မိုးကောင်းကင်အောက်မှကလဲ့စား (အတွဲ ၅) မိုးေကာင္းကင္ေအာက္မွကလဲ့စား

1451 (က)...(ခ)

#translator
#ကြွေရွက်ဝါအခန်း (၁၄၅၁ - ခ)(စာစဉ် ၁၀၈- အပိုင်း ၄)
“အထက်နယ်ပယ်သို့ တက်ခြင်း”
ရဲရှောင်၏ ရင်ခွင်ထဲရှိ ကျွင့်ယင်းလျန်မှာမူ ကျေနပ်မှုများဖြင့် ပြည့်နေ၏။
မိုးကြိုးကပ်ဘေးကို ခံခဲ့ရစဉ်က သူမ၏ခန္ဓာကိုယ်အနှံ့တွင် မယုံနိုင်လောက်အောင် နာကျင်ခဲ့ရသည်။
သို့သော် ယခုအခါတွင်မူ သူမစိတ်ထဲ၌ ပျော်ရွှင်မှုများသာ ရှိတော့၏။
ထို့အတူ ကောင်းကင်ရေခဲနန်းတော်မှ လူများအားလုံးလည်း ဝမ်းမြောက်ဝမ်းသာဖြစ်နေကြလေသည်။
ထို့ပြင် သူမတို့စိတ်ထဲ ခံစားနေရသည့် ဖိအားများ၊ စိုးရိမ်မှုများမှာလည်း ကင်းစင်သွားပြီဖြစ်သည်။
ကျွင့်ယင်းလျန်၏ အောင်မြင်မှုက သူမတို့ ကောင်းကင်ရေခဲနန်းတော်၏ အောင်မြင်မှုပင် မဟုတ်ပါလား။
လက်ရှိတွင် ကျွင့်ယင်းလျန်၏ စိတ်စွမ်းအင်လှိုင်းများက မယုံနိုင်အောင်ကို အားကောင်းနေပြီဖြစ်သည်။
တောအထပ်ထပ် တောင်အသွယ်သွယ်ကိုပင် ဖြတ်သန်း၍ ဖြန့်ကျက်နိုင်စွမ်းရှိနေခြင်းဖြစ်သည်။
“ငါမိုးကြိုးကပ်ဘေးကို အောင်မြင်သွားခဲ့ပြီ . . .”
“ကောင်းကင်ဘုံအထက် လူသားနယ်ပယ်ကို မကြာခင် တက်တော့မယ် . . .”
ဤသည်က ကောင်းကင်ရေခဲနန်းတော်အတွက် သတင်းကောင်းတစ်ခုပါပင်။
ရဲရှောင်က မိစ္ဆာကြီးကို အနိုင်တိုက်ခဲ့သော သူရဲကောင်းကြီးတစ်ဦး ဖြစ်သည်။
ထို့ကြောင့် မိုးကြိုးကပ်ဘေးကို ဖြတ်ကျော်၍ အထက်နယ်ပယ်သို့ တက်လှမ်းနိုင်သည်မှာ အံ့ဩဖွယ်ရာမရှိ ချေ။
သို့သော် ကပ်ဘေးကို ဒုတိယမြောက်ဖြတ်ကျော်နိုင်သူမှာ ကောင်းကင်ရေခဲနန်းတော်မှ မူလဂိုဏ်းချုပ်ဖြစ် နေသည်။
ထို့အတွက်ကြောင့် ဂိုဏ်းသူများအားလုံးမှာ ဂုဏ်ယူမဆုံးနိုင်အောင်ပင် ဖြစ်နေကြ၏။
သူမတို့၏ ယခင်ဂိုဏ်းချုပ်ဖြစ်သူ ကျွင့်ယင်းလျန်က ရွှမ်ပိုင်၊ ရှဲ့ဒါယူ၊ လိဝူလျန်နှင့် ဟန်ပိုင်ယွဲ့တို့ထက်ပင် အထက်နယ်ပယ်သို့ ဦးစွာ တက်နိုင်ခဲ့သည် မဟုတ်ပါလား။
ထိုသတင်းက ကောင်းကင်ရေခဲနန်းတော်အတွက် ဝမ်းအမြောက်ရဆုံး သတင်းတစ်ခုပါပင်။
