الحلقة(24)
يوم السبت
اريج كانت طالعه مع ندى تشري حوايج لسمستر الجديد
ندى: تهبببل اللبسه هادي مش عاديه
اريج: حنلبسها أول يوم
ندى: الجو قاعد مصقع
أريج: مادام فات شهر 1خلاص
ندى: والله الصقع يقعد ل4
وكملوا دورتهم وقبل المغرب روحوا
**
ربيع:جوه أحسن من قبل
سليمان : إيه حسيته مولي خير وبدي يطلع من العزله حتى المدة اللي فاتت لما مشي معاي لمخيمات أهل تاورغاء كان يلعب ويبصر مع الصغار وجوه مليح
ربيع: الحمد لله
سليمان جت عينه في عين وائل غمزله وضحك سليمان اتخزرط لإن دار الحركه قدام ربيع شن بيخلصه توا
ربيع:ع العموم أني نشم في ريحه حاجه حتصير قريبا
سليمان لونه انخطف ووائل شاد ضحكته
وائل بضحكه: زي شنو قصدك
ربيع: الله اعلم ياخبر اليوم بفلوس غدوة يولي ببلاش 😒
***
فاتت الليله عاديه
الصبح 24\2\2013
ناضت جمانه وهي متوترة وفي شعور غريب مسيطر عليها فجأة بدت بطنها توجع فيها وكأنه مغص اظاهرت أنها عاديه برغم إن دماغها مشغول ...
في المطبخ اريج كانت لابسه طرحة جديده وطالعه تهببل وندى واقفة تشرب في عصير
أمينه: بعد.تروحوا بترتاحوا وبنمشوا لحوش خالكم
أريج وهي تاكل: ممم بتبدا توتي
امينه: إيه
خش أصيل : صباح الخيرات والليرات
كلهم صباح الخير ❤
أصيل: أريييييج شنو هذا 😠
اريج انخلعت : شنو 😨
اصيل: هذا هذا شنو
ندى تشبح فيها ومش فاهمه شي وأمه
امينه : خيرك تكلم خيرها أختك
أصيل : طالعه طرف 🤣
اريج : خزززززززززززي ع وجهك يابارد
ندى وأمها: هههههههههههههههههه
جمانه: صباح الخير
كلهم :صباح النور
امينه : قلت لخواتك بعد تروحوا بنمشوا لحوش خالك
جمانه تصب في القهوة: بتبدا توتي لعرسها
امينه: إيه
أريج: تو ياماما مش عرس عبدو بداية6 الجاي إن شاء الله
أمينه: إيه صح مفروض نبدوا حتى حني
جمانه: عرس الولد دوشته أقل مازال بكري نحس فيه
امينه: خل الواحد يبدا بكري ووحده وحده عليه مايجي العرس نلقوا روحنا تامين كل شي
جمانه: ع خير يارب
امينه بحسرة: لو كان نجيب قاعد خاطب ريما ره عرسهم مع بعض
جمانه: نصيب
اريج: اشبح شنو حالها وشنو مدايره
في هاللحظه نجيب كان جاي للمطبخ سمع اسم ريما وقف ماباش يخش لين يكملوا كلام عليها
جمانه: ريما قويه تخطت هلبه مصاعب في حياتها حتتخطى هادي أكيد
ندى: لكنها تحب نجيب هلبه
اصيل فنص في ندى ندى سكتت
جمانه: ولو هوينا بتبدا معيده في الكلية وبتقرا الدراسات في نفس الوقت
امينه : من قالك
جمانه: كلمتها اليومين اللي فاتوا وهدرزنا عقلها كبير هدرزت معاي بود وكإن مافي شي وبدت تتخطى مرحله نجيب ماسألتنيش عليه حتى بتلميح
اريج: وهذا صح صحه لإيدها
امينه بحسرة: دورة تسمعيها انخطبت وتزوجت اللي زي ريما مايقعدوش
جمانه: صدقتي
نجيب كان يسمع في كلامهم ومصدوم ماكانش متوقع إن ريما حتنساه بسرعه هكي حس روحه مخنوق انسحب بدون مايحس حد وطلع من الحوش
***
الدنيا مسحبه وفي مطرة جايه الباين اريج تلاقت هي وسوسن وع بوسات واحضان واستاحشتك وليك وحشه تقول ليهم عام ماروش بعض😂
اريج: نبيك تتفرجي وتستمتعي بس
سوسن : بهدوء ارجوك
اريج : اطمني تعرفيني نعرف ناخد حقي بهدووء
سوسن: ماتخليهاش تستفزك
أريج : أطمني
سوسن : طرحتك اليوم وااااو تهبلي طالعه خياااال ياوين هدوكا الناس يشوفوا
