الحلقة(15)
فرج : أني ماتعودتش ندخل في قرارت تخصكم بروحكم بالذات الزواج،،لكن لازم نعرف شن اللي خلاك تسيب البنت هكي بدون مقدمات ،،نعرف إن هي تبيك وتعبت بعد فسخت الخطبه والبنت كويسه وعيلتها ناس باهيه شنو اللي خلاك ادير هكي بعد عامين خطوبه ياولدي
نجيب تنهد: ......
البنات في ديارهم
أريج مش قادرة ترقد وهي تفكر في ضرار واللي صار اليوم وحست إن مشاعرها بدت تطور تجاهه
وفي دار جمانه وندى
ندى كانت تدهور في صفحة قاسم وتتأمل في صوره وتشوف من منشوراته
ندى في نفسها" الوضع غادي يخوف إغتيالات ومظاهرات والدنيا ملخبطه ،،خايفه عليه هلبه ربي يحميك ياقاسم "
'مشششش هكيييي ياأمممي أفهميييييني "
جمانه وندى 🤤🤤
جمانه: شنو هذا
ندى من الخلعه وهي تحط تليفونها رصت بالغلط ع طلب الإضافه لقاسم وطلعت تجري هي وجمانه
أريج طلعت من دارها: هذا نجيب
جمانه : وأمي
'كذااااااااااب '
ندى : حيييي ماما ،،ونزلوا يجروا الثلاته
وصلوا جيهة الصالون كانوا عبدو وأصيل واقفين
عبدو: أقعدوا هني ماحد يخش
كلهم يسمعوا ويترقبوا شنو أخرة هالنقاش
أمينه: ره أنت ولدي وأني أكثر من يعرفك ماسيبت وحده زي ريما إلا في وحده لايده عليك
نجيب: أستغفر الله مازال مصرة
فرج: أمينه أهدي مش هكي
أمينه: كيف نهدى ره هذا عشم ولايا وأني عندي بنات، وبعدين البنيه ماشاء الله تحملت ولدك ودارت عليه قدام أهلها وطيبه فينا وأخلاقها ماشاء الله علاش يشدها عامين كان مايبيهاش لاش يضيع من عمرها عامين
نجيب: نصيييب ياناس نصيييب أما أحسن نسيبها توا ولانطلقها بعدين
فرج: أني نبي السبب
أمينه شبحت لنجيب بحده وتأشر بإيدها جيهة راجلها: هي تفضل رد ع بوك يللا
نجيب: خلاص يابوي أني معاش نبي وقلت نسيبها من توا خير من بعدين وأرجوكم معاش تناقشوني لأن هادي حياتي أني بروحي
فرج: زي ماتبي لكن حط في راسك ره مرة تانيه مش حنمشي معاك ونخطب لين تكون محدد موعد العرس وماتعاودش صنعتك هادي
أمينه: صدقني يانجيب لماتندم أشد الندم لو تفتش بالفتاشه زي ريما مش حتلقى واذكر ديما أن ربي عطاك نعمه وأنت اللي رفستها ،،وطلعت من الصالون لقت صغارها قدامها فاتت من حداهم ودموعها في عيونها وهما يشبحولها
نجيب: تعرف يابوي إنها مقاطعتني
فرج: عارف أمك تحب ريما هلبه وكانت تستنى بالساعه ودقيقه في عرسكم وكانت ديما تقولي ريما مفيش زيها وهي الوحيده اللي حتعرف تتعامل مع طبع نجيب الواعر وحتهنينا عليه
نجيب الكلام اللي قاله بوه رجعله نفس الشعور اللي حسه لما شاف ريما لأخر مرة بس جت صورة لارا بين عيونه وتجاهل هالشعور وقال: اللي خلقها خلق غيرها وأحسن منها ربي يبعتلها اللي يسعدها وهي اني نستأذن يابوي تصبح ع خير
وطلع لقي خوته قدامه خطم زي البرق من حداهم
جمانه: ربي يهديه
عبدو: تبوا الحق أمي صدقت خوكم رفس النعمه برجله
طلع بوهم
فرج : خيركم واقفين هني بروا أرقدوا سلم صغاري بروا أرقدوا مافي كان الخير أزمه وتمر ❤
كلهم ابتسموا لبوهم وقالوله تصبح ع الخير ورد عليهم ومشوا لديارهم
*****
حبيب داني شاغلني حبيب داني ومحيرني في وجداني ديما ساكن في وجداني قريب مني
