الحلقة(110)
بعد فاتت عطلة نص السنه جمانه بدت تخدم في المدرسه ..كانت في قمة الحماس وكانت تتبع طرق تدريس خاصه بش تحبب الطلبه في الماده وتخليهم يفهموها كويس..خلال فترة قصيرة اثنوا عليها مديرة المدرسه وعضوات الإدارة في المدرسه ..كانت شغوفه بخدمتها ..
الأنسان حتى لو اشتغل في مكان اقل من مؤهلاته العلميه..لازم يبدع ويعطي فيه وينجح فيه ومايستهنيش بيه ابدا مادام حطه الله في هالمكان ففي وظيفه ويبيه يأديها..وزي ماقال رسول الله "إن الله يحب إذا عمل أحدكم عملا يتقنه"..انشغالها بالخدمه ماشغلهاش عن حوشها وواجباتها تجاهه كانت تحاول توفق وسليمانها 💓كان يساعد فيها..برغم إن غار من خدمتها وطلبتها اللي شغلوها عنه...بس كان مرتاح لأن قدر يتفرغ لأعماله وأمه كانت تجيه بين فترة وفترة تقعد معاهم وتعاون..
🌹زينب انخطبت لأبوبكر وبدوا يكلموا في بعض انسجمت معاه هلبه وهو قلبه بدي يتعلق بيها أكثر وأكثر...💖
سرور حامل وتتوحم ع عماد ومكرهاته في عيشته بس متحمل ويساير لأنه يحبها💖
ريما ماتندري ع شي بخصوص تعب قلبها بس مستغربه في اهتمام نجيب الزايد بيها اللي برغم انه فرحت بيه بس ولا يضايق فيها وبدت تشك فشي...
أريج تقرا وتخدم مع معز وعلاقتهم ببعض قوت أكثر وأكثر وحملها زاد قوى المشاعر الحلوة اللي تكنها لمعز..
وفي يوم من الأيام في الشركه كانت مع راجلها في مكتبه يخدموا لين قطعت السكرتيرة عليهم انشغالهم
معز: نعم
السكرتيره: استاذ معز في واحد برا طالب يشوف مدام أريج..
شبحلها معز : ماقالش اسمه ..
السكرتيرة : لا..
معز: قوليله يخش...وصكر
اريج : شن في ؟
معز : استني وتوتعرفي ..
طق الباب وخش الشخص هذا : السلام عليكم
ردوا وسط علامات الإستغراب الباينه ع وجوههم : وعليكم السلام..
معز: تفضل قعمز..
:يزيد فضلك...احمم عارف انكم مستغربين فيا ومن نكون وليش جاي وليش طلبت نشوف المدام اريج تحديدا..
اريج: تشوفني أني ؟!!
معز: خش في الموضوع ...
تنهد الشخص هذا االي كان واضح ع ملامح وجهه الحزن والتعب الشديد طلع من جيبه حاجه وعطاها لأريج..
اريج لما شافتها انصدمت وعيونها تعبوا دموع: من ..وين جبتها..
جمال ابتسم بألم: هادي اخر حاجه قعدت من ضرار قبل ليموت عطاها لبنت خالتي تسلمها لأخته بش تحافظ عليها..ماعنديش خلفيه بالزبط شنو قيمتها.بس كانت أغلى عند ضرار من كل مايملك ..
اريج تشبح للحديده ودموعها نزلوا ومعز كان يشبحلها ..
معز: باه مدام عطاها لأخته علاش حضرتك جبتها هني..
