الحلقة(48)
خشت للمقهى كان باين عليه جديد وديكوره كلاسيكي وحتى الموسيقى متاعه كلاسيكيه عجبها المكان وهي تتفرج جتها وحده أنيقه
:اهلا وسهلا بيك
اريج : اهلا
:إنتي اريج
أريج بإستغراب: ايه
ابتسمت: تعالي معاي
مشت معاها اريج وعيونها ادور ع المكان كان حلو وملفت هلبه لين وصلت بيها قدام دروج ركبت المراة وأريج وراها وصلوا لطابق تاني مايشبهش الأول كان فخم بزياده وفيه مكتبه في الحيط كله وكانت كل طاوله مفصوله عن التانيه "بساتر أرابيسك"
:استاذ ضرار يستنى فيك غادي
اريج شبحت الجيهه اللي اشرت عليها المراة كانت في الزاويه ومدرقه بساتر ،،المراة مشت واريج قعدت واقفه في مكانها وخايفه ومترددة خطرت ع بالها فكرت أن تولي من وين ماجت ..جاها مسج ع التليفون "لأمتى بتقعدي واقفه هكي"
قراته وضحكت بعدين حاولت تتجاهل خوفها ومشت لمكان الطاوله تخطت الساتر وخشت لقت ضرار مقعمز بكامل اناقته يشرب في قهوة ويقرا في كتاب والطاوله كانت جنب الروشن المطل ع البحر قعدت تتأمل فيه كان يجنن منظره قعدت لحظات تتأمل لين هو رفع راسه
ضرار ورافع حواجبه بتساؤل: وبعدين ؟
ضحكت أريج وقدمت وقعدت واقفه وتشبحله ع جنب بإبتسامه ورافعه حاجبها اليمين
ضرار يضحك: خيرك ؟
اريج : كمل باقي اللوحه الحلوة اللي نشوف فيها من أول ماخشيت ونوض وخرلي الكرسي بش نقعمز 😏
ضرار : ههههههههه ،،ناض من مكانه ووخر الكرسي،،تفضلي سيدتي الجميله
اريج ابتسمت وقعمزت وهو ولا لكرسيه
ضرار سكر الكتاب وحطه ع جنب: هاه شن رايك في المكان
اريج بإبتسامه : حلو حلو، وبعدين رفعة حاجبها ،من هي اللي استقبلتني ؟
ضرار بضحكه: مديره الكافي
اريج بتهكم: صديقة أيام الطيش حتى هي
ضرار ضحك: لاالا هادي صديقه اختى مروة
اريج : وصديقات اختك صديقاتك حتى انت؟
ضرار بضحكه: ياغيورتي أنتي ،هادي مراة متزوجه وزوجها صديق وأني خاش معاهم شريك في الكافي
اريج بتعجب: اها يعني هو ليك حتى أنت
ضرار وهو يشرب في قهوته: اممم ،،شن تبي نطلبلك
اريج: عصير فراوله لوفي بس
ضرار بإبتسامه: حتى لو مافيش نخليهم يجيبوه
اريج ابتسمت بخجل ...
ركز عليها ضرار إنها لابسه اسود والوشاح مغطي شعرها كله خطر في باله شي واحد
ضرار : شن حالها أختك
اريج ارتسمت ع وجهها ملامح الحزن: حال اللي فاقد غالي
ضرار قعد يشبح لعيونها وجهها: شكلك بكيتي حتى أنتي
اريج بحزن: هلبه قاسم شخص كويس ومحترم هلبه وراجل حتى موتته مشرفه
ضرار اضايق وشبح للروشن وبعدين شبحلها: وأني ؟
اريج فجأة ضحكت : انت شنو
ضرار: اني شنو؟؟
اريج ضحكت: انت روح اريج وقلبها ❤
ضرار ضحك: آاااه من لسانك تغيري فيا في لحظه لأكثر من حاله
اريج بإبتسامه : تعرف عمري ماتوقعت إني نحب حد زي ماحبيتك،،ديما يقولوا اريج تحب نفسها أكثر من أي شي واريج مستحيل تحب غير نفسها؛ بس انت حبيتك اكثر ماحبيت نفسي
ضرار يشبحلها بنظرات عاشق ولهان وكلامها مخليه ناسي هو مني وسرحان فيها
"بس نخاف منك"
هالجمله اللي قالتها خلت ملامحه تتغير وقلبه انقبض واذكر زيين هو منو قعد يشبحلها بنظرة خوف ع حيرة ع قلق
