الحلقة(30)
في حوش عبدالباسط زحمه غير عاديه احبابه هلبه برغم أنه وحداني ماعنداش خوت لكن فرج كان معاه اكثر من الأخ سانده في كل وقت فرح حزن شده رخا كان ليه نعم الأخ والصديق،،طبعا جمانه مخليه روحها عاديه متناسيه تماما اللي صار من فيصل،،لكن خوتها مانسوا شي طول الوقت وهما متربصين لفيصل بنظرات تخوف هو بروحه مستغرب فيهم
"هادوا خيرهم يشبحوا هكي"
طبعا نجيب كان مستني فرصة مناسبه بش ينقض عليه😂
طلع فيصل للجنان ولحقه عمك نجيب طول
نجيب ضرب بصوابعه كتف فيصل اللي كان عاطيه بالظهر: ممكن شوي من وقتك
التفتله فيصل وأبتسم: خود هلبه
نجيب بتهكم: لالا نبي شويه لأنهم كلهم كلمتين بنقولهم ونبيك تحطهم في راسك،،يعلم الله قداش كنت نعزك وحاسبك أخ ومأمن ع خواتي معاك زي مأمن على أختك معانا بحكم تربينا جميع،،حتى منين طلبت جمانه مدحتك هلبه لجمانه رغم إنها تعرفك أكثر مني،قالتك مافيش نصيب لكن أنت خيبت ظني فيك وتصرفت بطريقه ماتلقيش بتربيتك ،،والله يافيصل كنت ناوي نقلبها ع راسك بس حسبت حساب بوي وبوك مانبيهمش يخسروا بعض في جرة قلة عقلك،،لو نسمع إنك جيت في طريق أختي مرة تانيه حنلوح كل شي ورا ظهري وحنتصرف باللي يمشي مع اللي زيك..خدي بعضه نجيب وخش وخلا فيصل في حالة غضب شديد..
تمت العزومه وروحوا العيله مع المغرب البنات كل وحده وسريرها أما الأولاد طلعوا لمشاويرهم والحاج فرج يهدرز مع مرته دارهم
أمينه: أني حنفتح معاها الموضوع
فرج: مانبيش نضغط عليها قالت باهي خير وبركه قالت لا كل شي قسمه ونصيب
أمينه: إن شاء الله خير،،قولي عبدالباسط كيف حاله
فرج تنهد : مش زي قبل معاش يتحمل التعب والجهد الزايد
قالي أنه حيدير توكيل عام لولده بش يمسك كل شي وهو يرتاح
امينه: أحسن شي
****
وائل: وأنت عاجبك
سليمان: إيه تصرفها مخليها تكبر في عيني
وائل: في عينك بس
سليمان بضحكه: شوف ماننكرش في شي زي الإعجاب جيهتها مش أكثر
وائل: هادي البدايه ياغالي
سليمان: باه وأنت كان تكلمت معاش تسكت
عماد خش : السلام عليكم
الزوز: وعليكم السلام
عماد : انتم الأيامات هادي قارنين الروس هلبه مع بعض
وائل: حسد ولاغيره
عماد: طياح سعدك
سليمان: الله المستعان
عماد: إييييح
وائل: 😂😂😂
سليمان: خيرك مروح بكري
عماد: شن ماتبنيش نروح نولي نطلع عادي
سليمان: الصبر
وائل: ايه بجديات مبكر اليوم
عماد: حس روحي تاعب شوي وشكلي بنمرض
سليمان: لبسك خفيف كلمتك عليه أكثر من مرة
وائل: اهو بدي جو ماما سليمان
عماد قلبه وجعه
سليمان شبح لوائل بحده
عماد : خل مالا نخش نتكا شويه ،،وخش داخل
سليمان: مشكله ياوائل كان بديت تتكلم يريح منك الكنترول مرات
وائل: جل من لاينسى
***
مع الواحد في الليل
شو واسق بحالو وشو قلبوا أوي وقلبي من جمالو دايب مكتوي
اريج ناضت : هاذا منو ،ردت بدون ماتشوف منو بصوت ناعس : آاالو
ضرار: آاااه ياقلبي
اريج تحت تأتير النوم: انت منو
ضرار بضحكه: أني حبيبك
اريج : ماعنديش حبيب
ضرار رفع حاجبه الإيسار وبتعجب: والله !
