الحلقة(46)
فاتو يومين وكل حد لاهي بنفسه نجيب يسبق في الوقت بش يلحق يجهز كل شي للمؤتمر..وجمانه تراجع في مشروعها اللي تحددله موعد جديد يوم الأحد،،أمااريج فضرار من لما مشي لبنغازي معاش كلمها ولاحصلاته وندى مش أحسن منها غير إن ندى قلبها كان مقبوض طول الوقت وخايفه ع قاسم
أما سليمان فكان يوتي لخطبة الجمعه اللي حيتكلم فيها عن هلبه مواضيع حتكون جريئه وكالعادة سليمان فكلمه الحق مايخافش في الله لومة لائم....
***
يوم الجمعه
الحاج فرج عازم عبدالباسط وخوه ناصر وذابح تلات خرفان صدق واحد منهم والباقي بين شوا وغدي وعشي ،،هذاكا اليوم لاأمل ولافيصل جو ،،اما عيلة ناصر جت كلها
طبعا عمتك وردة واخده موقف من عيلة سلفها وتتعامل معاهم من فوق لافوق وأمينه تساير وخلاص وتحاول تشغل نفسها مع نجيه عن تصرفات سلفتها المحرجه...
الشباب كان يوتوا في مكان في الحوازة بش يلعبوا كورة
والبنات مشوا جيهة الورد اللي زارعينه يشوفوه ويطمنوا ع وضعه والمكان اللي فيه الورد كان مقابل المكان اللي يجهزوا فيه الأولاد للكورة
جمانه كانت تشوف في ورداتها قداش موليين يهبلوا ومنظرهم يشرح الصدر غير ريحتهم ياسر وتليفونها كان في إيدها فتحت الفيس بتشوف سليمان شن منزل لقاته أون لاين خشت طول
(السلام عليكم صباح الخير)
(وعليكم السلام صباح النور)
(كيف حالك وحال أهلك)
(حالي الحمد لله اما أهلي العشية إن شاء الله ماشيلهم وإنتي كيف حالك وحال أهلك)
(توصل سالم أن شاء الله، الحمد لله حني اليوم في الحوازة واني تحديدا ندير في دورة ع ورداتي )
سليمان ابتسم
(ورداتك ؟)
ابتسمت جمانه
(ايه ماهو حني في الحوازة مخصصين مكان زارعين فيه تلاته أنواع ورد وكل وحده فينا مسؤوله ع نوع وفي انشغالاتنا حاطين عليهم عامل يدير باله منهم)
ضحك سليمان لإنه تحكي بحماس وبالتفصيل
(نستأذنك لحظات)
جمانه ابتسمت ورجعت تشوف في وردها
اما اريج
(الورد يزرع ورد غير كيف تجي هادي )
ضحكت
(ايه ماهو الجمال مايزرعه إلا الجميل )
ضحك ضرار
(غرور ولاثقه )
(الزوز مع بعض)
ضحك
(يحقلك والله يحقلك )
ضحكت أريج
(شن جو بنغازي)
(كويسه )
(حلوة ؟)
(إيه ديما سمحه في كل الظروف)
(شكلك ماشيلها هلبه)
(إيه ايام كنت صغير جو 18العشرين هكي عندي فيها صحاب)
(اها)
أما ندى
(والله كان نلقى نزغرط )
قاسم يضحك
(لهالدرجه توحشتيني)
ندى تبكي
(ندى )
(آلو)
(والله دموعي ينزلوا مانشوفش في الحروف هذا عالاش عطلت في الرد)
قاسم قلبه بيفر "والله تحبني "
(شن اديري)
(في الحوازه بحدا ورداتي اللي حكيتلك عليهم
في نفس اللحظه ◇◇◇
جمانه
(ممكن نشوف ورداتك)
اريج
(ترا صوريلي الورد ياورد)
ندى
(نبي نحق الورد متاعك)
جمانه
(لحظه هي)
اريج
(تمام)
ندي
(شوي بس) +
التلاته مع بعض" تششششششك "،،شبحوا لبعض لحظات وبعدين ضحكوا مع بعض ،،وكل وحده بعتت صورة لحبيب قلبها ...