جمال وحابس دموعه مايبيهاش تنزل: مروة بعد وفات ضرار خشت في حالة نفسيه ايامها كلها بكي وحزن وكل وقتها حاضنه حوايج خوها وتشم في ريحته..تتكلم عنه في كل وقت..تعذبت هلبه وكانت حامل بسبب حالتها النفسيه صارتلها ولادة مبكرة..كنت نشوف في وجهها ملامح غريبه ومبتسمه طول الوقت ..قبل لتخش لعملية الولادة عطتهالي وقالتلي" نبيك توصلها للبنت اللي كان يبيها ضرار اسمها أريج الشريف"..خشت للعمليه..سكت وخنقاته العبره..طلع ولدنا لكن هي لا ..غطا ايده بوجهه وقعد يبكي ..اريج بدت تبكي بالعبره..ومعز تأثر ع الأخر وعيونه دمعوا..
مسح دموعه واستجمع نفسه وقاللها: ارجوك خوديها وصيتها ارجوك نبيها تتنفذ ارجوك..
اريج وهي تبكي شبحت لمعز اللي اشرلها بعيونه بمعنى خوديها ..مدت ايدها وأول مالمستها تقشعر جسمها واذكرت يوم هدتهاله..
فلاش باك...
حول ضرار وقعد يضحك : والله مشغول وسيبت وراي شي ضروري وجيت ع خاطرك وفي الأخير واقفه تشبحيلي وخلاص
اريج ابتسمت: لاا جبتك بش بنعطيك حاجه أخر مرة لما تلاقينا ماقدرتش نعطيهالك
ضرار شبحلها وأبتسم: حتى اني
شبحتله اريج وطلعت من شنطتها حديدة صغيرة زي اليستيك وفيها خرز اللوح "يلبسوا فيهم الولاد هلبه"
اريج : هات ايدك
ضرار :ههههههههههه شنو تشبحي فيا ولد البارح
اريج بقلة صبر قدمت شدت ايده: ماتتسوهكش ع هديتي ولبستهاله وهو يتأمل فيها وخلاص قامت راسها لقاته يشبحلها بعشق وشوق وخرت اريج
اريج تأشر بصبعها ع سبيل تهديد: تحولها من إيدك نوريك ماتحولهااااش بككككل
ضرار هزا راسه بضحكه: حااااضر
الوقت الحاضر..
اريج ببكي : عظم الله اجرك في زوجتك الله يرحمها ويرحم خوها..
جمال: اللهم آااامين..وتوا اني نستأذن..وسامحوني ..
معز: ولايهمك...
لف جمال وطلع ..واريج تشبح للحديده في ايدها: كان يقول لأخته ديما بنت قلبي...علاقتهم ببعض كانت غير اي علاقه اخويه مألوفه..عانوا هلبه مع بعض وشافوا ايام صعبه هلبه وكانت متعلقين ببعض اكثر من اي شي هي كانت عيلته في وقت ماكانش عندهم عيله وهي كذلك..حتى لما سيبوا الدنيا سيبوها مع بعض ..وقعدت تبكي اريج..ناض معز وجاها قعمز ع ركابه قدامها وباس ايديها بعمق..هي نوضي حبيبتي نطلعوا ..اريج هزت راسها بالإيجاب وطلعوا من المكتب وهو حاضنها ومهماش الناس ولانظراتهم ..همه الإنسانه اللي في حضنه واللي مالكه قلبه...يبي يداويها يبي يجبر قلبها يبيها تكون ديما سعيده ومستعد يتحمل كل شي ع خاطرها ..
🌹🌹معز راجل بكل معنى الكلمه راجل حقاني عرف يحب صح ..عرف يحتوي اريج وعمره ماعايرها بالماضي ولاخلا للشك مكان بيناتهم ..الحب عطاء احتواء ثقه والراجل الحقاني لما يحب يحب برجوله وبشهامته وهذا كان معز💓💓"
***
في ليله من ليالي فبراير ..سليمان كان منهمك في التحضير لخطبة الجمعه اللي كان يبدا يحضرلها بمجرد ماينتهي من خطبه الجمعه اللي قبلها ..طقت جمانه الباب
سليمان : خشي ياعسلي🍯
خشت جمانه وهي تضحك وفي ايدها كتاب ومذكره: ممكن ناخد من وقت معشوقي شويه 😙
سليمان ابتسم وسيب اللي في ايده : خودي وقته كله 💖
ضحكت وحطت الكتاب قدامه: شن خطر في بالك لما شفته
ابتسم سليمان: اممم ممنوله في هالحاجه الوحيده بس لإنه كان سبب في إني قابلتك..
