الحلقة(114)ماقبل الأخيرة
شن سبب المشكله
نعيم: عادي مشكله بين شباب..
الأمن: وأنت
كنان: عركه عاديه غلطنا في بعض واضاربنا
الأمن :بس في ناس شافوك انت اللي بديت ياكنان
نعيم: في بيناتنا حساب ماصفيناشي..
الأمن قعد يشبحلهم الزوز: ع العموم حتوقعوا ع تعهد انتم الزوز وأنت ياكنان كان مش نعرفك زين ره مافوتتهاش لإنها مش أول مشكله ليك ..
كنان قعد يشبح فوق بلامبالاة...وقعوا الزوز ع تعهد وهما طالعين..
نعيم: ع خاطر بنت عمي مشيتها داخل
كنان فاته وكأنه مايتكلمش..وجي عدنان لنعيم: أسف جدا ع اللي صار مشكلته لما يعصب عقله يطير..
نعيم ابتسم مجامله: حصل خير..
عدنان ردله نفس الإبتسامه: شكرا...ومشي
كنان وهو طالع شاف ندى مع صحباتها تبكي قلبه وجعه هي لما شافته قلبت وجهها عنه ..ع طلعة نعيم مشتله تجري
ندى: شن صار نعيم
نعيم : ع خاطرك مشيتها ع خير
ندى ابتسمت: شكرا نعنع
نعيم ابتسم وشبح جيهة صاحباتها: موضوعنا مازال قائم ره ..مش مروح لين نتمه
التفتت ندى جهة صحباتها وضحكت: تمام ياسيدي..
عدنان: تحرك شن تراجي في شن مازال خاطرك
كنان وهو يشبح لندى ونعيم : هيا روح بيا..
عدنان : قدامي...كلم عدنان خطيبته وأعتذر منها وروح بكنان اللي كانت اعصابه راكبه ومهداش بكل
***
جمانه ماكانش عندها حصص يوم الأحد فدارت دورة ع الحوش وصلت في دار النوم وهي ضم في الدولاب متاع سليمان ..لمحت صندوق قهوي منظره مميز طلعاته بش تكمل ترتبيها لقت تحته صورة قامتها لقتها صورة قديمه للحاج عمران وولاده وركزت ع سليمان كيف كان مميز بيناتهم وشعره كان طويل واصل لكتافه ..هو كيف خش للحوش جايب معاه حوت لأن جمانه خاطرها ادير كسكسي بالحوت ..حطه في المطبخ ..واتجه للدار لقاها مقعمزة تتأمل في صورة ماحستش بيه لما خش وقعمز جنبها وقعد يتفرج معاها...
سليمان : الصورة هادي عمري فيها 13سنه ..
جمانه بضحكه: كنت تهبل
سليمان برفعة حاجب : كنت!!
شبحتله بضحكه: وتوا وليت تهبل أكثر
سليمان باسها من خدها : أنتي اللي تهبلي ..
جمانه ضحكت وشبحت للصورة: انتم عددكم اربعه بس في واحد خامس معاكم..
سليمان شبح للصورة وتنهد : هذا خوي لافي الله يرحمه
جمانه شبحتله: قصدك عندك خو متوفي ؟
سليمان : ايه ..مانحبوش نجيبوا سيرته بالذات قدام أمي لأن نفسيتها تتعب هلبه..
جمانه : شن سبب وفاته ..
سليمان : حادث سيارة..
جمانه: مات وهو صغير..
سليمان :لافي اكبر مني بسنتين توفى في اخر2008
جمانه بأسف: الله يرحمه ويغفرله ..
سليمان ضم رجليه بإيديه: كان طيب هلبه بشوش وبصايري ..كان يعامل فيا تقول التوأم متاعه ..توفى في يوم تخرجه اللي عطل فيه هلبه لأنه كان كسول شوي.. ضحك.. ناقش وكنا حاضرين روحنا قبله للحوش وكنا مدايرين عزومه ع خاطره ..هو روح بعدنا لإن يبي يقعد مع صحابه ..وهو مروح طلعت عليه سيارة تجري بسرعه ماقدرش يتجاوزها خبطت سيارته بقوة والسيارة قعدت ادور وانقلبت وتنطر منها مات في مكانه..نزلت دمعه من عيون سليمان ..مسحتها جمانه للي كانت أول مرة تشوف دموعه وخداته في حضنها وقعدت تسمح ع راسه وهو تمسك بحضنها كإنه طفل صغير محتاج لحضن أمه ..💔
***
فات باقي اليوم عادي ...كنان كان يتصل بندى اللي مابتش ترد عليه بكككل ..لين جت الساعه 1:30في الليل
ندى كانت خلاص حترقد جتها رساله تأففت بملل وفتحتها..
