الحلقة(4)
في حوش الحاج فرج
كانوا مقعمزين العيله مع بعض في غرفة المعيشه الحاج فرح ومرته أمينه ونجيب وعبدو وأصيل وأريج وندى وجومانا كانت تغسل أماعين العشي في المطبخ"الأماعين عليها😁"
كانوا يهدرزوا البنات مع خوهم أصيل وعبدو يتفرج مع بوه ع أخبار ويتناقشوا فيها وأمينه تسمع فيهم وتشارك مرة مرة
ونجيب في عالم تاني
كملت جومانا ومشت للدار خشت وهي تقيم في شعرها فوق كعكه وقعمزت وتقول : شكلها زردتكم هالمرة مليحه
أصيل : وأني من أمتى زرادي مش ملاح !!
جومانا: هههههههههههه قصدي اللي قصيت من نومتك ونضت المغرب بش تحكيلنا عليها أكيد فيها حاجه زياده
أصيل: تبي الحق إيه معانا قروب شراقه مش عادين فرهده وجو مليح
ندى: وين تعرفوهم ؟
أصيل: قروب في الفيس
اريج : سعدودكم أنتم الأولاد زرادي ورحلات وجو وحني مردومين في الحوش
ندى: أنتي امتى تقعدي في الحوش ديما وإنتي في السوق ولاعند صاحبتك ولامعزومه ولاعازمه في كافي أو مطعم
ضحكوا جومانا وأصيل
أريج: نحكي ع الرحلات للبر والبحروالطلوع برا طرابلس والزرادي والبيتان والحريه اللي عندهم ياجاهله
ندى:😒😒😒😒
جومانا: أيه وشنو درتوا
أصيل هذا ياستي شوا كسكسي رشده جاريه فتات رز بالخلطه شنو بنقولك أسبوع وحني ناكلوا
امينه ركزت معاهم : ماشاء الله عصبان كيف جت بنته
اصيل : اطلع طوووول ياأمي حاجه ماصارتش
عبدو: ياودي خير من عصبان أمي وحناي ماظني!!
أصيل : وراسك ياغالي ماذقت زيه
جومانا: معاش تحلف إلابربي
أريج بهمس: بدينا ...
سمعتها جومانا وطنشت
أمينه : ماشاء الله مرة تانيه اديروه خلولي بش نذوقه ونشوف
أصيل : حاضر ياغلاي تو نسقوا مع الشراقه في الربيع
ندى: قصدك العصبان داروه الشراقه ؟؟
أصيل :أيه هو ورز بالخلطه
ندى : الله الرز بالخلطه متاعهم قداش خاطري نذوقه
جومانا : حتى أني
"حتى أني 😁"
الحاج فرج : خلاص اني شحني تم بنوض نرقد
أمينه: حتى أني نايضه خلاص
البنات والأولاد تصبحوا ع خير
أمهم وبوهم: وأنتم من أهله
وكملوا سهرياتهم وكمل عمك أصيل يحكي ع الزردة
أريج: نشبح فيك ع الفيس تنزل في الصور الماكله أكثر حاجه سهفتني البيتزا ع حطب
أصيل: مانحكيلكش ع بنتها خيال
أريج : سمسام ....
ساد الصمت المكان عبدو فنص في أريج وأريج عيونها تعلقوا في نجيب وكلهم شبحوله يحسابوه سمعها لكن لاحياة لمن تنادي ...