اريج اضايقت: شهر كامل ماريته
سوسن: خلاص عاد مالقيت مانقول هيا هيا اسرعي خل نشوفوا الجداول
اريج : استني خل نساوي وشاحي
سوسن : تي وين بتساويه حني في الشارع
اريج : اهيا السياارة خل نشوف ع مرشها ونجي
سوسن شدتها تي وين ماشيه وكان يطلع فيها حد
اريج: لالا من بكري لحظتها مدرسه واضح مافيها حد
مشت اريج تجري تساوي في وشاحها وشعرها اللي طالع منه وفي هاللحظه بدي ينزل مرش السيارة
:ياوالله صبح مبارك اللي ريت فيه هالوجه السمح
اريج انخلعت: يامااااما وطلعت تجري جبدت سوسن من إيدها ويجروا لين خشوا داخل
سوسن داهشه: قتلك..قتلك يا..حمارة فيها حد
اريج ووجهها احمر وارتسمت أبتسامه ع وجهها : ومش أي حد
سوسن: قصدك
اريج هزت راسها ورمشت وهي تضحك بمعنى إيه
ضحكت سوسن: طيب فيك ياحنه
في هاللحظه خش هو لابس اسود في أسود وقفازات شتويه سوده ويمشي مشيته المغروره حول نظاراته شبح لأريج ع جنب وشبح قدام جوه زوز سلموا عليه ولحق عليهم واحد تالت هدرزوا شويه وخشوا داخل
أريج:😍😍😍😍😍
سوسن: واضح عليه شخص مهم شفتي كيف جوا يسلموا عليه
اريج تفكر"زعمه شنو يكون"
روووجه صباحو
اريج جوها انقلب 180درجه ورسمت إبتسامه مغرورة ع وجهها: صباحو مها
مها وحده من البنات الهاي كلاس زي مايقولوا لكنها تافهه هلبه وكانت حاطه راسها من راس اريج لإنها تغير منها لدرجه الحسد
مها كان معاها زوز ولاد وبنت من اللي يقروا معاهم
مها: قالوا روووجه اليوم عازمتنا ع كافي وحلو
اريج: لاياحبي ع غدي في مطعم ******
مها انصدمت: بجديات
اريج بغرور: ومن امتى اريج الشريف تبصر في حاجات زي هادي ولانسيتي عزومه الحلو اللي درتهالكم انتي بالذات وكلتك 3بان كيك
اللي مع مها شادين ضحكتهم لكن سوسن ضحكت في وجهها
مها بضحكه صفرا: تمام نتلاقوا هني مع الواحد
اريج وهي مبتسمه بغرور ورافعه حاجبها اليمين فوق: تم نستنى فيك ميمو 😏
ومشوا مها وشلتها
سوسن: صحه ليك
اريج: مازال مارت شي تقول عليا أني قفاصه ومتاع فقر هالجعانه ...
****
"ياارب اللي ندير فيه صح ولاغلط نحس فيه غلط لكن مش قادرة نمنع نفسي ،باه اني ع أي أساس بنشوفه ؟! نبي ناخد منه كتاب أني فعلا نبي نقراه ،،ووواك خلاص راسي وجعني أصلا هالمرة وخلاص"
هالكلام يدور في راسها طول مارجليها قاعدين يرفعوا فيهللمكان اللي ببتلاقى فيه مع سليمان ،،هي أصلا ماتعرفش حتى إسمه كيف ماشيه تشوف شخص هي ماتعرفاش غير ع موقع تواصل إجتماعي فيه اشكال وألوان الوهمي المحتال الخيبث الطيب ،،كل اللي تعرفه إنها تتحرك وتتصرف بدون إرادتها وكإنها مسيرة
في الطرف التاني
كان في سيارته خش للجامعه وقريب يوصل لمكان اللقاء يرن في وذنه كلام وائل وفي نفس الوقت ضميره مش مريحه وين يشبح الكتاب ع الكرسي اللي جنبه يقول "أني ماشي بش نعطيها الكتاب بس" وصل كأنه ماشي للمجهول حتى هو حاس روحه مسير وبدون إراده منه يتصرف .
موقف جمانه وسليمان بسيط مايستاهل هالحيرة هادي كلها والتخبط لكن اللي زي جمانه وسليمان اللي يعرفوا الحلال من الحرام اكثر من غيرهم وملتزمين بدينهم يحسوا في روحهم مش قابلين هالموقف وعايشين صراع قوي مع مبادئهم .
وهما يجهلوا من الأساس إذا كان هالموقف شر ولاخير ليهم..