(اني لوطا ووالله لو ماتنزليش توا ندير العار وانتي تعرفيني)
ندى انصدمت مسكينه وحتى النوم طار..طلعت من دارها بالشويه وكان الحوش ساكت تماما ..طلعت للجنان واتصلت بيه رد طول
ندى بهمس: انت وين
كنان : تعالي من بابكم الخلفي ..وصكر
ندى شبحت لتليفونها : مهبول..ومشت تتسحب وتشبح فوق جهة شقق خوتها ..لين وصلت في الباب فتحاته بالشويه دف كنان الباب وخش ورده ..
ندى بهمس : انت واحد مجنون رسمي
كنان بهمس: ايه مجنون وهلبه ..بالك مش عاجبك
ندى: ايه مش عاجبني العار اللي درته اليوم والله ماقادرة ننساه ..
كنان بضحكه: عار شنو اكشن هذا لازم منه في الحياة
ندى بضحكه مكتومه: رسمي مختش ..
كنان: شن يبي جاي ولد عمك هذا
ندى : وانت شن دخلك ..
فنص كنان: كان اني مادخليش مالا منو اللي دخله قولي
ندى: قبل لاتحاسبني برا حاسب روحك
كنان تنهد وشبح جهة شقه اخته بعدين شبحلها: هذاكا اليوم اللي اسمها صفاء وحكالها القصه كامله..
ندى: وأني شن قلتلك قبلها شن نبهت عليك ..
كنان حط ايده ع راسه: حقك ع راسي ياحبيبة قلبي انتي
ندى شبحتله :كنان زي ماأني محترمه رغبتك إني مانتعاملش الشباب نهائي ..حتى أنت بادلني نفس الإحترام ..
كنان غمض عيونه وفتحهم وابتسم: حاضر ووعد مني معاش تتكرر..قوليلي علاش جايك للكليه
ندى بضحكه: حاط عينه ع تسنيم شافها مرة معاي وعجباته وقعد يراقب فيها وخشت راسه وقالي نكلمهاله ونجمعهم ببعض
كنان بضحكه: واني خربتها ..
ندى : لالا ..ماروحش إلا وهو مكلمها...وتم موضوعه معاها .
كنان: مايحبش يضيع الفرص صح ليه..
ندى: باهي ..هيا توا اطلع قبل ليفيق حد ويحس بينا
كنان ابتسم : والله مامطاوعني قلبي..
ندى:كنااان
كنان ضحك:باه هاني طالع توا تو بنكلمك تليفون خليك فايقه
ندى : باهي غير اطلع..طلع كنان بالسيف وندى ولت تتسحب لين وصلت لدارها وحمدت ربي اللي ماحس بيها حد..
***
فاتت ايام وشهور ولدت فيهم مرت وائل ومشت جمانه للمة لما شافت العيل تشوقت هلبه للحظه ولادتها وامتى تشوف ولادها بين إيديها ..وزاد شوقها أكثر بعد ولادة ريماوملاك للي ولادتهم كانت مع بعض ملاك طبيعي و ريما بالعمليه
وطبعا كان الخوف مسيطر ع نجيب ..لكن الحمد لله جابت ريما وحالها كويس هي وبنتها...دارو اسبوع كبير في الصاله للزوز وكان اسبوع يحكوا بيه لشهر قدام ...والعيلة كبرت والأحفاد زادو حلاوة الحياة بالذات بالنسبه للجد والجده 💖
ندى اختارت لبنت عبدو اسم رنيم ..وبنت نجيب نغم وطبعا كنان هو اللي اقترحه عليها😁.
***
خلي نظم أموري غادي ونرتب أوضاعي ونحددوا موعد العرس
هويدا: برغم انه والله ماهاين عليا نسيب بلادي وناسي..لكن المكان اللي تكون فيه هو بلادي وانت فيه كل ناسي..