ထိုအချိန် တိမ်မြူခိုးနန်းတော်မှ မိန်းကလေးများမှာလည်း ပျော်ရွှင်လျက်ရှိနေကြ၏။
သူမတို့စိတ်ထဲ ရွှမ်ပိုင်က ပိုင်အာဖြစ်သည်ဟု သံသယရှိခဲ့ကြသော်လည်း လုံလောက်သည့် သက်သေမူ မပြ နိုင်ခဲ့ကြချေ။
သို့သော် ယခုအခါတွင် သူမတို့၏ဥသျှောင်ကြီးဖြစ်သူ ရွှမ်ပိုင်က သတင်းကောင်းကို ပေးပို့လာ၍ အားလုံးမှာ ဂုဏ်ယူများမှုဖြင့် ဝမ်းမြောက်၍မဆုံးနိုင်အောင် ဖြစ်နေကြလေသည်။
တိမ်မြူခိုးနန်းတော်က ချင်းရန်နယ်ပယ်၏ အင်အားအကြီးဆုံး အမျိုးသမီးဂိုဏ်းတစ်ခုအဖြစ် ရှိနေနိုင်ဦးမည် မဟုတ်ပါလား။
“ကျွန်မတို့ စောင့်သင့်သလား . . .”
ကျွင့်ယင်းလျန်မှ ရဲရှောင်အားကြည့်ရင်း မေးလိုက်၏။
ရဲရှောင် မျက်မှောင်ကြုတ်ရင်း ခဏမျှစဉ်းစားလိုက်သည်။
အကယ်၍ သူ့တွင်သာ ရွေးချယ်စရာရှိပါက လိဝူလျန်၊ ဟန်ပိုင်ယွဲ့နှင့် ရှဲ့ဒါယူတို့ကို စောင့်နေဦးမည်သာ။
အထက်နယ်ပယ်သို့ အားလုံးအတူတကွ တက်သွားနိုင်ပါက အကောင်းဆုံးပင် မဟုတ်ပါလား။
သို့သော် သူတို့ရင်ထဲတွင် အမျိုးအမည်မသိသည့် ဖိအားတစ်မျိုးကို ခံစားနေရ၏။
စင်စစ် ထိုဖိအားက ကောင်းကင်ဘုံမှ ဖိအားတစ်မျိုးဖြစ်ပြီး ၃ ယောက်လုံး ခံစားနေရခြင်းဖြစ်သည်။
တဖြည်းဖြည်းဖြင့် ထိုဖိအားက မုန်တိုင်းပမာ ပြင်းထန်သထက်လည်း ပြင်းထန်လာနေသည်။
ထိုအချိန်မျိုးတွင် သူတို့သာ ဆက်နေနေမည်ဆိုပါက အထက်နယ်ပယ်သို့ တက်ခွင့်ရမရကိုပင် မသေချာချေ။
သုံးယောက်လုံးက ယခုနယ်ပယ်၏ ကျင့်ကြံမှုအဆင့်ကို ကျော်လွန်သွား၍ ချင်းရန်နယ်ပယ်တွင် မရှိသင့် သော လူများဖြစ်နေကြပြီ မဟုတ်ပါလား။
အတိအကျဆိုရလျှင် သူတို့ကို ယခုကမ္ဘာကြီး၏ ပညာရှင်များအဖြစ် သတ်မှတ်၍ မရနိုင်တော့ခြင်းဖြစ်သည်။
ထို့ကြောင့် ထိုသို့သောအခြေအနေတွင် အတင်းအကြပ်နေနေမည်ဆိုပါက ကောင်းကင်ဘုံ၏ အပြစ်ပေးခြင်း ကို ခံရမည်သာ။
အကယ်၍ ထိုသို့သာ အပြစ်ပေးခံရပါက မလွယ်ကူနိုင်ချေ။
ချင်းရန်နယ်ပယ်၏ နတ်ဘုရားအပြစ်ဒဏ်က မော်တယ်ကမ္ဘာထက်ပင် များစွာပြင်းထန်နေသည် မဟုတ်ပါ လား။
