الحلقة(102)
جمانه بعد روح سليمان سالم روحها رجعتلها ..لكن في نفس الوقت حز في خاطرها كيف مافكرش فيها..مافكرش يطمنها ..وهو يعرف كويس انها حتخاف عليه بالذات وهي حامل مفروض فكر فيها لهالسبب ع الأقل..فقررت انها تحسسه بغلطه ..خدت منه موقف وقلبت عليه ..وهو لاحظ وفهمها ..بعد تغدوا كانت جمانه مقعمزة في الصاله مع الأقارب اللي من الصبح كانوا عندهم...خشت جنى وجت حدا جمانه
جنى: خالتي جمانه عموك يبيك برا
جمانه بإبتسامه: قوليله مش فاضيه ..
جنى : بس هو قال بيعطيك حاجه
جمانه: قوليله بعدين تو ناخدها..
جنى ناضت وطلعت ..وطبعا ماحد ركز مع حديثهم لإن الكل لاهيين بالهدرزة الوحيدة اللي كانت عيونها عليهم زينب💔
شويه وخشت ماريه وورا ظهرها حاجه وقعمزت حدا جمانه
ماريه : خالتي جمانه
جمانه وشاده ضحكتها : نعم حبيبتي
ماريه مدتلها وردة: هاكي هادي من عمو...وقالك حاجه نقولهالك في وذنك ..وقربت ماريه لوذن جمانه وبهمس يدغدغ في وذن جمانه : قالك..ولا ..نحبك..ياحوريه ..
جمانه ضحكت من توشويش ماريه ومن حركات سليمان ..
وطبعا ماريه طلعت ..قامت عينها جمانه في زينب لقت عيونها مدمعات اغتصبت زينب ع وجهها ابتسامه لجمانه وطلعت..وجمانه قررت تلحقها
***
حتى اني استاحشتهم هلبه ..
معز بضحكه: غدوة إن شاء الله نطبوا عليهم ..نمشوا لحوش اهلي في الأول والعشيه نرفعك لأهلك
اريج قامت روحهاوخدت بوسه من خده: سلمهولي طويل طولي "لأن معز كان طويل"
معز : هههههههههههه سلملي درهوبتي اللي زادت سمنت ولت كركوبه
اريج ضرباته ع كتفه: عينك وعين عينك ..ومشت وخلاته
معز ضحك"نحبك ياأحلى بطه💖"
***
كانت واقفه في الجنان وتبكي بحرقه لين حست بأيد لمست كتفها..التفت وانصدمت لما شافتها..
جمانه بإبتسامه: أسفه لو فزعتك ..بس نبي نتكلم معاك ممكن
زينب ابتسمت : باهي ...مشوا هما الزوز وقعمزوا ع كرسي طويل محطوط في الجنان ..
جمانه: ملامحك الحلوة والبريئة هادي ليش تشيني فيهم بالدموع ..
زينب ابتسمت بألم: انتي اكثر وحده تعرف سبب دموعي
جمانه: صح ..لكن انتي زي مايبان عليك انسانه مؤمنه وقلبك طيب ونيتك واضح انها صافيه..تتوقعي وحده بصفاتك ماتكونش محبوبه عند الله ...
زينب شبحتلها وتبيها تكمل ..
جمانه : كل شي ربي مقدره ..وكلامك يومها ع النصيب لازم تاخدي بيه من قلبك ..لما يكون خاطرك في حاجه وتتمنيها من كل قلبك وربي مايقسمهاش ليك..هل تتوقعي ربك الرحيم يبي يعذبك ..او يكسر قلبك ؟..مستحيل وحشاه هو بس حرمك من حاجه حلوة لأنه مدرقلك الأحلى منها بهلبه..
زينب : وهو فيه احلى من سليمان ..وبعدين شبحت لجمانه وضحكت بخجل
جمانه بضحكه: بنفوتهالك هالمرة بس هههههههه
زينب ضحكت: سامحيني ..بس اني كبرت ع حبه مش بالساهل ننساه ..مش ساهل نشوف قدامي المراة اللي اختارها ونشبح في عيونه حبه ليها اللي تمنيت ربعه..حسدتك هلبه صدقيني ..