اريج: لما قلتلك يومها الثقه مش ساهل تنعطى ماكانش قصدي اللي أنت فهمته بالزبط، شبحت للروشن وبحزن: اني ياضرار برغم حبي ليك مش قادرة نحس بالأمان معاك انت جوانب حياتك الغامضه أكثر من الواضحه برغم قربي منك لكن مانعرفكش زين قاعد مجهول بالنسبه ليا وهالشي مخليني رغم أنك خطبتني من أهلي مخليني نحس إن نهاية علاقتنا مجهوله وشبحتله لقاته راسه لوطا وعيونه مغمضات وكأنه يسمع ويتألم ،،سكتت
هو قام راسه وشبحلها وضيق عيونه :كملتي كلامك
اريج هزت راسها بإيجاب وهي خايفه
ضرار حط إيديه ع الطاوله وشبح لعيونها بتركيز وبجديه: نظرة الخوف اللي في عيونك كل ماتكوني معاي تقطع فيا تقطيع ديما نحس أنك خايفه مني بس كنت نقول ممكن لأنها مازال ماتعرفنيش كويس،أو لأني اكبر منها بهلبه وهالشي مدايرلها رهبه،،لكن ولامرة توقعت أنك مش حاسه بالأمان معاي !واني اللي محاوطك وين ماتكوني ومامخلي حد يفكر يضرك حتى بنظرة ،،تعرفي أن الشخص اللي هددك وكسرلك سيارتك وطبقلك عجلتها قبلها توا ملوح في الحبس
اريج تفاجئت وشهقت شهقه بسيطه وحطت إيدها ع فمها
تعرفي إن طلع هو اللي باعت هذاكا الصايع وراك لسبب واحد كان يبي يمثل عليك بش يحصل ع قلبك يعني ينقذك منه او يجي يساعدك ويبدلك عجله السيارة المهم يلفت إنتباهك ،،وضحك وحرك عيونه جيهة الروشن وبعدين جيهتها،بس اني عفستله في مخطاطته بدون قصد
أريج : باه شنوقصده من تكسير السيارة
ضرار: كان يبي يخوفك وكان ناوي يخطفك
اريج شهقت مرة تانيه: من هو الحقير هذا
ضرار: واحد يقرا معاك اسمه محمد
اريج انصدمت ومش مصدقه: محمد؟؟!!مستحيل
ضرار بإستغراب: تعرفيه ؟
اريج : ايه انسان مسالم وع حاله وفي رقبته امه وخوته صغار معقول يدير شي يودر روحه بيه هكي مافكرش فيهم
ضرار بحده وامتعاض: شكله حبك هلبه
اريج : مجنون وغبي
ضرار : لكن خدي اللي يستاهله ليه فترة معفن غادي
اريج شبحتله بنظرة وبملامح بريئه: ضراري
ضرار ضحك: تبيه يطلع.
اريج هزت راسها بإيجاب
ضرار تنهد : ع خاطر عويناتك اللي ماعندي أغلى منهم تونطلعه ولو ولى للعب الصغار مش حيشوف غير النار
اريج ابتسمت: تسلملي
ضرار : بما إنك تبي تعرفيني أكثر فحنحكيلك ع حياتي بالتفصيل الممل ومش حنردق عليك ولاحاجه فيها بس خل نطلبلك الفراوله الأول، وبهزة حواجب،يافراوله انتي
اريج ضحكت وتحشمت وضرار ضحك عليها وطلبلها العصير
***
أمينه: اختك حالها مخوفني خيرها شن ترالها فجأة من امس
جمانه بتوتر: شكلها بتمرض تاكل في جيلاطي وحني قاعدين في شهر اربعه !!"ياارب اغفرلي"
امينه: جيلاطي ؟!هالبنت هادي تو غابيه في لوزاتها كيف يبدهلوا فيها ؟!!والله لو وجعوها هالمرة لما ادير العمليه غصب عنها
جمانه سكتت وتفكر في حال أختها"يااريتهم اللوز ياأمي "
***
اني أبن لأب وأم تزوجوا عن حب برغم الفروق الإجتماعيه والعلميه بوي ميكانيكي من عيله متوسطه وأمي دكتورة تخدير من عائله من اكبر العائلات في طرابلس نسب ومال
أهلها طبعا وقفوا ضد زواجها من بوي لكن هي سكرت راسها عليه مش عارف شن شافت فيه بش تعلقت بيه لهالحد؟
