الحلقة(75)
أنت قلبك تعلق بيها ونسيت معاها هلبه حاجات مهمه تانيه منهم محمود وأمه مانبيش نقول ربي عاقبك بس أدبك لأنك ابتعدت عنه وعلقت قلبك بغيره وغير اللي يحبه ،،ربك يغار ع قلوب اللي تعلقت بيه لو تعلقت ب غيره فردك ليه بطريقته،توا نبيك تشغل قلبك بالطاعات العبادات الخاصه والعامه وأهمها السعي في حاجة خوك لمؤمن وبالنسبه لمحمود وأمه الله يصلحه ويرحمها حاول أنك تكفر عن غلطك وماتخليش محمود لإن في سن صغير وساهل جدا يضيع
والبنت هديكا انساها مدام اخترت هكي استعين بالله ع نسيانها وحيساعدك ياولدي ...
سليمان مايبيش ينساها يبي تصير معجزة وتولي ليه ومرته بس مش عارف كيف
الشيخ: ولا ادعي ربك يردهالك ويخليها من نصيبك
سليمان اتفاجئ وشبح للشيخ وضحك...
الشيخ عبدالله: كلنا عرفنا الحب ومافي حد ماعرفاش الرسول لما في مجمع من صفوة الرجال لما ينسأل من أحب الناس أليك يقول "عائشه" هذا احلى وأجمل صور الحب
سيدنا أبو بكر قبل مايموت وصى إن زوجته إسمها اسماء وكانت زوجته التانيه هي اللي تغسله من حبه ليها
الحب عاطفة طاهرة لما يكون في مكانه الصح وفي وقته الصح لكن أهم شي إن هالحب مايشغلكش عن الحب الأعظم هو حب الله سبحانه ..
سليمان ارتاح هلبه لكلام الشيخ أحمد وباس راسه : ربي يجازيك عني خير الجزاء ياشيخي
***
سفرة قبرص يلي ربحوها فريق فيصل وجمانه في المسابقة اللي في المصيف صار في تعديل ع اللي بياخدوها بدل فيصل وجمانه مشوا معز وأريج يعني اللي حيسافروا اريج ومعز وأمينه وعبدو ،،سافروا التلات وبيروحوا الجمعه
وصلوا لقبرص المكان اللي عايشه فيه ملاك مع أهلها
وعبدو أول ماوصلوا بلغها وأهلها اصروا يعزموهم ع العشي لإنهم وصلوا الصبح يرتاحوا ويطلعوا في الليل
حجزوا غرفتين في فندق مطل ع البحر غرفه لأريج وأمها وغرفه لمعز وعبدو ..
...
ليكم تلاته ايام مخليكم ع راحتكم واليوم بتطلعوا تتعشوا معاي غصب عنكم
جمال: هههههههه تي باهي ياراجل مش قايلين لا ره
ضرار بضحكه: خلاص نشوفكم الليله وتو نبعتلك النعته
جمال : تمام هي تشاو وصكر
مروة كانت واقفه جنب جمال وسارحه في حاجه شافتها
جمال: ميرو ميرو حبي
مروة: هاه
جمال: وين سرحتي
مروة: لالاشي
جمال ابتسم: هي تعالي نركبوا عارفك بترقدي خلاص
مروة هزت راسها بإيجاب مع إبتسامه مجامله وبالها مشغول باللي شافاته...