မော်တယ်ကမ္ဘာက အဆင့်နိမ့်နယ်ပယ်ဖြစ်၍ အပြစ်ပေးမှုမှာလည်း အားနည်းလှသည်မှာ မဆန်းပေ။
ထို့ကြောင့် ယခုနယ်ပယ်၏ နတ်ဘုရားအပြစ်ပေးမှုဒဏ်ကို ရဲရှောင်ပင်လျှင် အလွယ်တကူ မခုခံနိုင်မည်မှာ သေချာလှသည်။
သို့သော် လက်ရှိအချိန်တွင်မူ ရဲရှောင်အဖို့ ထူးခြားသည့် ကျင့်စဉ်များကို ကျင့်ကြံမှုပြုလုပ်ထားသည့် အကျိုး ကြောင့် ကောင်းကင်ဖိအားများကို ပြင်းထန်စွာ မခံစားရသေးချေ။
ရွှမ်ပိုင်နှင့် ကျွင့်ယင်းလျန်တို့မှာမူ ထိုသို့ မဟုတ်။
သူမတို့အနေဖြင့် ဆက်လက်နေနိုင်ရန် ခက်ခဲသထက် ခက်ခဲလာနေပြီဖြစ်သည်။
မည်မျှထိဆိုလျှင် ကောင်းကင်ဘုံက သူမတို့ကို အတင်းအကြပ် မောင်းထုတ်နေသည့်အလားပင် ဖြစ်တည် နေခြင်းဖြစ်သည်။
ထိုခံစားမှုနှင့်အတူ အချိန်မရွေး ပြစ်ဒဏ်ခံရတော့မည့် လူများကဲ့သို့လည်း ခံစားနေကြရ၏။
“လိဝူလျန်နဲ့ ဟန်ပိုင်ယွဲ့တို့က အချိန်မရွေး မိုးကြိုးကပ်ဘေးကျလာနိုင်အောင် လုပ်လို့ရနေလောက်ပြီ . . .”
“လိဝူလျန်က ရှဲ့ဒါယူကို စောင့်နေတာ ဖြစ်နိုင်တယ်၊ ဟန်ပိုင်ယွဲ့ကလည်း သူ့မိသားစုနဲ့သူ စီစဉ်စရာရှိတာ စီစဉ်နေတာဖြစ်လိမ့်မယ်၊ သူတို့အတွက် အချိန်ပိုလိုတယ် . . .”
“နင်ဘီလျူနဲ့ ကျန်နှစ်ယောက်ကတော့ ရှဲ့ဒါယူလောက် အင်အားမကြီးကြသေးဘူးလေ၊ အဲဒါကြောင့် အား လုံး တစ်ချိန်တည်း တက်နိုင်မယ်လို့တော့ မထင်ဘူး . . .”
ရဲရှောင်က ခဏမျှ စဉ်းစားရင်း ပြောလိုက်၏။
“အခုလက်ရှိ အခြေအနေအရ နောက်ကျသွားရင် မကောင်းဘူး၊ ငါတို့တွေ အရင်သွားသင့်တယ်ထင်တယ်”
ရဲရှောင်က ဆုံးဖြတ်ချက်ချလိုက်သော်လည်း မိန်းကလေးနှစ်ဦးမှာမူ အဖြေပြန်မပေးကြချေ။
ရဲရှောင်လည်း အံ့ဩသွားဟန်ဖြင့် မိန်းကလေးနှစ်ဦးအား လှမ်းကြည့်လိုက်၏။
ထို့နောက် ကျယ်လောင်သော အသံဖြင့် -
“မင်းတို့က ဘာဖြစ်နေတာလဲ၊ ဘာလို့ စိုးရိမ်နေတဲ့ပုံပေါ်နေတာလဲ၊ ဘာဖြစ်လို့လဲ . . .”
“ရှောင်ရှောင် . . .”
“ကျွန်မ ရှင်နဲ့အတူ ကောင်းကင်ဘုံအထက် လူသားနယ်ပယ်ကို မလိုက်နိုင်မှာ ကြောက်မိတယ် . . .”