عبدو بهمس : ادوي زين
ندى: باهي ماسمعك ره ليلتك زرقا
أريج شقلبت عيونها: إيه ومن دايرها البيتزا ؟
أصيل :الشراقه
جومانا : ماشاء الله شوركم مادرتوا معاهم شي
عبدو : لادارو كيف عاد منو اللي ياكل
جومانا وندى ضحكوا
أصيل : لاوالله درنا الرشده الجاريه والكسكسي حاجه صح
ندى: ماشاء الله الشراقه فرهوديين ومتاعين جو
أريج: خودي واحد منهم
شبحولها كلهم
نجيب : أريييييييج انتلفي لدااااارك ياحيوانه
أريج ماتت من الخوف بلا حس ولامس ناضت زيها زي البنت الطيبه وطلعت طول
نجيب ناض خلاص حتى أنتم نوضوا أرقدوا وطلع
جومانا قعدت تشبحله لين طلع وقالت: بكل مش عاجبني فيه شي
ندى: حتى أني لاحظت قبل يناشب فيا ولازم يشدني من شعرني لما يشوفني ليه مده مادارها
عبدو: ولما يديرها تبكي وتنفخي في راس أمي وتقول خيره ولدك راسه وراسي كلموه 😒
ندى: 😑😑😑
أصيل: بالك حاجه في الخدمه
جومانا : مش عارفه إن شاء الله خير وخلاص
كلهم : إن شاء الله
ربيع: هو هذا كول حار وبعدين عيط يابطني
عماد: هو ماصدق قتله ديرها حاره صب فيه حكة الفلفل الأحمر وحط فيها عشرة قرون فلفل أخضر
الشيخ خاش بالشاهي وطاسة لبن
الشيخ: المؤمن لايكذب
وائل: طويسه خضرا هات هات
الشيخ : خود.لبن تو يهدي شويه
ربيع: تو مش يزيده
الشيخ : ماأظنش
عماد: هات أي شي وخلاص
وائل: شنو جو العام في هاليومين
ربيع : زي ماهو
وائل: هي هي شكلها
الشيخ: الحمد لله ع كل حال وربي يصلح البلاد والعباد
ربيع: بنقوللكم شي لكن بالله ماتنفعلوا
وائل : شنو
ربيع : طلقت المراة
الشيخ عصب ع الآخر: درت اللي في راسك ولا شتت عيلتك في سبه دوة فاضيه تريحت توا كويس مليح بكل ياربيع ناض وطلع من حداهم
عماد: ع خاطر قطاف فارغ طلقتها وأنت ماخديتها لين قريب هبلت
ربيع: مافيش نصيب بينا خلاص مش بالسيف
عماد: بعد ولاعندك منها 3صغار !!!
ربيع: ترا فكوني تقول أول واحد يطلق أهوا وائل مطلق وعنده الصغار ،،قعد يشبحله وائل
عماد: وائل وضعه مش زي وضعك
وائل: غلطه عمري أني طلقت ليا فوق 3سنين نرقد نادم وأنوض نادم أسباب تافهه تخليك عمرك كله عايش بحسرة الندم
ربيع: أني مش حنندم وأحسن حاجه درتها إني طلقت وكل واحد حر في حياته خدي مفاتيحه وتليفونه وطلع
عماد: لاحول ولاقوة إلابالله
وائل: خليه تو يرده الحيط نعرفه يحبها هلبه مرته مش يطول طلاقهم
عماد: ياودي ماأظنيش القصه كبرت هلبه بيناتهم
وائل: لاحول ولاقوة إلا بالله وخلاص، توا سليمان مستحيل يطلع من داره وهو هادي حالته
عماد إيه أني بنركب نرقد
وائل جاي معاك....
الشيخ في داره
مقعمز يقرا قرآن بش تهدا أعصابه قدامه اللاب توب مفتوح وعالق بالنت
كمل قراية قرآن بعد هدي وفجأة جوه إشعارات خش ع الفيس وقعد يشوف فيهم
************
ندى: بنت خالتك ادير في جو بايخ منزله صورة ايدها ع الفيس وكاتبه فووقها شعر تي ماتوا من زمان اللي يديروا في الجو هذا
جومانا : مالك ومالها فوتيها
ندى: ووووك ع النفاق ياااربي رقية خاشه كاتبلها ماأروعك
وهي يومتها تاكل في لحمها وهي تقرم فيها لين جتها تخمه
جومانا: أعوذ بالله؛ به توا إنتي ماإديريش زيها ؟!
ندى : اععععع لحمهم معفن خل نسكر ونرقد خير
جومانا : أستغفر الله ربي يهدي وخلاص
ندىمتغطيه ودارت روحها ماتسمع في شي
جومانا في نفسها : لازم نعلق الكلمه اللي في رقبتي بنقولها منشوراته مستفزة ،،وبدت تكتب ....