اريج :😴😴😴😴
ضرار : آلوووو...آلوووو
يسمع في صوت نفسها زبط أنها رقدت
ضرار ضحك وبعدين قعد يسمع في صوت أنفاسها لين تسكر تليفونها "كالعاده الشحن 🤣"
**
تاني يوم
اصيل وندى
ندى: انلاااأ
اصيل: أخر كلام
ندى: ايه
اصيل: كان إنتي ماكلمتيهاش أني حنكلمها
ندى: هوينا قدامك وكلمها
اصيل بقلة صبر: خيرك يارتيله موليه هكي
ندى: ترضى هي تكلمني وتقولي خوي يبي رقمك وأني ناخده
أصيل:😒
ندى: هاه ريت مش حترضى لهذا اللي ماترضاش لأختك ماترضاش لبنات الناس
اريج جتهم
اريج : هيا أني واتيه
مشي أصيل وهو معصب للسياره
اريج أشرت براسها لندى " خيره"
ندى: تو نحكيلك بري توا قبل يفش غله فيك
اريج مشت لسيارة وطلعت هي وأصيل
***
الجو كان حلو ربيعي معتدل لبس سليمان"عربي طرابلسي" وكان لونه عسلي وكان بكامل أناقته
ابراهيم: اللهم بارك عريس
سليمان ضحك: السلام عليكم
ابراهيم بضحكه : وعليكم السلام،،بجد فيك حاجه
سليمان : حاجه شنو من نهار عرفتني وأني هكي
ابراهيم: ايه هو ديما وجهك ناير بس هالمرة زايد حلاوة
سليمان: ياسيدي يحلي أيامك
ابراهيم ضحك وقال: إيه حق عرس عمر بعد العيد
سليمان: ماأبعده
ابراهيم: هو هكي يبي لين يكون واتي تماما
سليمان: ربي يكمله ع خير
ابراهيم: الفال ليا يااارب مانبيش نقول وليك ماتبيش انت
سليمان ضحك: وعلاش مانبيش الفال لينا جميعا
ابراهيم : مش قتلك فيك حاجه
سليمان بضحكه: أني ما مصاحب إلا مهبله هو هذا
ابراهيم: 😂
***
سوسن: والله الفطور ع حسابي باهي
أريج تضحك
سوسن: مش مصدقه لا فوقها إنتي قلتيله نحبك
اريج تنهدت : والله ياسوسو لما جي بيمشي حسيت روحي حنفقده للأبد قلبي هو اللي قالها
سوسن : اهو جي اهو جانا أهوشرين ع الشريانه
اريج وجهها احمر: هو
سوسن ترقص في حواجبها: إيه..أهو جي جيهتنا
اريج : بطني 😖
ضرار وقف عليهم
بإبتسامه: صباح الورد
سوسن: صباح الخير
من الحشم أريج ماقدرتش ترد
ضرار: قلنا صباح الورد
اريج بصوت يدوب طالع: صباح النور
سوسن ناضت :هي مالا اني انوض
اريج فنصت فيها شافها ضرار
ضرار غمز لسوسن بإبتسامه: طريقك زينه سوسن
سوسن ضحكت ومشت
قعمز ضرار في جنب اريج وخلا روحه مقابلها ،،اريج بعدت شويه عليه
ضرار رفع حاجبه الأيسار بتعجب وشبحلها شبحتله
اريج: مسافه قانونيه
ضرار ضحك: باه ياقانونيه إنتي
اريج قالبه وجهها وتهز في رجلها
ضرار: من أولها نكد😑
اريج شبحتله ع جنب وشبحت قدام وع نفس الوضعيه
ضرار: خيرك!!
اريج وتقلد في صوته: "طريقك زينه سوسن"
ضرار ضحك بصوت عالي
اريج : زيد أضحك زيد 😒
ضرار هدى ضحك شوي: غيورة
اريج: نار غيرتي ره
ضرار بنظرة حب: حطي في بالك عيوني مايشوفوا غيرك حتى سهو
اريج شبحتله: اسمع قبل كل شي لازم نتفقوا ع بعض الأمور
ضرار بضحكه:نتفقوا ليش لا
اريج بجديه: نتكلم بجديات
ضرار بجديه: تمام قولي
أريج: ماتتعاملش مع بنات إلا للضرورة القصوى وبحدود
تانيا جو التحكمات متاع ماتمشيش لحوش عمك لحوش خالك لحوش جدك ماتطلعيش ماتخشيش هذا مانبيشي
البسي ماتلبسيش هذا حتى هولا
ضرار بجديه: كملتي ؟!