جمانه بإبتسامه : مش حنصدقك لأن وحده بطيبتك ماتعرفش الحسد..حطت ايدها ع ايد زينب..رد بالك تفكري اني نقولك في الكلام هذا شفقه اومجرد مواساه..مانحبش نتعامل مع الناس ع هالأساس ..بس انتي يازينب إنسانه نيتك الصافيه حتخلي ربي يعوضك بخير انتي ماحلمتيش بيه ..لاتفكري في مرض ولاغيره ..مش اول ولااخر وحده هلبه عندهم السكر ومتزوجين وعايشين احلى عيشه..المرض الحقيقي هو مرض الحقد والحسد مرض القلوب السودا اللي تكون مليانه بالكره والبغض لأي حد تشوفه سعيد وتتمنى زوال سعادته هادم صدقيني مستحيل يرتاحوا ولاربك يوفقهم..لكن اللي زيك حتشوفي بعينك كيف ربي يحبهم..صدقيني حيعوضك خير..جزاء لنيتك وقلبك الأبيض..
زينب نزلت منها دمعه وحطت ايدها التانيه ع ايد جمانه: عنده الحق يحبك ماينلامش حلوة من برا ومن داخل..
جمانه مسحت دمعة زينب: مش احلى منك ومن قلبك لو وحده تانيه غيرك كان همها الوحيد انها تجرحني وتفرقني عن الإنسان اللي كانت تبيه ...بس انتي شوفي كيف مقعمزة معاي وتسمعيلي والأبتسامه ع وجهك ..
زينب : ممكن نحضنك..
جمانه خدت زينب في حضنها وزينب حضنتها وقعدت تبكي: ربي يسعدكم يااارب..
جمانه: ويبعتلك اللي يستاهلك ويعيشك احلى حياه..
صاحب العيون الزرقا كان يراقب ويسمع في كل حرف...يعني هو ع عشقها بيزيد عشق لهالإنسانه اللي ملكاته بكل مافيه .."الخير اللي مدايره بش وهبني الله إياك شكله كان في يوم مبارك وحصلت في جرته دعوة باب العرش انفتحلها ..آااه يارب دلني ع طريقه نحمدك ونشكرك فيها ع نعمتك بس"
***
ندى تكلم في كنان فيديو..
كنان : فهمتيها عسولتي
ندى : ايه ...شرحك يهبل كنكون
كنان : انتي اللي تهبلي ياروح كنكون😍
ندى بضحكه:حني قلنا بنتكلموا ع قرايه بس
كنان: ههههههههههه به ياقلبي اني
ندى: كنااان
كنان: ياعمر كنان
ندى بضحكه: خلاص بنصكر
كنان : هههههههه خلاص خلاص...هي ترا نشوفوا الفيزياء
ندى: هي شويه ...
***
قصدك سكينه حامل
لطيفه: واضح وزبطها من اهتمام عمتي الزايد بيها
امباركه مع رفعه حاجب سرحت بأفكارها الشيطانيه..
لطيفه: وين مشيتي
امباركه شبحتلها : معاك يللا اهو ربي رزقها بعد
صبر ...
لطيفه بضحكه : ماتوقعتكش تردي هكي
امباركه: صح طايرتلي منها لكن مش لدرجه نكرهلها حاجه زي هادي ..ع اقل تحصل عيل..
لطيفه : صح ..الا في الحاجات هادي وتنهدت ربي يرحمني ويرزقني حتى اني
امباركه"افرحي ياسكينه حنخليك تفرحي شويه بس "
***
سليمان : والله ماني عارف كيف نشكرك ياابوبكر
ابوبكر وهو مصافح سليمان: تستاهل كل خير ياشيخ وهذا شويه من معروفك اللي ديما سابق
سليمان: جزاك الله خيرا ..
ابوبكر: هي ماتبي شي
سليمان : في حفظ الله السلام عليكم
ابوبكر : وعليكم السلام..وطلع..وسليمان خش وقابله رضوان
رضوان : هو اللي كلمته يومها في مشكلة رمزي
سليمان: ايه دبرلي الفلوس اللي شريت بيهم الحوازة لأن ماكانش عندي مبلغ زي هذا وقتها ..واليوم كان مش حلفتله ماكانش خداهم مني..
