الحلقة(106)
اني مكمل في الموضوع اللي قتلك عليه
سليمان : أنت متأكد..
ابوبكر : ايه ...
سليمان : هادي اختي مش بس بنت خالتي يعني لو عارف روحك ممكن تخليها في نص الطريق سكر الموضوع من هاللحظه
ابوبكر ابتسم: ليك سنين تعرفني عمري عطيت كلمه ووليت فيها ولا وليت في نص الطريق مع اي حد ..!
سليمان: يعني واثق من قرارك..؟
ابوبكر: مليون في الميه
سليمان بإبتسامه : ع خير إن شاء الله
....
جمانه بفرحه : يعني حسيته يبيها بجديات ..
سليمان : ايه ومصر عليها..بيني وبينك حاس إن في شي
جمانه بتساؤل : كيف
سليمان : يعني اصراره ع الموضوع مش متاع حد سمع عنها سمع ..
جمانه: ممكن يكون شايفها في اي مكان
سليمان : ممكن ...تنهد ..ربي يكمل ع خير ..الجمعه بعد الصلاة إن شاء الله نتسقدوا غادي ويصير خير
جمانه بإبتسامه : إن شاء الله...ايه اليوم اختي مروحه نبيك ترفعني قبل العصر لحوشنا ...
سليمان : حاضر ...وقرصها من خشمها ...بيتان لااا...وتاني حاجه اسمه حوش اهلك ..انتي هذا حوشك تمام ..
جمانه بضحكه : ايييي حول ..تمام تمام...😆
***
ندى: مش مصدقه روحت لحوشنا وراقده في داري
اريج : هههههههههه اللي يسمعك يقول ليك السنين غادي
ندى: ايه والله تقول سنين..
اريج شبحت لرقبتها: ياروحي ندوشي شن تحسي توا ..
ندى: احسن من قبل بهلبه ..
اريج: الحمد لله...
ندى: نبي نرقد روجتي ..
اريج : تمام ..ناضت عدلت الدفايه وسكرت الضي وخلت الباب مردود وطلعت...
***
ثريا: متأكد من كلامك ره الحكايه مش ساهله ..
ابوبكر: ساهله ياخالتي غير حني نصعبوا في كل شي
ثريا: والله في بنات ماخاصتهم حاجه نعرفهم غير تأشر بس شن رادعليك ربي تاخد وحده مريضه
ابوبكر: خالتي مرضها لاهو خطير ولاهو معدي مرض عادي بشوية ضوابط تمشي الحياه بأحلى مايكون ..اني البنيه خشت خاطري ومافي واحد سألت عليها إلا ومدح فيها وفي أخلاقها وفي اخلاق خوتها وبوها ..واني مانبيش اكثر من هكي ..
ثريا تنهدت : ماعندي مانقولك غير ربي يهنيك
ابوبكر ابتسم : اهو هي هادي الدعوة اللي نبي نسمعها..❤
***
قبل العصر جمانه كانت بين امها وخواتها ويهدرزوا
امينه تمسد ع راس جمانه اللي راقده ع رجلها : مرتاحه بنيتي
جمانه : الحمد لله ياماما فوق الراحه ..سليمان راجل بمعنى الكلمه ويخاف من ربي ويعامل فيا معامله الأب قبل الزوج ..
امينه: ربي يهنيكم دووم ويصرف عنكم كل شر
جمانه : آاامين
اريج : شن جو نونو..
جمانه ضحكت وحطت ايدها ع بطنها واشرت بصوابع ايدها التانيه: قصدك نونين ✌مش نونو واحد
اريج : اااااااااااااه
امينه بفرحه : توأم ؟؟
جمانه بضحكه وهزت راسها بإيجاب
ندى وعيونها مدمعات: ياااروحي غير امتي يجو بس
اريج : ماشاااء الله تبارك الله ربي ينوضك بالسلامه وتشوفيهم ع خير يااارب
جمانه : آااامين ..
امينه: حولي شويه جمونتي خل نمشي نفرح بوك ..وناضت طلعت
اريج : تو تشوفي هادم حصت ماما
جمانه بضحكه: وعزوزتي تقول هادو حصتي.
