الحلقة(72)
تاني يوم البنات مشغولين بحفلة عيد ميلاد أريج وعزموا صاحباتها أيام المدرسه وزميلاتها في الجامعه وبيجيبوا حتى منشطه وجو مليح وطبعا بيديروه في مكان مصكر في المصيف ونجيب محرص هلبه ع الموضوع وجاب ناس موثوقه بش تشوف الخاش واللي طالع ،،طبعا أريج ماتندريش عليها منين زارقه قاعدة عايشه في حزنها وأوجاعها ...
***
بتوقف معاي مادخليش بيك
سليمان: وأني قلت مانيش واقف معاك؟!
عماد: والله ماحيرتاح قلبي لين نقرا فاتحتها وغير يفوتوا اربعه شهور ندير العرس
سليمان: وهي فهالفترة حتقعد مع بوك
عماد : ايه وأني حنجيهم كل يوم وفي الليل نبات في الشقه
سليمان: إن شاء الله خير
عماد: إن شاء الله توافق بالطيب وماتضطرنيش ندير كل شي غصب عنها..
سليمان بضحكه: إن شاء الله
عماد: اضحك مه ماجربتش تحب ولاتعرف شنو معناه
سليمان ملامح وجهه تغيروا وقدم للبحر تنهد وحول فانيلته وخش عام
عماد"والله عارفك مانك خالي ياصاحبي"
***
فات الوقت وجت الساعه 5:30
ريما كانت ماشيه هي ورنا وسارة مع كنان اللي كان مداير زي الحفله وكل يوم يجتمعوا حواليه ناس تحب صوته واتابع فيه ع الإنستا طبعا هو يغني ويعزف ع القيتار والبيانو وهو وعدنان طلبة طب ويقروا في أوكرانيا وكنان خاش في فرقة الكليه الموسيقيه كنان حساس لكن عصبي شوي وكتوم نوعا ما حليوه وطويل وعريض شوي عدنان مازال أحلى طويل وعريض ورزين هلبه وبارد شوي وجدي ...
المهم كانوا مجتمعين في مكان قريب على المكان اللي بيديروا فيه عيد ميلاد أريج
طلعت ندى برا وكانت تشوف فيهم وتسمع في صوت عزف قيتار وصوت حلو يغني بالإنجليزي قربت أكثر كانوا في مجموعه مقعمزين ع الشط وكنان قدامهم ع رشاده كبيرة يعزف ويغني لما شافته اذكرت قاسم 💔وكيف كان يعزف حلو ع القيتار نزلت دمعتها ومسحتها طول وقربت أكثر بس كان في مسافه ..
كنان وهو يغني كمل الأغنيه كلهم صفقوا وطلبوا منه يزيد
كنان: تمام ..حاضر....تو عربي
كلهم عيطوا وصفروا
كنان بدي يعزف ويغني وكان يموت في عمر دياب وكله من سارة كبراته ع حبه 🤣😂
المهم يغني ويشبح للحضور اللي كانوا متحمسين معاه وكان مداير ريمكس بين أغاني عمر دياب وهما يصفقوا معاه ومتحمسين وندى تحمست حتى هي تصفق وتغني ..وهو زاد حماسه مع الحضور ويوزع في نظراته عليهم وقام راسه شوي شاف ندى استاكه سكت ويشبحلها وتلخبط وقعد يعزف بس وكلهم استغربوا ،،ادارك نفسه وعزف أغنيه بدت خاصه بالنسبه ليه وبدي يغني
كنان: قمرين قمرين دول ولا عينيك ..قلبي بيسألني عليك
...اتريني بفكر فيك ..
والله مكان على بالي ياهوا ..والله ماكان ع بالي ياهوا
ويشبح لندى ويغني وعيونه يلمعوا ركزت معاه ريما وحست انه يشبح لجيهه معينه لكن طبعا مش قبل ساره لي كان تقيم في روحها بش تشوف وين يشبح
سارة بضحكه: سحر عيلة الشريف بيطلق ع حوشكم كله
ريما اضايقت وتنهدت
سارة: ماتبيش تقوليلي خيرك من الصبح مش عاجبتيني
ريما: مافي شي خلينا مركزين مع كنان ..
