الحلقة(56)
الناس منصته إنصات للخطبه اللي كانت غنيه بالمواعظ والكلام بالحقائق والبراهين كلام يوصل للعقل والقلب في آن واحد بالأحاديث الصحيحه والأقتباسات من السيرة النبويه وحياة الصحابه وتاريخ الإسلام وربطها بشكل جميل جدا بالواقع الحالي واللي صاير فيه تجاوز الخطوط الحمرا كعادته وتكلم بجرأة عن البعض ،همه هو توعية الناس اللي وعيها متوقف لعقود وفي من يستغل في قله الوعي هادي لتحقيق مآربه حاليا ،،الناس كانت تسمع بإنتباه وفي منهم يسمع بإنتباه أكبر وترصد ،،تموا الخطبتين وبدت الصلاة قري خلالها آيات تمس موضوع الخطبه تمت الصلاة الناس جت تسلم عليه وتهنيه علي خطبته الرائعه والقويه وهو يدور بعيونه بين الناس لمح شخص يرمقه بنظرات ماكرة وخبيثه طلع الشخص وكأنه يقوله" نبيك برا"،،بعد بدي يفضى الجامع سليمان طلع هو وصحابه سليمان لمح الشخص نفسه واقف يستنى فيه بحدا سيارة
سليمان: شباب روحوا وأني لاحقكم
كلهم هزوا راسهم بإيجاب ومشوا
مشي سليمان بخطوات واثقه إتجاه هذا الشخص
سليمان بإبتسامه واثقه: السلام عليكم
:وعليكم ياشيخ ،،قلنا مابيتش تعدل حني ندوروك
سليمان: ماليش بكم أي علاقه بش نعدل عليكم أو دوروني
ابتسم بتهكم وقدمله وإيديه في جيوبه: تسكير الراس مش حينفعك في شي حيضرك بس
سليمان ابتسم وبتهكم: انتم اللي تسكروا في راسكم
ضحك بسخريه: مش حتسفيد شي بمعاداتنا رد بالك تشد ظهرك بالناس اللي تصلي وراك وتحضرلك في خطبك لما يجد الجد مش حتلقى حد منهم حواليك
سليمان ضحك بسخريه وقدمله وحط عينه في عين اللي قدامه: ظهري شاده بالله مش بخلقه والناس اللي تصلي وراي مش ملزمه بيا في اي شي ولاأني نوعي فيهم بش نلزمهم بيا أو تكون ليا سلطه عليهم!!
: حتضر نفسك
سليمان : في سبيل الله عادي
: أهلك
سليمان: أهلي مسيبهم ومسيبيني وأعتقد تعرف من هو بوي كويس معاكم ومش ضدكم
: ننصحك لأخر مرة ابعد عن الشر وغنيله وبتهكم وهو يضحك بسخريه : ياطيبه ياطيبه يادوا العيانه هههههههههه
سليمان : طول عمرك حتقعد إنسان بلا مبادئ وجندي للشيطان ومن يتبعه
: وأنت حتقعد طول عمرك مثالي وحتطلع من الدنيا زي ماجيت
سليمان : كلنا حنطلعوا منها زي ماجينا بس شنو خلينا ورانا هذا المهم في اللي يخلي السمعه الطيب وفي اللي يخلي عار اطول من العمر
: ههههع ، المهم زيد فكر في كلامي كويس مش حيخلوك ولاحيخلوا أي حد قريب منك ولاأي حد.. وجي بيمشي
سليمان قلبه انقبض بس تظاهر باللامبالاه : ضرار
التفتله: شنو؟! فكرت بسرعه؟!
سليمان ابتسم: قول لسيدك ماعنديش مايخوفني بيه طريقي مكمل فيه لأخر نفس
ضرار ابتسم بغضب ولف مشي وجهه مايتفسرش من الغيظ
أما سليمان فصابه خوف لأول مرة وروح للحوش بش يتغدا ويمشي مع وائل للجامع اللي بحدا حوش انسابته بش يقروا الفاتحه..
