هروب ليلة الزفاف💍مكتملة💍

💍الجزء 63💍

💍❤️هروب ليلة الزفاف❤️💍
بقلم✍️ أسماء الزروالي⭐🌙

فقرة 63 🌹
هبة كل مرة تتزيد تكره ليلى وتتزيد تكتشف ماذا تأثيرها السلبي على حياة البنت.

هبة : ماتخفيش ماغاديش تبقاي تلبسيه.... انا اصلا في الليل تنوض نصلي لفجر غادي نبقا نوضك دخلي للحمام وترجعي تنعسي.

ملاك: بصح ... لكن طاطا ليلى ماغاديش تبغي.

هبة : حتى حنا ماغاديش نقولو ليها والو ... غادي ديري بحال اللي راكي مزال تتتلبسيه حتى ادوز هاد الشهر وهذيك الساعة ... كلام اخر غادي اكون.... لهذا الموضوع غادي ابقا سر بيناتنا.

ملاك فرحانة : صافي متافقين.

مشات هبة تخشات حداها في لفراش وقرات عليها لقصة حتى طاب نعاسها ونعسات....

غطاتها هبة مزيان ورجعات للبيتها..... مشات توضات وصلات العشاء ...ومشات تتقرا القرآن

هبة  سمعات الدقان في باب بيتها. سدات القران الكريم وحطاتو .

هبة :  صدق الله العظيم ... تفضل.

كانت زهرة هازة بلاطو فيه لعشا ديال هبة . ابتسمت ودخلات حطاتو فوق طبلة.

زهرة: كلشي خرج اسي بلال وليلى قلت نجيب ليك عشاك هنا...

هبة : شكرا غير عذبتي راسك . كوهبطت تعشيت في الكوزينا معاكم

زهرة : قلت غادي تكوني عيانة من بعد السفر وعرفتك تكوني محتاجة الراحة . قلت نجيبو ليك لبيتك بلاما تتعذبي تهبطي.

هبة : بارك الله فيك....

زهرة تدور في عينها في البيت : ملاك نعسات؟.

هبة : اه عاد ذابا شوية... وراه مادرتش ليها ليكوش.... ماشي حرام بنت في عمرها ثمان سنين ومزال تتلبسوها ليكوش.

زهرة : راه ماشي انا راه ليلى.   وحتى الحاجة ماكانش عاجبها الحال... لكن ماعندها جهد على بنت ختها صحتها عيات وضعافت وهذا سبب من الاسباب اللي خلاو الامور تتبدل

هبة مستغربة: ماعرفتش علاش ليلى تتعامل هاكدا مع البنت رغم أنها بنت أختها. راه الخالة تتكون في مقام الام.

زهرة جرات كرسي وجلسات وبوجه مهموم قالت: عرفتي ان هاذ العائلة بديت معاهم الخذمة منين كان اسي بلال مزال صغير تيقرا. كانو اسرة صغيرة فقط غير الحاجة والحاج بات اسي بلال  وبلال.  كان الحاج والحاجة تيموتو على بعض وتيحبو بعض بزاف. الحاج كان تيسافر بزاف وأحيانا تيبقا بالشهورة لكن الحاجة ماكانتش تتقلق بحكم أن عملو كان نبيل.

هبة : شنو كان تيخذم.

زهرة: كان دكتور كبير جراح في الاول كان تيسافر للبلدان اللي فيها الحروب وبلدان افريقيا الفقيرة من بعد منين عيا ولا بروفيسور ولا تيدرس الطب داخل وخارج المغرب. وبنا مستشفى كبيرة  خصوصية في الدار البيضاء.

هبة : ماشاء الله تبارك الرحمن .

زهرة: بصراحة كان انسان طيب وتيحب اعمل الخير بزاف.. الله ارحمو في هاد النهار.

هبة : الله ارحمو واسع عليه.... مسكينة الحاجة  اكيد حزنات عليه بزاف منين مات على ماقلتي لية كانو تيبغيو بعدهم بزاف.

زهرة بحزن شديد جاوباتها: الحاجة نهار مات الحاج كنا غادي نخسروها ...  مسكينة جات تفيقو في  الصباح لقاتو مات. نهارت حداه واسبوع وهي في المستشفى حتى هي كنا غادي نخسروها لولا السي بلال اللي تبارك الله قوى راسو وتدخل  بعملية جراحية سريعة  لقلبها . وعتقها.

هبة تتحاول تستوعب كلام زهرة سولاتها: واش اسي بلال حتى هو طبيب.

زهرة ابتسمت بحزن: كان طبيب جراح ممتاز بحالو بحال الحاج ومشا على نفس طريقو حتى هو كان تيسافر  وخدم مع اطباء بلا حدود وتبارك الله عليه دار مكانتو في عالم الطب وولا مشهور في الجراحة .

هبة باستغراب:  وعلاش قلتي كان واش مابقاش طبيب.

زهرة عينها تغرغرو بالدموع تتحسر على بلال : مسكين كان تيبغي مراتو نقدر نقول ليك كامليا بنت خالتو كانت اول حب في حياتو كانت مكانتها كبيرة بزاف في قلبو  ... ونهار عملات الحادث كان هو في المستشفى .كانت عندو عملية جراحية خطيرة ديال واحد البنت قدر اعتقها  رغم ان العملية خذات منو عشرة السوايع .  وكيف خرج قالو ليه باللي مراتو جابوها للمستشفى دخل باش اعمل ليها العملية ماقدرش اعتقها حيث كانت حاملة ونزفات بزاف والاسعاف كان تأخر باش وصلها للمستشفى .

هبة بلاما تشعر شهقت ونزلو دموع سريعين على خدها .

هبة : لا حول ولا قوه الا بالله .. مسكين اسي بلال.

زهرة: فعلا مسكين...  راه نهار ليهم في العملية منين ماتت ...كانت اول مريضة تموت في يدو ومايعتقهاش ... حيث العمليات كلهم اللي عمل من قبل كانو ناجحين ... لكن مرتووولدو اللي كان في كرشها ... ماقدرش اعتقهم  .... راه من هداك نهار مارجع دخل لغرفة العمليات حزن بزاااف و قرر ابعد على كلشي.... خصوصا منين عرف باللي مرتو ماتت بسباب بنتو... مابقاش قادر اشوف في بنتو خاف عليها من عصبيتو وتعاملو اللي ولا قاصح... خاف عن غير قصد يأديها وهي مزال طفلة .... لهذا  اختار ابعد.

هبة  قلبها حسات بيه تزير عليها بقا فيها بلال الرجل القوي اللي اكتشفت ان عندو قلب مجروح ومحطم وملاك البنت اللي غير ضحية سوء الحظ
هبة بحزن    :  والله هاد الشي تيألم في القلب بقا فية أسي بلال حاسة بيه مجروح لكن مسكينة ملاك حتي هي  راه كانت غير سبب ماشي عن قصد تسببت في الموت ديال ماماها

خلي جيم وتعليق عفاك 🌹