جمانه واقفه تستني ومتوتره تحت حيط داير زي المظله لإن المطر تبشبش
أما سليمان وصل نزل من السياره وفي إيده الكتاب فتح سحابته وسكر سيارته وبدي رحلة البحث عن العقد الفريد❤
هيا تستنى وستين سناريو فراسها "عطل وينه" وهني بدت تخاف مفروض تولي من حيث أتت بس في شي يقوللها أقعدي
هو يدور ويدور مالقي حد بالأوصاف المعلومه عنده"ماشفتش وحده لابسه ملايه موف داكنه كان تطلع جريه ياسليمان ياشيخ يامحترم"
طلعت شويه من تحت الحيط"المظله" تشوف من جيهه معينه بالك تلقى واحد لابس أسود سروال جينز ازرق كحلي مالقتش حد بهالوصف"شكله انضحك عليك ياجمانه تستاهلي هذا اللي يدير حاجه مش مستريحلها"
في هاللحظه لمحها لمح الملايه الموف الداكنه زي اللي تلمع.. المطر وقفت لكن دموعها نزلوا
سكر سحابته ومشي جهتها وهو مبتسم وفرحان ومش عارف علاش
اما هي مسحت دموعها من تحت الخمار وقررت تمشي
السلام عليكم ...
..هي خيرها الدنيا سخنت هكي قلبي خيره يرعش هكي شنو هالإحساس المسيطر عليا هذا...!
العقد الفريد صح؟!!
هني هيا التفت وياريتها ماألتفت شافت اللي خلاها تحس ملامح كل شي حواليها تختفي ويقعدوا بس ملامحه عيونه الكبار الزرق إبتسامته طلته االلي سلبت عقلها
الو جمانه
الرقم الذي طلبته خارج نطاق التغطيه
جمانه معاش حست بشي غير قلبها اللي مش عارفه خيره مايبيش يهدا
معاك الشيخ
احمم أسف ممكن تأخرت ضحك زحمة الطريقة ماحد غابي فيها
جمانه ماتندريش عليه شنو يقول مطموسه فيه وخلاص اجتمعت عندها الشخصيه اللي تراسل فيها مع الهيئه الخارجيه والوقفه اللي كلها أدب ورجوله وعلى مسافه والعيون لوطا
رن التليفون استاقضت جمانه
سليمان : عن إذنك لحظه
جمانه:" حيي عليا أني شن صارلي خيرني بلمت في الراجل هكي !!..الحمد لله لابسه خمار😥"
كمل مكالمته وجاها
سليمان : اسف عطلت عليك
جمانه وطت راسها ويدوب صوتها طالع : مافيش مشكله😳
سليمان مدلها الكتاب وشاد جيهه وحده : تفضلي
قربت جمانه شويه مدت أيدها وخدت الكتاب من جهتها
وولت لمكانها
جمانه بنفس نبرة الصوت: نكمله ونرده
سليمان : هههههه مش ساهل تكمليه فيسع حياخد وقت
جمانه تحشمت: تو نشوف
سليمان: امتى ماتكملي رديه تو ندبر في غيره عادي
جمانه : لالا خوده
سليمان ضحك: خلاص الحاجه اللي نعطيها معاش تولي
جمانه متحشمه ع الآخر: باه أني نستأذن السلام عليكم
سليمان وهو مبتسم: وعليكم السلام
جمانه مشت وسليمان قام راسه تلقائيا ويشبحلها كيف تمشي بحياء خطرت عليه آيه وقراها"تمشي على إستحياء"
تلفت ومشي لسيارته وركبها وطلع
***
1:00 الظهر
اريج مقعمزة في مطعم هي ومها وشلتها وتتفرج على مها كيف تسحن اريج طلبتلهم أغلى شي ومها ماقدرتش توصل اللي تبيه وتحرج أريج لما تحدتها أن تعزمهم ع غدي في مكان غالي لأن تعرف الحاله الماديه لعيلة اريج فوق الريح بس ماكانوش بحبوا المظاهر والفخفخه الفارغه فقالت عنهم إنهم متاعين فقر...
اصيل: يارجل كلهم سيمسترين ونفتكوا
معاذ: عاد انت خوك مهندس ضامن روحك
أصيل : وعلاش شنو دخل نجيب في قرايتي ره والله عمره ماخش في حاجه تخصني حطها في راسك
رواد: خلاص اني جعان اسكتوا
اصيل ومعاد 😂😂😂
اصيل وهو خاش لمح اريج مع ولاد وبنات في المطعم اتفاجئ وبحركة سريعه
لف بصحابه
اصيل هي تعالوا نمشوا للي في آخر الشارع
رواد: وعلاش هذا لا
أصيل هذا غالي وماعنديش فلوس يسدوا
معاذ: ندفعوا معاك
أصيل : لاالااا اني اللي عازمككم والله مانكم حاطين معاي قرش ركبهم السيارة وفي نفسه يهدد ويتعود"نهارها أحرف"
يتبع .....
#GomanFared