***
حيييييي ورد وجو وإبتسامات لالالالالالالالاا مش معقووووول مش ممممكن "بصوت معلق رياضي"
سليمان انخلع: انت كنت تتجسس
عماد بضحكه: والله لااني جاي بنكلمك شفت هالمنظر ره انت فاتح اللاب توب ماتنساش
سليمان انحرج وطلع من المحادثه وخش لصفحته بش ينزل منشور عن الخطبه وعماد ضحك هز راسه يمين ويسار وطلع
***
جي وقت الغدي وهالمرة قسموا نساوين ورجاله
ندى: احسبوا فيصل جي ره
جمانه اضايقت لما سمعت إسمه
امينه ونجيه: هيا هي
وردة كانت تشبح لأريج من تحت لتحت شبحات ياالطيف
وأريج انتبهتلها ومش عارفه خيرها
اريج تكلم في جمانه بهمس : خيرها مرت عمك
جمانه بنفس الهمس: حتى اني لاحظتها مش عارفه خيرها
....
تغدوا العيله وغسلوا النساوين الماعين بعد العصر
مشوا الرجاله جيهة الملعب وبدوا يوتوا في أرواحهم للكورة
بعد تمت المباراة بفوز فريق فيصل وبعد فرحة الأنتصار والشماته 😂،،صلوا المغرب ،،وبدوا نساوين يوتوا في العشي اللي كان عصبان والرجاله يشووا
اريج كانت طالعه برا تجيب في نعناع للشاهي وكيف جايه بتخش المطبخ شدتها ام معز
وردة: ترا شويه بنتي نبيك في كلمتين
اريج استغربت: حاضر
مشوا ع تركينه قريبه شويه من المطبخ
وردة بنظرة حاده ونبرة حاده: اسمعي اللي دير فيه عيب
اريج ضيقت عيونها وهي تشبحلها متاع مش فاهمه
وردة: لما نطلبوك لمعز وأنتي ترفضيه مايجيش تتعاملي معاه بطريقه وكأنه ماصار شي لا ودلعي فيه عزو ومش عارف شني
الولد وجعه خاطره لما ردتيه وأنتي مستهترة بيه لهالدرجه
حطي في بالك ولدي هكي هكي يقولوا عليه "ودارت حركه بإيديها كإنها ترش في ملح أكيد زبطوها" وماخاسر غيرك
فياريت تنتبهي ع تصرفاتك كويس وخشت داخل
اريج انطمست مرةوحده هي لسانها طويل والكلمه تردها بعشرة بس هالمرة ماقدرتش تنطق "كيف معز خطبني أمتي ؟!"
***
بنغازي
الساعه 10 ليلا
:كل شي تمام مجرد يركب السيارة ويوصل للمقر حتقربع عليهم كلهم
:كويس ،،نراجي نسمع صوت الأنفجار يوصلني هني
: حتسمعه ههع
....
