الحلقة(17)
بعد كم يوم ...
في الليل
ندى فاتحه الفيس وادور في صفحة قاسم قداش ليه مش فاتح لدرجه خشت لإيميلات صحابه بالك تلقى خبر عنه لكن مالقت شي
ندى"ياربي مايكون صايرله شي بس💔"
في نفس الوقت جمانه قدام اللاب توب حتى هي ع الفيس تقرا في منشور ل(صوت الحق) كان يتكلم عن الإمام أحمد بن حنبل وكان مندهشه من اللي عرفاته عن مواجهته للخلفاء العباسيين في فتنة"خلق القرآن" كانت الفتوى واقفه ع كلمه وحده منه لكن هو رفض إنه يبيع دينه ويشري الدنيا وقعد مسجون ويتعذب أشد أنواع التعذيب لدرجة لحمه قعد يتقطع ويطيح وعظامه بانو وحتى لما سمحوا لواحد من أولاده إنه يشوفه معرفاش من كثر ماغير التعذيب ملامحه
جمانه تقرا ودموعها ينزلوا وعلقت
"كل اللي كنت نعرفه عن احمد بن حنبل إنه من الأئمة الأربعه
وليه مذهب ،،وبرغم إني سمعت بفتنة خلق القرآن بس ماكنتش نعرف إنه هو اللي وقف في وجهها لولا مقاومته ره تغيرت عقيدة أمة كامله الله يجازيه عنا خير الجزاء"
جمانه مسحت دموعها وسكرت وألتفت لندى لقتها سرحانه
جمانه: خيرك ندوش حبيبتي الأيام هادي مش عاجبتيني
ندى أستاقضت: لالا مافي شي غير الإمتحانات قربت خلاص وقاعده نفكر فيهم
جمانه أبتسمت: ماينخافش عليك ياقلبي قدها وقدود
ندى ردت الإبتسامه لأختها وبعتتلها بوسه في الهواء 😚
جمانه ناضت خشت فراشها وبترقد
جمانه: تعرفي ندوش خاطري نسافر
ندى: والله حتى أني
جمانه: خلاص قبل عطلة نص السنه انسقوا كلنا لسفرة
ندى: وين تبي
جمانه: مش عارفه المهم مكان مريح وتتغيرفيه النفسيه
ندى: تركيا
جمانه: حلوة
ندى : إيه ومامشينالهاش قبل
وقعدوا يهدرزوا لين رقدوا
في دار عبدو وأصيل
اصيل: يعني لما تروح حتخطبها طول
عبدو : إيه ومعاش بنأجل بكل
أصيل : حدد موعد العرس من توا خير مادير زي خوك
عبدو: مستحيل نبيع ملاك مهما صار
أصيل: ربي يتتمملك عخير 😉
عبدو: تسلم والفال ليك يابو العيون الزرق
أصيل قعد يضحك
******
تاني يوم
في مكتب إعمار
نجيب: والله هذا اللي عندنا مش عاجبك شوف غيرنا
الراجل: حنشوف غيركم أكيد ناس تحترم زباينها وتعرف كيف تتعامل معاهم وناض الراجل وطلع
خش المهندس مختار
مختار: خيرك يانجيب ياولدي هاذا تالت حد يجينا دير معاه مشكله
نجيب بعصبيه: عشرين مرة نعاوده التصميم كل مرة يطلعلي فيه لولا المصيبه إن يقتنع بيه بعد يولي ويقولي لامش عاجبني هذا كيف تتعامل معاه قولي يحساب ماوراي غيره ؟!
