الحلقة(13)
(السلام عليكم)
(مافيش مشكله ،ولو فعلا كنت من الناس اللي تنشر في زلات أي حد بش تجمع لايكات كنت شفت المحادثه في كل مكان ع الفيس ، ع كل حال مش حنرجع نتابع صفحتكم لأنها زيها زي غيرها)
سليمان أبتسم وكتب: (هلبه زيك لما مايلقوش اللي يتناسب مع توجهاتهم في شخص ما أومامؤسسه ما أو أي كيان يلصقوا فيه كل شيء سيء كبير أو صغير)
جمانه : هذا خيره هكي يفكر ...
كتبت(اني من متابعات الصفحه من أول مافتحتوها في في أخر 2011 منشوراتكم إلى حد ما كانت نافعه إلى أن خشت في معمعة الصراعات السياسيه أصبحتوا تستخدموا في الدين لخدمه هالصراعات ،والدين من الأساس مفروض يبتعد عن قذارات السياسه"
سليمان فهم كيف تفكر كويس :(هدف صفحتنا توعية الناس وتوجيههم للحق بعيد عن الصراعات اللي تحكي عليها نبوا نعرفوهم مسؤولياتهم إتجاه بلادهم لأن حني شعب نفتقروا للحاجه هادي نفتقرا للإراده اللي تخلينا نكونوا اصحاب كلمه مش مسيرين فيها وهادي ماليهاش علاقه بالسياسيه بل وطنية وأنتماء وحب للأرض اللي ولدنا فيها )
جمانه : (انت من الناس اللي أيدت الخروج ع ولي الأمر في 2011 والخروج عن ولي الأمر محرم شرعا)
سليمان أبتسم: في 2011 كنت مجرد داعي للخير ولم أكن مؤيد لهالطرف أوذاك بس كل اللي اتبعته هو هالأيه◇ولاتركنوا للذين ظلموا فتمسكم النار◇ وإلى الآن ماأتبعتش غيرها ولأخر نفس
جمانه وقفت ع الكتابه وقعدت تفكر في كلامه
سليمان : (حني المسلمين حكمنا يوم من الأيام العالم نهينا أكبر الإمبراطوريات مش من كثرة عدة أوعدد لكن بإيماننا بإتباعنا للحق بإقامتنا للعدل، الإسلام مش دين هو منهاج حياة كامل متكامل عمرك ماتفصليه ع شي في هالدنيا سياسيه إقتصاد حرب سلم، ولو أستدلينا بيه ع اللي يصير توا فهذا مايعنيش إننا نستغلوا فيه )
جمانه : (انتم تبع منو )
سليمان ضحك ورد ( الحق الحق وبس )
جمانه : (نتمنى تكونوا هكي فعلا وماتكونوش من اللي يدس السم في العسل)
سليمان أبتسم: (عندك حق وماحد ينلام لو شك في اي حد يطلع بشعارات الوطنيه لأن هلبه منهم عكس ذلك تماما خدعوا هلبه ناس بكلامهم اللي كان حق لكن هما أرادو بيه باطل)
جمانه: (فعلا هذا اللي صاير)
بعدين انتبهت ع روحها ،ماشاء الله عليا أنسجمت معاه وفتحت ميعاد ،،أستغفر الله خل نسكر ونرقد وفعلا سكرت ولفراشها طول
اما سليمان راجاها ترد ولما لقاها غير نشط زبط إنها سكرت
لكن رجع يقرا في المحادثه : شورني خديت وعطيت معاها هلبه ونسيت إنها بنت مرة وحده ،،،طلع من المحادثه وكمل دورته ع صفحته ونزل إعلان ع حفل الختمه اللي حيديروه يوم الإربعاء وصكر ورقد
*******
الثلاث
الساعه 11:30
نجيب غاطس في الخدمه يشغل في نفسه عن التفكير في أي شي غير الخدمه
نجيب: تمام هكي المهم يتم كل شي في موعده
أحمد: إن شاء الله هيا أني ماشي للموقع السلام عليكم
نجيب ونزار :وعليكم السلام
نزار: نحس فيك مش ع بعضك
نجيب إبتسم مجامله: ضغط خدمه لاغير
نزار: تمام ماتبي شي
نجيب : سلامتك
نزار بيطلع بس اذكر حاجه وولا
نزار : قول من لقيت في كليه الهندسه لمامشيت يوم الأحد
نجيب ولاهي في اللاب توب: مني
نزار: عز العرب
نجيب قام راسه بإنتباه : عز العرب هذاكا؟
نزار ضحك : ايه هذاكا
نجيب رجع وشاف للاب توب: شنو رجعه للبلاد
نزار: جاي بيستقر هني خلاص
نجيب: وأهله بيقعدوا غادي ولابيروحوا معاه
نزار : لالاهو بس قالي إن ساكن بروحه في طرابلس
