(109)
علااااش!
سليمان: بالزبط ماقالتش السبب لكن واضح ياابوبكر
ابوبكر:تمام تمام إن شاء الله خير ..
سليمان : سامحنا ...
ابوبكر : مافيش مشكله ..السلام عليكم
سليمان: وعليكم السلام...وصكر....وقفل تليفونه هيا الإقامه ...
الله اكبر الله اكبر..اشهد أن لاإله إلا الله..أشهد أن محمد رسول الله...حي ع الصلاة ..حي ع الفلاح ..قدقامت الصلاة ..قد قامت الصلاة.. الله اكبر الله أكبر..لاإله إلا الله
سليمان : استوا ..أقيموا صفوفكم واعتدلوا .. حادوا بين المناكب والاقدام وسدوا الخلل...
الله أكبر...
***
في حوش عيلة عماد الكناين كانوا مجتمعات في المطبخ يطيبوا في الغدي ..خشت حنان..
حنان : معليشي اسمعوني شويه...كلهم وقفوا والتفتولها...تعرفوا كويس انكم مش بس كناينا انتوا بناتنا لا عمرنا وطينا من قدركم ولا وجعناكم حتى لو صار نصلحوا غلطنا وتعتذروا..امي الله يرحمها كانت تبيكم في بعض وخيات ..وتبيكم تلموا العيله..لاعمرها فرضت عليكم شي ولاحني ولاعمرها فرقت بيناتكم نهائي..وقالت لكل وحده فيكم لما جت..نقل الدوة..المقارنات ..فلانه علاش هكي درتولها علاش اني مادرتوليش فلانه علاش راجلها جابلها واني ماجابليش ..كله ماتبيشي ومشيتوا معانا ع خط مستقيم طول الوقت..اشرت بأيدها..في اللي ليها 20سنه مش شويه ..لذلك اللي قاعد يصير في الفترة الأخيره رغم اني نشوف فيه بس قعدت ساكته تجنبا للمشاكل لكن السكوت خلا الموضوع يصير فيه تمادي..كلامي توا ليكم كلكم بشكل عام ويخص وحده فيكم وهي عارفه نفسها ..بتخششوا بيناتكم جو الحسد والمكائد كل وحده تشد حوشها ولانعرفوكم لافي فرح ولافي عزي..وللمقصودة حطي كلامي حلقه في وذنك هالمرة مشيتهالك زي مامشيت اللي قبلها لكن التالته تابته وحق من عطاني الذريه حتطلقي طول وتطلعي زي ماخشيتي..حطوا كلامي هذا في روسكم وراكم تنسوه ...وتوا يللا كملوا شغلكم وطلعت...
:اشبح شن صاير
: ايه ..اسكتي فكينا خير ماتخش مرة تانيه وتعطينا ع راسنا..
سرور كانت تشبح لسندس اللي كانت تقرض في السلاطه وجهها أصفر من الخوف"ماكنتش نبي يصيي هكي ياسندس لكن إنتي أجبيتيني"
***
خش بعد ماخبط الباب بقوة..انواار ..انوااار
طلعت انوار من المطبخ تجري ومعاها أمها..
انوار بخوف: خيرك
ابوبكر بعصبيه مكتومه: تعالي نبيك..ومشي لداره
انوارمن الخوف لحقاته طول ..ومرت بوه قعدت واقفه ومستغربه..
انوار: خيرك شن في ..
وهو حاط ايده في وسطه: زينب عطاتك رقمها..
انوار : خديت رقمها
ابوبكر يأشر بإيده : هاتيييه
انوار بخوف : به تو نجيب التليفون ...طلعت انوار جابت تليفونها من المطبخ وجت حطت ع رقم زينب وعطتهوله ..خداه وسجله في تليفونه ..ومدلها التليفون ..
ابوبكر: تمام اطلعي توا..
انوار طلعت بدون ماتناقش بحرف وسكرت الباب وهو طول ضرب ع الرقم...