***
ياخد في شهيق وزفير وهي كانت واقفه جنبه وتضحك عليه
اريج: اطق أنت ولانطق أني
نجيب: اسكتي
اريج:😒
طق نجيب الباب شويه وفتحله عدنان اللي تغير وجهه أول ماشافه
عدنان: تفضل اي خدمه
نجيب:هكي تستقبل في ضيوفكم
عدنان بحده: ايه اللي زيك بالذات
اريج طارتلها: لوسمحت نبوا نشوفوا أبله أمال
عدنان: علاش
نجيب : شي بيني وبينها
"منو اللي يطق ياعدنان" جت وشافت نجيب وأخته ع البااب
أمال: شن في
نجيب: نعرفك مراة مضيافه وتحبي تتعاملي بالأصول مع الجميع
أمال شبحتله بكبر: تفضلوا
وسع عدنان اللي كان يشبح لنجيب بغل ونجيب تجاهله
وخش هو وأريج
***
كنان: وتوا بناخد استراحه عشرة دقايق ..خدي قيتاره وناض وعيون ريما وسارة ومعاهم رنا هالمرة لاحقينه
ندي كيف جت بتمشي
كنان: ندى
ندى التفت وابتسمت: اهلا
كنان مد ايده بيسلم: اهلين بيك وصافحته هو حس بقلبه رعش لما لمست ايدها ايده حولت ندى ايدها
كنان بإبتسامه مرتبكه: خيرك ماجيتيش قعمزتي غادي ،،وتلفت وأشر للناس الحاضرة
ندى: بصدفه شفتكم.. واشرت بإيدها..هني المكان اللي بنديروا فيه عيد ميلاد أختي ومن الصبح وأني نجهز في المكان طلعت خديت رست وبنولي
كنان ابتسم : وشن رايك
ندى بعفويه: تهبببل صوتك وعزفك وإحساسك رووعه
كنان قلبه يدق بقوة💓: شكرا 💘
ندى : توا بنمشي سلام ومشت تجري ..
كنان"ياربي خيرني هكي يصير فيا قدامها❤"
***
عدنان: ههههههههه والله جو انت
نجيب معصب لكن يحاول يسيطر ع روحه:نتكلم بجديات
عدنان: ماهو هي هني النكته انك تتكلم بجديات،،ريما في أحلامك نخلوها توليلك
أريج: لوسمحت خلي الكلام بينه وبين أبله أمال
عدنان: اني خوها ..
أمال: عدنان شويه ياأمي ،،انت توا جاي تبيني تقنعني نوافق بش ترجعلك بنتي وتتزوجها ،،باهي أني ماعنديش ولاذرة ثقه فيك بش نأمنك عليها كيف حتقنعني
نجيب : معاك حق والله مانلومك أني غلطتت في حقها هلبه ومهما تقولي عندك الحق
أمال: اسمعني كويس ، ريما مش بس بنتي ريما اختي وصاحبتي وأحيانا تولي حتى أمي،المعروف إن اي حد اضيق بيه مايلقاش زي حضن امه يرتمي فيه ويخفف عنه،لكن في حالتي العكس اني اللي كنت نرمي روحي في حضنها لما اضيق بيا مات بوها وعمرها16سنه
كانتلي الولد والبنت كانت في ظهري قوتني وربت خوتها معاي وقفت لعمامها اللي ياما دارو فينا وخدت حقها وحق خوتها عانتني في مرضي كنت نشبحلها هي من بعد ربي كبرت خوتها معاي وخلتهم أحسن ناس..لين خشيت انت في حياتها تغيرت هلبه عرفت إن بنتي القويه قلبها الأبيض بدي يحب فرحتلها لإنها حتعيش لنفسها ولإني جربت الحب قبلها وذقت حلاوته نبيها تعيشه و خطبتها نشبح في نظراتها ليك اللي كانت مليانه حب وكيف عيونها يلمعوا غير تجي سيرتك،،غرت منك هلبه وفي نفس الوقت حبيت حبها ليك وقلت حيعوضها عن كل شي انحرمت منه عن حنان الأب وحبه،،لكن بديت نلاحظ عليها إنها بدت تذبل وتغيرت ديما مهمومه ديما سرحانه عيونها اللي كان واضح عليهم البكي اللي كان خفيه عليا وعلي كل الناس اللي قريبه منها،،قداش صار ..عمرك ماحسبتها في شي حتى المواسم والاعياد كانوا يجوا أمك وخواتك ويعطوها الموسم ويقوللها هذا من نجيب،وأني متأكده إنك مافكرتش فيها حتى مجرد التفكير عيون بنتي الحلوة القويه سيطرت عليهم نظرة الحزن والكسرة بسببك عمرها ماتمناتك تكون معاها في مكان ولقاتك ديما كاسر بخاطرها وقعدت تبكي
اريج تبكي معاها وعدنان دموعه في عيونه وشاد ع قبضه ايده بقوه أما نجيب فكان كاااااره نفسه ع الآااااخر ودموعه حابسهم في عيونه
امال تماسكت ومسحت دموعها: بالك تحسابها كانت تشكي منك والله ولامرة دارتها ديما تلمع في صورتك قدامنا ومرات تكذب حتى الكذب ع خاطرك؛ كنت عارفه اللي تمر بيه بنتي ومابتش ندخل لإني كنت عارفه إن فكرة بعدها عنك حتعذبها اضعاف ...بنتي بسببك بسبب الكتمان قلبها بدي ضعيف لمحلها خالها مرة إنها تسيبك قريب ماتت ماتحملتش حتى تسمعها،،جي اليوم اللي سيبتها فيه قريب راحت مني لولا لطف ربي بيها وبيا وسمعت باللي صارلها حتى تليفون ماقمته وسألت عليها،،فرحت لما ناضت منها ولأن بنتي قويه تخطت ألمك ولو شوي ووقفت ع رجليها رغم إني عارفه إنها مانساتكش للحظه ،،واللي دراته معاك أخر مرة اكبر دليل
طاوعتها ومشتيلها اللي دارته لأني فاهمه عليها وعارفه شنو تحس جيهتك ،لكن مستحيل نطاوعها توليلك مستحيل نسلم بنتي لراجل شراته بأغلى ماعندها وباعها بالرخيص ..