***
عمي خليها طاوله ماتعبش يوحك
سعيد: خل نعاونك وانتي قايمه الحوش ع راسك
سرور: متعودة ياعمي مادوييش
سعيد دف الطاوله: هاه هكي كويس
سرور: يعطيك الصحه ياعمي ووالله مانك دايي حاجه غييها
سعيد بضحكه : باهي بنمشي نفتح الأخبار تبي حاجه بنتي تعالي
سرور: تسلم عمي
حنان جايه من المطبخ: سرور هلبه عليك
سرور: لاالاعادي مافيش مشكله
سرور كانت اضم واتنكت في حوش شيابينها تبي تشغل نفسها عن التفكير في حاجات اضايق فيها عماد من نهار حطها معاش جي مايبيهاش تضايق منه واليوم قرر يجي ويشوفها وجايب معاه السوبر ماركت كله 🤣
حنان : سلمك جياب ياغالي يعوض عليك ربي
عماد: تسلمي ياااارب ..ويدور بعيونه
حنان بضحكه: في المطبخ
عماد ضحك ومشي للمطبخ وقف ع الباب لقاها لابسه قفطان نص كم واسع وقايمه شعرها كعكه وشعر كان ناعم هلبه في خصلات منه طالعه من الكعكه ادير في المقروض وتتحرك وخصلات طايحات ع وجهها يتحركوا معاها منظرها كان يهبل ..لاشعوريا قدم جيهتها وكانت عاطيه بالظهر باسها من خدها
سرور: هيييييييييييييييييييييييييي😲
عماد: خيرك😨
سرور بعصبيه: كيف اديي هكي ياسخيف ياقليل الأدب وتضرب فيه ع صدره
عماد: راجلك ياحمارة😂😂
سرور بنظرة غضب: لا مزال
عماد بضحكه : شن هو اللي مازال طلع من جيبه كتيب للعائله ويفتح فيه ويوريلها فيه ،،هاه هاه ريتي توا مرتي ولا مش مرتي
سرور رفعت حاجبها اليمين: ندييوا عيس وبعدين دير اللي تبيه
عماد: آاااه ياقلبي غير امتى هالعييس
سرور ضرباته ع كتفه
خشت حنان: هذا عماد بصايري وجوه حلو من هو صغير وقلبه حليب
عماد بضحكه: غير متحشمه منك كانهدا قالتلك "شكاي العيوس أمها وخالتها وعشية من قبيلتها "
سرور: هههههههههههههههههه
حنان: هههههههههههههه ،؛ريتي كيف ضحكك واضح عليه يحبك هلبه
سرور ماتت من الخجل وعماد يضحك عليها
عماد بمزح: هيي ماتبالغيش وخيتي اني خديتها ع خاطر مقيوضها بس وجبد مقروضه وقعد ياكل فيها
سرور: مبيدك 😑
عماد: ريتيها لسانها اطول منها
حنان تضحك: خلاص اطلع وخليها تخدم ع حالها
عماد ياكل: باهي ...ماتبوش ..نعاونكم
سرور: كول وبعدين تكلم
عماد:😂
حنان بضحكه: لالا صحيت
عماد: متأكدين أخركلام
سرور: تعاونا لو طلعت وخليتنا نكملوا شغلنا
عماد: ربي يصبرني عليك وع لسانك ياسيويي
حنان ميته بالضحك وسرور تفنص فيه وهو طلع يضحك
***
قبرص ...
في الليل لبست اريج وتأنقت بش تمشي لعزومة اهل ملاك
لوطا في الفندق
عبدو: اللهم طولك ياروح
أمينه: تو تنزل
عبدو: ليك ساعه تقوليلي تو تنزل
معز بضحكه: خلاص ياراجل هدي شويه
عبدو : وأخيرا
نزلت اريج وهي بكامل أناقتها طالعه تهبببل
كانت لابسه بلوزة بيضه لفوق الركبه بشويه تحتها سروال HDأسود وفوق البلوزة لابسه طرف احمر طويل بلاأكمام ووشاح أبيض حرايري محطوط حط وكندرة حاطيه سودا وشنطه صغيرة حمرا وحاطه روج احمر خفيف
خدت عقل معز قريب هبل فيها بس اضايق لأن لبستها ملفته هلبه وطارتله من لقطة الروج
اريج: اسفه عطلت
عبدو: هيا قدامي
معز ساكت ولاحرف ..ركبوا السياره معز وعبدو القدام ومعز اللي كان يسوق وأمينه وأريج اللتالي وأريج جت وراه بالزبط طول الطريق عيونه عليها وهي تشبح للشوارع قامت عينها في المرايه جت في عينه شبحلها بحده وشبح للطريق قدامه
اريج"خيره شبحلي هكي"
وصلوا لحوش أهل ملاك اللي استقبلوهم أحسن استقبال وملاك فرحانه بيهم هلبه وهدرزوا وجو حلو..