رضوان: الباين عليه راجل اصلي
سليمان: راجل بمعني الكلمه
....
ابوبكر طالع وبعدين اذكر تليفونه اللي نساه داخل ..ولا للباب لقاه مسكر ...طق بس الباب كان بعيد وهما للداخل ماسمعوشي ..وهو كان محتاج تليفونه ضروري ..وخر وقعد يوزع في نظره ع السور ..لمح من بعيد باب صغير شبه مردود.."زعمه هذا اللي يدخل ع المربوعه "..مشي جيهة الباب
فتحه شويه بان عليه جنان بيولي بس طاحت عينه ع حاجه خلاته واقف في مكانه بلاحركه..كانت مقعمزه تقطف في النعناع ولابسه توته شتويه لونها اخضر هادي هلبه وشعرها م الأسود الناعم مفرود ع ظهرها ..ناضت وتحركت شويه بان عليه وجهها اللي كانت ملامحه ناعمه وتشع انوثه ..
"زيييينب تعالي "
زينب: هيا جايه ..وخشت وخدت قلبه معاها
ابوبكر"اللهم صل ع النبي هذا شنو ..؟! استغفر الله اني شن قاعد ندير هني !!" سكر الباب ..وولا جهة الباب الرئيسي لقاه مفتوح خش وخدي تليفونه ع السريع بعد سلام وكلام وطلع ..وبين عيونه زينب ...💖
***
في الليل الكل روحوا واكرم وماريه وجنى قاعدين مع حناهم تبره وحناهم فتحيه وتبرة تخرفلهم في خرافة سبع بنات في قصبات ..وسليمان كان مقعمز معاهم ويضحك ع تعليقات الصغار ع الخرافه
ماريه بصدمه : كلتهم كلهم !!
تبرة: ايه قعدت بنيه وحيدة خدتها معاها
اكرم: وعلاش ماكلتهاش حتى هي
تبرة: ماه بديرها بنتها ..
جنى: كيف اديرها بنتها معناها الغوله طيبه
تبرة: وووك هذا شنو ..خلاص معاش مكملتها
فتحيه وسليمان 😂😂
اكرم بتوسل: لااخلاص ياحناي كملي هي..
تبرة: نسمع كلمه تانيه الله معاد مخرفه
ماريه وجنى حطوا ايديهم ع فمهم ..وكملت تبرة الخرافه ..
....
امباركه من فوق نفسها: ترا ياجمانه قولي لعمتي تركب الصغار بعدين ..و طلعت من بحداها ...
جمانه شبحتلها وهزت راسها يمين وايسار بأسف تقابلت هي ولطيفه مركبه صغارها اللي كانوا راقدين ودارت روحها ماشافتهاش..وجمانه طنشت ..جت سكينه
سكينه: هي تصبحي ع خير جمونه
جمانه بإبتسامه: وانتي من اهله ..
ومشت جمانه للصاله اللي أصوات الضحك طالعه منها خشت تضحك وهي مش عارفه سبب ضحكهم
جمانه: السلام عليكم..عيونه تلقائيا تعلقوا فيها وقلبه يقربع بقوه ..💓
ردوا : وعليكم السلام
جمانه : خيركم تضحكوا
فتحيه : الصغار هبلوا حناهم تبره..
جمانه: خيرهم ..
تبرة بعصبيه: بنخرفلهم خرافه مانلحق نكمل كلمتين مع بعض يسألوا سؤال ...
جمانه : هههههههههه
سليمان:💓💓💓💓💓
جنى : خالتي جمانه تحكيلنا حكايه
جمانه بإبتسامه: مانحفظش حكايات
ماريه بحماس: تلعبي معانا جماد حيوان
جمانه بحماس اكبر : نلعب يللا ..
طارت تجري ماريه وجابت كراسه ..
اكرم: تو بتفوز علينا ماريه سريعه هلبه
جمانه بتحدي طفولي : تو نشوفوا ..
تبره : هههههههه راك بتولي ام تلعبي معاهم
جمانه: ههههههه ايه مافيش احلى من لعب مع الصغار
فتحيه ضحكت : العبي ياحنه العبي بش بعدين يبدا عندك ساهل تلعبي مع صغويرتك..