جمانه ابتسمت وفتحت المذكرة ع صفحه معينه وحطتها قدامه ..قراها ولقي فيها
(☆24\2\2013)
استغرب : شن معنى هالتاريخ...
جمانه : توقعت انك ماتكونش حاط في بالك شي زي هذا ..
ع العموم هذا تاريخ غدوة..نفس تاريخ اليوم اللي أول مرة تقابلنا فيه..
سليمان شبحلها بنظرة حب واذكر هذاكا اليوم
فلاش باك
السلام عليكم ...
..هي خيرها الدنيا سخنت هكي قلبي خيره يرعش هكي شنو هالإحساس المسيطر عليا هذا...!
العقد الفريد صح؟!!
هني هيا التفت وياريتها ماألتفت شافت اللي خلاها تحس ملامح كل شي حواليها تختفي ويقعدوا بس ملامحه عيونه الكبار الزرق إبتسامته طلته االلي سلبت عقلها
الو جمانه
الرقم الذي طلبته خارج نطاق التغطيه
جمانه معاش حست بشي غير قلبها اللي مش عارفه خيره مايبيش يهدا
معاك الشيخ
احمم أسف ممكن تأخرت ضحك زحمة الطريقة ماحد غابي فيها
جمانه ماتندريش عليه شنو يقول مطموسه فيه وخلاص اجتمعت عندها الشخصيه اللي تراسل فيها مع الهيئه الخارجيه والوقفه اللي كلها أدب ورجوله وعلى مسافه والعيون لوطا
رن التليفون استاقضت جمانه
سليمان : عن إذنك لحظه
جمانه:" حيي عليا أني شن صارلي خيرني بلمت في الراجل هكي !!..الحمد لله لابسه خمار😥"
كمل مكالمته وجاها
سليمان : اسف عطلت عليك
جمانه وطت راسها ويدوب صوتها طالع : مافيش مشكله😳
سليمان مدلها الكتاب وشاد جيهه وحده : تفضلي
قربت جمانه شويه مدت أيدها وخدت الكتاب من جهتها
وولت لمكانها
جمانه بنفس نبرة الصوت: نكمله ونرده
سليمان : هههههه مش ساهل تكمليه فيسع حياخد وقت
جمانه تحشمت: تو نشوف
سليمان: امتى ماتكملي رديه تو ندبر في غيره عادي
جمانه : لالا خوده
سليمان ضحك: خلاص الحاجه اللي نعطيها معاش تولي
جمانه متحشمه ع الآخر: باه أني نستأذن السلام عليكم
سليمان وهو مبتسم: وعليكم السلام
جمانه مشت وسليمان قام راسه تلقائيا ويشبحلها كيف تمشي بحياء خطرت عليه آيه وقراها"تمشي على إستحياء"
تلفت ومشي لسيارته وركبها وطلع...
الوقت الحاضر
سليمان : شن رايك نعاودوه
جمانه: ههههههههههه شنو
سليمان بجديه: ايه نعاودوه ..اني غدوة فاضي وانتي ماعندكش مدرسه ..
جمانه : بس غدوة عندي موعد
سليمان : موعدك بعد الظهر وحني نتلاقوا في نفس الوقت اللي تلاقينا فيه مذكرتيه ..
جمانه بضحكه : والله خشت في راسي ..باه تمام والملايه نفسها قاعده عندي ..
سليمان ضحك: حتي اني نفس الحوايج قاعدين عندي
جمانه بحماس: خلاص إن شاء الله غدوة موعدنا
سليمان : هههههههههه بإذن الله ...
جمانه شافت للاب ولاقاته كان يكتب وقرت العنوان:موضوع الخطبه الجمعه الجايه إن شاء الله
سليمان : ايه ..قعمزي خل نكلمك عليها..