مختار بهدوء: هلبه هكي يجونا لكن كنا نعرفوا نتعاملوا معاهم ونقنعوهم بهدوء ويقتنعوا ع العموم انت الفترة الأخيره مش عاجبني
نجيب تنهد: ضغط خدمه
مختار: كلنا معاك تحت هالضغط وأنت ياما كنت تحت ضغط الخدمه ومافيش اصعب من سنة 2011 واللي مر علينا فيها لكن كنت قدها وتجاوزت المصاعب بنجاح اني اللي اقدم منك في هالمجال وثقت في قدرتك وإدارتك وفعلا كنت قدها
ياولدي لو تحس نفسك إنك مش قادر تتحمل ضغط الخدمه خليك داب إدارة المكتب وخل الشغل ع التصاميم لغيرك وأنت ترتاح
نجيب هدي شويه: يصير خير ياباش مهندس
مختار : توا الأفضل انك تروح وترتاح وحني نهنو اطمن
نجيب ابتسم مجامله: ايه هذا اللي بيصير
مختار أبتسمله وطلع
ونجيب قعد يوتي في روحه بش بيطلع
طقطقطق
نجيب: تفضل
خشت لارا
لارا تشبح فيه كيف يلم في حاجاته: بدك تروح؟
نجيب بدونه مايشبحلها: إيه
قدمت لارا جيهته: نجيب ليش مارديت ع التليفوناتي امبارح ؟
نجيب ناض وخدي شنطته وبيطلع من مكتبه: كنت راقد
فتح الباب، تفضلي ياباش مهندسه
لارا مستغربه في أسلوبه معاها طلعت وهي تشبحله كيف يمشي وبعدين لحقاته : نجيب نجيب نجيب وقف
نجيب يدير في روحه مايسمعش
لحقت عليه وشداته من ذراعه وبحده: ممكن تفهمني ليش عم تعاملني بهالطريقه
نجيب: حولي إيدك حني في مكان عمل ولو فعلا تبي تعرفي علاش نعامل فيك هكي راجعي روحك وتو تعرفي ، وكمل طريقه وخلاها مصدومه وتشوفله لين ركب سيارته ومشي وهو يحرق في العجل
******
الساعه 7:00
ربيع : بارك الله فيك يامنعم تعبتك معاي
منعم الممرض اللي حطه سليمان لربيع: هذا واجبي ياربيع والحق أني اللي كسبت معرفتك
ربيع: حتى اني والله ، نشوفك ع خير
منعم: رد بالك ع روحك وربي يزيدك من الشفي وكيف جاي بيطلع رن تليفون ربيع وكان بعيد عنه شوي ربيع برغم حالته تحسنت لكن قاعد في صعوبه في المشي عنده منعم مدله التليفون
ربيع ضحك وخداه: مصر نتعبك لأخر لحظه
ضحك منعم : ماتقولش هكي ياراجل هي مالا السلام عليكم
ربيع : وعليكم السلام في أمان الله ،، وطلع منعم
وقفت رنة التليفون ربيع : رقم غريب ؟؟!!يللا كان شي ضروري تو يتصل مرة تانيه ومامرتش ثانيه ورن من جديد ربيع فتح الخط: ألو
: صوت نفس بس
ربيع: ألو ألوووو
:سكوت
ربيع للحظه قلبه قعد يطق بالقوة
ربيع: ردي خيرك ساكته تشمتي براحتك يانهال
نهال: انهدت بالبكي
ربيع قلبه ينعصر عصر
ربيع: علاش تبكي توا 💔
نهال: شنو حالك شنو صاير فيك تحسنت؟
ربيع ابتسم بألم: إيه
نهال: والله ياربيع ماليا علاقه هما اللي دارو هكي حاولت نمنعهم لكن ماقدرتش وتبكي بالعبرة
ربيع بألم: خلاص اسكتي بالله عليك عارف إنتي ماليكش علاقه وهما ..ربي يسامحهم
نهال وهي تبكي: عارفه إنك طلاقك ليا ردة فعل ع اللي داروه معاك صدقني مش زعلانه منك بكل
ربيع في نفسه "أني اللي زعلان من نفسي وكاره روحي لإني طلقتك"
نهال: وبالنسبه لخوتي اطمن مش حيتعرضولك حتى في الورشه صاحبك هديكا الليله ماطلعش من بحداهم لين أقنعهم أنهم معاش يتعرضولك
ربيع : من صاحبي؟!!!!