جمانه : هههههههه
جت ماريه وجابت معاها كراسه و5بيروات بألوان مختلفه..
ماريه شبحت لعمها اللي كان هايم بحوريته : عمو تلعب معانا ..شبحتله جمانه شبحه فيها زعل ..
سليمان وهو يشوفلها : كان قالت خالتك جمانه باهي نلعب
تبرة: عاد انت حتى الوابيس تلعب فيها معاهم ..
كلهم :😂😂😂
ماريه: خليه يلعب معانا
جمانه شبحتله ع جنب: باهي...
قدملهم ..وقطعوا الوراق وبدوا يلعبوا..وكانوا يلعبوا بحماس شديد ..سليمان كان يراقب في حركاتها بالتفصيل اول مرة يشوف فيها هالجانب الطفولي ..لما تفوز كيف كانت تفرح ..ولما يسبقوها كيف تضايق منسجمه ع اخر وحركاتها كانت تهبل ...طبعا هو كان خاسر طول الوقت ..لإنه ماكانش يلعب كان يتامل فيها بس ..
ع خشة عمران وهو يضحك : وافق شن طبقه
جمانه تحشمت ووطت راسها وهي مبتسمه ..وسليمان يشبحلها ويضحك..
فتحيه : هههههههههه..والله تقول من عمرهم كيف يلعبوا مهاهم
عمران: ولدك الشيخ بطوبته اللي ناس وين تقابله توقف وتسلم عليه ريته يومها يلعب في الوابيس ويجري مع الصغار ..
ماريه : حتى انت لعبت معانا يومها سباق
عمران فنص فيها بضحكه ..
وكلهم ضحكوا ..
تبرة: ياريتك سكتت
كلهم : 😂😂😂😂
***
كيف ماتقوليش كيف!!
سرور : اهو قتلك بالله عليك ..
ناض من السرير واتجه للباب ناضت تجري وقفت قدامه ..
سرور بخوف: وين ماشي
عماد بعصبيه: ماشي بنحط حد لهالنماذج الخاربه
سرور: خلاص ياجل اختي تصيف معاهم
عماد بإبتسامه مصدومه: الله الله راجل اختك يعرف وصاحبي يعرف واني راجلك مانعرف شي ..!!
سروربخوف: ياعماد افهمني مقديتش نقولك وقتها لأني عايفه شن بديي..
عماد ربع ايديه بعصبيه : وعلاش تقوليلي توا ماه خليتيني راقد ع وداني
سرور: عماد اني قلتلك لإنك لازم تعييف بش تحتاط حتي انت ..ايجوك تفهمني ..
عماد دفها وطلع وسكر الباب
سرور خبطت ع رجليها : حي عليا...
فتحت الباب ونزلت وراه...لقاته مقعمز في الجنان ..جاته هو حس بيها ..
عماد : سرور خليني بروحي ارجوك .
سرور : مش حديي شي غلط ولا
عماد بقلة صبر: كان بندير شي ره ماقعمزتش هني ..تحركي خشي..
خشت سرور وهي خايفة وتفكر شن ممكن يدير عماد لخوتها ..
***
خش الدار لقاها راقده وعاطيه بالظهر..ابتسم ..بدل حوايجه ولبس فانيليه كم زرقاء مكتوب عليها بالأبيض وسروال ابيض وتمدد جنبها وتغطا وحط ايده تحت راسه ويشبح للسقف وبعدها شبح بعيونه ع جنب..متأكد انها قاعده نايضه وابتسم..
سليمان: مش حترتاحي ع المخده انتي وسادتك صدري ماتعرفيش ترقدي غير عليه
هي ابتسمت وعيونها مغمضات ومابتش ترد
سليمان: يعني لأمتى هالعقاب ..حتى عويناتك حارمتيني نشوفلهم..
جمانه تسمع ولارد..
سليمان شبح للسقف بعدين شبحلها ع جنب وابتسم بمكر: تو الحور العين اللي يستنوا فيا في الجنه يشبحوا فيك كيف تعذبي فيا ونازلين فيك...
جمانه برغم نار غيرتها اللي ولعت لكن ضحكت بكتمان
سليمان : يقولوا هالمراة القاسيه اللي تعذب في راجلنا ..غير يوصل فينا تو نعوضوه و نسوه فيها ..