عدنان: سمعت اللي عند أمي وتوا تقدر تتفضل
نجيب قام راسه وشبح لعدنان بحده بعدين شبح لأمال: اني ربي يحبني هلبه اللي حط بنتك في حياتي ،،ضيعتها بغبائي وماحسيتش بقيمتها ألا بعد مافقدتها ،،حسيت بحبها ..والله نحبها من كل قلبي غفلت عن قلبي ومشاعري وفي لحظه غباء ريحتها من ايدي،،بنتك أغلى مانتمنى ومستعد نخسر كل شي بش نكسبها مرة تانيه ،،بنتك توا ولت حياتي كلها ومش حنكمل حياتي من غيرها لو نقعد طول عمري بروحي غير ريما مش حتكون في حياتي مراة
امال: خلاص فات الوفت
نجيب بإصرار: مافات شي الوقت لينا ليا أني وياها بنتك حنحطها في قلبي وعيوني نفرط في روحي ولانفرط فيها من جديد ،مش أنتي قلتي إنك حبيتي قبل تعرفي شعور لما الواحد يكون عايش في مكان ويحس إن روحه في مكان تاني عايش ومش عايش ..اني معاش نقدر نكمل حياتي من غيرها ووالله لو فكرتوا تعطوها لغيري نقتله بدون مانفكر
امال تشبح لعيونه طول ماهو يتكلم مش نفسه نجيب الأول بكل الحب واضح فيهم ودمعه ع طرف العين حتنزل وهو شادها ...
أريج وجعها خوها وتبي تساعده: تعرفي إن ريما كانت حتغرق ونجيب خش طلعها من الميه برغم إنه معاش يقدر يعوم زي قبل مشالها يجري بدون تفكير ووالله هذاكا اليوم جرحه انفتح وخوي رجع خيطهوله وماكانش حاس بشي طول الوقت وهو يقول طمنوني ع ريما ...
امال وعدنان مصدومين ماحد جابلهم سيرة عن قصة غرق ريما واللي زاد صدمت أمال هو اللي داره نجيب ع خاطرها اللي حتى لما كانت تمرض وترقد في المستشفى يتصل اتصال بس ومرة وحده ولااتنين...
نجيب: اني مش حنطلع من هني لين نسمع ردك ياتقولي ايه ياتقولي ايه معندكش غير هكي.. وأمال شبحتله هلبه بعدين قالت : نسال ريما ونشوف شن يصير
تنفس نجيب بقوة واريج فرحت وحست أن في أمل وعدنان قعد ساكت ومش عاجبه
***
جي وقت العيد ميلاد ...
وين رافعتني يادراه الكبد
ندى: خيره أسلوبك مولي زي زمان بايخ😒
اريج: قولي وين رافعتيني 😡
ندى كانت جابدتها من ايدها وهي تمشي لين وصلواوللمكان وخشوا وكان مظلم
اريج: خير بلاك أنتي علاش جايبتني هني😖..ندى ندى يامصيبه وين مشيتي ندى 😢ندى يادراااااااه انفتح الضي وبدوا يطربقوا في هداكا اللي يطلع في ورق صغار يلمعوا إن شاء الله عرفتوه😁
وهي مصدومه ومش مصدقه وولعت المنشطه أغنيه تامر حسني متاع كل سنه وأنت طيب وهما يغنوا معاها واريج عيونها يدمعوا وفرحانه تشبح لسوسن اللي غمزتلها مشتلها اريج وحضنتها وجوها زميلاتها وصاحبتها يهنوا فيها ويغنوا
وهي تضحك وجتها ندى حضنتها
اريج: ياقمله انتي ورا هذا كله
ندى: قمله!!ماتخلينش نفركش الدنيا ..ضحكوا الزوز ع خشت ريما وسارة ورنا اللي سلموا عليها وهنوها ورحبت ببهم
وبدت الحفله والأجواء متاعها...