“ကျွန်မ အခုမှ စဉ်းစားမိတာ၊ ကျွန်မ ကောင်းကင်ရေခဲနန်းတော်ကိုပြန်ပြီး ကျွန်မလူတွေအတွက် စီစဉ်စရာ ရှိတာတွေကို စီစဉ်ပေးရဦးမယ်လေ . . .”
“ကျွန်မက အထက်နယ်ပယ်ကို တက်သွားတယ်ဆိုပေမယ့် ကောင်းကင်ရေခဲနန်းတော်က ကျွန်မကို ဆုံးရှံး လိုက်ရမှာ၊ ဒါကသက်ရောက်မှုအများကြီးဖြစ်သွားနိုင်တယ်၊ အဲဒါကြောင့် ကျွန်မ မထွက်သွားခင်မှာ လိုအပ်တာတွေ ပြင်ဆင်ပေးခဲ့ဖို့ လိုတယ် . . .”
ကျွင့်ယင်းလျန်က ခဏမျှ စဉ်းစားရင်း ပြောလိုက်၏။
ရဲရှောင်မှာမူ ကျွင့်ယင်းလျန်၏ စကားကြောင့် ဝမ်းနည်းသွားလေသည်။
သို့သော် ဤသည်က သူ့အတွက် စိတ်ဓာတ်ကျစရာအခြေအနေတော့ မဟုတ်ချေ။
“ဟုတ်တယ် ကျွန်မလည်း ပြန်ဖို့ လိုနေသေးတယ် . . .”
“ကျွန်မ မသွားခင် လုပ်စရာလေးတွေ ရှိနေသေးလို့ပါ . . .”
ရွှမ်ပိုင်ကလည်း လေသံတီးတိုးဖြင့် ပြောလိုက်၏။
“ဘာ . . . မင်း . . .”
“ပိုင်အာ မင်းကဘာတွေ ပြောနေတာလဲ . . .”
ရဲရှောင်က နားမလည်ဟန်ဖြင့် မေးလိုက်သည်။
“လျန်လျန်က ကောင်းကင်ရေခဲနန်းတော်က ဂိုဏ်းချုပ်မလို့ သူလုပ်စရာရှိတာ၊ စီစဉ်စရာရှိတာတွေကို စီစဉ် ပေးခဲ့ရမယ်ဆိုတာ ငါနားလည်တယ် ဒါပေမယ့်  ပိုင်အာ မင်းကတော့ တခြားလူအတိုင်း လုပ်လိုက်စရာမလိုဘူးလေ၊ မင်းက ဘာစီစဉ်ရှိနေသေးလို့လဲ . . .”
“ဪဒါနဲ့ ငါအမြဲတမ်းမေးဖို့မေ့နေခဲ့တာ မင်းက ဘယ်ဂိုဏ်းကလဲ . . .”
ရွှမ်ပိုင် ပြန်မဖြေခင်မှာပင် ကျွင့်ယင်းလျန်က မအောင့်အီးနိုင်တော့ဘဲ ရယ်မောလိုက်သည်။
ရဲရှောင်နှင့်အတူ မတက်နိုင်မှန်း ဖြစ်နေသည့်တိုင် ကျွင့်ယင်းလျန်က ရယ်မောနေသည်မှာ ထူးဆန်းနေသည် မဟုတ်ပါလား။
“တော်တော်ကိုရူးတဲ့ အားဟူပဲ . . .”
“သူက အခုထိ သရုပ်မှန်ကို မသိသေးဘူး၊ ကြည့်စမ်းပါဦး မယုံနိုင်လောက်အောင် ရူးမိုက်တဲ့လူ . . .”
“သေစမ်း . . .”
“ငါ့နာမည်ကိုပဲ ထပ်ပြီးသုံးနေပြန်ပြီ၊ ငါဘယ်နှစ်ခါများ ဒါမျိုးအပြောခံနေရဦးမှာလဲ . . .”
“ငါ့နာမည်က နာမည်ကောင်းတစ်ခုလေ၊ ဘာလို့ ငါ့နာမည်ကို ထုတ်သုံးနေရတာလဲ . . .”