جمانه نار الغيره سخنتها نزلت الغطا عليها شويه وهو ضحك ..
سليمان بضحكه: غرتي اها ..نشبح في الدخان اللي طالع من راسك
جمانه قعدت تضحك ع الصامت وهو يشوف في جسمها كيف يهز وضحك ..ولف بحسمه جيهتها : باه مانبيكش تقربيلي غير ماتعطنيش بظهرك بس
جمانه مابتش تعدل عليه ..
سليمان بنبرة حزن مصطنعه: طلعتي قاسيه ياحوريتي ..
جمانه: اني مش حوريتك هونا عندك حور عين يستنوا فيك ..
سليمان ضحك وبتنهيده مصطنعه: ياااريتني نمشيلهم ..راني عايش الدلال كله توا...
جمانه بخوف : بعيد السو ..
سليمان ابتسم : عارفك تموتي فيا وماتقدريش تعيشي من غيري ..
جمانه "نموت من غيرك ربي يجعل يومي قبل يومك"
سليمان بجديه : احساسي بالمسؤوليه اتجاه اسم بوي وخوفي ع خوي نسوني نفسي..والله حتى هاتفي نسيته في سيارتي ومشيت مع الراجل وفي بالي بس كيف نطلع عيلتي من هالمشكله ...
جمانه: مافكرتش فيا وفي حالتي لما خوتك يروحوا وانت مش معاهم وماحد يعرف عليك شي ..طمنتنا حتى برساله ..قريب متت من خوفي ياسيدي فكرت في امك اللي شويه تانيه وإنجلطت بعيد السو عليها..فكرت في عيلك اللي ف بطني لو خسرته من الرعشه ..سليمان انت توا عندك زوجه تعرف شن معناها زوجه معناها شريكتك نصك التاني معناهاهي انت وانت هي..فرحها فرحك زعلها زعلك تنغزك شوكه تحس هيا في وسط قلبها ...
سليمان : اسف ياروحي ماكنتش نعرف ان عذبتك لهالحد
جمانه دمعوها ينزلوا بصمت وقعدت ساكته ..قرب وحضنها وهي عاطيه بظهرها..
سليمان باس راسها : حقك عليا ياروح قلبي
جمانه مابتش تبعده وفي نفس الوقت قعدت تابته ومابتش تبادله اي شي ...
سليمان : مافيش امل ترضي الليله بكل
جمانه: لازم تحس بغلطك لذلك مش حنرضا بسهوله
ضحك وزاد ضمها : المهم تبرد نار قلبي وانتي في حضني وحنصبر لين ترضي عليا ...وبدي يقرا في القرآن اللي عودها ترقد وهي في حضنه وتسمع فيه ..وفعلا هي حست بالراحه التامه ورقدت وهو شويه وخداه النوم ورقد...
***
تاني يوم الساعه 9:00الصبح
يوم الجمعه
باب يقربع بالقوة
ساسيه: صبح ياربي هذا شنو
طلع المنتصر وفتح لقاه عماد..لاسلام ولاكلام بوكس ع وجهه طيحه
عماد: رجلك مانبيهاش تعب محلات خوي نلقاك.غادي نطربقك ..وطلع طول ...
.....
سرور : علاش ياعماد علاش ديت هكي
عماد بغضب : يستاهل الفاسد واحد زيه يمشيها عليا ..
سرور: قلتلك خلاص هو بيوحه كان حيسيب الخدمه
عماد: أخخ بس لو طربقته قلبي عليه مغلول لابعد حد
سرور: عماد شن تقول
عماد شبحلها: انتي خيرك مش راضيه فيه هكي وخايفه عليه
سرور: عماد ياك تنسى هذا خوي
عماد والغضب عامي بصيرته وبتهكم: خوك ..!اللي يسمعك يقول خوك حق..اللي في اقرب فرصه واتته لوحك في الشارع
سرور من صدمتها حست ان كلام عماد كف ونزل ع وجهها بكل قوة ...اللي خافت منه صار..وجي النهار اللي عايرها فيه عماد بخوتها.....
يتبع .....
#GomanFared