....
يشبحلها وهي تنقش تنقيش وكانت تسرح هلبه
ضرار: خيرها مهبيه حي عليك تطلع مزعلها
جمال:اختك كان نلقى مانخليهاش تمشي ع الوطى
ضرار: مروة مروة ياهوو
قامت راسها: نعم
ضرار: خيرك يابنتي الجته هني والعقل اشبح وين
مروة ابتسمت: لا مافي شي
ضرار أشر بصبعه ع جمال: هذا مزعلك
مروة ضحكت: لا والله مافيش خيرمنه إلا انت طبعا
جمال: لازم دخليه في كل طبيخه
ضرار بضحكه: غصب عنك
مروة ضحكت وقعدت تشبح لخوها وتفكر
ضرار : خيرك
مروة: نبي نزوجك
ضرار: ههههههههههههههههههههههه
جمال: والعروس واتيه بنت خالي والله ماتلقى زيها جمال ونسب ومال ..
ضرار هدا ضحك: تعشوا تعشوا
مروة : نتكلم بجد ع الأقل ماما تقعد معاكم
ضرار شبحلها وطلق الموس والشوكه: صكري ع الموضوع ومعاش تفتحيه بكل
جمال: خلاص مروة خليه ع راحته مش صغير ويعرف مصلحة نفسه
مروة سكتت..وهو رجع كمل ماكلته بعصبيه..
***
الموضوع لازم يتم رسمي يافتحيه
فتحيه بأرتباك: أن شاء الله قريب
رقيه: امتى يعني
فتحيه بربكه اكثر: غير يتم سليمان اموره في طرابلس
رقيه شبحت لأختها بشك: أن شاء الله خير...
***
روحوا من حوش ملاك وهما خاشين للفندق عبدو ركب هو وأمه ومعز جبد اريج من ايدها قبل لتركب
اريج تشبح لإيده: خيرك !
معز: شن المهرجان اللي لابستيه هذا
اريج: والله وانت شن دخلك
معز : تبي تلفتي النظر وخلاص؟!
اريج عصبت: شن قصدك احترم نفسك
معز : اني محترمها هذا علاش كلمتك
اريج: ماليكش حق تتكلم مادام خوي راضي
معز: هذاكا خوك مش اني
اريج برفعة حاجب : ومن انت إن شاء الله
طلقها معز وركب وهو يقول: وروج اهوا معاش اديريه ..ركب وخلاها مصدومه "مصح وجهه"
***
ندى كانت منطرحه ع سريرها قدام المكيف الجو حريقه برا حتى في الليل
ندى: الله ع البرودة الله يربح اللي اخترعك
قعدت تبربش في تليفونها خشت ع النت جوها اشعارات من الفيس والإنستا خشت ع الفيس ردت ع تعليقات ع المنشور نزلاته ع المصيف اللي كانوا فيه وعيد ميلاد اريج .لقت طلبات صداقه بالهبل
ندى"عليك شكالات مقلبه وأسماء تجيب الغثيان" شويه لمحت اسم غير بيناتهم
"حي هذا كنان خو ريما " خشت ع صفحته وقعدت تدهور فيها لقاته مش مهتم هلبه بالفيس قبلت الطلب وطلعت من الفيس خشت ع الإنستا كانت منزله صور نفس اللي في الفيس قعدت تشوف في التعليقات بعدين شافت الفولورز
لقت كنان بيناتهم ضحكت خشت ع صفحته لقتهم فيديوات وصور هلبه ادهورت فيهم كلهم كانوا صور لكنان في الجامعه وفي الفرقه ومقاطع عن حفلات ليه رسميه وعاديه في الأماكن العامه وتشبح في تعليقات اجانب وعرب والبنات بالهبل ليبيات وسوريات وخليجيات حتى غربيات ..