***
ندى: تهبببببلي
اريج: قولي ماشاء الله
جمانه تضحك وكانت توتي في روحها لبست قفطان حني مخصر كمامه طوال وضيقات كان خفيف مغطي من القدام ومفتوح من أعلى الظهر ودارت لمسات بسيطه ع وجهها وكانت طالعه ناعمه وجذابه كعادتها لبست ملايتها وطلعت هي وأمها رفعهم بوها اللي كان معزوم ع الفاتحه حتى هو
انقرت الفاتحه ووائل ومرام كانوا أسعد اتنين في الدنيا وبنتهم فرحانه رغم إنها ماكانتش فاهمه شي
اول ماوصلهم خبر قرايه الفاتحه مرام حضنت جمانه أول وحده وكانوا دموعها سيل جمانه دمعت حتى هي والناس الحاضرة تأتروا
بينما وأئل أول ماكملوا حط ايده ع وجهه وقعد يبكي وجاه الحاج جمعه نهضه وحضنه باس راسه ووائل حسها كبيرة منه باسله راسه وايديه وائل حضن سليمان هلبه
وائل بنبرة باكيه: الفال ليك يابوصاحب
سليمان بضحكه : ربي يهنيك ويسعدك
وبدت الناس تهني فيه دارو عشي كبييير وبو مرام ذبح جمل وصدق حتى منه ،،وجمانه كانت تتحرك مع مرام وأهلها وحميده وأمهم مانزلوش عيونهم من عليها ،، كان ملفته هلبه وعجبت هلبه حاضرات سألوا امها عليها، بعد تمت هديكا الليله وائل خدي مرته وروح بيها لعمارة سليمان عطاهم شقة ووتى فيها دار النوم والمطبخ بيقعد فيها مؤقت لين يكمل صيانة شقته ويأثثها بأثات جديد
نجوا للحظه قبل ليروح وائل بمرام
كانوا واقفين الأصحاب قدام الحوش مع نسبات وائل ويهدرزوا والجيهه التانيه كان مفتوح فيه القراج بش يطلعوا منه النساوين ويروحوا خطم الحاج فرج من حداهم سلم ع وائل وهناه وسلم ومشي لسيارته ماكانش سليمان مركز معاه هلبه طلعوا من الباب متاع القراج جمانه وأمها ولإن الكشافات كانوا والعات كان يبانوا ع بعض مصطفى نسيب وائل شبح جيهة الباب شاف جمانه طالعه زبطها نفس البنت اللي جتهم قبل مشيتها كانت مميزة تمشي بتأني وبحياء سليمان تلقائيا شبح لمصطفى وشبح وين مايشبح لمح وحده كإنها جمانه ركبت السيارة ومشت سيارتهم سليمان شبح مرة تانيه لمصطفى لقاه مركز معا السياره حتى بعد مشت طارتله
سليمان بعصبيه مكتومه: هيا ياشباب هذاكاهو
وائل : خلاص ...مصطفى قول لعويله هيا
خش مصطفى وسليمان يشبحله بضيق وبعدين توجه لسيارته ...
***
احسن حاجه درتيها
ريما: نبي نغير جو قبل الإمتحان
رنا: ياريتك طولتي المده تلاته أيام بس !
ريما : شغل المكتب هلبه والمهندس عز بيسافر بعد اني نروح عنده خدمه برا
رنا : كان مش مشغوله ره جيت معاكم وشفت كنان وعدنان
ريما ابتسمت: مرة تانيه إن شاء الله
رنا بضحكه : بتمشي معاك توأم روحك
ريما ضحكت: ايه خلت نادر يفضي روحه ع خاطر المشيه
رنا: 😂😂
**
هذيكا الليله مرت بأحلى مايكون ع وائل ومرام اللي ماصدقوا ولوا لبعض،،أما سليمان فكان مش ع بعضه الموقف ضايقه هلبه خلاه ينسى حتى لقائه مع ضرار ..
اما جمانه فكانت فرحانه هلبه وروحت حكت لخواتها عن الفاتحه
أما ريما فجهزت شنطتها بش تسافر لخوتها و تغير جو وتفكر بعرض عز أكثر صح ابدتله موافقتها بس هو قاللها تزيد تفكر بش تخش المرحله الجايه في حياتها وهي حاسمه أمرها وملوحه الماضي ورا ظهرها الماضي اللي رجع نجيب يعيش فيه من أول وجديد يتفرج ع صور البيان اللي قاعد محتفظ بيهم متألم هلبه والندم يقتل فيه سكر الألبوم ودسه وخدي تليفونه وفتح الفيس ع صفحتها الشخصيه وقعد يتفرج عليها لين خداه النوم وعقله وقلبه مع ريما بس اللي ضيعها بحماقته....