ندى: كل وحده تاخد واحد
اريج : هههههههه احسن حل
جمانه : واني نحمل ونتعب ونجيب بش ياخدوهم مني لا وألف لا..
اريج وندى:😂😂
***
يوم الجمعه بعد الصلاة سليمان وجمانه وفتحيه مشوا للبلاد
بعد الغدي قعمز عمران مع ولاد كان يبيهم في كلمه ..
رمزي: سامحيني ياسيدي هذا ظلم
عمران ضيق عيونه: ظلم !!
رمزي: ايه ..انت مسلمه اللي غادي وحتى اللي هني هلبه هكي
عمران : اللي سلمتهوله هني كنت مسلمهولك قولي شن درت ترا..؟تي ماهو قريب ضيعتنا كلنا..وهو اللي طلعنا من الوحلة اللي وحلتنا فيها...
رمزي ضحك بتهكم:تي انت هكي ولاهكي تبي تريسه علينا تي الباهيه ديما ليه واحني تلحقنا العافنه بس
سليمان: رمزي اتقي الله انتم الخير اللي فيه إلى الآن ماعنديش ربعه ولازم تفرق هو سلمني بعض الرزق ماكتباش بإسمي اما انتم بروا شوفوا شن عندكم وشن تملكوا وشوفوا اني شن عندي وشن نملك ..عمري مافكرت اناقش ولانعترض ولانقول علاش هما عندهم واني لا..
عمران :انت ماكنتش قد المسؤوليه وعملتك لازم تتحمل نتيجتها..
.....
لمة مرت خوي بديرها كبيره ياعمتي
فتحيه : عزمتني بكنايني ولابروحي
سكينه : انتي والكناين ياعمتي وشبحت لجمانه وابتسمت ..بالذات العروسه يبوا يتعرفوا عليها..جمانه ردت نفس الإبتسامه ..
امباركه"سحيقه ليك وليها"
فتحيه: خلاص انتوا امشوا
....
رمزي حمق ع الآخر: تي ياودي ياسر خلاص فهمنا ره..مبروك عليك ياشيخ ياصالح ..عاد انت اللي تبيه حاضر ومجاب
عمران: شن تقطف
رمزي : مانقطفش كلام الحق
سليمان: الله المستعان
ضو"إن شاء الله تولع "
رضوان: استهدى بالله يارمزي ماتقولش كلام تندم عليه بعدين
رمزي: اني كان بنندم بنندم ع سكوتي ع هالحاله ..شوف بعينك كيف قاعد يسحب في البساط من تحت رجلينا
عمران: امشي اقلب وجهك
رمزي: هو هذا اللي جاي حنلقوا رواحنا برا وايدينا ع روسنا وولدكم الباهي تحت ايده كل شي..اللي ماعمره قال نبي حاجه وقلتوا لا...ضو زمان منين كان يبي البنيه اللي امها مطلقه وقفتله فيها ومابتش تاخدهاله ع خاطر امها مطلقه
وهذا خديتوهاله مطلقه مرة وحده
سليمان بركان غضب وانفجر ناضله بيضربه وقف بوه في وجه
عمران بغضب: هذا اللي مازال تضاربوا واني واقف ؟!
سليمان استغفر ربي ووخر ومسح بإيده ع وجهه
عمران شبح لرمزي: لولا مرتك بعد شوق ربي رزقها بحمل كان هذا انت وياها والشارع ودوروا وين تمشوا ..وشبحلهم كلهم ..واحد منكم مازال نسمعه يقطف قطاف زي هذا وحق من خلق الحق ماضال إلا متبري منه وحارمه من كل شي ..وتوا انتلف من قدامي ....طلع رمزي ولحقه ضو بش يزيد يغلظ قلبه ..طبعا اللي يصير في صالح ضو كله حاط رمزي في وجه المدفع وهو يتفرج من بعيد..عارف انه بوه حيتأثر باللي صار ويعيد تفكيره من جديد ..سليمان خدي بعضه وطلع برا السانيه كلها ع رجليه كان يبي يهدا شويه..
...
جمانه : غدوة هي إن شاء الله
سكينه : ايه
جمانه ناضت : به تو انوض نشوف سليمان ونقولك ..