أصيل : احبج واااايد
هويدا: ههههههههههه مشت فيك اللهجه من توا ..
اصيل: هههههههههه حلوة غصب عنك تمشي فيك ..
هويدا: صح..وقفت ع صفة فيها ألعاب ..شن رايك حلوة ولا
اصيل : اممم حلوة بس هادي احلى
هويدا: صح والله ..هو اخر الأسبوع عيد ميلادها لكن قلت خل ناخد من توا ونرتاح من همها
اصيل بضحكه: بنت خالك ولا بنت خالتك قلتيلي
هويدا: بنت ولد خالي
اصيل: هههههههههه
باه ياماما تو نشروها مرة تانيه
الولد يبكي : بالله عليك ياماما اشريهالي توا
امه فتحت الشنطه وتعد في الفلوس وشافت سعر اللعبه: ماما توا ماعنديش هلبه فلوس ..وعد ياماما لما يولوا عندي تو نشروها ..
الولد: ياريته بابا مامشي للجنه ره شرهالي ..
تاثرت امه ونزلت منها دمعه مسحت وشدت ولدها ومشت وهو قاعد يبكي ..
اصيل وهويدا كانوا مركزين معاهم وتأثروا لين خلاص..
المراة وقفت ع الكاسه تخلص ..قعد يحسبلها العامل متاع المحل حط اصيل اللعبه معاهم المراة اتفاجئت..
اصيل : هادي ع حسابي للأخت
المراة: لا اسفه مانقدرش نقبلها ..
اصيل ابتسم: الهديه لاترد والرسول قبلها..
المراة: شكرا مش محتاجين صدقه ..
اصيل : الله يسامحك وخيتي اني خديتهاله لإن في شبه كبير من ولد خوي المتوفي من غير سو ع ولدك بالله عليك ماترديها عليا..
هويدا مصدومه في الكذبه
المراة تحشمت وشافت لولدها اللي يشبح للعبه وعيونه يلمعوا من الفرحه ..خدتها: بارك الله فيك والله يرحم ولد خوك ..خدتها المراة وخلصت اللي خداته وطلعت..
هويدا: يالطيف ع الكذبه من غير سو ع بنات خوتك
اصيل بضحكه: لو ماقلتش هكي ماكانتش حتاخدها وولدها يشبح للعبه وقريب يهبل عليها حرام تقعد في خاطره وهو يتيم ..
ابتسمت هويدا وهو قعد يخلص في اللي شراه..والعامل متاع المحل شكره ع الموقف اللي داره هلبه لأنه اثر فيه وطلع هو هويدا وروحوا...
***
خش رمضان ووصل في يومه العاشر وجمانه خشت شهرها..سليمان كانت عنده سفرة دعويه هو ومشايخ معاه وكانوا مرتبطين بجمعيه دعويه عالميه..رفع جمانه للبلاد تقعد غادي لين هو يروح سفرته مدتها 10أيام ..
عمران : حتى اني سمعت بشي زي هذا
سليمان : الحكايه باينه والحرب جايه لطرابلس..لهالسبب جبت زوجتي هني مانعرفش شن يصير غادي
عمران : وأماليها كان قلتلهم يجونا هني نفضولهم حوش يقعدوا فيه
سليمان ابتسم : بلغتهم لكن عمي الحاج فرج حاسب حسابه وع قد مادرت فيه رفض تماما وقال انه حيمشي للزاويه ..
عمران: علي كيفه..انت اطمن على عيالك في الحفظ والصون وحاول تروح بسرعه المراه ع وشك ولاده
سليمان : إن شاء الله..سلم ع راس بوه وايديه..هي السلام عليكم ..
عمران : وعليكم السلام.
...
سلمى: معقوله يسافر وماتسلميش عليه ..
جمانه وهي تبكي: مانبيشي يشوفني نبكي ويمشي وهو متكدر
سلمى: ع اساس ماتكدرش توا
جمانه هزت راسها بالنفي: لا هو عارفني وفاهم وهكي احسن صدقيني
سلمى تنهدت: باه ياسرك بكي خلاص ..
جمانه ترشف وكل ماتمسح دموعها ينزلوا ..وصلتها رساله ع تليفونها شافتها(استودعني الله بس ..وماتبكيش ..نعشقك )
ضحكت ومسحت دموعها ..