وافقوا أهلها مرغمين خوفا من العار ،تزوجت بوي وعاشت معاه بنفس ظروفه إلا أن أهل بوي كانوا ناس متخلفه لأبعد حد كانوا مش متقبلينها وكانوا يأثروا عليه هلبه يعني هو ماعنداش كلمه ولاشخصيه معاهم بالذات أمه وخوته أولاد وبنات بهدلوا أمي هلبه وهو بزايد امي جابتني أول سنه زواج ليها وتبهدلت هلبه ،،ضحك،،جابتني في الحوش وكله بسبب تخلف وجهل هديكا العيله اللي ماعندهمش نساوين يجيبوا في المستشفيات امي عانت هلبه وكانت مرغمه تتحمل نتيجه إختيارها بالذات إن أهلها قطعوا علاقتهم بيها بعد الزواج كثرت المشاكل فبوي طلع هو أمي سكنوا في حوش بروحهم في حي شعبي قديم وكان خرابه مش حوش تعذبت فيه عذاب وأني وعيت ع هلبه من اللي عاناته مع بوي اللي كرهها بسبب اهله بس كان مخليها ع خاطري، هو ماكانش يحبني لهالدرجه بس اهو المهم عنده ولد ،،بسبب الرطوبه وظروف السكن السيئه امي جتها حساسيه في صدرها خلتها معاش تتحمل الحياة غادي بس كانت تقاوم ومرة تعبت رفعوها الجيران تعاين وشرولها حتى الدواء وراجلها اللي هو بوي مايندري ع شي يجي مرة مرة يحدفلنا شكارة تموين ويغيب بالأسابيع ،امي حملت بأختي مروة جابتها وضحك ،بس في المستشفى رفعوها جيراننا الله يذكرهم بالخير ،،امي خدت قرار الطلاق وخدتني اني و أختي ومشت لحوش اهلها مانقدرش نذكرلك الدوة اللي صارت بس هما لزوها طلعت مكسورة وولت لهديكا الخرابه سكت وشبحلها لقي عيونها حمر من البكي
ضرار بضحكه: لالا خلاص معاش مكمل
اريج : علاش
ضرار : عيونك ياقلبي تبهدلوا
اريج مسحت دموعها بحركه طفوليه: لالا خلاص معاش بنبكي كمل أرجوك
ضرار ابتسم وشبحلها بحب : حاضر
تنهد وقال: امي بدت تخدم في حياش الناس الدكتوره رقيه بنت(*******) ولت خدامه في حوش اللي يسوى واللي مايسوى ،،كانت مصرة أني نمشي للمدرسه وكانت تقري فيا مرات نباتو من غير مايخش في بطوننا لقمه وحده عشنا ع صدقات الناس وعشي الجار هذا وغدي الجار هداكا وأختي مسكينه مش عارف كيف عاشت برغم قلة الحليب كانت تشمل فيها بالكتانه وضحك بألم ،،اريج قلبها يتقطع تقطيع وتشوف في الدمعه محبوسه في محاجر عيونه ،،الراجل اللي يقولوله بوي بعد امي سيبت الحوش طلقها ولاعاد دورنا ولاحاسبنا في الدنيا ..فات الوقت وأني وصلت 12سنه وأختي سته سنين واحد من معارف جدي بو أمي عرف بحالة امي ومش لجدي وخبره علينا جدي ماتحملش رد بنته لحضنه من جديد وحني عنده خلال شهرين شفت نعيم نساني الحرمان اللي كنت فيه لكن طبعا الحلو مايكملش بوي جي دار عار في حوش جدي وقال صغاري نبيهم وبعد طول عياط وشطاح خدانا وجدي قال صغاره مانقدر ندير شي
تنهد وشبحلها وهي حركت ايده بمعنى كمل هوضحك وكمل
بوي تزوج وكان عنده ولد عمره أربعه سنين طبعا عشنا مع مرت بوي زيها أي مرت بو ورتنا ايام سوود كان همي كله مروة كنت نخنبلها في الماكله بش تاكل ونتحمل في الطريحه اللي ناكلها بعدها كنت نحمي فيها برغم طفولتي وقتها وضعفي كنا نحصلوا متنفس بسيط لما نلعبوا في الشارع مع الصغار بش مرت بوي تاخد راحتها مع جارتها لما يجوها وكنت زمان نحب نلعب مع بنيه سماها فدوة كانت شقرا وحلوة هلبه من عمر مروة كنت نقول لما تكبر بنتزوجها اريج ضحكت وهوضحك ،ماغرتيش !؟ضحكت كان نحصل عليها ناكلها ..ضحكوا هما الزوز،،ايه كمل ،،تنهد مرت بوي كانت قارنه الراس مع جارتها ام فدوى وكنت برغم صغرسني ألا اني حسيت أن في شي تخططله مرت بوي وفي ليله ...
يتبع .....
#GomanFared