ضرار كان يفكر في "حد الزين " زي مامسميها ويسمع في هالأغنيه، كان يحب الأغاني الليبيه القديمه والمعاصر يسمع لمحمد حسن بسسس مايجذبش غير الفن الليبي والقديم تحديدا
طق طق
ضرار : خشي
خشت مليكه
مليكه: سيدي اليوم اتصلت ابله مروة وقالت تبيك ضروري
ضرار : تمام اطلعي
قام تليفونه ودار مكالمه لمروة نادى رد
مروة: ماتقوليش وينك
ضرار باللامبالاة: خيرك شن في
مروة: مبرد دمك ياأخي لما نقول نبيك ضروري معناها شي ضروري
ضرار: عارفه الضروري متاعك
مروة: والله هالمرة بجديات أمك تعبانه هلبه ضرار وديما تسأل عليك
ضرار خاف: مروة قسما بالله تطلع جريه منك ياويلك
مروة : والله ياضرار والله مش عاجبتني بكل
ضرار بقلق : تمام تمام غدوة حنجيكم وقوليلها وصكر
مروة : اسمع ألو ألو ..مبرده ذوق مافيش
أمها: خيرك
مروة : كنت نكلم في ضرار وقال غدوة جاي
أمها فرحت هلبه: طيب فيا ياكبدي يوصل سالم ياارب
******
أسبوع كامل فات ولاجديد كلهم ع حالهم غير إن جمانه رجعت أتابع في صفحة(صوت الحق) وتتفاعل مع منشوراتها وتعلق وسليمان مهتم هلبه بتعليقاتها لكن مايردش عليها
*****
السبت
الساعه 12:00الظهر
الحاج فرج كان عازم عيلة صاحبه عبدالباسط ع الغدي في حوزاته هو هالمرة وجمانه الوحيده اللي هالزيارة هم ثقيل ع قلبها
وصلوا عيلة عبدالباسط بعد السلامات والترحيب لهو النساوين بتجهيز الغدي
والرجاله مقعمزين يهدرزوا
في المطبخ الدخلاني
نجيه: نصيب ياأمينه وكله مقدر ومكتوب
أمينه: والله يانجيه قريب نهبل حبيتها البنيه هلبه وكنت فرحانه بيها ونراجي غير أمتى تولي كنتي ع قد ماطيبه وخلوقه واللي يسمع إني خاطبتها لولدي يشكر فيها وفي أهلها نزيد نفرح أن هادي حتولي كنتي
نجيه: مش مكتوبين لبعض والخيره فيما أختاره الله معاش تحرقي دمك
أمينه: مش بلاش هالولد يانجيه في وحدة تانيه متأكده
نجيه: زعمه ؟!
أمينه : مش زعمه أكيد
نجيه: إن شاء الله خير ياوخيتي
في حديقة ورد صغيره في الحوازة كان مزروع فيها ورد وكان فيها أنواع الورد مقسمه بين البنات الثلاته وكل وحده زارعه نوع ومهتمه بيه وبوهم حاط عامل بش يرد باله منها
جمانه: سبحان الخالق قداش يهبلوا 😍
ندى: ورداتي أحلى وجيهتي مساويه اكثر منكم 😋
اريج: عينك كلهم حلوات 😒
امل : هما كلهم حلوات بس جهة جمانه احلى
جمانه مابتش تشبحلها قاعده مضايقه منها ع الموقف اللي حطتها فيه قبل
أريج: صاحبتك عاد بتقيميها بيها
ندى : ترا عالي أريج شوفي
مشت اريج لندى وأمل جت حدا جمانه
أمل: قاعده زعلانه
جمانه بدون ماتشبحلها: وإنتي شن رايك
أمل: والله مانقصد نحطك في موقف بايخ نيتي كانت خير
جمانه: خير شني ياأمل إنك تستغفليني أنتي وخوك هكي ؟؟
امل :والله ماكنت نحساب هكي بيصير
جمانه قعدت ساكته وماتبش تشوفلها بكل
أمل: حطي نفسك في مكاني تشوفي خوك الكبير والوحيد وهو يتقطع ويتعذب وكل يوم اللتالي ع خاطر البنت اللي يحبها مش تحاولي تساعديه
جمانه: نساعده بإنه ينساها ويدور غيرها نقنعه أن الدنيا نصيب وماتوقف ع حد مش اندير مادرتي