سلمى: آاااه ياحليلي من الحب ..
جمانه: ههههههههههه
....
فاتوا ايام جمانه وسكينه زي البيات مايمسوا في شي وامباركه ولطيفه عليهم الكيد ومعاهم سلمى..لكن هما كانوا يحرقوا حرق من داخل بالذات امباركه للي حقدها زاد ومعاش متحمله استفزاز سكينه المستمر فخططت لكارثه حديرها حولت فيها ايدها من ربي مرة وحده...
في يوم كانت سكينه تعبانه وكأن الوحم رجعلها برغم انها فطرت هذكا اليوم لكن بلافايده اللي تفطره ترجعه...بعد المغرب وبعد تمت حوسة الماعين..حالها تحسن شويه خشت للمطبخ دارت صونيه فيها كم حاجه بتاكلهم وكانوا وقتها امباركه وعمت سليمان سعاد في المطبخ يوتوا في الشاهي وحلاوات لرجاله جايين لعمران ..وجمانه كانت ادير في حاجه في الخلاط ...
شنو هذا جمانه
جمانه: عصير بنجر كويس لفقر الدم
سكينه : الله ..باه بالله لما تكملي صبلي طاسه وجيبيلي ..
جمانه ابتسمت : حاضر..
وامباركه مركزة معاهم بس ماكانتش تشبحلهم..
....
جايتك وطالبه منك السماح ياخالتي
فتحيه: السماح ماتطلبيشي مني اطلبيه من اللي غلطتي فيها ..
رجاء : اكيد هذا علاش جيت
رقيه: صنعتها هادي مش حتعاودها ياوخيتي غير هي كانت حامقه ع خاطر وخيتها..
سلمى: خلاص صار خير..وجمانه طيبه وحتسامح
رجاء : هي وينها..
....
جمانه شربت طاسة عصير البنجر وصبت طاسه لسكينه وحطتها ع الرخامه ..ووقفت تغسل في الخلاط ..امباركه استغلت الفرصة وجت حدا الطاسه ع اساس بتفتح الدولاب وتاخد حاجه وحطت شي في طاسة العصير...وولت لسعاد اللي كانت تخدم في الشاهي ..كملت جمانه وولت للطاسه ..شافتها سعاد: بقولي قوي يابنتي
جمانه بضحكه : لالا بس طعمته قويه لكن هو مفيد هلبه
امباركه : ديرله سكر سكينه تحب الحاجه الحلوة هلبه
جمانه خدت السكر وحطاته وقعدت تحرك ..وأمباركه تشبحلها .."ايوه حركيه زيدي بش من اول جغمتين يدير مفعوله " ..كملت جمانه وخدت الطاسه وطلعت قابلتها رجاء انصدمت لما رتها...
رجاء ابتسمت بربكه: شن حالك جمانه
جمانه : الحمد لله ..كيف حالك انتي ..
رجاء : بخير الحمد لله ..جمانه نبيك شويه معليشي
جمانه ابتسمت : عارفاتك في شن تبيني حني في شهر مبارك ومن اول ماخش صفيت قلبي من كل شي ومش حامله ع حد أي حاجه..
رجاء وعيونها دمعوا: حز في نفسي اللي صار مع أختي ماقدرتش نتقبل اللي صار حقدت عليك وانتي ماليكش ذنب
جمانه : خلاص انسي وهي تعالي معاي ..مشوا ..جت زينب
رجاء : بتلحق بعدين مع وداد يكملوا الحوسه ويجوا
جمانه : كويس ..
خشت جمانه للصالة وعطت لسكينه العصير وسلمت على رقيه..وقعمزت وقعدوا يهدرزوا شويه خشوا زينب ووداد وسلموا..وجمانه شدت زينب تهدرز عليها شن دارت وشن وتت للعرس ..
لطيفه بعد شربت شويه من العصير ..ناضت خشت للحمام..
شويه ويسمعوا في عياط..
فتحيه: هذا صوت سلمى ..
طلعوا يجروا ..لقوها واقفه في الممر متاع الحمام اللي كانت طايحه فيه سكينه وتحتها بقعة دم كبيييرة...
يتبع .....
#GomanFared