***
تاني يوم
ريما في المطار
سارة: تي خلاص يا بنتي مش مهاجره هي
رنا تضحك من بين دموعها: ماتعودش تغيب عليا هكي
ريما تبكي: ماتخلينيش نفوتها السفره رنا
ساره دفت رنا عن ريما وجبدت ريما من إيدها: تي أني ماصدقت اقتنعتي هيا هيا سلم بنتي لارجوع إلى الأمام
ضحكوا ونادر راجل سارة قاللهم هيا،،مشوا للطيارة وركبوها وطارت ريما بعيد عن كل شي لفترة من الزمن ....
**
نجيب كان مستعجل نازل من الدروج تقابل هو وأصيل جاي راكب شبحوا لبعض وجي أصيل بيفوت خوه لكن نجيب جبده وحضنه بقوة : قاعد زعلان يابطل تزعل مني اني نوجي
اصيل ضحك واضبط خوه: سامحني مش قصدي.. أنت خوي ومافيش خير منك في عيوني وأنت عارف
حضنه نجيب بقوة واصيل خاف : خيرك نجيب ؟!
نجيب ضحك : شي نرضي فيك بس، ودفه وشد وجهه بإيديه ،،خليك ورا طموحك وامشي في طريقك اللي انت راسمه لنفسك همي كله نشوفك ناجح وخيرمني ،،ضرب ع كتف خوه ونزل
اصيل قعد يشبحله الفت نجيب دارله تحية الشرطه ومشي
امه كانت تشوف في الموقف وهما ماشافوهاش دموعها نزلوا
"ربي يخليكم لبعض ياوليداتي ويحميكم من كل سوء
**
بتتزوجي وبتخليني
سوسن: روجتي فكيني من دراما اصلا حنوقف قيدي سمستر واحد وبنكمل
اريج بحزن: اني حنسبقك مش حنولوا زي بعض
سوسن بإبتسامه: المهم نتلاقوا
اريج بضحكه مع دموع: حتلبسي ملايه
سوسن : حكم القوي ،،لكن قتله خمار لا مش مقتنعه بيه
اريج : شنو قالك
سوسن: قالي المهم مكياج لا
اريج : ماعندك ماديري بيه
سوسن: هههههههههه
***
الساعه 7:00مساءا
نجيب كان طالع لموقع في وحده من مناطق طرابلس وكانت الأرض في تركينه مستخطيه ماشي نجيب وراكب سيارته ويتكلم بالتليفون
نجيب: خلاص يابوي نكمل شغلي ونسبقك غادي
فرج : رد بالك تعطل؛ امك حطير من الفرحه
نجيب بضحكه: إن شاء الله وترجع ترضى عليا
فرج: هي ديما راضيه غير تدلل
نجيب : يحقلها ،المهم بوي توا أني مستعجل نتلاقوا بعد ساعه
فرج: إن شاء الله وصكر ،،صكر نجيب الخط ولع السيارة وتوجه للموقع بعد قطع مسافه وقرب من وجهته المقصودة حس إنه معاش قدر يتحكم في سياره
نجيب بغضب: خيرها الهم توا! دارتها فيا كان اليوم"هو كان عنده عيب في سيارته في المكابح لكن كان يعرف يسيطر عليه هالمرة ماقدرش "
الوضع بدي يطلع عن السيطرة حاول بس مافيش فايده
نجيب بخوف: يااارب
كانت في باص قدامه فيها ناس كان حيخبطها
نجيب : مانحطش أرواحهم في رقبتي اجتازهم بسرعه لكن هالإجتياز خلا السياره الدور حوالين نفسها هلبه وبدت تنقلب مرة اتنين تلاته في الرابعه انقلبت على ظهرها ...الدم بدي يسيل ونجيب ولانفس.....
يتبع .....
#GomanFared