**
نجيب مع معز مقعمزين ع الشط
معز: باهي هي توا زعلانه منك
نجيب: تو نرضيها مدام امها لانت معاي
معز: نحس فيك فرحان
نجيب: فرحان وخايف مش حنطمن لين تولي عندي
معز ضحك وضربه ع كتفه: ربي يعطيك ماتتمنى
شبحله نجيب زين: وحتى أنت ياولد عمي ياسندي وعزوتي
استنفد كل المحاولات 😉
معز شبحله زين وفهم عليه وابتسم
نجيب: عارف قداش نوثق فيك ونعرف إنك راجل وماحد يصلح بأريج غيرك خليك معاها هي صح واعرة ولسانها طويل لكنها طيبه وحساسه وماتستغربش مني لو ماكنتش نعرفك راجل حقاني ماكنتش تكلمت معاك عليها بكل...
معز : وأني حنكون عند حسن ظنك وأريج بنت عمي وعرضي وشرفي مستحيل نضرها ولو حتى بنظرة
حط نجيب ايده ع كتف معز وابتسمله ع جية عبدو واصيل ونعيم ورحيم
نجيب: هذا شنو؟
فرش أصيل فرشه كبيره وحط عبدو الباكو اللي جايبه عليها فتحه وكانت طورطا
نجيب: ههههههههههه
معز: كل عام وأنت بخير
نعيم : اول مرة نعرف إن تاريخ ميلادك انت وأريج في نفس اليوم 15 \7
رحيم: جبت معاي 29شمعه
أصيل :29 شنو30
نجيب: شكرا ع المشاركه أستاذ اصيل😑
معز يضحك: قصدك تتعقد من حكايه العمر
أصيل: تي مش غير يتعقد كان يلقى يقعد ديما عمره 25سنه😂
نجيب: منور هلبه😒
كلهم:😂😂😂😂
***
فيصل وجمانه كانوا واقفين في مكان مستخطي جمانه تبي تفتك من الحاح فيصل وحست أن عنده شي يبي يقوله فعلا وجت تسمعه
جمانه: قول اللي عندك وخلصني
فيصل: كان نعرف شن درتلك بش تغيرتي معاي هكي هذا كله لأني نحبك
جمانه: خش في الموضوع
فيصل تنهد: عارفتيه موضوعي واحد ومافيش غيره نبيك تكون مرتي وشريكه حياتي
جمانه: وأني مليون مرة قلت لا
فيصل: اقنعيني علاش لا
جمانه تنهدت وبهدوء: لإني نشوف فيك زي خوتي مانشوفش فيك الزوج اللي نتمناه
فيصل: لازم نكون شيخ مثلا
جمانه: شن قصتك أنت شادلي هالكلمه وخلاص
فيصل: انتي أدري
جمانه: تكلم بوضوح ومن غير ألغاز
فيصل: تمام،،الشيخ الأشقر اللي عيونه زرق تعرفي واحد بهالمواصفات 😏
جمانه انصدمت وسكتت معاش عرفت شن تقول
فيصل : ودايرة روحك عاقله وملتزمه وانتي اديري في العلاقات وهدايا ومواعيد
جمانه زادت انصدمت وتأكدت ان فيصل شافها يوم عطت الأمانه لسليمان
فيصل: خيرك سكتي ولا متحشمه من عمايلك
جمانه بعصبيه: احترم نفسك ياوقح اني عمري ماغلطتت ولادرت اللي يحشمني
فيصل: باه برري اللي درتيه
جمانه: مش ملزمه نبررلك نهائي
فيصل: باهي وبوك وخوتك حتى هما مش ملزمه تبرريلهم
شبحتله بإشمئزاز وأسف: طلعت واحد واطي مع الأسف
فيصل: ماتتماديش اكثر ...
جمانه: ع اساس بتلوي ذراعي برا قول اللي بتقوله ودير اللي بديره ،وأشرت بسبابتها عليه ،انت لو يربطوك في رجلي نقصها ..ولفت وجت بتمشي
فيصل : وبوك مستعده تخسريه عادي
جمانه وقفت والتفتله : شن قصدك
فيصل: لو ماقبلتيش تكوني زوجتي حتجيبي لبوك مشاكل تخليك تخسريه وممكن للابد...
جمانه خافت هلبه قعدت واقفه في مكانها بدون حركه.....
يتبع .....
#GomanFared
