الحلقة(60)
يشبحلها وتشبحله تاخد رشفه من العصير ياخد رشفه من رد بول حتى هو
اريج : حركات الصغار اللي يدير فيها
سوسن:😂😂
اريج:وأنتي التانيه شنو يضحك وبعدين علاش تشربي في ردبول العار بنت وتشرب في مشروب طاقه 😒
سوسن: بالله عليك ماتفشيش غلك فيا مش كان نشرب في اللي يشرب فيه معناها اني ضرار🤣
اريج:😑
بنوض ناخد حاجه ناكلوها جعانه تبي حاجه
سوسن: شاورما روجتي
اريج : حتى أني نبي شاورما ،،ناضت أريج مشت لحقها ضرار
سوسن : يابيصير جو توا 😁😁
وقفت اريج ع الراجل اللي يدير في الشاورما
اريج : زوز شاورما بليز من غير هريسه ،،شمت ريحة عطر قويه تعرفها زين عرفاته وقف جنبها مابتش تعدل عليه
الراجل : حاضر،وأنت ياأستاذ
ضرار : زوز شاورما وكثر فيهم هريسه "بلييز" يقلد في أريج
اريج:😑
الراجل ضحك وضرار شبحلها ع جنب وأبتسم
اريج تشبح القدام وضرار مرة مرة يشبحلها ع جنب
جت وحده وقفت جنبه عينها عليه من لما كان مقعمز ع الطاوله
البنت بشخلعه: لوسممحت
اريج:😑
ضرار شبح للبنت: تفضلي
البنت: ممكن نعرف شنو جو ماكلتهم
ضرار استغل الموقف: حلوة بنتها وشي نظيف
البنت: خلاص بناخد برايك في رقبتك لوصارتلي حاجه هههههههه
وضرار ضحك حتى هو بلعاني
اريج:😒
البنت: انت تقرا هني
ضرار: تستس ،نخدم
البنت : أها الإسم الكريم كان مافيش مشكله
ضرار: لاعادي جدا ضرار
البنت : حلو هلبه اسمك طالع عليك
اريج:💢💢💢
ضرار: شكرا وأنتي
البنت: بسمه يدلعوا فيا بوسي
ضرار رفع حواجبه: حلو حلو
البنت: شن بتاخد خل ناخدوا زيك وبالمرة نكسبوا تقعميزة معاك وهدرزة
اريج خلاص وصلت حدها جبدت ضرار من إيده وقفاته في مكانها وقفت بينه وبين البنت
اريج بعصبيه: وعلاش مش ماليه عينك ماتشبحيش فيا واقفه جنبه
البنت سطرتها من فوق للوطا: ومنو أنتي
اريج برفعة حاجب: خطيييبته، ومدتلهاصبعها وورتها الخاتم ،وبش تزيدي تتأكدي هاه ،حولت اريج الخاتم وورتها الأسماء كيف منقوشه في وسطه
البنت: مالا حرصي ع خطيبك زين ياحلووة اللي واقفه جنبه ومش مدايرلك إعتبار شكلك مش ماليه عينه
اريج كانت بتضربها لكن تمالكت نفسها: ترا بري مانزلش مستواي لأمثالك
مشت البنت بعنطزة واريج التفتت لضرار لقاته يشبح للراجل اللي يدير في الشاورما ولاكإن في شي صار جنبه
اريج بهمس: بااااارد
تفضلي ياأبله
اريج خدت الشاورما: شكرا
ومشت وضرار خدي طلبه ولحقها وقعمز ع طاولته
سوسن: وحق ربي بدموعي😂😂😂
اريج: كولي واسكتي ،،طلعت اريج الشاورما متاعها وكيف بدت تاكل هو بدي حولتها من فمها هو حولها تشبحله ويشبحلها هزلها براسه متاع خيرك ؟اريج شقلبت عيونها وبدت تاكل
ضرار بدي ياكل وشاد ضحكته
سوسن:😂😂🤣🤣🤣
***
مش مصدق اللي سمعته
سارة: هذا اللي صار
عز العرب: ريما ياإنها هي طيبه لدرجه الملائكيه يإما هيا عاشقه نجيب بكل معنى الكلمه
سارة: بعد اللي سمعته شنو بدير
عز العرب سكت
سارة :أذا فعلا حتصبر معاها وتتحمل كمل معاها وإذا مش حتقدر ياريت تخليها من توا خير البنت مش حمل خيبات جديده
عز العرب قعد يفكر....
