الحلقة(79)
الجمعه يوم مميز عند الليبيين لمة العيله والأجواء الحلوة والهدرزة صغار يلعبوا وجد عيونه فرحانه بيهم ومرات يكشخ عليهم كان خربوا ونساوين وقتهم بين الغدي وعالة الشاهي ومايتبعها والعشي وخلال هذا كله هدرزة وضحك وجو حلو والرجاله يتناقشوا ع حال البلاد واللي صاير فيها وكلهم يولوا محللين سياسيين 😂...
هذا الجو كان في حوش أهل عماد اللي ملتمين وسرور بيناتهم مش حاسه بالغربه هما خلوها تندمج معاهم العيله طيبه وحتى سلفاتها كويسات برغم إنهم متحسسين شويه من معاملة حمواتهم وشيبانهم لسرور لأنها كانت خاصه اولا لأنها مرت أخر العنقود اللي انحرموا من وجوده بينهم لسنين وثانيا بسبب ظروفها الخاصه ...
"طلعووووها توا هالساااايبه"
حنان: هذا شنو
سرور كانت مصدومه خايفه لأنها عرفت صوت خوها الكبير
تسمع فيهم يتعاركوا برا وعماد وقتها كان مهناش
"مش ماشي لين تطللللع هالسايبه"
سرور لبست وشاحها وطلعت وسلافها وعمها كانوا واقفين
سرور بقوة وغضب: شن جاي تبي
قدم خوها: ياكلبه من عطاك الإذن تطلعي من حوش اختك وتعيشي بين ناس غريبه
سرور: اولا انت ماليكش حق دام لزيتني وقلت قدام الناس إنك خليت مسؤوليتك مني،،والتانيه هذا حوش اهل ياجلي يعني أهلي ...
قدملها بسرعه : ماعندك كان لسان ياكلبه 👋 وعطاها كف وطيحها
ع خشة عماد اللي شاف الكف ومرته كيف طاحت قدم زي المجنون شح خوها من اللتالي وطاح فيها ضرب بكل قوته وخوته يشحوا فيه لين كشخ عليه بوه باش ناض
وهي كانت تشبح في اللي صار ودموعها مطر
عماد وخوته شادينه: ياكلب تخطي عتبه الحوش مرة تانيه رجليك نقصهم وديني مدة ايديك ع مرتي هادي لما ندفعك ثمنها غالي
خوها وهو يمشي بصعوبه وشاد وجهه: تي برا عقاب واحد مدمن بيدريلي روحه راجل ره عارف ماضيك
بو عماد: توا بتطلع تقلب وجهك ولانجيب من يطلعك وي الكلب
خوها ويشبحلها بتهديد: تو تشوفي يامسخه ..وطلع
عماد خوته فكوه وهو التفت شبح لسرور اللي كانت نظرة عيونها غريبه خشت تجري وسلفاتها وحمواتها يشوفوا فيها وواجعتهم
أما عماد فطلع للجامع طول ....
***
ندى واقفه قدام دار أصيل
طقطقطق
اصيل: خش
خشت ندى بالشويه : خوي السمح
اصيل : لا
ندى: شن هو اللي لا😕
اصيل: اللي جايتني ع خاطره
ندى: آخر كلام
اصيل: ونبي وراس وخيتي اطلعي بنرقد
ندى: بترقد من توا الساعه 8 ماجتش
اصيل: نرقد امتا مانبي مالكش علاقه وخودي الباب في ايدك وانتي طالعه..واتكى ع السرير
ندى وهي طالعه بزعل مصطنع: الله غالب نكلم هويدا ونقوللها مانقدرش نجيك
فجأه 🏃♂️"لقت اصيل متنطر قدامها"
ندى:😨
أصيل:بتمشي لهويدا قصدك 😍
ندى: ايه 😒
اصيل : تمام غدوة بعد نرفع جمانه للجامع نجي ناخدك
ندى: ياكبدي عليك 😒
اصيل بضحكه ومولي لسريره: اطلعي يارتيله وصكري الضي والباب
ندى:😑...وطلعت ...
اصيل: اشي الحمارةخلت الضي والباب 😠
***
يرن تليفونها كالعاده شبحتله واستغفرت قفلاته مرة وحدة وطقت ع دار اختها
جمانه: روجه نضتي
اريج تمسح في دموعها: ايه خشي جمون
خشت جمانه لقت اريج مبتسمه وواضح عليها باكيه قعمزت بحداها
جمانه : خيرك ؟ماارتحتيش في السفره ؟
اريج بنبرة: بالعكس كانت حلوة
جمانه حطت ايدها ع ايد أختها : باه خيرك
اريج انهدت بالبكي: شفته ياجمانه
جمانه قلبها انقبض : كيف شفتيه
اريج ببكي: شفته عايش حياته عادي وحتى دار وحده تانيه كان تشوفي كيف شاد في ايدها ويهدرز عليها ويضحكوا شافني وكإن مايعرفنيش ياجمانه ولاكإني نعنيله حاجه...وتبكي
جتها جمانه حضنتها: اللي زيه عمرهم ماحيكونوا صادقين في اي شي في حياتهم الكذب في دمهم وهمهم مصالحهم وبس يتعرفوا امتى مايبوا يخطبوا امتى مايبوا يسيبوا امتي مايبوا ماعندهم اعتبار لشي ابدا...