جمانه خدت تليفونها وطلعت من حداهم واتصلت بيه
...
هو قاعد يغلي من الغضب وماهداش رن تليفونه رد
سليمان بعصبيه : شن تبي انتي التانيه ترا حلي ...وسكر في وجهها ...
جمانه من الصدمه شافت الرقم ومش مصدقه انه هو عاودت قرت الرقم اكثر من مرة جسمها فشل ودموعها عبوا عيونها ..وايديها يرجفوا ..جتها عزوزتها
فتحيه: هاه شن قالك ..
جمانه تمالكت نفسها وتصنعت الإبتسامه: لا ماردش
فتحيه: ايه العصر قريب تلقيه في الجامع توا ..
جمانه هزت راسها بإيجاب وابتسامتها المزيفه مافارقتش وجهها ..
بعد الصلاة طلع من الجامع وهو كااااره روحه ع الآخر كل مايذكر كيف رد عليها يتمني لو فقد النطق وقتها ولاقال اللي قاله بس هو هكي انسان برغم هدوئه الغالب وسماحته في التعامل لكن لما يسيطر عليه الغضب يولي واحد التاني ...
الغضب احيانا يعمي الإنسان يخليه يقول كلام او يرتكب افعال يندم عليهالما يرجع لعقله ..لذلك الرسول قال لأحد الصحابه لما قاله اوصني .."لاتغضب".
...
واقفه ع الحوض تغسل في الفناجيل اللي بتصب فيهم القهوة اللي دارتها بدموعها ؛موجوعه منه هلبه ..ماتعودتش منه إلا بالدلال والكلام الحلو أول مرة يجرحها هكي وهي حساسه بعض الشي والحامل زاد هالحساسيه ..ودموعها ينزلوا بصمت شديد..مسحتهم لما سمعت صوت سكينه خاشه تسأل فيها: هاه كلمتيه
جمانه بدون ماتشبحلها: ايه ماردش شكله مشغول...ترا بالله سكينه مديلي سطل الحلويات سكينه مدتهوله وهي اتستف فيهم وايدها يرجفوا..
سكينه: خيرك ترعشي قعمزي قعمزي تو اني نكمل
جمانه: لالا مافي شي عادي ..كملت وعطتها السفرة..معليشي سكينه ممكن ترفعيها انتي ..
سكينه ابتسمت : اكيد هي تعالي المرا تسأل عليك ..ابتسمت جمانه بالسيف ومشت معاها..
هو خش من الباب وأمه كانت واقفه برا تشوف للنخل..جاها
سليمان بضحكه: شنو تشوفي في بنياتك
فتحيه : ههههههه ايه ..
سليمان شبحلها : احمم ..امي شن حالها جمانه
فتحيه : كويسه الحمد لله ..ايه حق اتصلت بيك بكري بتقولك ع لمة معزومين عليهاوهي معانا تبي تاخد اذنك قبل قالتلي اتصلت وماردش
سليمان وقلبه ينعصر عصر: ماعنديش مشكله تمشي ...سكت شويه ..ترا امي قوليهالي تطلعلي من جهة الكوجينه
فتحيه : في مراه جايتنا بتهدرز عليها مانقدرش نطلعها توا
سليمان : من هي ؟
فتحيه : مرت ولد عم بوك تبي تشوفها
سليمان بضحكه: ياوالله حاله وخلاص ..
فتحيه : هههههه مراه كبيره والواحد بيساير ..ماه الناس اللي شافوها نهار العزومه قعدوا يحكوا ع زينها هلبه وهي خاطرها تشوفها
سليمان بضيق : ايه ويضربوهالي بالعين و يرزوني فيها
فتحيه: ههههههه بعيد السو هذا غير شيخ وعارف إن الحافظ الله...
سليمان تنهد : اكيد ..لكن العين الحق تدخل الرجل القبر والجمل القدر زي ماقال الرسول عليه الصلاة والسلام
فتحيه : اللهم صل وسلم وبارك عليه..ربي الحافظ ومرتك ديما تقرا في اذكارها ومراة تصلي وتقرا كلام الله ماتخافش عليها..