***
اريج وسوسن يتمشوا ويهدرزوا
اريج: بعد العيد يعني
سوسن : ايه ،قوليلي كيف صار في عرس عبدو
اريج: سبحان الله بوها مرض بعد ماطلع خوي نجيب من العيادة
سوسن: خيره إن شاء الله
اريج : إن شاء الله ،،اريج شافت حاجه طيرتلها عقلها ،،هيييييييييييييي
سوسن شبحت لنفس المكان: بلعاني يبي يحسسك باللي هو حس بيه لما شافك مع معز
اريج بغضب: في فرق
سوسن: عنده هو لا
اريج شبحت للمكان اللي هو فيه كان ضرار واقف ع سيارته ويهدرز مع البنت متاع الكافيريا خدت تليفونها وبعتتله رساله
شافته لقاته طلع تليفونه من جيبه قام نظراته ويقرا في الرساله
(والله واللي إسمه الله لو ماطيرهاش من قدامك توا ياضرار تنساني للأبد نتكلم مني جد وحلفت)
نزل نظراته شويه وسلم ع البنت ومشت وجاي جيهتها
سوسن: هذا جايك
اريج تشبحله وخلاص لين وصل فيها
ضرار: ماتحلفيش عليا ياسوسن مرة تانيه
اريج: لاياسوسن نحلف عليك ونحلف
ضرار: سوسن ماتحطيش راسك براسي
اريج: بنحطه لأنه ماحد يطلعله يحط راسه براسك غيري ياسوسن
ضرار: ههههههههههههههه ياعن جد الثقه
اريج ابتسمت بغرور
ضرار: ترا بري سوسن
اريج : اقعدي سوسن
سوسن: يرزيكم في سوسن ،،اقعددوا فيها
ضرار وأريج : 😂😂
ضرار: استاحشتك ياقنتشه
اريج فتحت عيونها: شن هي
ضرار يضحك: اللون اللي لابستيه
اريج: يقولوله رصاصي مش قنتشي
ضرار: هههههه تي به به
اريج: شنو كنت ادير معاها
ضرار: من هي
اريج : من هي يغني العنزة هديكا
ضرار: هدرزنا شويه
اريج قدمتله وشبحت لعيونه بجديه: ادير حركه زي هادي مرة تانيه ماتتخيلش شنو حيطلع معاي بعدها
ضرار قدملها وجهه : ترا شن بديري
اريج سخنت مع بعضها ووجهها ولا طماطم من قربه ليها وخرت
ضرار: ههههههههه تي غير تعالي نقعمزوا في شي ضروري بنحكي معاك فيه
اريج: شي زي شنو
ضرار مدلها إيده : تعالي
مشتله اريج شدت في إيده ومشوا مع بعض...
***
وائل رافع مرام لحوش اهلها من الصبح
لإن عنده رحله بعد العصر وبيقعد يومين
مقعمز مع سليمان في البلكونه ويهدرزوا
وائل: امتحانات ورساله ربي يعاونك ياشيخ
سليمان: اللهم آمين ،،شنو مداير مع بنتك
وائل: بدت تاخد عليا وأني مش قادر نقعد بلاها حتى توا حطيتها في حوش جدها وقلبي معاها
سليمان ابتسم: ربي ينبتها نبات حسن ويفرحك بيها
وائل: اللهم آميين
سكتوا ويتفرجوا ع الجو برا وائل يشبح لسليمان وفي باله كلام يبي يقوله
وائل: سلومه
شبحله سليمان: نعم
وائل: مافيش جديد
تنهد سليمان وشبح للشارع : ليها قريب اسبوعين مختفيه
وائل فكر لو مرام تكون فاتحه معاها الموضوع وهي اقتنعت بيه
وائل: سليمان بنقولك شي
سليمان شبحله: شنو
وائل: مرام تفكر تخطب العقد الفريد لخوها مصطفى
سليمان انصمت مرة وحده قعد يشبحله وخلاص
سليمان: قول خطبتها وخلاص هذا علاش اختفت مرة وحده
وائل: والله مانعرف ممكن
سليمان : مش ممكن أكيد
ناض وتوجه لداره ووائل يشبحله شويه وطلع منها لابس وطلع برا الحوش
وائل: من الأول راك خطبتها بتقعد ديما هكي ..