جمانه بإبتسامه: باه ..وقعمزت ع كرسي بحداه وقعدوا يتكلموا ويتناقشوا في الموضوع ومنسجمين ع الآخر...
***
تاني
كلية الطب
كنان: فهمتي ..
ندى: يسسسس...
كنان بضحكه: حبيبتي شطورة عارفها ...
ندى ضحكت : هيا نوض نبي ناخد حاجه ناكلوها مافطرتش
كنان: تتكلمي بجديات..ندى خيرك ماتسمعيش في الكلام..
ندى : خلاص كنكوني اخر مرة ..بالله عليك ماتعصب..
كنان زفر بقوة: ندى رجاءا اهتمي بصحتك وبنفسك ارجوك
ندى: حااااضر من عيوني ياعيوني
كنان غلباته الضحكه:طفله ونموت فيك💓
ندى: واني نحبك هلبه هلبات.. وناضت..هي نوض بسرعه ..
ناض كنان وهو يضحك وفي طريقهم قابلوا ايوب اللي جاهم طول ..
ايوب : كنان التعبااااااان عاش من شافك وسلم عليه
كنان : ايوب الحيواااااان تعيش وتشوف
ندى وشاده ضحكتها : كنان عيب ..
كنان : مادوريش هذا وجهه زينقو مايحرجش
ايوب : هههههههه ..ومد يده بيسلم ع ندى..كيف حالك ندى ..سلم عليه كنان وجبده بقوة ..
كنان: ماتتعداش الخطوط الحمر يابرو
ضحك ايوب : تي باه ياودي..ونفض ايده ..وين ماشيين
كنان : الكافتيريا ..
ايوب : تمام بعدين نبيك كنان ..
كنان بإستغراب : اوكي بيناتنا آلو ..
ايوب: تمام ..هي سلام ...ومشي
ندى: كان نعرف كيف وليتوا صحاب هكي
كنان: ههههههههههه زي مايقولوا محبه بعد عداوة
ندى: هههههههههه..
***
واقفه تحت نفس الحيط اللي كان من فوق مظل تشبح للسمي اللي كانت صافيه عكس هذاكا اليوم اللي كانت فيه مغيمة وباديه تمطر ..تذكر في مشاعرها الملخبطه هذاكا اليوم وكيف كانت تبي تهرب ضحكت ..
احمم عسلتي
التفت : ههههههههه غلط مش هكي مش هادي الكلمه
المفروض تقولها ..
سليمان ع اساس يذكر وشبه عيونه مغمضات: اممم شن قلت وقتها ..روحي ..لا..عمري لا..اممم ياأحلى حاجه صارت في حياتي...
جمانه: ههههههههه ..قتلي العقد الفريد صح وقلدت صوته ..
سليمان: ههههههههههههههه اني نتكلم هكي
جمانه : ايه صوتك هادي ورخيم وحلو صوت إذاعي ..اول ماسمعته تحرك قلبي من داخل ولما التفتت وشفت صاحبه نسيت اسمي مرة وحده ..
سليمان : غير جينا في الشارع بس كان هذا عرفت كيف نرد ع كلامك الحلو هدا ...
تمشوا شويه وقعمزوا ع رشاده كبيرة وفتحوا الكتاب وقعدوا يتكلموا عليه لف سليمان بحركه سريعه صفحه من صفحاته وبانت الصورة..
جمانه: هههههههههه امتى حطيتها
سليمان بضحكه: اليوم الصبح قبل لنطلعوا ..هي كانت سبب تاني مرة شفتك فيها..
جمانه: هذاكا اليوم ماكنتش نبيك تشوفني وادرقت عنك
سليمان :ههههه لمحت طرف ملايتك وقتها
جمانه بضحكه: الصراحه ماقدرتش نمنع نفسي من إني نشوفك يومها..