نجيب: قالك هدرزتوا معناها
نزار: كلمتين ع الماشي لكن شكله حيتعين عضو هيئه تدريس في الكليه
نجيب: ربي يوفقه
نزار : هي مالا خل نمشي
ناض نزار وطلع ونجيب سيب اللاب توب ورجع بذكرياته للورا لزميله عز العرب اللي كان من المتفوقين في الكليه كان من دفعته وكان ديما الأول ونجيب التاني ونجيب كان متحسس منه وفي الحقيقه عزالعرب كان مغرور بنفسه هلبه
وهذا اللي خلا نجيب يزيد ينفر منه
طق طق طق
نجيب وهو شبه سرحان : تفضل
لارا: فيني فوووت 😄
نجيب تغير جوه 180درجه وبدون مايحس ناض من كرسيه ومشي سلم ع لارا وهو يشوف لعيونها وإيده تصافح في إيدها: الحمد لله ع سلامتك ❤
لارا اللي متفاجئه ومش مصدقه اللي صار : الله يس..لمك😍
نجيب ١ دخلها وقعمزت وهو قعمز ع الكرسي اللي مقابلها : ماقلتيش بتروحي بسرعه هكي
لارا أبتسمت : أنا اساسا ماقولت لاعن مدة سفري ولاإمتي رح ارجع💓
نجيب ابتسم: صح
قعدوا يشبحوا لبعض هلبه وسرحوا في عيون بعض
لارا: أشتقتلك ❤
نجيب بدون مايحس: أني أكثر 💓
لارا قلبها بيفر من مكانه 💕💕💕
شافت لأيده اليمين لقت الدبله مهناش استغربت لأنها ملاحظه إنه ولامرة حولها قبل
أنتبهلها نجيب وأبتسم : حاليا اني حر طليق
لارا أبتسامه عريضه أرتسمت ع وجهها حطت إيدها ع قلبها: قصدك ....
نجيب صكر عيونه وفتحهم بمعنى إيه وهو مبتسم
لارا بدون مقدمات ولاحواجز ولاشعور غير شعور واحد مسيطر عليها هوالحب : بحبك ❤
نجيب ضحك: وأني قبلت نخش الأسر من جديد من كل قلبي 💝
لارا قعدت تضحك من الفرحه ونجيب يضحك لفرحتها
وهديكا اللحظه هما نسوا كل شي ومايفكروا في شي غير في بعض
ريما بعتت اللي جابوهلها نجيب كله من حاجات البيان الهدايا كل شي ،،وقعدت مسكره ع روحها دارها تبكي وبس وهي حاضنه دبلته اللي فيها ريحته وأسمه وقلبها ينعصر ألم ،،كيف حطلع شخص يجري في عروقها مجرى الدم من حياتها كيف حتنساه وهي تعشقه وقلبها ينبض بيه وليه حاسه إنها ضعيفه هلبه أضعف من إنها تتحمل وجع الفراق والأنفصال من أنسان يعنيلها الحياة بما فيها دفنت راسها تحت مخدتها وهي تبكي بالعبرة.....💔
******
سليمان : بإذن الله الخميس غادي
سلمى: والله ماني مسماحتك كان ماجيت
سليمان يضحك: متعوده بيا نعطي وعد نخلفه
سلمى : لا بس خايفه صحابك يشغلولك بحاجه جديده
سليمان ضحك: جاي والله العظيم جاي لو شنو يصير
سلمى : تمام نراجو فيك ياغالي مانعطلش عليك في أمان الله
سليمان : السلام عليكم
سليمان ولا جهة إبراهيم وعمر
سليمان : حتى الخميس هذا مش حنحضر قوموا بالواجب وسجلوا مع الدكتور وركزوا معاه
عمر : ماتخممش
سليمان : ايه كيف صار وقررت تتزوج
عمر: الزنين ياراجل ونقان خواتي تزوج تزوج قلنا باه بش نفتك من نفخ الراس
سليمان: قصدك أنت ماتبيش؟
عمر : مش مانبيش بس مازال الحق
أبراهيم: ياريتني في مكانك ياراجل المشكله عكسك كلهم شايفيني صغير ع الزواج
عمر: وأنت ياشيخ
سليمان : أني شنو؟
أبراهيم: شنو اللي شنو ؟أمتى بيهديك ربي ودير عيله
سليمان:وهو اللي مش متزوج ضال ولاكيف 😒
ابراهيم: 😂😂، به جاوب ماتتهربش من الأجابه
سليمان : مانتهربش بس مش وارد حاليا في راسي الموضوع
عمر: يعني بصراحه ياشيخ معقوله ماجاش في خاطرك نهار يكون عندك مراه وعويله وتستقر
سليمان : تصدقني لو قلتلك أبدا ولامرة
إبراهيم: شبحتي فيك شبحه أنك حتتزوج قبلي وقبل عمر
سليمان ضحك: وعلاش ؟!