في نفس الوقت زينب ..كانت تعصرفي البرتقال بش بيشربوه مع الغدي ودموعها تنزل بخفيه ...رن تليفونها اللي كان محطوط مقابلها في دولاب المطبخ ..سكرت العصااره وطلعت التليفون لقاته رقم غريب حطاته ع الطاولة وطنشت وكملت عصر ..تشبح بعيونها للتليفون والرقم عاود مرة اتنين تلاته لين وصل في عاشراتصال...كانت مستغربه بس مع هذا مابتش ترد لين جتها رساله ..صكرت العصارة وخدت التلفون وفتحتها(ردي اني ابوبكر)...شهقت بهمس ومصدومه عاود اتصل قعدت متردده ترد عليه لين فصل بعت رساله تانيه فتحتها(عارف التليفون في ايدك توا زينب ردي وماتخلنيش نتهور)
زينب"يتهور شن بيدير يعني ..خل نرد وخلاص" تسحبت وطلعت للجنان شبحت للسمي لقتها مغيمه وغيومها يبانوا معبيات..وقفت تحت المظله هو اتصل "يااارب ساعدني" وردت..
ابوبكر: طيب فينا اللي رديتي ...
زينب ضحكت بكتمان وقعدت ساكته ..
ابوبكر : علاش رفضتي قولي ..
زينب ساكته ..
ابوبكر: ع خاطر قتلك عندي ضعف نظر وبنخليك انتي تقري الصغار ياودي خلاص تو نلبس نظراتي ونساعدك
زينب بتلقائيه: ههههههههههههههههههه
ابوبكر ابتسم : عقبال مانسمع هالضحكه تصدح في حوشي
زينب تحشمت وسكتت
ابوبكر بجديه: زينب خلي عندك ثقه فيا ارجوك اني قتلك عندي خلفيه تامه ع كل شي وفاهم ادق ادق التفاصيل مستحيل نخذلك يازينب ولافي يوم حنوجعك بنظرة..افهميني زينب ..انتي انحطيتي في قلبي حطان ..نبيك بكل مافيا ومايهمنيش اي شي تاني المهم تكوني معاي
زينب : معقوله واحد زيك عمره ماحب قبل اودار علاقه بش يكون شعورك اتجاهي هكي في هالفترة القصيرة
ابوبكر بإبتسامه: اني كانت ليا تجربتين وفشلوا لأن اختياراتي في المرتين كانوا غلط ..مع الأسف ماتوافقتش معاهم لإنهم ماديات وفارغات مانبيش نذمهم في غيبتهم بس للأسف هادي الحقيقه..
زينب : وشنو عرفك مانطلعش زيهم انسانه فارغه وماديه انت مازال ماتعرفنيش
ابوبكر ابتسم: لوكنتي هكي فعلا ماكنتش سألتي هالسؤال..
زينب قعدت ساكته...
ابوبكر بنبرة عصبيه مصطنعه: من الأخير انتي خشيتي قلبي وخاطري وراسي معاهم ..يعني واخدك واخدك تبي ولاماتبيش
زينب طلعت منها ضحكه فيسع ماكتمتها
ابوبكر بضحكه: توا نبيك تمشي تكلمي مرت الشيخ
وتقوليلها غيرت رأيي وموافقه..والفضانيه الخميس الجاي
زينب: مازال اصبر
ابوبكر: معاش في صبر عارفك بتغيري رايك خل نحصل عليك بش معاش تقدري اديري شي ..
زينب: هههههههههه...باه
ابوبكر تنهد: يبهي أيامك ويزهي احلامك 💖
وكملوا مكالمتهم على زخات المطر اللي تعزف في لحن حب جديد خش لقلوب جمعها رب العالمين...💖
***
وشن اللي مزعلك توا...
اريج : مازال نبي نتعود ع الحياة بعد الزواج بعدين يجي موضوع الصغار
معز بضحكه : صدقيني مافيش أحلى من الصغار في الحياة بعد الزواج ع قولتلك
سكتت اريج ..فتح الباب معز وخش لحوش أهله قابله نعيم طالع ...أوووووو الكنق ومرت الكنق
ضربه معز ع كتفه : شن جو يابطل..