:انت متأكد من معلوماتك
: زي مامتأكد من إسمي
قاسم: مني فيكم يعرف عنوانه
:انا
قاسم جبده: هيا أرفعني غادي بسرعه
طلع قاسم هو الضابط اللي معاه وهما في الطريق قاسم كان واخد قرار حيحرق بيه قلوب هلبه ناس يحبوه شد تليفونه وبعت رساله لندى وسكره
:شن ببالك ياقاسم
قاسم: نوصلوا وتو تعرف
"حنستخدم خيالي هلبه في المقطع هذا لذلك اقروا وقولوا باهي😂"
رن تليفون السواق خداه قاسم لقاه واحد من الضباط زملائه رد
: ايوا عطيني قاسم
:انا قاسم
: اسمع قاسم السيارة فحال تحركت السيارة حيبدأ يخدم المؤقت متاع القنبله وفي حال ماتحركتش خلال 12ساعه حيبدا المؤقت بروحه يخدم وتنفجر
: تمام
: قاسم شن بدير
: كل خير إن شاء الله صكر
مجرد وصلوا قدام حوش العقيد نزل قاسم وطق الباب بقوة
انفتح
: كنك قاسم شنو في
: كويس انت اللي فتحت عطيني مفتاح سيارتك
: عليش
: هات تربح
: انا طالع وبنجيكم عشان العمليه اللي بنفذوها بكرا
قاسم بتلقائيه حط إيده في جيب العقيد لقي المفتاح : سامحني سيدي
خدي المفتاح وطلع يجري للسيارة العقيد شبه فهم لحقه
: قاسم انزل ياقاسم
: خلاص ركبت توا
: قاسم ياولدي راك قاعد صغير خليني اني نواجه مصيري عشت حياتي طول وعرض اللي ماتوا مش خير مني
: انت عندك وليه مريضه وعيل مريض عباهم ع الله ثم عليك
الراجل اللي كان معاه في السيارة: قاسم ارجوك انزل تربح
: اسمع عدي ل(*******) وقوله الأمانه في الحفظ والصون عند العروس
قاسم ولع السيارة وتحرك بسرعه وخلا العقيد وزميله مصدومين ودموعهم تنزل
قاسم طلع يجري بالسيارة ويسابق في الوقت ويحاول يطلع بيها لمكان مستخطي وفاضي 20دقيقة بالزبط وتنفجر يسوق بسرعه ويطلع من مكان ويخش في مكان لين فاتوا 19دقيقه خش لوطى فاضيه كبيره 30تانيه بالزبط قاسم وقف في نصها وقف ومر عليه شريط حياته كله لما كان صغير لعند تخرج من كلية الشرطه الثورة اللي حارب فيها بكل ماعنده امه خوه أصحابه ندى ندى اللي كانت احلى حاجه صارت في حياته وتمنى تكون حلاله وكان عارف أن هالأمنيه مستحيله شبح فوق 10ثواني يااارب اقبلني شهيد وصبر أمي وأسعد ندى من بعدي
3أشهد أن لاإله إلا الله 2
وأشهد ان محمد رسول الله 1
0.....
"صوت إنفجااااار قوي هز بنغازي هز انتهت بيه حكاية قاسم"💔
***
امي إنتي شن تقولي
فتحيه : اللي سمعته حتتزوج زينب وحتولي هني وتكمل عمرك هني
سليمان بصدمه: امي انتي تسمعي اللي تقولي فيه
فتحيه بعصبيه: انت بايع روحك زايد ناقص مدخل روحك في معامع مالكش فيها اني في بالي أنك قاعد غادي ع خاطر قرايتك ع خاطر الجامع ع خاطر مرتاح غادي لكن طلعت تغني في موال تاني
سليمان بضيق؛ ياأمي من قايلك هالكلام
فتحيه : اللي قاله صادق ومايكذبش ،، اسمع ياسليمان ماتعبليش قلبي حول هنايا وكمل قرايتك وتزوج بنت خالتك ودير عيله ع حالك ومية جامع هني يتمنوك تكون فيهم
سليمان بحده: امي اللي قلتي عليه مانقدرش نديره
فتحيه قعدت تشبحله قربت منه: اختار وحده من 2يارضاي يا تقعد في طرابلس
سليمان مصدووووم لين خلاص لسانه انشل مش عارف شنو يرد يشبح لأمه وعيونه مفتوحات ع الآخر وأمه تشبحله ودموعها في عيونها وتراجي في رده
فجأة ،،،رن تليفون سليمان ،،بصعوبه مدإيده لجيبه وخداه،،رقم غريب!! رد بالسيف
سليمان : السلام عليكم
:...........
يتبع .....
#GomanFared