***********
وفي عز مالشيخ يشوف في التعليقات ع صفحته ره تليفونه
الشيخ: السلام عليكم أمي كيف حالك
: مش أمك اني ياشيخ
الشيخ: معليشي منو معاي
: أني وحده مستاحشاتك مووووت وخاطرها ترتمي في حضنك
الشيخ حول التليفون من علي وذنه شبح زين لقاه رقم أمه
عاود حطه ع وذنه من جديد
الشيخ: منو معاي
: أني وحده تحبك موت وتبي تشوفك توا قبل بعدين
سكر الخط في وجها
عاودت اتصلت مرة اتنين تلاته في الرابعه رد
الشيخ: بتقولي انتي منو ولاكيف توا !!
: شنو بدير يعني !!
الشيخ: حسبي الله ..
: تي خيرك ياأصلان ماعرفتنيش "اصلان معناها أسد بالتركي"
الشيخ: والله ماتتحشمي الله أمتى تبطلي لعب الصغار هادا راك مراة متزوجه
سلمى: حتى لو تزوجت بنقعد الصغيرة ودلوعتكم
الشيخ: لحظه لحظه إنتي في ليبيا
سلمى: إيه وفي البلاد
الشيخ : بإذن الله الصبح غادي
سلمى: أهو ياماما جبتهولك
الشيخ: بحداك أمي ترا إعطهالي
سلمى: هي شويه
فتحيه: أيوه سلومه ياغالي
الشيخ: أيواه ياحبيبتي كيف حالك اليوم
فتحيه: الحمد لله بخير أنت كيف حالك
الشيخ: دام إنتي بخير أني بخير ،خيرك اليوم ماردتيش عليا لما كلمتك
فتحيه: لهيت بأختك جت من الصبح
الشيخ: وماكنتوش ناوين تخبروا بجيتها
فتحيه ارتبكت: اه ..لاوليدي غير نسيت بس
الشيخ : تمام تمام حالكم باهي وحال خوتي ونساوينهم وصغارهم ؟
فتحيه: الحمد لله كلهم كويسن
الشيخ سكت شويه بعدين قال : شنو حال بوي
فتحيه: الحمد لله المده اللي فاتت كان في تركيا وروح اليوم هو وأختك وراجلها
الشيخ : بنسألك بوي يمشي للإسطبل ويشوف في الخيل ؟! مشغول هلبه ع فرسي ومهرها
فتحيه سكتت
الشيخ : أمي ألو أمي
: وكانك تعرف ربك صح ره تجي لبوك وتشوفه شنو حاله مش تسأل عليه شاف فرسك ولالا تقول عامل عندك !!داير روحك شيخ وتوعظ في الناس أوعظ روحك قبل لكن والله ماني مسامحك ياسليمان وسكر
فتحيه تبكي: علاش هكي حرام عليك تو حتى أتصال معاش يتصل
عمران : جعله ماأتصل ،،حني بوه وأمه هو مفروض يدورنا مش حني لكن الحق عليا ربيت صغاري كلهم صح ألا هادا طلع عاق وعاصي وتعبني هلبه،تعبني ،، وطلع من بحداهم
فتحيه: ريتي ريتي تو في بو هكي يقول ع ولده اللي رافع راسه ومخلي الناس يأشروا عليه ويقولوا هذا بو الشيخ سليمان اللي سابق سنه وجيله
سلمي حضنت أمها : خلاص ماما إدعيلهم ربي يصلح بينهم ويحنن قلب بوي ع سليمان
فتحيه: يااااارب رد ولدي لبوه ورد بوه ليه ياارب
في هالوقت سليمان حالته صعبه كلام بوه عصرله قلبه عصروخلاه قريب يهبل
في نفس اللحظه جي إشعار من الفيس مشي للاب توب بيسكره لمح التعليق اللي جي مع الإشعار قراه أستفزه هلبه وهو معصب ولقي في شنو يفش غله دار حاجه عمره مادارها ولايتوقع يديرها خش ع الخاص لصاحبة التعليق وحط غضبه كله في رساله ليها وسكر....
*************
جومانا كانت تقرا لين جاها إشعار رساله من الصفحه اللي علقت فيها خشت شافتها وأنصدمت
جومانا: هذا شنو يفترش .....
رايكم........
#GomanFared