نهال: نسمع فيهم يقولوا الشيخ سليمان ،هو نفسه الشيخ اللي خلاك تبطل شرب ولا؟
ربيع أبتسم وتنهد وهو يفكر في جمايل سليمان ومتحشم منه: والله لو عندي خوت ماحيكونوا زيه
نهال: ايه بارك الله فيه حتى خوتي اللي مايقدرهم حد من عنادهم خلاهم يقتنعوا بكلامه ويحولوا عنادهم ع جنب تقول سحرهم ياربيع
ربيع ضحك: كيف حال التريس
نهال ضحكت: كويسين الحمد لله مستاحشين بوهم 💕
ربيع : هما بس 💓
نهال: 😳🙈
ربيع: ههههههه نشبح في وجهك شن لونه ره 😂
نهال: 😍باه توا بنسكر نكلم فيك وأني خايفه يشوفوني
ربيع ضحك: ذكرتيني بالأيام الخوالي 🤣
نهال 😂
نهااااال
نهال: 🤤حييي عليا خلاص باي باي صكرت
ربيع :هههههههههه نحبك وحق ربي 😍😍
******
الساعه 9:30 ليلا
حوش الحاج فرج
فرج: اسبوع بالكثير
أمينه: هلبه الحق
فرج: لازم نمشوا ياأمينه مايجيش ره ماغابوش علينا الناس لافي حزن ولافي فرح
أمينه: والصغار؟
فرج: ههههههه حسستيني إنك تتكلمي ع صغويرة الخمسه وسته سنين ره خلاص كبروا ماشاء الله
أمينه : ماتعودتش نغيب عليهم هكي
فرج: واني ماتعودش نغيب ع حوش فترة طويله من غيرك
امينه قعدت تشبحله وضحكت وفرج شد إيدها
امينه: حيي شنو ادير تو كان شافوك الصغار ؟
فرج ابتسم : شنو ندير شاد أيد مرتي حبيبتي ورفيقة عمري
امينه ضحكت : باه اسكت تو يسمعوك
فرج: خل يسمعوا 😁
ديما اني وياك خاطري نقعد عمري معاك خاطري
ندي تغني وتصفق وتناشب في امها وبوها
امينه تضحك: تحشمي بابنت
فرج يضحك
ندى : ياوخيتي محلاكم ربي مايحرمنا منكم ولايحرمكم من بعض
أمينه وفرج : آاااامين
خش نجيب للحوش
نجيب: السلام عليكم
ندى وفرج : وعليكم السلام
شبح لأمه لفت وجهه عنه
نجيب تنهد وبيركب
أمينه تنخص في ندى وبهمس : قوليله تتعشى
ندى 😕: تتعشى نجيب
نجيب وهو راكب: لا
امينه : انسلب وضعف هلبه
فرج : منك.إنتي
أمينه: اني مادرتله شي هو جابه لروحه أصلا من نهار سيبها وشيرته مذهوبه وحاله مش باهي
ندى: صح
فرج: ربي يهديه ويصلح حاله
ندى وامينه: آاامين
فتح باب الحوش ويسمعوا في هدرزة
امينه: صوت أصيل
ندى: حتى عبدو كأنهم يرحبوا بحد
فرج : اكيد صحابهم
خش اصيل : السلام عليكم
ردوا السلام
اصيل : بوي تعالى المربوعه عمي ناصر جي
فرج : جي بروحه
أصيل: هو ومعز
فرج هز راسه بالإيجاب وناض للمربوعه
امينه: زعمه شنو في جاي توا وجاي معاه معز
اصيل : الله أعلم المهم وتوا ضيافه بيطلع اذكر حاجه وولا إيه حقه أمي غدوة صاحبي الشرقاوي جاي وعزمته ع الغدي
ندى:😍😍😍❤❤❤❤❤
امينه : أني وبوك غدوة متسقدين للزوايه بنحضروا عرس لناس صحابنا
ندى: حقه ماما ؟؟باهي قداش بتقعدوا
أمينه: أسبوع
ندى: هلبه والله
امينه: شن بدير الناس يجونا ويقعدوا عندنا