***
متأكد !!
ضرار: ايه،،خوك في حد لاعبله في السيارة وشخص يعرف العيب اللي فيها بش يبان الحادث وكأنه بسبب هالعيب
اريج بخوف: منو زعمه
ضرار: عنده عداوات
اريج: مانعرفش اللي نعرفه إن خوتي مسالمين وماليهمش في المشاكل
ضرار: ممكن تكون عداوة خدمه "حسد"يعني
اريج: ربي يستر
ضرار: خوك بدي يطلع من الحوش
اريج: لالا محرصين عليه بابا وماما مايطلعش قبل يطمنوا ع عمليته ويفك الجبس
ضرار: إن شاء الله خير
اريج: حسني خفت
ضرار شد إيدها: ماتخافيش ياقلبي حاط ناس تأمن عليكم وعليه
اريج تشبحله: تسلم
ضرار: بالله عليك فكي هالعقده خلاص
اريج: انت غلطتت
ضرار: حتى أنتى
اريج : باهي قول أسف وبعدها نقولك اسفه
ضرار : ههههههههههههههههه وعلاش مش أنتي اللي تبدي
اريج : باهي ياسيدي نقولوها مع بعض نعد لتلاته ونقولوها باهي
ضرار :هههههههههههههههههه ،،هي ابدي
اريج : واحد اتنين تلااااته
"أسف آسفه"
وانفجرواا بالضحك على بعض ،،ضرار برغم أنه في أخر تلاتين لكن كان يحب يسايرها بس ماتحسش بفرق العمر بيناتهم وترتاحله اكثر وكان يحب شقاوتها الطفوليه هلبه وتهبل فيه بحركاتها اللي مخليه قلبه يتعلق بيها أكثر وأكثر..
***
بعد العصر
نجيب كان مقعمز في داره ويخدم ع اللاب توب
طقطق
نجيب:خش
خش أصيل وواقف ع الباب: نجيب
نجيب وهو لاهي بالخدمه : هممم
اصيل : جايك ضيف يبي يتحمدلك ع السلامه
نجيب: باه شوي وجاي
طلع أصيل،،ونجيب سوا روحه وخدي القيله متاع وطلع من داره متوجه للمربوعه لما وقف انصدم باللي جايه
عز العرب وقف : الحمد لله ع سلامتك ياباش مهندس
قدمله نجيب وسلم عليه: الله يسلمك ،،قعمز نجيب مقابله
عز: والله اول ماعرفت جيتك للعياده طول
نجيب: قالولي بارك الله فيك
عز: الفترة هادي كنت مسافر خدمه هذا علاش عطلت ماجيتكش بعد نضت سالم
نجيب: معذور
ناض أصيل بيجيب الضيافه
عز شبحله: انكتبلك عمر جديد
نجيب: الحمد لله
عز: طول عمرك محظوظ وحظك قوي هلبه
نجيب استغرب وقعد يشبحله : مش زي حظك طبعا ،،ماقلتليش مازال العرس"بتهكم قالها"
عز ابتسم: لغينا الفكره بعد اللي دارته ريما فكرة الأرتباط بيها ولا محكوم عليها بالفشل مسبقا
نجيب يشبحله ومش فاهم شي
عز: مافيش راجل يتحمل يكون مع وحده قلبها مع غيره
نجيب قلبه قعد يدق بقوة
عز: برغم كل اللي صار معاها واللي درته فيها اول ماسمعت بحالتك جت تجري قعدت فوق راسك لا ومش بس هكي عطاتك كليتها ....
نجيب انصعق قلبه قريب وقف تشوشت الرؤيه قدامه حس روحه زي اللي بيدوخ
نجيب بصوت عالي : أصييييييييييل....
يتبع .....
#GomanFared