سليمان : إن شاء الله ..
...
بعد المغرب جت رقيه ومعاها وداد وزينب وفرحت جمانه بجيتهم..وتحديدا زينب بعد شويه خدتها جمانه وطلعوا للجنان ..
قعمزوا ع كرسي الطويل في الجنان االلي ورا المطبخ ..
زينب بضحكه : شن في
جمانه شبحتلها بإبتسامه : نبي نكلمك في موضوع
زينب بإبتسامه إستغراب: موضوع شنو ..
جمانه: عريس ..
زينب ملامح وجهها تغيروا وسكتت..
جمانه: خيرك
زينب شبحتلها: جمانه اني مانحبش حد يتعامل معاي بشفقه ..
جمانه: شفقه شنو هادي ..
زينب: ايه شفقه اشمعنى يطلع موضوع العريس هذا بعد اخر كلام صار بيني وبينك
جمانه ضحكت: تصدقي حتى اني تسألت نفس التساؤل ..لكن ربك عمرك ماتستغربي من تدبيره سبحانه ..صدقيني الموضوع مش زي ماأنتي مفكرة ..هو واحد يعرف العيله ومن البلاد يخي وعلاقته بسليمان اكثرشي ..كلمه عليك وقال انه يبيك...
زينب بتهكم : ويعرف اني ..
جمانه: في الأول ماكانش يعرف بس بعدين عرف وقعد ثابت ع موقفه ويبيك ..
زينب : جمانه انتي تتكلمي بجديات ..؟!من هو هذا!!
جمانه: مانعرفش عنه غير ان اسمه ابوبكر وراجل كويس يمدح فيه سليمان..
زينب: يعني هو مافيشي شي بكل
جمانه: كيف يعني
زينب: مافيشي حاجه خلاته يتنازل ويطلبني للزواج..!
جمانه: معاش تتكلمي هكي يازينب طلعي الفكره السلبيه هادي من راسك ماتبديش تفكري حتى انتي بنفس طريقة التفكير المتخلفه..إذا انتي هكي تفكري في نفسك ماينلامش اي حد تاني شنو يفكر..
زينب ودموعها ينزلوا: مش مصدقه بصراحه ولامقتنعه ممكن يوم نتزوج شخص سليم..
جمانه مسحت دمعتها: اني قبل قلتلك ربك يعطي كل واحد على نيته وجزاء صبره وانتي ربي اختبرك وطلعتي من هالإختبار ناجحه جي دور الجزاء الحسن ع صبرك ويبي يهديك هديه هالنجاح ..ماتستغربيش ع ربك كرمه بكل ..
زينب تمسح في دموعها: ونعم بالله..
جمانه: خودي راحتك في التفكير ..وتو نعطيك رقمي ونستنى ردك
زينب ابتسمت : باهي
....
ليل الليل ..
جمانه : عمتي معليشي نبات معاك الليله ..."عمران يبات في المربوعه "..
فتحيه : عادي بنيتي لكن علاش
جمانه: نبي نبات معاك ونهدرزوا😊
فتحيه بضحكه: باهي المهم راجلك راضي
جمانه اضطرت تكذب مرةتانيه وبربكه: ايه
فتحيه : باه هي خشي بنتي..
في نفس الوقت خش للدار مالقهاش وحتى في الحمام مش موجوده استغرب ..مشي لأمه وطق عليها ..
فتحيه : زعما منو..
جمانه حست انه هو ...
ناضت فتحيه وفتحت الباب وطلعت : خيرك سلومه
سليمان : احمم امي جمانه عندك
فتحيه : ايه مش قاليتلك بتبات حداي
سليمان ابتسم : ايه ...قالتلي ...غير جيت بنطمن عليها
فتحيه : كويسه ماتخافش كيف بياخدها النوم.
سليمان : باه ..قوليلها قالك تصبحي ع خير ..
فتحيه : هههههههه هي بس
سليمان باس راس امه : تصبحي ع خير ياوجه الخير
فتحيه: وانت من اهله ياغالي ..مشي وهي خشت سكرت الباب ..