نعيم: مليح ..شن جو مرت خوي
اريج بضحكه: مليح ..وقلدت صوته
نعيم :هههههههههه تي به به تعجبي عليا يادبه
اريج : عينك
معز : خلاص انت وياها ...ع جية ورده
وردة: ماتقولي مراة متزوجه كيف تتعاركي انتي وسلفك
اريج ضبطت نفسها وسكتت
معز: وين المشكله اريج قاعده صغيره حتى لو كانت مراة متزوجه زي ماقلتي ..ونعيم خوها الصغير
وردة: هذا انت محامي دفاع وخلاص
نعيم: احممم هيا اني طالع ياعيله سلام...
وردة: هي تعالي وتي معاي لغدي وخشت المطبخ
معز شد ايدها: سايري وطنشي
أريج ابتسمت : ع خاطرك نتحمل عادي
معز:خشي ..بسرعه خير ماندير حركه نندم عليها ..خشت اريج وهي تضحك ..وطبعا طايحه عمتك ورده تلقح وهي ضاربه كلامها في الحيط ومش مدورتها...
وهما يتغدوا خبرهم معز إن أريج حامل عمها فرح هلبه لكن عزوزتها ردت فعلها كانت بارده"عاد انتي من قبل كان يلقى مايخليكش تمشي ع الوطا يابال توا"
***
يتغدوا هما الزوز في صمت او بالأحرى هي اللي ساكته وشبه سارحه وتنقش تنقيش ..
سليمان : جمانه ..
جمانه شبحتله: هاه ..
سليمان : خيرك ياعمري في حاجه ...
جمانه ابتسمت: لا عادي..
سليمان: كيف لاعادي
جمانه : مش حاجه مهمه ماتشغلش بالك ...
ناض وجي جنبها: اي شي يشغلك يهمني ماتقوليش مش مهم...
جمانه: احمم باه بنقولك ...بصراحه حاسه بفراغ وملل ..
سليمان : باه
جمانه : ايه هو هذا ماله هلبه ..وأغلب الوقت بروحي في الحوش ..ماعندي ماندير..
سليمان تلفت القدام : شن تبي بالزبط...
جمانه: نبي نخدم..
سليمان مط شواربه بإستياء: اني هالموضوع تكلمت فيه قبل تعرفي رايي فيه مانحبش نعاود نتكلم في أمور نهيتها وحسمت قراري فيها..
جمانه : باه خلاص زي ماتبي ...ولت تاكل ...اما هو اضايق وناض مرة وحده ...خش لغرفة المكتب وصكر عليه
جمانه حتى هي نيتها تسكرت وناضت قامت الماعين وغسلتهم.....
***
ماشاء الله ماشاء الله
ندى: يعني بيولوا عندنا زوز بنيات حلوات
ريما بضحكه: ايه ياستي..
ملاك:والله لما شفت صور الإيكو عيوني دمعوا
ريما : حتى اني شعور حلو بالمرة ..
امينه بضحكه: تحلوا عويناتكم ع خير انتم وياهم
ندى: الله ياكناتنا الحلوات لو تسلموني مهمة تسميتهم
ريما وملاك شبحوا لبعض وابتسموا..
ملاك : خلاص ليك المهمه
ريما: احسن وهكي نرتاحوا من دوشه اختيار الأسماء
ناضت ندى وباستهم الزوز: ياسلم كناتنا السمحات
امينه : اختاري اسماء باهيه وليها معنى مش اسماء مش مفهومه ونطقها يعوج الحناك
ريما وملاك: ههههههههههههه
ندى بضحكه: اطمني ماميتي حتدعيلي ع الأسماء الحلوة اللي حنختارها 😌...
***
ماطلعش من داره من لما خش وهي مابتش تخش عليه لإنها عارفه انه معصب وممكن يغلط معاها في الكلام ...خشت لدار النوم وخشت فراشها وشويه وخداها النوم..هو داخل كان يستغفر ويسبح...بعد هدت نفسه طلع ..مالقهاش لا في الصاله ولا المطبخ مشي لدار نوم لقاها راقده خش معاها وحضنها وغطاها وغطى نفسه ..هي فاقت شويه قالتله"آسفه لوضايقتك"...هو زاد حضنها "اني اللي اسف اني عصبت عليك" خشت في حضنه اكثر وهو حضنها بزياده ورقدوا ....وصوت المطر برا قوي هلبه...🌧....💖
***
المطر تصب وعشانا بالرب...