اريج : ايه
ضرار: اول شي بتقطعي علاقتك مع الأولاد في الكليه لازميل لاعميل،، مكياجك يخف عطرك حتى هو،،لبسك ماعنديش عليه أعتراض،،نتصل تردي تليفونك ردي بالك تصكريه رد بالك واشحنيه ديما،،ومش حندخل في باقي تصرفاتك وعلاقاتك إلا بعد الخطوبه
اريج : الفاتحه
ضرار فنص فيها
اريج: باه الخطوبه
ضرار كمل: حدود علاقه تعارفنا لنهاية السمستر هذا حنخطبك
اريج: لالاا
ضرار بتعجب: علاش
اريج: لو تخطبني قبل نكمل قرايه خوتي حيحاصروني ويقيدوني هلبه لذلك أي شي رسمي بعد التخرج
ضرار: بعد سنتين!!!؟
أريج: إيه
ضرار: اريج اني مش صغير ره
اريج: هذا هو اللي يريحني ياضرار
ضرار قعد ساكت ويشبح القدام
اريج تشبحله: ضرار اني نبيك لوكان عمرك 44سنه
ضرار ضحك :44 ؟!!شكلك حسبتيها سنين قرايه وخدمه مع بعض
اريج ضحكت: رقم طلع معايا وخلاص
ضرار تنهد: حاااضر اللي تبيه اني فيه
اريج بنظرة حب: يحضرلك الخير حبيبي
ضرار: شن هي عاودي توا
اريج ناضت: عندي محاضره باااي ومشت جري
ضرار يضحك عليها ...
***
الساعه 10:30
كانت واقفه في نفس المكان تستني ،،تشبح للكتاب اللي كان محطوط على رشاده وبينها وبينه مسافه وتستنى في سليمان
سليمان وصل ومشي لنفس لمكان لمح الملايه السودا قلبه دق وعيونه ضحكوا
هي شبحاته"سبحانك يااارب فوق ماعاطيه جمال الشكل والهيئه وهبته طلعة بهيه تذهل العقل"
قدم سليمان للكتاب وجمانه كانت واقفه بعيد شبحلها سلم عليها بهزة راس هي ردت نفس السلام
فتح الكتاب دور ع الصورة خداها ورد الكتاب لمكانه شبح لجمانه شويه وبعدين لف ومشي جمانه كانت تستنى فيه يغيب بش تمشي تاخد الكتاب لكن الريح تحركت فخافت الكتاب يطيح مشت تجري خداته
وسليمان تلفت وقعد واقف يشبحلها وهي شدت الكتاب وشافتله لقاته يشبحلها قعدت وافقه تشوفله للحظات قعدوا واقفين يشوفوا لبعض من مسافه وقلوبهم ادق بقوة كل قلب كان يلقي يمشي للتاني
جمانه"خيرك ياجمانه شنو اديري تحركي هيا"
سليمان" علاش وقفت هكي شنو حركات المراهقين هادي ياشيخ"
استاقضوا في نفس اللحظه كل منهم تعوذ من الشيطان ولف ومشي في طريقه وخلوا قلوبهم عند بعض ❤
***
يمشي وفي شي في داخله هو اللي رفعه ،خش من المدخل وبدت الذكريات تعرض قدامه من أول ماخشلها طالب للحظه ماطلع منه وهو أستاذ ،،يمشي ومشاعر مخلطه مع بعضها تتصارع في داخله
:مش معقول نجيب الشريف
نجيب ابتسم: أووووو دكتور عيسى
وحضنوا بعض
عيسى : شن الريح اللي حذفاتك ع الهندسه
نجيب ضحك: استاحشنا
عيسى: والله حتى إنت ليك وحشه
كملوا طريقهم هما الزوز يهدرزوا وصدفه فات أصيل
اصيل : نجيب نورت الكليه والله
عيسى بمزح: حتى هو خوك
أصيل : هههههه
نجيب جت عينه ع حاجه خلاته مايسمع شي من دوة أصيل وعيسى ،شاف ريما واقفه وفي إيدها كتاب مفتوح وشادته من جيهه وواقف عليها عزالعرب شاد الكتاب من الجهة التانيه وكإن يشرحلها وريما كانت منتبهه معاه هلبه وكانت ادير في حركه كان يحبها نجيب هلبه كانت تبعد بأطراف صوابعها خصلات من شعرها اللي تنزل على وجهها