جمانه : منو
فتحيه: راجلك ينشد عليك وقالك تصبحي ع خير ياحنه
جمانه ضحكت وقعدت ساكته ...
فاتت الليله ع جمانه وهي تهدرز ع عزوزتها كانت تسأل فيها ع سليمان وطبعه تبي تزيد تعرفه اكثر وأكثر..وامه كانت تحكيلها عليه بالتفصيل..لكن هو كان مش قادر يرقد مستاحشها هلبه من لما جو معاش راها بكل وزايده انه زعلها منه ..طول ليله وهو يفكر وقلبه مش مخليه يرقد..
تاني يوم......
مكالمه هاتفيه 📱
سكينه : حتجي يعني ..
: ايه حرصت عليها...
سكينه : كويس بكل ..نبيك اديري اللي قلتلك عليه اهم شي مانكونش في الصورة
: كوني هانيه
سكينه ابتسمت بخبث...
...
قبل المغرب
جمانه كانت توتي في روحها للمه كانت لابسه قفطان أزرق ملكي كم ضيق من فوق لعند الخصر بعده واسع وقايمه جزء من شعرها وطالقه باقيه بعد كملت مكياجها ولبست ذهبها وصلت في الخرصه بتسكرها هو خش...
قلبها يخبط خبط مستاحشاته موووت وفي نفس الوقت قاعده زعلانه ..تجاهلاته ..اما هو بعد سكر الباب قعد متكي بجنيه ع الحيط ومربع ايديه ويتأمل فيها...هي تعقدت من عيونه اللي محاصرتها سكرت خرصتها بالسيف..هو ماباش ينطق بحرف ..اماهي مشت خدت كندرتها في ايدها وملايتها وجت بتطلع شدها من ايدها....
سليمان بنبرة هاديه وحنونه: نسيتي هادي ..شبحت لأيده لقت الشنطه ..اللي من ربكه نستها مدت ايدها وخدتها منه ..طلقها وطلعت وقلبها في 1000💓
اما هو فضحك "آااه ياحوريتي حتى صوتك حارمتيني نسمعه ...لكن تو نعرف كيف نرضيك"..
...
في اللمه ..اللي كانت مزحومه بعض الشي..اصوات الهدرزة ماوقفتش بكل واغلبها قرمه في خلق الله ..جمانه كانت مقعمزة وماتهدرز مع حد ..وسكينه تحوس مع خواتهاو كنتهم ع الضيافه..وعمتك امباركه مقعمزه ونافشه ريشها معروف عليها الكبر ...ولطيفه في جرتها كالعاده ..شويه وجت سكينه قعمزت مع جمانه ...وبدت تهدرز وتعرف فيها ع الناس ..وكانت متجاهله تماما نظرات امباركه ليهم ..
ع خشة وحده ..كانت حلوة هلبه مدندشه بالذهب ولابسه قفطان رغم بساطة المناسبه إلا انه فخم ..الكل يشبحولها جتها مرت خو سكينه وسلمت عليها وقعمزتها ..واغلب الحضور عليهم إشارات استفهام هادي مني ..وامباركه تشبحلها من فوق لالوطا ..مشت مرت خو سكينه وقفت عليها وتهدرز هي وياها وحده من الحضور من عيلة مرت خو سكينه ضربها الفضول ..."الحديث كان مسموع للكل"
:عفاف عرفينا عليها اول مرة نشوفوها ...
عفاف: هههههههههه ..هادي ازدهار كانت تقرا معاي زمان ..
:نعرفهم صاحباتك اول مرة نشوفها ..
عفاف: ايه لينا مدة ع بعض مالياش هلبه متواصله معاها من جديد
وحده تانيه من الحضور: تسكني هني انتي
ازدهار بنبرة دلع: ايه اني اصلا من (*****)لكن تزوجت هني
: كنة عيت منو
ازدهار : عيلة عمران عبد المقصود ..
الكل انصدموا وقعدوا يشبحولها وامباركه ولطيفه عيونهم طلعت من الصدمه...
: كيف لمنو من ولادهم كلهم متزوجين وهادو كناينهم حاضرات..
ازدهار ابتسمت بغرور: اني مرت ضو عبد المقصود....
يتبع .....
#GomanFared