امل: عيييت فيه هالكلام قلتهوله وقلت اكثر منه ويخي حاولت نكرهه فيك لكن شي معمي ع الآخر عاشقك عايش بيك أفهمي وقعدت تبكي
جمانه سخفتها شدتلها إيدها: يعلم الله إن نقدر فيصل ونعزه وزيه زي خوتي في المعزة لكن مش بإيدي ياأمل مش حاسه أتجاهه بشي تاني ومانشوفش فيه الزوج اللي نتمناه
أمل : عارفه وهذا حقك ،،نبيك تسامحيني ياجمانه من يومها وأني مانكلمش فيه ومضايقه حتى من نفسي
جمانه : خليك معاه ياأمل وحاولي بكل الطرق إنك تساعديه بش يطلعني من راسه ويشوف حياته مع وحده تستاهله وتبيه وتسعده
امل ابتسمت : إن شاء الله
اريج: كان نعرف شنو تقوللها
ندى: زي العاده تكلم فيها ع فيصل
أريج: به هي جمانه علاش رافضاته وهي كانت معاه راسين في شاشيه أيام زمان
ندى: كانت تتعامل معاه زي ماتتعامل مع نجيب وأصيل وعبدو وهي قطعت علاقتها بيه من قبل ماتلتزم من لما صارحها بمشاعره
أريج: تدلع اختك هادي وحده غيرها تحمد ربي اللي جاها واحد زي فيصل فلوس زي التراب وهو الولد الوحيد مستقبل مليح
ندى: هديكا إنتي اللي تفكري هكي مش جمانه
اريج: شن قصدك
ندى: إنتي تحبي الفلوس والمظاهر ومواصفات الراجل اللي تتمنيه أنه يكون مصرف متنقل
اريج: خزززي هادي نظرتك ليا
ندى: هذا الواقع أنتي تحبي روحك هلبه لهذا مش حتهتمي لحكاية المشاعر هادي
أريج : عينك لو كنت هكي فعلا ماكا....سكتت
ندى: مكا شني
أريج: شي شي اقعدي فيها ومشت وخلتها
*******
: باااازين سمح ياراجل يعطيها الصحه
: صحتين ياقسومه
قاسم : تعبنا المراة قوللها تسامحنا
خليل: عيب ياراجل والله فرحتي مش لاقي وين نحطها بجيتك ياخوي
قاسم : تسلم ياغالي
خليل: هاك خود هالطويسه الخضرا
قاسم خداها: صحييييت
خليل: ها شنو مدايرين في الخدمه
قاسم تنهد: الوضع مش تمام بكككل
خليل: من أي ناحيه
قاسم: في تصفية حسابات قاعده تصير وعمليات إغتيال في حاجه حتصير لامحاله
خليل: حسك خوفتني
قاسم: يستر الله
خليل حط إيده ع رجل خوه: بالله عليك ترد بالك من روحك أمك مش حمل وجع فقد جديد موت سليمان لتو مأثر عليها تنوض في الليل مفجوعه تعيط وتبكي وماتسكت كان لما تقرا عليها الوليه عندي
قاسم وعيونه دمعوا: الله يرحمه حط إيده ع إيد خوه: حاضر ياغالي
خليل يغير في الموضوع: هاه شنجو طرابلس
قاسم : مش أحسن من هنا بواجد
خليل: وناسها
قاسم : طيابه وكرم ماشاء الله
خليل: قعدت عند صاحبك الشيخ
قاسم وهو يشرب في الشاهي:اها
خليل: أكيد قعدت من عزومه لعزومه
قاسم: مش غير والله لين تحشمت وليد تعرفت عليه في أخر زردة عزمني غدا وعشا ومانحكيلكش ع كرم الضيافه من جميع النواحي
خليل: باين عليهم ناس كويسه بارك الله فيهم
قاسم جت بين عيونه ندى أذكر الموقفين اللي جمعوه بيها ابتسم إبتسامه غريبه بالنسبه لخليل
خليل بخبث: شنو هالإبتسامه هذي 🙄
قاسم وج ولاأحمر: لاشي عادي
خليل: عادي لاملون وحق الله هالإبتسامه من وراها حاجه
قاسم وهو مبتسم بحشم: ترا حل غادي
خليل يضحك : هههههاها حتقول للعزوبيه باي باي وأخيرا
قاسم يضحك ويأشرله بإيده: وطي صوتك ياراجل فضحتني
خليل : به احكي يللا
قاسم شبحله :.....