فلاش باك
ريما: خالي قال مافيش مانع
هبت نسمه هواء طيحت خصلات من شعر ريما ع وجهها
حولتهم ريما بأطراف صوابعها: وقال خلال هالأسبوعين
نجيب مبتسم: تمام تو نشوف وضع الوالد ونقوله يكلم خالك ويتفقوا
طاحوا خصلات شعرها من جديد بخفه حولهم نجيب بصوابعه حطهم ورا وذنها ،،وهي ذابت من الخجل
نجيب بإبتسامه: كان تقنطي هالوشاح اللي حاطيه ودرقي بيه شعرك مانبي حد يشوفه غيري
ريما: تو نشوف 😳
نجيب ضحك
الوقت الحاضر
عيسى: عز العرب ماكأناش كاين في ألمانيا طول تلات سنين روح وأنسجم مع الوضع وبرغم هلبه عراقيل قاعد يخدم في للكليه وبرا
أصيل : عاجبني هلبه طموح ومافي شي يوقف في وجهه كان نوي حاجه يوصلها
نجيب ركز ع كلمة أصيل الأخيره هلبه
عيسى: دكتور عززززز
التفت عز العرب وشافهم وسلم عليهم بإشارة اليد🖐 ،،اما ريما لما شافت نجيب انصدمت وقعدت تشبحله وخلاص
وهو نفس الشي نظرة عينه كانت غريبه هلبه بالنسبه ليها
مافهمتهاش بس الحاجه الوحيده اللي حستها وكأنها نظرة عتاب
عز العرب لاحظها : نستأذن شويه ونجيك
ريما شبحتله وابتسمت : إذنك معاك
قعدت ريما واقفه،وعز العرب اتجه لعيسى واللي معاه
مد يده وسلم : السلام عليكم
سلم ع عيسى وأصيل ولماصافح نجيب نجيب شد ع إيده بقوة عز حسها وقوى شدته حتى هو واتنين مبتسمين لبعض يحاولوا يخفوا غيضهم من بعض
عز بإبتسامه مغرورة: عاش من شافك ياباش مهندس
نجيب رد بنفس الإبتسامه : تعيش وتشوف
عيسى: المهندس نجيب وأصيل خوت
عز ابتسم لأصيل: عارف
عيسى: طبيعي مش غير اسمهم واحد حتى تفوقهم
عز بغرور: مايختلفوش اتنين ع شطارة الباش مهندس نجيب لكن وياريت تسمحلي فيها نجيب وضحك اصيل مرن هلبه وأجتماعي وروحه حلوة
اصيل: بارك الله فيك 😅
عز ابتسم لأصيل وشبح لنجيب وانقلبت لأبتسامه صفرا ونجيب نفس الشي
عيسى عارفهم مايتحابوش فحب يلطف الجو : ريما انسجمت في الكليه وكأنها مكانتش بعيده عنها سنتين
عز: فعلا هي شاطرة وعندها رغبه والباين أنها فهالسنتين كانت اتراجع في اللي قراته
عيسى: انتوا اتنين تنائي مميز في الماده اللي تعطوا فيها بشهادة العميد نفسه
'ع أساس بيلطف الجو غبره مرة وحدة'😂
"طبعا عيسى سافر قبل ليسمع بخطوبه نجيب وريما وللحظه الحاليه مايندريش أنها كانت خطيبته " +
عز ابتسم وشبح لنجيب : الحمد لله
أصيل حس بإنه الجو مش تمام بين خوه وعز العرب
عز العرب بمكر: هي أمالا نستأذنكم خليتها تستنى
عيسى: إذنك معاك
مشي عز لريمه وخش هو وياها لداخل لوحده من الأقسام
ونجيب يغلي غلي يشوف فيهم كيف يضحكوا ويهدرزوا ومنسجمين ع الآخر ......
اصيل: هي تعالى نخشوا
نجيب: لالا مستعجل بنمشي للمكتب
عيسى: ماهناك ماقعدت
نجيب : جيت بندير طله وأن شاء الله نعاودها مرة تانيه لبس نظارته وطلع بسرعه
أصيل"شكلك حتعاودها مرات مش مرة"
يتبع .....
#GomanFared
