فوق السرير جنبها .... كانت ناعسة مغطية و شعرها جمعاه سفنجة خارجين منها بعد الخصلات ...
هبة: جلستي جلستي شي بركة على ظهري حاسة بيه غادي اتفصل على زوج.

مد بلال يدو وبدا يبرك ليها على ظهرها.

هبة خذامة تتأوه : اه اي  اح اه اي اح تم تم ....شوية الفوق .... شوية التحت ..... بركي تم .... اه تم تم بركي مزيان عفاك .... الله ...الله اعطيك الصحة ...

بلال جابت ليه الضحكة ابتسم وقال.

بلال : أمين .... شوية دابا.

بقات ساكتة تتستوعب شكون اللي هضر معاها ... غير ميزات صوتو ...وهي تقفز جات جالسة.. وكالعادة غير شافتو جالس حداها وجها تزنك.

هبة متوترة  : اسي بلال ... اه فين هي زهرة ....واش انت ..... ريدو ..

بلال قاطعها : اه انا اللي سديت الريدو ...وانا اللي درت ليك المساج ... خاصك تخلصيني عليه.

بالحشمة نزلات وجها لتحت ...هز كاس لحليب ومدو ليها.
بلال : هاكي شربي هذا ماحدو سخون.

مسكاتو من عندو بيدين تيقفقفو.
خلاها حتى جغمات الجغمة الاولى عاد تكلم.

بلال : جيت نشكرك على زوج لحوايج.
هبة هزات عينها شافت فيه .... كانو ملامحو تاعبين .... لكن عينيه كانو دافيين وصادقين.

بلال: اولا بغيت نشكرك .... انك قبلتي تكوني أم ملاك رغما انني ماخديتش رأيك وحسيت براسي بحال الا فرضتو عليك .... ثانيا بغيت نشكرك على العمل لكبير اللي عملتي مع ملاك حتى رجعتيها  للمدرسة .... وعدتني ووفيتي بوعدك ... شكرا بزاف.

هبة نزلات وجها وركزات عينها على كاس لحليب اللي في يدها وقالت :. اولا أنني نكون أم لملاك هذا راه شرف لية .... ماتنساش اسي بلال انني بحكم مقطوعة الشجرة ...  وملاك لقيت فيها راسي وعائلتي ... وانا فرحانة وفخورة نكون ليها أم ... وأبدا واش كان هاذ القرارثقيل علية او حسيت انني مرغومة او ملزمة به .... وخيرك اسي بلال كبير .... رغم كل سوء التفاهم اللي وقع بيناتنا .... لكن اول ماتنتفكر وقفتك معايا في أشد اوقاتي تنقول أي حاجة عملتها في حقك قليلة .... بالنسبة للمدرسة ماتحتاجتش تشكرني عليها ... ملاك ذكية كان خاصها غير اللي وجها ... والحمد لله ماصعباتش علية المهمة ...بلعكس حتى هي ساعداتني باش وصلنا لهاذ النتيجة...

بلال بقا تيشوف فيها وفي طيبة قلبها وفي تواضعها وندم على الهضرة اللي قال ليها اول ما خدمات عندو في الفيلا ونهار الخطوبة.

بلال : وبغيت نعتذر منك على أي كلمة جرحتك بيها في لحظة غذب.

هبة ابتسمت وقالت : الحاجة قالت لية منين تتكون معصب ماتتعرفش اش تتقول.... فهذاك الشي علاش ماديتهاش في هضرتك.

صافي اللي جا عليه حصل عليه وهكذا نفسيتو غادي ترتاح ... هبة مامقلقاش منو ... وقرار انها تكون ام الملاك متقبلاه وفرحانة بيه.

وقف بلال : اه نسيت ... سلمات عليك امي رحمة.... وآدم ..كنت مشيت زرتهم البارح ... وراه عطيتهم العنوان .... قالو لية غير ارجع لفقيه من السفر وايجيو ازوروك ....

هبة علات وجها فرحة كبيرة : بصح ...غادي ايجيو والله حتى انا توحشتهم بزاف ... اش خبارهم لاباس عليهم.

بلال : لاباس عليهم وتيسلمو عليك بزاف ...وراه فرحو بزاف منين عرفو باللي راك مزال عايشا معايا.

هبة نزلات راسها بحزن : مساكن الله انعم عليهم حتى هما بالفرحة.... دارو معايا اللي مادروهش عائلتي .

قرب منها بلال مد يدو هز ليها وجها شافت فيه.

بلال :  هبة حنا عائلتك ذابا نساي عليك الماضي وعيشي الحاضر.

نزلات دمعة دافية من عينها .... وابتسمت ..... بلال قلبو رق لحالتها ماسخاش احضنها ووحسسها الأمان ...لكن ...حدو نزل باسها في جبهتها وقال : شربي حليبك ونعسي رتاحي وماتفكريش في حاجة خايبة ..

خلاها مجمدة بلاصتها وتم خارج.

حتى وصل لباب وهو ادور عندها : والفوط الصحية انا نكلم زهرة تجيبهم ليك...

هي نسات موضوعهم  غير قال هضرتو وهي تزنك ودورات وجها.
ابتسم هو وخرج.