سليمان: واني كان خاطري نشوفك ..سبحان من خلا الريح تحرك الكتاب بش طلعتي وشدتيه وخلاني نلتفت في لحظتها ونشوفك ..تعرفي في شن كان خاطري في هديكا اللحظه
جمانه: شنو ..
سليمان : نقرا فاتحتك ونروح بيك..
جمانه: هههههههههههههه
سليمان لف ايده عليها وحضنها ورفع راسه فوق : اللهم لك الحمد اللي وهبتني خير متاع الحياة الدنيا..💖
جمانه: ولك الحمد إنك استجبت دعائي ووهبتني الزوج الصالح اللي ياما دعيتك ترزقني بيه
جمانه وسليمان: الحمد لله 💖💖💖
......
بعد ماطلعوا من الكليه مشوا لأقرب جامع وصلوا فيه الظهر..وبعدها توجهوا للعياده ..مشت جمانه قعمزت تستنى في دورها وسليمان كان يستنى برا ..شويه وجي دورها وخشت ..
الدكتورة : كيف حالك جمانه
جمانه : الحمد لله كويسه
الدكتورة : جاهزة
جمانه بضحكه : ايه ..
جت الممرضه وساعدت جمانه تركب ع السرير والدكتورة بدت تشغل في الجهاز..
جمانه : ساهل نعرفوا جنسهم
الدكتورة:ع حسب وضعيتهم ..وبنسمعك حتى نبضهم
جمانه : دكتورة نبي انادي زوجي يكون معاي بش يسمعه حتى هو ..
الدكتورة ابتسمت :مافيش مشكله ناديه
اتصلت بيه جمانه وقالتله يجي ..وهو حسها رزينه شويه والمكان كله نساوين بس خدي بخاطرها وركب ..كان يمشي وعيونه لوطا..وكان محاصر بعيون جنس حواء المبهورات بيه وبطلته البهيه ..طقطق ع الغرفة وخش بعد مااذنتله الدكتورة ..
سليمان: السلام عليكم ..
الدكتور والممرضه:😍😍
هو تلخبط ومشي لجمانه وقف جنبها
سليمان: شنو حبيبتي..
جمانه: قالتلي بتمسعني نبضهم نبيك تسمعه معاي
سليمان ابتسم: ياعمري نسمعه معاك 💖
بعد استاقضت الدكتورة قدمت وبدت شغلها شويه..وبدوا يسمعوا في صوت بدي يوضح وكان اصوات متداخله ..دمعت عيون جمانه وقعدت تبكي هو قرب منها وخدي ايدها وباسها من برا ومن داخل بعمق..💓
جمانه: شعور حلو هلبه
سليمان: صح...
شويه والدكتورة ضحكت: وضعيتهم مناسبه هلبه وساعدتني ..نكشف عن جنسهم
جمانه وسليمان يشبحولها ..
ضحكت الدكتورة: ولاد.
جمانه قعدت تضحك وتبكي :شفففت مش قتلك ..
وهو يضحك وفرحان لفرحتها ...
والدكتورة والممرضه منسجمين معاهم وكأنهم يتفرجوا ع مسلسل تركي..😂
جمانه : الحمد لله..
شويه وناضت ووصتها الدكتورة هلبه توصيات..وبعدها طلعوا ..وهما في الطريق
جمانه : حبيبي
سليمان: روحه
جمانه : خاطري في حاجه
سليمان: ههههههههه عارفك تبي البحر
جمانه:هههههههههه سلملي اللي فاهمني ..شد ايدها اللي حولت منها القوانتي ع خاطره وباسها وحطها ع قلبه وكملوا طريقهم للبحر بش يشاركهم فرحتهم اللي ماليهاش حد..♡♡
***
صار قتلي تزوج ...
:ايه
:عايش حياته بعد مادمر حياتي بكل سهوله ..لكن خليه ياخد راحته ويفرح شويه ..ياما جاياته من ايام سود....
يتبع .....
#GomanFared