حنان : هههههههههه سمعتي سرو يبي عصيده
سرور شبحتله وسكتت..
عماد : اه لو بالزبده والعسل ..ياسلااااام
سرور ولاكأنه يتكلم ع خشة عمها ..
سعيد : والله مطرة قويه من قبل العصر لتوا
حنان : ايه ماشاء الله
عماد: في هالبلاد حتى خير ربي مانفرحوش بيه ..تو الطرق بتتسكر والدنيا بتغرق
حنان : ايه والله صدقت
سعيد: ربك يفرج ويصلح الحال ..لكن الجو يبيله عصيده..
سرور ناضت : حاضي ياعمي من عيوني ..
حنان ضحكت: بوي يحبها بالرب ..
سرور: واني بنديي اللي يحبه عمي ..هيا شويه وادوق أحلى عصيده ..وناضت خشت ..
سعيد ضحك وناض: هي بنمشي نشوف الأخبار...
حنان : واني بنمشي نطبق الحوايج
عماد: واني بنمشي نعاون سرور😁..ومشي للمطبخ
سعيد وحنان 😂😂
خش عليها شافته تجاهلاته كالعاده..
عماد: سروري ..صفي قلبك...
سرور شبحتله بحده: صعب يصفى كلمتك لتوا تين في وذني..تتذكي لما قتلك خايفه يجي يوم وتعاييني تتفكر يدك عليا تتفكر قتلي مش كلام بس حتى فعل..تذكي
عماد: لحظه غضب كلمه وطلعت من كثر مادمي كان محروق حياتي اني وياك كان حتدمر من فعايلهم لولا لطف ربي بينا..ايه اني غلطت ونستاهل الضرب
بالشباشب ..سامحيني ارجوك مش قادر نتحمل زعلك مني وجفاك ...سرور قعدت تبكي جاها بيحضنها دفاته ..
سرور: ييحتك قديد معفن ..وقدت تتغصص
عماد:🤤 شنو وحق الله توا كيف مدوش وغاسل روحي بالموزيل والرايحه غسل ..
سرور طلعت للجنان وقعدت ترجع في حوض مزروع
عماد: خيرك سرور
سرور ببكي: بيا من حداي وناديلي حنان بسيعه ..
عماد : به به وهو ماشي يجري انضرب صبعه في الباب 😖...فاته وكمل طريقه لحنان أخته...
***
بعد ماصلى العشي روح للحوش وفي ايده حاجه ..فتح الباب وخش لقاها مقعمزة تقرا في كتابها المفضل ..جاها وقعمز جنبها وجبد الكتاب..
جمانه بتذمر: سليماااان ...
سليمان : ياروحه انتي وضمها وقعد يبوس فيها..
جمانه بضحكه : باهي خلاص
سليمان بضحكه : تفضلي ياعسلي المصفى 🍯💓
ضحكت جمانه وخدت الكيسه فتحتها لقت فيها باكو صغير فتحاته لقت فيه خاتم ذهب ابيض فصه ألماس وكان ناعم هلبه وحلو...يهبببببل حلو هلبه 😍
سليمان بضحكه : باه اللي عجبك تعبت واني ندور ع حاجه تشبهلك ناعمه وحلوة بالمرة..
جمانه شبحلته وقدمت باساته من ذقنه: نحبك هلبه تعرف 💖
سليمان :ههههههههههه والله نعرف...وفي حاجه تانيه..
جمانه : شنو...
سليمان: احمم كلمت واحد من المشايخ معاي زوجته مديرة مدرسة دينيه..وقالي انهم يبوا مدرسة علوم ..شن رايك
جمانه بفرحه: قصدك موافق إني نخدم..
سليمان: مانتحملش تقوليلي تبي حاجه واني نقول لا...
جمانه عيونها دمعوا وحضناته: اني مش عارفه شن اللي درته في حياتي بش ربي رزقني بيك مش عارفه ..
ضحك وحاوطها بإيده وحضنها بزياده: اني اللي مش عارف شن درت بش ربي رزقني بحبك ...نعشقك بجنون...💖
جمانه : وأني نموت فيك موت...💖
يتبع .....
#GomanFared