اريج بعدت عن حضن اختها وقعدت تشبحلها بإستغراب: علاش تتكلمي هكي ؟؟
جمانه تنهدت : اريج اني في الأول مانبيش نقولك بس الباين أنك لازم تعرفي بش ماتنزليش دموعك الغاليه هادي ع شي مايسواش
اريج قلبها انقبض: قولي
جمانه:........
***
فتحيه تبكي : توا بنضرك انتي أختي بنضر بنية أختي؟؟
رقيه تبكي : ضرتينا وفات بنتي هو جايتها مانعرفش أمتى تنوض منها مانعرفش لو حتنوض اصلا ..مانيش مسامحاتك يافتحيه في كسرة قلب بنتي مش مسامحاتك ..وصكرت عليها
وفتحيه تبكي بالعبرة..
**
في الليل
كانت راقدة ع السرير لكن نوم مجافي عيونها اللي كانت تنزف بالدموع تبكي ع نفسها ع كسرتها قدام أهل راجلها شنو حيقول عليها توا ؟؟!اكيد حيهزوا عليها ...كانت مخنوقه هلبه تبكي بحرقه شديده ..حست بإيد محطوطه ع ذراعها
عماد: سروري قاعده تبكي
سرور مابتش ترد
عماد قدم راسها وقعد يشبحلها كان مقعمز في جنبها ع السرير: ماتبيش تكلميني
سرور ببكي: خليني بيوحي
عماد بضحك: لا مش مخليك يايوحي
سرور: عماد ايجوك
عماد: ارجوك انتي افهمي واستوعبي إني وليت راجلك همك همي حزنك حزني فرحك فرحي انتي اني وأني إنتي
سرور ضحكت بتهكم: توا تقول هكي وبعدين تقعد تعاييي فيا أن ماوياي حد
ضرب بسبابته ع راسها: دماغك هذا مصدي ..
سرور كتمت ضحكتها
عماد: اضحكي ماتشديهاش
سرور ضحكت بعدين شبحتله: أني معاد عندي حد غييك يد بالك تكسييني ولا تخليني
عماد: اني عيلتك وانتي عيلتي سروري أني عشت بروحي سنين من غير عيله وماوراي حد كان ربي وطحت في ناس كانتلي خير من عيلتي.. انت اللي ردتيني لعيلتي الأولى صح بس صدقيني ماوليتش ألا ع خاطرك يعني اني شايف الدنيا بيك وليك حنكون خوك وبوك وحبيبك وصاحبك حنكون سندك من بعد ربي حنفضلك ع نفسي في كل شي ومش غير كلام وبس حتشوفي بعينك
سرورهو يتكلم كانت تتأمل فيه يتكلم بصدق عيونه اللي مليانات حب ودموع كانوا يقولوا في اكثر من الكلام اللي يقول فيه لسانه ..لاإراديا باسته من ذقنه ..
عماد استك مرة وحده قعد يشبح لعيونها وخلاص وهما يشوفوا لبعض عماد ماحسش بنفسه إلا وهو يبوس فيها
هي انسجمت بعدين استاقضت ودفاته وقعمزت ع حيلها
سرور بعصبيه وربكه: خيييييك هبلت انت 😳😡
عماد : هههههههههههههههههه ،،تو منو اللي بدي الأول
سرور: انت علاش خاش اصلا الداي خط احمي ولا قلتلك هكي من قبل ولا ماقتلش 😡😡
عماد بضحكه: خاش نطمن عليك ياقردة
سرور: قيدة في عينك ..نوض اطلع
عماد: غير اهدي خل نتفاهموا
سرور غمضت عينها بتهديد وتأشر بسبابتها: بتطلع ولا والله نصكها عيطه ..