اصيل : تمشوا وتجوا سالمين،، تمام تو نعزمه برا وطلع
امينه ناضت بتوتي الضيافه لسلفها وندى تعاون فيها وتفكر في قاسم وفرحانه أنه بخير
*********
سليمان كان مقعمز ع الفيس يدير في جولته المعتاده
سليمان : الإشاعات بلاحسب والناس ماتصدق تنشر اللي يسمعوه يعاودوه والمشكله في اللي عارفينه كذب وينشروا ع خاطر الإعجابات وتعليقات شي يغم القلب سكر الفيس
وناض طلع للبلكونه يسمع في صوت تمتمه وبكي شبح لوطا
لقي عماد مقعمز ع الصلايه في الجنان ويدعي ويبكي نزله
عماد يدعي ودموعه ينزلوا: ياربي حنن قلب بوي عليا يااارب...أجمعني بماليا ...رجعني ليهم ياارب..يارب زي مارجعت يوسف لعيلته يارب 'يبكي' ..يارب نزل ع قلب بوي الرحمه يارب بش يرحمني ويرحم أمي اللي نظرة عيونها ليا لما شفتها أخر مرة قطعتلي قلبي ...ياااارب ...ياربي نزل في قلبه الحن يااارب...ربي أنت سامحتني ..حسيتك سامحتني لما حطيت في طريقي ناس طلعوني من اللي اني فيه ووقفوني ع رجليا وقفوا معاي وماخلونيش بككل حتى خدمه لقوهالي وتغيرت حياتي للأحسن بدت نصلي وبديت قريب ليك ...يعني "يرشف ويمسح في دموعه " يعني أنت سامحتني ...يااارب زي ماأنت سامحتني خلي بوي يسامحني رجعني لعيلتي نعيش بيناتهم يفرحوا بيا نجيب صغار يلعبوا مع صغار عمامهم وعماتهم ونموت بيناتهم ياااارب 'سكر عيونه بقوة ودموعه ماوقفوش' ....
دعاء عماد سمعه سليمان اللي مقدرش يمنع دموعه من النزول من كثرما وجعه صاحبه وقال في نفسه" دعاء صادق والباين إنه طالع من قلب صادق ربي أحن عليك وأرحم بيك من بوك وأمك ياصاحبي حيستجيب ويفرحلك قلبك " وأنحسب سليمان وركب لشقته وخلا صاحبه في خلوته مع ربي يفضفضله ويحكيله وترتاح نفسه
*****
بعد روح ناصر خو الحاج فرج
امينه تهدرز مع راجلها في دارهم
أمينه: خيره ناصر
فرج تنهد : شنو بنقولك ياأمينه مواضيع خاشه في بعضها
أمينه بقلق: قول شن في حسك شغلتني
فرج:.........
******
لارا مقعمزة في دارها ودموعها مابطلوش نزول لابت تاكل ولاتشرب وحبست روحها في دارها ،،
"ليش تغير علي فجأة هيك شو عملتلوا لحتى يتعامل معي هيك ،،ياااربي رح جن ،،وكمان قافل موبايلوا وبالفيس بوك اوف لاين،،،"
خشت تشوف في صفحته وقعدت تدهور فيها وتشوف منشوراته قديم وجديد قابلها منشور متاع"تمت خطبته "
ولمارجعت للمعلومات لقاته قاعد مداير إنه خاطب
طاااارتلها وطلعت من صفحته الشخصيه وهي بتتفجر من الغيظ ، وخشت ع صفحتها بتكتب بوست "بتعبر عن مشاعرها وتكتب مقصودة في الأخير 😂مش الليبيات بس يديروا فيها ره 🤣🤣"
شافت حاجه صدمتها تشوف فيها وعيونها مفتوحات ع الآخر : مشااان هيك يانجيب !!!!
يتبع .....
#GomanFared