“အင်း ဒါပေမယ့် ဒီတစ်ခါသုံးခံလိုက်ရတာက ငါ့သခင်ကိုဆိုတော့ ငါ့နာမည်က ငါ့သခင်နဲ့ကိုက်ညီတယ်ဆို တာကိုတော့ ဝန်ခံရမှာပဲ . . .”
ရွှမ်ပိုင်လည်း ခဏတာမျှစဉ်းစားလိုက်ပြီးနောက် ထပ်မံဖုံးကွယ်မထားတော့ရန် ဆုံးဖြတ်လိုက်တော့သည်။
ထို့ကြောင့် ရဲရှောင်နှင့် မျက်လုံးချင်းဆုံအောင် ကြည့်လိုက်ပြီးနောက် လေသံတီးတိုးဖြင့် -
“အစ်ကိုကြီး . . .”
“ကျွန်မက ပိုင်အာလည်းဖြစ်သလို ရွှမ်ပိုင်လည်းဖြစ်တယ် . . .”
မိုးကြိုးကပ်ဘေး ခံရပြီးနောက်ပိုင်းတွင် ရွှမ်ပိုင်၏ဝိညာဉ်စွမ်းအားများမှာ ပိုတည်ငြိမ်လာခဲ့သည်။
ထို့ကြောင့် ရဲရှောင်ကို နက်နက်ရှိုင်းရှိုင်း ချစ်သည့်အချစ်များနှင့်အတူ သူမ၏နှလုံးသားကလည်း ပိုသန်မာ လာခဲ့၏။
လက်ရှိအချိန်တွင် ယခင်ကကဲ့သို့ ကိုယ့်ကိုယ်ကိုယ် ထိန်းချုပ်နိုင်စွမ်းမရှိသည့် လူတစ်ဦး မဟုတ်တော့ချေ။
ယခင်ကဆိုလျှင် ရွှမ်ပိုင်က ပိုင်အာဖြစ်မှန်း ရဲရှောင် သိသွားမည်ကို အလွန်စိုးရိမ်ခဲ့ရသည် မဟုတ်ပါလား။
သို့သော် ယခုအခါတွင်မူ သူမကိုယ်တိုင်ပင် ရဲရဲဝံ့ဝံ့ ဝန်ခံလိုက်ချေပြီ။
ထိုအချိန် ရဲရှောင်မှာမူ ပိုင်အာ၏စကားကြောင့် မျက်လုံးများပြုတ်ထွက်မတတ် ပြူးကျယ်သွားလေသည်။
ထို့အတူ ပိုင်အာကိုကြည့်ရင်း ခေါင်းများမူးဝေလာသလိုလည်း ခံစားလိုက်ရ၏။
သူ၏ကျင့်ကြံမှုအခြေအနေ မည်မျှမြင့်မားပါစေ ယခုအခြေအနေက မမျှော်လင့်ထားစရာဖြစ်နေ၍ ရဲရှောင် အနေဖြင့် မည်သို့ စိတ်ကိုထိန်းထားနိုင်ပါတော့မည်နည်း။
“ဘာ . . . ရွှမ်ပိုင် ဟုတ်လား . . .”
“မင်းက တိမ်မြူခိုးနန်းတော်ရဲ့ ဥသျှောင်ကြီး ရွှမ်ပိုင်လို့ ပြောချင်တာလား . . .”
ရွှမ်ပိုင် ပြန်မဖြေ၊ ခေါင်းသာ ညိတ်ပြလိုက်၏။
သူမ၏ မျက်နှာတစ်ခုလုံးမှာလည်း ရှက်စိတ်ကြောင့် နီရဲလျက်ရှိနေလေသည်။
“ကျေးဇူးပြုပြီး ခွင့်လွှတ်ပေးပါ အစ်ကိုကြီး . . .”
“ကျွန်မ အကြာကြီး လိမ်ခဲ့မိတယ် . . .”
ပိုင်အာက တောင်းပန်နေသည့်တိုင် ရဲရှောင်ကမူ အမှန်တရားကို လက်မခံနိုင်သေးချေ။
(ဘာတွေဖြစ်ကုန်တာလဲ . . .)
