الحلقة(5)
أسراب ضي بألوان مختلفه ،،زحمه كبيرة ،،مناسبه وكإنها مناسبه عرس وكأنه حوشنا،،لامش حوشنا حوشنا مش كبير هكي ،،أني نجري في الممر وحد يقولي هيا ياجومانا تعالي نطلعوا للخيمه
جومانا: شويه بس خل ندور كندرتي
ندور وندور ومالقيتهاش قلبت عليها الدنيا ،،حيي وين الكندرة كيف بنطلع هكي حفيانه ،،لمحت كندرة نهاية الممر كانت تهبل 😍لونها فضي لبستها كانت تبرق من جمالها نشبحلها وفرحانه بيها هلبه ،،كيف بنطلع نسمع في دوشه شبحت لقيت الناس تجري ،،خفت خشيت لدار قريبه ماعرفتهاش شنو فيها روشن مطل ع الشارع قعدت واقفه نشوف منه نشبح في الناس تجري وتعيط وأني نشبح خايفه لقيت أسد يجري وراهم وناس تانيه حوايجها مشركه ووجوهم مخبشه يعيطوا ويجروا مع الأسد ورا ناس ،،منظر مرعب وفي لحظه الأسد شبحني أني متت من الخوف بسرعة البرق جاني يجري وأني نجري ونعيط وهو يجري وراي وأني بنموت من الخوف ونجري بسرعه مش طبيعيه تنحوا من رجليا الكنادر قعدت نبكي وانقهرت هلبه عليهم ألتفت لقيت الأسد ينهش في الناس ويقطع فيهم خشيت لمكان وكان حيجيني خلاص
: شهقه عاليه ....
جومانا بعد شهقت قعدت راقده وعيونها في السقف وقلبها يضرب بقوة وشعور بالخوف مسيطر عليها تلفتت على يمينها لقت خيال أسود مقعمز يشوفلها شهقت وناضت
ندى: جومانا خيرك ؟!
جومانا: هادي إنتي ندى
ندى: خيرك وكإنك كنتي تحلمي بكابوس
جومانا: كابوس وبس حاسه روحي قاعده مرعوبه لتوا
ندى: خلاص حبيبتي تعوذي من الشيطان ،،ندى تصب الميه في طاسه،،هاكي أشربي
جومانا شربت ميه وناضت
ندى : وين ماشيه
جومانا: بنمشي نتوضى ونصلي
ندى : باهي
جومانا طلعت من الدار توضت وولت صلت ورجعت لسريرها
تفكر في الحلم وفي نفس الوقت أذكرت الرساله اللي جتها ع الفيس اللي خلتها ترقد وهي مضايقه ...
************
الصبح
الساعه 8:30
في مكتب إعمار للتصاميم الهندسيه
لارا: مو معقول كل مرة تجي تغير إشي بالتصميم مفروض صممتوا هي وريحتنا
ولاء: حاله حتى اني طيرتهالي بس مضطرة تسايري وخلاص
لارا: نجيب لسا ماإجا
ولاء: لتوا لا غريبه قبل قبلنا في المكتب
خش نجيب للمكتب اللي كان في الحقيقه مجموعه مكاتب لمهندسين كبار وشباب وهو صاحب المكتب وبوه شريك معاه براس المال
خاطم في الممر يشوف في المكاتب شبح جهة مكتب لارا وولاء ووقف وقال
نجيب: صباح الخير
لارا: 😍
ولاء : صباح النور بش مهندس
لارا : صباح النور
نجيب : المهندس أحمد جي
ولاء : إيه جي لكن طلع للموقع متاعه
نجيب: كويس ،المهم أول مايجي المهندس نزار قوليله يجي "سكت" وقال :لارا بعد خمسة دقايق تعالي للمكتب ، ومشي
لارا:😍😍😍😍😍😍
ولاء: بشويه يابنتي راك مفضوحه
لارا: موبإيدي مافيني مستحيل شخصية هالزلمه شو بتجنن ولا وسامتوا دخيييلوا
ولا: أرزني ياختشه
لارا:شووو ؟؟؟
ولاء : ههههههههههههه قصدي أثقلي يامجنونه
لارا: أها صعب والله صعب حاسه حالي هلأ وأنا رايحه لعندو أول مابشوفوا رح اعترفلوا وقلوا بحبك مجنونه بحبك
ولاء: هييييي راك تنسي إنه خاطب
لارا:😣 ماأنا هاد اللي معذبني ومخليني ساكته
************
عماد : ادهنلي التوسته مربى وجبنه
وائل: والعجه 😋
عماد: فوتني ترا عارفني بنقدرها وأني هادي حالتي من البارح
وحضرتك ماخطرت عليك غير اليوم
وائل يضحك ومدله طرف التوست
وائل : خطم عليا سليمان الساعه 7الصبح عطاني مفاتيح الحوش
عماد: علاش
وائل: قالي ماشي للبلاد
عماد ياكل ويتكلم : غرييه ماقالش البارح
وائل : ياراجل كول وبعدين تكلم
عماد: 😒😒😒😒
وائل : ربيع كلمك
عماد هز راسه بالنفي لإنه ياكل
وائل : زعم وين بات البارح
عماد حرك كتافه بمعني مايعرفش
وائل: زعمه مايديروله شي مالي مرته بعد.طلقها
عماد أشر بصبعه فوق وبعدين حركه يمين وأيسار بمعنى إن شاء الله لا
وائل: تي خيرك ادير هكي من بكري تبكشت
عماد: وووووه معاش عرفت مش قلت معاش تتكلم وأنت تاكل !!
وائل : الصبر وخلاص ،،وبعدين وليت ع العجه تعيط بعدين تقول بطني نلوحك برا الشقه
ناض وائل وطلع من المطبخ وعمك عماد طاح بإيده ورجليه في العجه
************
طق طق طق
نجيب : تفضل
خشت لارا ونجيب رفع راسه وعيونه معلقات فيها يشبحلها بعدين أستاقض
نجيب: تعالي قعمزي ،،قعمزت لارا
نجيب: إحم لارا إنتي قداش ليك في ليبيا
لارا: 6شهور
نجيب: معناها ليك تلاثه شهور في ليبيا قبل تخدمي في المكتب
لارا: إيه
نجيب: مع مني عايشه هني
لارا: 😮😮😮😮
نجيب: قصدي نبي نعرف إذا كنتي جايه بتستقري مع عيلتك ولافترة وبتروحي"قعد يفترش'
لارا: اها 😅 لاانا إجيت مع أهلي بابا عندوشغل هون بالسفارة إجينا معو ورح يظل مدة 3سنوات تقريبا
نجيب أبتسم : كويس
لارا: راحت مع إبتسامته وقعدت تشبحله وخلاص
نجيب: إحيييهم
لارا أستاقضت:ممكن أعرف ليش هالأسئله باش مهندش
نجيب: لاشي غير نبي نعرف كيف نرتبلك وضعك معانا
لارا: تمام 😊
نجيب: تقدري تتفضلي
#GomanFared