******
قاعده في دارهاماعندها وين تمشي
أم ريما تكلم في سارة صاحبة ريما
أمال : خشيلها وإن شاء الله ع إيدك تطلع من هالعزله
طقطقت سارة وخشت
لقت ريما مقعمزة وسرحانه
سارة: رموشي
ريما وهي قاعده ع نفس حالتها: تعالي
قدمت ساره قعمزت مقابلتها ع السرير
سارة: كيف حالك
ريما أبتسمت بألم: كيف بيكون حالي
سارة : مفروض يكون خير من هكي
ريما ابتسمت بتهكم وقعدت ساكته
سارة شدت إيدها : ريما إنتي مش هكي إنتي إنسانه قويه ياما تحملتي وياما فات عليك انتي وعمتي كنتي لأمك الولد والبنت وتحملتي المسؤوليه معاها قداش جاكم ظلم من عمامك اللي نكروا حقكم في ورث بوكم واجهتي وإنتي كنتي مصدر قوة أمك لين خديتوا حقكم ربيتي معاها خوتك لين ماشاء الله ولوا مميزين ومن الأوائل ويقروا برا توا ورافعين راسكم كبرتي ضحى لما كانت أمك في فترة مرضها وخلتيها دكتورة أسنان قد الدنيا ،،ريما هادي الأزمه ابسط بهلبه من اللي واجهتيه من لما كنتي صغيره
ريما : اللي تحكي عليه كان سبب في قوتي ، لكن حبي لنجيب كان نقطة ضعفي اللي دمرتني وخلتني غير ريما اللي تعرفيها
ساره: أنسيه ياريمه زي مااني نسيت أكرم تذكري قداش حبيته وعارضتي اهلي ع خاطره ولما خديته شن دار فيا بهدلني وأني عروسه ماليش تلاته شهور نلقاه مع مرة تانيه في دار نومي
شوووق ماصار فيا طلقني بدون تردد وكأنه ماصدق خشيت في حاله نفسيه وتعبت لين عمتي الله يذكرها بالخير جتني وقالتلي كلام عمري ماننساه "قالتلي يابنتي كنتي تقولي كان ماخديتاش نموت وكان نسيبه نموت ، لكن إنتي مامتيش قاعده عايشه معناها حياتك ماوقفتش عنده ومازال في حاجات حلوة هلبه مستنياتك وخلي ديما ع لسانك هذا الدعاء اللهم أجرني في مصيبتي وأخلفني خير منها "
كلامها هزني وخلاني نطلع من الحاله اللي كنت حاطه روحي فيها رجعت لقرايتي تخرجت وخديت الماجستير وبديت محاضرة وعوضني ربي بنادر" زوجها " اللي نساني أكرم وسنينه وكان أجمل عوض من ربي ❤
حمدت ربي ع اللي صارلي وندمت ع كل لحظه نزلت فيها دموعي ع خاطر أكرم واللي داره فيا لإن عوض ربي ليا كان فوق الوصف
ريما شبحت لصاحبتها بإمتنان : سارة إنتي من احلى الحاجات اللي ربي عطهالي ودموعها نزلوا وحضنت صاحبتها وهي تبكي وحتى سارة قعدت تبكي وفرحت لإنها حست أن كلامها أثر في ريما
*****
فات باقي اليوم عادي جدا
فيصل ماباش يوري وجهه لجمانه ماكانش يبيها تزيد تنفر منه وجمانه ارتاحت هلبه إن اليوم مرع خير
في الليل
أريج مش جايها نوم ادور في الفيس ع صفحة لضرار مالقت شي ليه فوق أسبوع معاش شافته ولاتندري عليه بالصدفه وهي ادور لقت صفحة شخصيه بالإنجليزي مكتوب أسمها مروة كوين وكانت ناشرة صورة ليها ول ضرار مكتوب عليها
اني والحب بعد طول غياب
أريج بغيره: من هالبوبريصه هادي😡
لقتها مدايره رابط لصفحه في الأنستا خشت عليها لقتها لضرار قعدت تتفرج ع صوره ولقت أغلبهم لضرار مع هالبنت وفتحت أخر صورة منزلها وكانت في الصيف هي نفس الصوره اللي البنت نشرتها
وكاتب عليها " بنت قلبي" 😚
أريج تغلي: من هالتافهه اششي كيف متشعبطه فيه 😡
شكله ياأريج زيه زي غيره كذاب وملعب وإنتي انغريتي بيه
كويس أني ماعطيتاش مجال من الأول ،صكرت وهي مضايقه وأرتمت ع مخدتها سكرت عيونها تحاول ترقد
اريج: أوووووف حتى صكرت عيوني قاعده نشبح
في الصورة 😧
*****
ندى: خل نشوف قسومي شن منزل قبل لنرقد قعدت تبحبش في صفحته مالقت شي جديد لمحت جهة الأصدقاء في جنبها إشارة صح
ندى خبطت خدها بإيدها وبهمس بش ماتسمعهاش جمانه اللي كانت راقده : 😲😲😲😲😲حييي عليا هذا أمتى صار
وتجيها رساله ع الخاص ......
يتبع
#GomanFared