ضحكت وقبلت الفولو ودارتله فولو ثواني وقبلها
جتها رساله فتحتها وكانت منه
(ندى فرج)
(ايه)
(باهي بأمارة شني)
ندى: شنو قصده
(مافهمتش)
(كيف نعرف انك ندى فرج)
ضحكت واستنتجت انه شاف هلبه ايميلات زي اسمها وكان يبعت فولوا والبنات ماصدقوا😂 وحبت اديرله مقلب
(بأمارة السفنز بالدحي)
(تافهات)
(هههههههههههههههههه)
معاش بي يرد
ضحكت وبعدين بعتت
(بأمارة التطفل متاعك عليا وأني مقعمزة ع الشط ونبكي)
(ههههههههههههههه)
(واخيرا لقيتك )
(ندى شكلك رحت بين الندوشات)
(هههههه مش غير رحت بعتت لعشرين لتوا)
ضحكت
(لو منك من اول مرة ماصدفتش نفوت)
(هديكا انتي مش اني كنت مستعد نبعت لميه المهم نلقاك)
ندى تحشمت وغيرت الموضوع
(روحتو لأوكرانيا)
(Yes)
(الحمد لله ع سلامتكم )
(شن جو غادي حني هني محماطي)
(هههههه الجو لطيف )
(سعدوودكم😟)
(ههههههههه)
وكملوا هدرزة...
***
يرن تليفونها دارته صامت وقلباته ع وجهه وكملت كتيبه في مذكرتها
" بسببك اعيش حالة الموت البطيء اختنق بطوق رجل لااريده ،اتسائل كيف تسير حياتك الآن لا أظن بإنني أشغل ولو جزءا بسيطا من تفكيرك ،ادرت ظهرك لي ولم تبالي بما خلفت ورائك في قلبي اشتاق إليك بشده ...."
حطت البيرو وقعدت تبكي قلبت تليفونها لقت فيصل قاعد يتصل صكراته مرة وحده ومشت توضت وصلت ركعتين وفتحت المصحف وبدت تقرا....
***
سليمان مقعمز مع وائل في الصاله ع خاطر المكيف
وائل: كان ركبت مكيف في دارك خير
سليمان: مانحباش في الديار
وائل: انت راكباتك عقدة من مرضتك هديكا
سليمان ضحك وسكت
وائل: سليمان
سليمان : اصدمني عادي ولت عندي مناعه
وائل ابتسم: المراة أمس قالتلي ان العقد الفريد ....
سليمان خاف: خيرها تكلم؟
وائل: انقرت فاتحتها ع قريبها..
سليمان انصعق وقعد جامد في مكانه ركز ع كلمة قريبها
فلاش باك
<<فيصل: البنت اللي اليوم كنت معاها واللي عطاتك هديه الباين، قريبتي ونعرفها بنيه محترمه لكن أنت شكلك ضاحك عليها بجو المشايخ اللي مدايره >>
<<فيصل: فوتها خيرلك ولا قسما بالله اللي نديره فيك يخليك من حوشك معاش تطلع >>
الوقت الحاضر
ناض سليمان خش لداره وسكر عليه الباب ووائل قعد يترقب شويه تانيه قعد يسمع فيه يقرا في القرآن بصوت عالي وبنبرة حزينه تخلي الواحد يخشع معاها وائل قعد يسمع وسليمان داخل كان يقاوم في وجع قلبه ويطفي في ناره بكلام الله سبحانه...
يتبع .....
#GomanFared