ابراهيم: كل اللي يقولوا هكي يتزوجوا قبل اللي بيهبلوا ع الزواج
سليمان: كلها نصيبات وليها وقت ربي كاتبه مانستعجلش ع شي حيجيني حتما في يوم من الأيام لو ربي كاتبهولي
عمر: صدقت والله
****
نجيب ولارا في المنتزة مقعمزين يهدرزوا
لارا: لهاللحظه مو مصدقه إشي من اللي صار
نجيب يشرب في ميه حول الشيشه وقاللها: نبخك بيها بش بش تصدقي
لارا: لادخليك المكياج يازلمه إذا بترش ع وشي مي منظري من بعدا رح يخليك تسحب أعترافك 😅
نجيب قعد يشبحلها بإعجاب: أنتي حلوة في كل حالاتك
لارا: ياقلبي 😍
نجيب يضحك : خلاص نوضي الدوام تم طووول للحوش
لارا : من هلأ بلشنا تحكمات 😅
نجيب بجديه : لارا حطي في بالك أني غيور جدا ومن بيئه محافظه يعني لازم تتأقلمي ع طبعي وبيئتي لإن مستقبلا حتعيشي فيها
لارا للحظه حست بالخوف وقعدت تشبحله وساكته
نجيب: خيرك خفتي شد إيدها ، أني نبيك تفهميني وتحاولي تتأقلمي مع شخصيتي وطبيعتي وأكيد حنساعدك وحنراعي إنك من بيئه مختلفه مش حنزعلك ولانبيك تزعليني
لارا أبتسمت وهزت راسها إيجاب
نجيب : يللا نوضي وحنكلمك في الليل ونهدرزوا أكثر
لارا : حاضر ❤
نجيب أبتسم :يحضرلك الخير ❤
وناضوا روحوا
********
ماما تعالي يامااااااما
: خيرك شن في
: ريما ياماما مغمى عليها في فراشها وجهها اصفر وشوفي فمها كيف أبيض
: بسرعه اتصلي بخالك يجي بسرعه
طلعت اخت ريما بش تتصل بخالها
أم ريما: حسبي الله ونعم الوكيل فيك يانجيب
جي خال ريما ورفعوها وطلع عندها انهيار عصبي وهبوط لأنها كانت ماتاكلش كويس من فتره وام ريماوأختها حاقدين ع نجيب وحتى سارة صاحبتها لأن هو السبب
******
الساعه
4:00
روح نجيب وجوه أخر رواء وهو مبتسم
خش للحوش لقي خواته يتفرجوا ع التلفزيون
نجيب: السلام عليكم
ندى واريج: وعليكم السلام وهما يشبحوله ف شبحه غريبه
وهو مستغرب فيهم وكيف بيركب دروج شاف أكياس وبوكسات محطوطات في الممر فهم القصه
أريج: جابهم ولد خال ريما بكرري
تلفت شبح لأريج
اريج: خيرك ماقلتش أنك فسخت
نجيب كيف بيرد جت أمه
امه منفعله: شن دارتلك البنت بش سيبتها علاش درت فيها هكي علقتها معاك وبعتها بالرخيص
نجيب: كل شي نصيب
أمينه: هكي بكل بساطه بعد ضاعوا سنتين من عمرها جتها بعته فاتتها ع خاطرك عينوها معيده قعمزت في الحوش ع خاطرك ع قد مادرت فيها إهمالك اللي حتى في المناسبات والأعياد حني نرفعولها في الهديه وحني اللي نشرولها وأنت شي ولا حاسبها خالقه ماتخافش اللي درته فيها يرده ربي فيك وفي خواتك؟!!
نجيب: أمي ماتكبريش الموضوع أرجوك
أمينه: ماكبرتاش هو كبير بروحه البنت بسببك قريب ماتت هاوينها ملوحه في المستشفي
نجيب انصدم وقلبه رعش رعشه غريبه
وكملت امه : اتصلت بيا أمها تعرف شنو قالتلي ولدك عشم يتيمه وباعها برخيص وهي ياما شراته بالغالي لكن حسبي الله ونعم الوكيل فيه ،حشمتني ياولدي ونزلت من عيني ومشت وخلاته
نجيب قريب مات من اللي سمعه بالذات كلام أمه ركب يجري جت قدامه جمانه اللي كانت تشبحله وتبكي
فات من جنبها وكمل طريقه لداره وماطلعش منها
يتبع .....
#GomanFared