ရဲရှောင်လည်း သူ့ရှေ့ရှိ မိန်းကလေးကို မယုံနိုင်သောမျက်လုံးများဖြင့် ငေးစိုက်ကြည့်နေမိသည်။
ဝတ်ရုံနက်များကိုသာ အမြဲဝတ်ဆင်ပြီး ရေခဲတမျှအေးစက်လေ့ရှိသည့် ရွှမ်ပိုင်က ချစ်စဖွယ်ကောင်းသော ပိုင်အာအဖြစ် မည်ကဲ့သို့ နေထိုင်ခဲ့ပါသနည်း။
ထိုအချက်ကို ရဲရှောင် စဉ်းစား၍မရနိုင်အောင်ပင် ဖြစ်နေမိသည်။
(ငါအိပ်မက်မက်နေတာများလား . . .)
ရဲရှောင် မစဉ်းစားနိုင်တော့။
ထို့ကြောင့် ကျွင့်ယင်းလျန်အား အကူအညီရလိုရငြား လှမ်းကြည့်လိုက်၏။
ထိုအခါ ကျွင့်ယင်းလျန်မှလည်း မှန်ကန်ကြောင်း ခေါင်းညိတ်ပြလာလေသည်။
ထို့ပြင် သူမ၏မျက်နှာက မရယ်မိအောင် ကြိုးစားနေပုံပါပင်။
“ကျွန်မ ကျွန်မ လိမ်ခဲ့တယ်ဆိုတာ . . .”
“ . . .”
ရွှမ်ပိုင်လည်း အစအဆုံး ရှင်းပြလိုက်တော့၏။
“ကျွန်မပြောချင်ခဲ့ပါတယ်၊ အဲဒါအမှန်တိုင်းပြောနေတာပါ . . .”
“တကယ်တော့ ကျွန်မ ဘယ်သူလဲဆိုတာ အရေးမကြီးပါဘူး၊ ပိုင်အာ ဒါမှမဟုတ် ရွှမ်ပိုင်ပဲဖြစ်ဖြစ်ပေါ့ . . .”
“ဒီဟာနှစ်ခုလုံးက ကျွန်မနာမည်တွေပဲလေ၊ ကျွန်မက တစ်ယောက်တည်းပါပဲ . . .”
“ဘယ်လိုပဲဖြစ်ဖြစ် ကျွန်မက ရှင့်ရဲ့မိန်းမပဲလေ . . .”
ထိုစကားများကိုပြောချိန် ရွှမ်ပိုင်၏ ပါးမို့မို့တွင် နှင်းဆီရောင် ယှက်သန်းသွား၏။
ထို့အတူ သူမ၏နှလုံးသားထဲတွင်လည်း ခံစားချက်မျိုးစုံ ရောထွေးသွားလေသည်။
ထို့ကြောင့် ရဲရှောင်ရှေ့မှ ရုတ်တရက် ပျံသန်းထွက်ခွာသွားတော့သည်။
ရဲရှောင်မှာမူ ကူရာကယ်ရာမဲ့သလိုဖြစ်နေသော ရွှမ်ပိုင်ကိုကြည့်ရင်း တုန်လှုပ်လျက်ရှိနေသည်။
သို့သော် ခဏအကြာတွင်မူ ကျယ်လောင်သော အသံဖြင့် -
“ဟုတ်တယ် ..  .”
“မင်းက ဘာပဲဖြစ်ဖြစ် ငါဂရုမစိုက်ဘူး . . .”
“မင်းက ငါ့မိန်းမ၊ မင်းကငါ့ရဲ့ ပိုင်အာပဲ . . .”
“ဘာတွေပဲဖြစ်နေပါစေ၊ ဘယ်နေရာပဲရောက်နေပါစေ မင်းကငါ့မိန်းမ ငါ့မိန်းမပဲ . . .”
ရဲရှောင်လည်း ပျံသန်းသွားသည့် ရွှမ်ပိုင်ကိုကြည့်ရင်း အော်ဟစ်လိုက်ပါတော့သည်။