عماد ناض يضحك: هاه نضت نضت ..طالع وهو يضحك وهي تشبحله وقف في الباب
عماد: سرور
سرور شبحتله ع جنب 😒
عماد: قولي زرزور
حدفاته بالمخده طلع وسكر الباب بسرعه وهي قعدت تضحك وتذكر اللي صار تتحشم وتتلمس في حرارة خدودها من الخجل....❤
***
ندى مكسده ع قروب في الفيس مدايرته هي والبنات اللي يقروا معاها ومقررين يخشوا طب قروب رسائل طبعا
يهدرزوا ع النتيجه وع عزومه هويدا اللي دايرتهالهم غدوة في وحده من البنات اسمها صفاء ماكانتش ندى ماتقبلتها هلبه ماصارش بينهم شي ولاشافت منها شي لكن هكي سبحان الله في ناس مش مقبولين من ربي ..البنت قالت انها جايه غدوة وندى طارتلها طلعت من الفيس
شويه وجاها اشعار ع الأنستا فتحت لقت رساله من كنان
(خشي ع صفحتي ع الفيس وشوفي الفيديو اللي نزلته وعطيني رايك 😊)
ضحكت ندى ولت خشت ع الفيس وشافت الفيديو مكتوب فوقه ،،قلبي مشتاق ..وائل كفوري
ابتسمت ندى وفتحت الفيديو كان كنان مقعمز في مكان أخضر ولابس نظارات وتشرت أبيض وسروال جينز قهوي
ويغني وعلى كلمات أغنيه قلبي مشتاق بصوت كنان
...ضرار كان مقعمز يتأمل في صورة لأريج
أنا قلبي مشتاق وبعدك جمر ونار
الحب والأشواق مابيخلصوا بنهار
يتأمل في الصورة ويذكر في موقف المطار
انتي حبي اللي بيناديني
انتي عيني اللي بتغفيني
انا كيف بدي غفي عيوني
وإنتي بعدك بتحبيني
ولما بسمع صوتك حدي بحتك صوتك بتوعيني
يلي غيابك صار بقلبي صدمه متل العتمه وبحرمن الأسرار
يلي غيابك صار صار بقلبي صدمه متل العتمه وبحر من الأسرار
....اريج كانت شاده الخاتم اللي هداهولها تشبحله بقهرة وتبكي تشبح لأسمائهم المنقوشه في داخله ودموعها تنزل بحرقه وهي تذكرفي كلام جمانه عنه...
وبحر من الأسراااااااار....
ندى "صوته واحساسه روعه غناها احلى من وائل"
مشت طول للأنستا وردت عليه
(روووعه 😍😍)
ماردش عليها لأنه كان مسكر وقتها ندى طلعت من الإنستا وخشت للفيس بش تنزل الفيديو وتسمعه مرة تانيه...
***
فات اسبوع
جمانه تمشي للجامع وتحاول تكون حذرة ومتحكمه في مشاعرها لأنها مهما كان ع ذمة راجل تاني حرام تخونه حتى لو بالمشاعر
سليمان كان مهون ع قلبه وجودها قريبه منه وطول ماهو في الخلوة يقاوم في مشاعره ويذكر في نفسه أنه في بيت من بيوت الله مايبيش يعطي لنفسه فرصه لهتك حرمة المكان ولو بالمشاعر بس،،سمع بزينب ووجعاته لكن معاش مشي للبلاد بكل..زينب فاقت من الكومه بعد4ايام ونفسيتها مدمرة ورقيه امها قاطعت فتحيه
ندى بدت تهدرز ع كنان هلبه وانسجمت معاه وولوا زي الأصدقاء برغم إن مشاعر كنان كانت غير..
نجيب قاعد يخدم ع طريقه بيدمر بيها ولد عم ريما نهائيا وع وشك التنفيد وريما خايفه عليه لكن مش قادرة تمنعه
أمااريج كانت في حاله يرثى لها مش قادرة تنسى اللي صار ولاكلام جمانه عن ضرار كانت قليل ماتطلع من دارها
من كثر ماكانت موجوعه كانت تبي تخش ع صفحته ع الإنستا تبعتله رساله تهزبه فيها وفعلا خشت ولقت اخر شي منزله صور ليه هو ونهى كانوا مبتسمين ومنزل تحتها(❤)
اريج قلبها انحرق طاح تلفونها ع السرير وقعدت تبكي "معقوله كان يكذب عليا معقوله لهالدرجه هو ممثل قوي خلاني نصدق انه يموت فيا ومن غيري ..هو قتلني وعايش حياته من غيري" تبكي ايدها ع صدرها مخنوقه حباته حب عمرها ماحباته لحد قلبها واجعها وروحها مجروحه جرح عميق
معز من لماروحوا من قبرص وهو يتصل بيها وهي ماتبيش ترد اتصل في اللحظه هادي..اريج قامت التليفون شافته هو ردت
اريج: شنوو ماتبييش تفهم علاش مانبيش نرررد عليك حللل عني خليييني في حااالي مش بالسيف ياأخي مانبيكش دير لروحك كرامه وفوووتني... وسكرت في وجهه
وانهارت لوحت روحها ع السرير وقعدت تبكي بالعبرة..
يتبع .....
#GomanFared
